Ukusiza Labo Abangakayilungeli Incwadi Ethi Okufundiswa YiBhayibhili
1. Inga-kghani incwadi ethi Okufundiswa YiBhayibhili izobakara boke abantu ekukhambeleni kokuthoma? Hlathulula.
1 Bona umuntu abe mkhulekeli kaJehova, kufuze afunde lokho iBhayibheli ekufundisako. Nokho, abanye basekolweni engasingeyobuKrestu begodu abaqali iBhayibheli njengeliZwi lakaZimu. Abanye abakholelwa nakancani kuZimu begodu abalihloniphi iBhayibheli. Ngimaphi amathulusi abe lisizo kilabo ebebangakatjhigameli ekumukeleni incwadi ethi Okufundiswa YiBhayibhili ekukhambeleni kokuthoma? Iimphakamiso ezilandelako zisekelwe emaphuzwini wabarhuweleli abavela eenarheni ezi-20 ezihlukeneko.
2. Nengabe umuntu usitjela bona akakholelwa kuZimu, khuyini ekufuze silinge ukuyazi, begodu kubayini?
2 Abangakholelwa KuZimu: Nengabe umuntu uthi akakholelwa kuZimu, kuyazuzisa ukubuza bona kubayini. Inga-kghani kungombana ukholelwa ekuzitjhugulukeleni kwemvelo? Inga-kghani uphelelwe likholo kuZimu ngebanga lokungabi nabulungiswa ephasini namkha ubuzenzisi kwezekolo? Inga-kghani uvela enarheni ekhuthaza ukungakholelwa kuZimu? Mhlamunye akali ngokuqinileko bona uZimu ukhona, kodwana azange abone itlhogakalo yokukholelwa kuye. Abarhuweleli abanengi bafumene ukuthi ukubuza bona, “Bewusolo uzizwa njalo na?” kukhuthaza umuntu bona ahlathulule. Lalela begodu ungamngeni emlonyeni. Nesizwisisako bona kubayini umuntu angakholelwa kuZimu, sizokwazi bona kufuze simphendule njani nokobana ngiyiphi incwadi esizomnikela yona.—IzA. 18:13.
3. Singatjengisa njani bona siyamhlonipha umuntu neenkolelo zakhe?
3 Newuphendulako, tjheja bona ungenzi umuntu acabange bonyana uhlasela umbonwakhe. Isiphakamiso esilandelako sivela e-United States: “Kuqakatheke khulu ukuhlonipha ikululeko yomuntu yokuzikhethela bona ufuna ukukholelwani. Kunokufuna ukuhlula ipikiswano, kungcono ukubuza imibuzo eyenza abantu bacabange begodu bafikelele iimphetho.” Ngemva kokuzwa umninimuzi aveza umbonwakhe, ngokuvamileko omunye umbonisi okhambako wendlalela ipendulwakhe ngokuthi, “Khewacabanga bona nalokhu kungenzeka?”
4. Singawasiza njani amaBuddha?
4 Ifundiso yokobona kunoZimu ayaziwa kwabanengi amaBuddha. Abanye abarhuweleli eBritain bathanda ukusebenzisa incwajana ethi Lasting Peace and Happiness—How to Find Them nebafakaza ebantwini abanjalo. Ngemva kokudemba isethulo, bacoca ngengcenye ethi “Is There Really a Most High Creator?” bese kuba ngethi “A Guidebook for the Blessing of All Mankind.” Ngemva kwalokho, bangakghona ukukhambisa incwadi ethi Okufundiswa YiBhayibhili bese bathi kumninimuzi, “Ngitjho nanyana ungakholelwa kuZimu, ukutaditjha iBhayibheli kuyazuzisa ngombana ineenqophiso ezinengi ezilisizo.” Iphayona elikhonza esimini yesiTjhayina e-United States lathi: “Abanengi esiminethu bayakuthanda ukufunda. Ngalokho kujayelekile bona bayifunde yoke incwadi ngaphambi kobana sibuyele kibo. Kodwana kungenzeka bangawuzwisisi umbono wesifundo seBhayibheli. Ngalokho ngithanda ukukhambisa incwajana ethi Iindaba Ezimnandi ekukhambeleni kokuthoma ngombana itlolwe ngendlela ekhuthaza ingcoco.” Umbonisi wesifunda okhonza esifundeni sesiTjhayina e-United States ubika bona kungakghoneka ukukhambisa incwadi ethi Okufundiswa YiBhayibhili ekukhambeleni kokuthoma. Nokho, kungaba ngcono ukuthoma isifundo esahlukweni 2, esinikela isethulo seBhayibheli, kunokuthoma esahlukweni 1, esikhuluma ngoZimu.
5. Kubayini kuqakathekile ukubekezela?
5 Kuthatha isikhathi bona umuntu abe nekholo kuZimu, ngalokho ukubekezela kuqakathekile. Iingcoco zethu zokuthoma kungenzeka zingenzi umuntu avume bona kunoMbumbi. Kodwana ngokukhamba kwesikhathi kungenzeka avume bona lokho kungakghonakala, namkha angathi uyazwisisa bona kubayini omunye umuntu angafikelela esiphethweneso.
6. Kubayini abanye abantu kungenzeka bangabi nekareko eBhayibhelini?
6 Abanganakareko Namkha Abangalithembi IBhayibheli: Nokho, ngokujayelekileko, umuntu ovumako bona kungenzeka uZimu ukhona akanakareko kilokho okufundiswa yiBhayibheli ngombana akakholelwa bona ililiZwi lakaZimu. Mhlamunye uhlala enarheni engasingeyobuKrestu begodu uhlobanisa iBhayibheli neSingabukrestu. Namkha uhlala enarheni ekuthiwa ngeyobuKrestu kodwana enganandaba khulu neendaba zobuKrestu, begodu kungenzeka acabange bona iBhayibheli angeze imsize ngalitho. Singabasiza njani abanjalo bona babe nekareko eBhayibhelini begodu ekugcineni bamukele isifundo sencwadi ethi Okufundiswa YiBhayibhili?
7. Ngokujayelekileko ngiyiphi indlela engcono yokwenza abantu babe nekareko eBhayibhelini?
7 I-ofisi legatja leGreece latlola: “Indlela engcono khulu yokusiza abantu abanganakareko eBhayibhelini kubavulela yona ubatjengise bona ithini. Abarhuweleli abanengi balemuke bona umlayezo weBhayibheli unomthelela onamandla ukudlula nanyana yini abangayitjho bona ngokwabo. (Heb. 4:12) Ukubona ibizo lakaZimu kusize abanengi baba nesifiso sokuhlolisisa iBhayibheli.” I-ofisi legatja le-India latlola: “Iqiniso ngokuphila nokufa libakara khulu labo abamaHindu—kunjalo nangesithembiso seBhayibheli sephasi elinganakho ukubandlululana ngokweengaba.” Ukuqalisela eemrarweni yendawo kujayele ukunikela abarhuweleli ithuba lokutjengisa lokho iBhayibheli ekutjhoko malungana nokobana umBuso kaZimu uzozilungisa njani izinto.
8. Singathini kilabo abonombono ongasimuhle ngeBhayibheli ngebanga leSingabukrestu?
8 Nengabe umuntu unombono ongasimuhle ngeBhayibheli ngebanga leSingabukrestu, mazise bona iSingabukrestu lenze iBhayibheli neemfundiso zalo laqaleka kumbi. I-ofisi legatja le-India latlola: “Ngezinye iinkhathi, kutlhogeka sisize abantu babone ukuthi amasondo awasibalawuli beBhayibheli.” Labika bona amaHindu, kanengi akarwa yingcenye 4 yencwajana ethi Iyini Injongo Yokuphila? Ungayithola Kanjani?, ehlathulula indlela amasondo alinge ngayo ukusilaphaza nokutjhabalalisa iliZwi lakaZimu. Iphayona leBrazil nelikhuluma nabantu abanjalo lithi: “Kubayini ungafumani okungeziweko ngalokho okumumethwe yiBhayibheli? Abantu abanengi benza lokho ngomqondo ovulekileko, bangakazibophi kunanyana ngiyiphi ikolo. Kungakurara ozokufunda.”
9. Kubayini kungakafaneli siphelelwe mamandla umuntu nekathoma ngokungabi nekareko kilokho okufundiswa yiBhayibheli?
9 UJehova ubona ihliziyo yomuntu ngamunye. (1 Sam. 16:7; IzA. 21:2) Labo abanobujamo obuhle behliziyo ubadosela ekukhulekeleni kweqiniso. (Jwa. 6:44) Abanengi abanjalo azange khe bafundiswe ngoZimu namkha kuncani abakwaziko ngeBhayibheli. Ikonzwethu ibanikela ithuba ‘lokusindiswa begodu bafikelele elwazini leqiniso.’ (1 Thim. 2:4) Ngalokho, nengabe umuntu ekuthomeni akanakareko kilokho okufundiswa yiBhayibheli, ungapheli amandla! Sebenzisa elinye lamathulusi afumaneka ngelimi lakho ukubenza babe nekareko. Ekugcineni ungakghona ukutjhentjha ingcocwenu bona idzimelele ecwadinethu eyihloko yokuraga iimfundo zeBhayibheli, ethi Khuyini Kwamambala Okufundiswa YiBhayibhili?
[Ibhoksi elisekhasini 4]
Nengabe umninimuzi uthi akakholelwa kuZimu, linga lokhu:
• Ukufumana bona kubayini, mbuze, “Inga-kghani bewusolo uzizwa njalo?”
• Nengabe umBuddha, sebenzisa incwajana ethi Lasting Peace and Happiness—How to Find Them, amakhasi 9-12.
• Nengabe ukholelwa ekuziphendukeleni kwemvelo, iinkhombo ezilandelako zingaba lisizo:
Umlandelande weenhloko ze-Phaphama! ezithi, “Ingabe Kwaklanywa?”
Ividiyo ethi, The Wonders of Creation Reveal God’s Glory
Iincwajana ezilandelako, A Satisfying Life—How to Attain It, ingcenye 4; Ukuphila Kwabunjwa Na Nofana Kwazivelela? nethi The Origin of Life—Five Questions Worth Asking
• Nengabe uphelelwe likholo kuZimu ngebanga lokungabi nabulungiswa nokutlhaga, iinkhombo ezilandelako zingaba lisizo:
Incwadi ethi Is There a Creator Who Cares About You?, isahluko 10
Iincwajana ezilandelako, Ingabe UNkulunkulu Uyasikhathalela Ngempela?, ingcenye 6, nethi Iyini Injongo Yokuphila? ingcenye 6
• Tjhentjhela encwadini ethi Okufundiswa YiBhayibhili msinyana umninimuzi nasele athoma ukuwamukela umbono wokobana kungenzeka uZimu ukhona. Kungaba kuhle ukuthoma ngesahluko 2 namkha esinye isihloko esifanelana naye.
[Ibhoksi elisekhasini 5]
* Iincwajanezi ziyafumaneka ku-Watchtower Library nge-CD-ROM.
[Ibhoksi elisekhasini 5]
Nengabe umninimuzi akakholelwa eBhayibhelini linga lokhu:
• Cabangela izahluko 17 no-18 zencwadi ethi Life—How Did It Get Here? By Evolution or by Creation?
• KumaHindu sebenzisa incwajana ethi, Why Should We Worship God in Love and Truth?
• KumaJuda sebenzisa incwajana ethi, Will There Ever Be a World Without War?,* amakhasi 3-11.
• Coca ngeenzuzo zeenkambisolawulo zeBhayibheli ezilandelako. Nanzi iincwadi ongazisebenzisa ukutjengisa umuntu bona iBhayibheli ilisizo:
Umlandelande weenhloko ze-Phaphama! ezithi, “Usizo Lomkhaya”
Ividiyo ethi, The Bible—Its Power in Your Life
Iincwajana ezilandelako Iindaba Ezimnandi Ezivela KuZimu!, iimfundo 9 no-11; Incwadi Yabo Bonke Abantu,* amakhasi 22-26; nethi A Satisfying Life—How to Attain It, ingcenye 2
KumaBuddha sebenzisa incwajana ethi, The Pathway to Peace and Happiness, amakhasi 3-7.
KumaMuslim sebenzisa incwajana ethi, Real Faith—Your Key to a Happy Life, ingcenye 3.
Nengabe utjhumayela endaweni lapho iBhayibheli libandlululwa khona, kungaba ngcono ungawutjho umthombo wamezwi ahlakaniphileko owatjhoko bekube kulapho sewubavakatjhele amahlandla ambalwa.
• Hlathulula indlela iimphorofido zeBhayibheli ezizaliseke ngayo. Ungasebenzisa okulandelako:
Ividiyo ethi, The Bible—Accurate History, Reliable Prophecy
Incwajana ethi, Incwadi Yabo Bonke Abantu,* amakhasi 27-29
• Tjhentjhela encwadini ethi Okufundiswa YiBhayibhili msinyana ngemva kobana umuntu athoma ukubuza bona iBhayibheli ifundisani ngeenhloko ezihlukahlukeneko.
[Ibhoksi elisekhasini 6]
Nengabe umninimuzi uthi: “Angikholelwa kuZimu,” ungathi:
• “Ngibawa ukukutjela ngokurhunyeziweko bona yini eyangikholisa bona ngikholelwe kuMbumbi?” Hlanganyela naye amaphuzu asencwadini ethi Ukubonisana, amakhasi 87-91, namkha wenze amalungiselelo wokumlethela incwadi othabele ukuyifunda.
• “Kodwana ngathana uZimu bekakhona, bewungathanda bona abe nobuntu obunjani?” Abaninimuzi abanengi bathi bebangadoseleka kuZimu onethando, ubulungiswa, umusa begodu ongakhethi. Mtjengise eBhayibhelini bona uZimu uneemfanelo ezinjalo. (Kungakghoneka ngitjho nokusebenzisa isahluko 1 sencwadi ethi Okufundiswa YiBhayibhili, ukuthoma kusigaba 6.)
Nengabe uminimuzi uthi: “Angikholelwa eBhayibhelini,” ungathi:
• “Banengi abazizwa ngendlela leyo. Abanye bacabanga bona iBhayibheli alivumelani nesayensi namkha imithethokambiso yalo ayisebenzi. Khewungitjele, wakhe walifunda iBhayibheli ngaphambili? [Lindela ipendulo. Ngemva kwalokho mtjengise isingeniso esisekhasini 3 encwajaneni ethi, Incwadi Yabo Bonke Abantu, begodu umnikele yona nengabe ibandla lenu linayo esitokweni, namkha uyiphrinte ku-Watchtower Library.] Abanengi banyaza iBhayibheli ngombana ikolo yenze iimfundiso zalo zabonakala zizimbi. Ngokulandelako, ngingathanda ukucoca nawe ngesibonelo esisekhasini 4 no-5.”
• “Abantu abanengi banombono onjengowakho. Ngingakutjengisa okuthileko okungikarako ngeBhayibheli? [Funda uJobho 26:7; no-Isaya 40:22 otjengisa bona iBhayibheli inembile ngokwesayensi.] Godu iBhayibheli ineenluleko ezihlakaniphileko ezingasiza imindeni. Ngokulandelako, ngingathanda ukukutjengisa isibonelo salokho.”
• “Ngiyathokoza ngokungitjela lokho. Ngathana uZimu wabatlolela incwadi abantu, ucabanga bona beyizokukhuluma ngani?” Ngemva kwalokho mtjengise okuthileko eBhayibhelini okuvumelana nalokho akutjhwileko.