Okuhlangabezanwe Nakho
◼ E-Australia: UJohn, indoda efundileko, bekaya esondweni asesemncani kodwana wathoma “ukukholelwa ngokuqinileko bona uZimu akekho.” Iphayona lamtjhiyela incwajana ethi, Ukuphila Kwabunjwa Na Nofana Kwazivelela? ngemva kwalokho ekukhambeleni okulandelako lamtjhiyela incwajana ethi, Origin of Life. Iphayoneli laragela phambili lihlawulela ikareko yakhe ngokumlethela abomagazini bamva begodu abakhuluma ngananyana ngiziphi iinhloko zendalo nofana iimphorofidi zeBhayibheli. Nelibona bonyana uJohn sekakulungele, lamkhambisela incwadi ethi IBhayibheli—IZwi LikaNkulunkulu Noma Elomuntu? Ngemva kokuyifunda, uJohn wathoma ukuzihlathulula njengomuntu “ongaqiniseki bona uZimu ukhona nofana akekho.” Ngemva kwalokho iphayona lethula incwadi ethi Okufundiswa YiBhayibhili, latjengisa uJohn isigaba 8 ekhasini 20 neengaba 13-16 emakhasini 23-24. Imitlolo ekhonjiweko esencwadini le yamkara khulu uJohn bewathi, “Mhlamunye kufuze ngilifunde godu iBhayibheli.”
◼ EMexico: Indoda ethileko yatjela umrhuweleli bona ayikholelwa bonyana iBhayibheli iphefumulelwe nguZimu. Umrhuweleli lo wabawa ukuyitjengisa ubufakazi bokobana iBhayibheli iphefumulelwe. Ngemva kweengcoco ezithileko, ihliziyo yendoda le yathoma ukuthintwa ngilokho egade ikufunda eBhayibhelini. Yathinteka khulu neyifunda ngemithethokambiso kaZimu. Yathi kumrhuweleli: “Ekuthomeni nesifunda iBhayibheli ndawonye, isiluleko salo besizwakala njengesivela kinanyana ngiyiphi enye incwadi begodu besingangithinti. Kodwana kwanje nesiyifundako, khulukhulu nasifunda ngokuziphatha, isazelo sami siyathinteka.”
◼ E-United States: Njengombana isibili esitjhadileko sihlanganyela ekufakazeni okukhethekileko emadorobheni amakhulu, sahlangana nomma ovela eTaiwan obekakholelwa kuZimu kodwana akholelwa bona iBhayibheli ngeyamakhuwa. Weza kiso azokubona iincwadi ezikhangisiweko ngombana wazizwa anganamnqopho ngitjho nanyana bekaphila ipilo emabothobotho. Bekanethamba lokobana iBhayibheli izomsiza aphile ukuphila okunomnqopho. Isibilesi sathoma isifundo naye sisebenzisa incwadi ethi, Okufundiswa YiBhayibhili kuhlanganise nencwajana ethi Lasting Peace and Happiness—How to Find Them. Kunokobana bafunde isahluko 2 encwadini, bacoca ngengcenye esencwajaneni enesihloko esithi “A Guidebook for the Blessing of All Mankind.” Ngemva kokufunda iingaba zokuthoma ezisithandathu engcenyeni leyo, umma lo wathi kuyarara bona iBhayibheli ihluke kangaka neyimadaniswa nezinye iincwadi zekolo. Ngemva kokufunda iimphorofidi zeBhayibheli ezizalisekileko, wathi, “Ayikho enye incwadi engicabanga bona inembe njengeBhayibheli!”
◼ EJapan: Nanyana umninimuzi atjela umrhuweleli bona akakholelwa kuZimu, umrhuweleli waragela phambili akhuluma naye ngobufitjhani, acoca naye ngeenhloko eziku-Phaphama! ezinesihloko esithi “Ingabe Kwaklanywa?” Kancanikancani, indoda le yatjhentjha umbonwayo bese yathoma ukuvuma bona kungenzeka uMbumbi ukhona. Kwanje iyakholelwa bona uZimu khona, begodu umrhuweleli ufunda naye incwajana ethi Iindaba Ezimnandi Ezivela KuZimu!
◼ ECanada: Umma othileko obeka phuma ngendlini atjhinga ekoloyini, udade wakhambisela abomagazini bamva. Kwamva udade lo nekabuyelako, umma lo ngokuqinileko wamtjela bona akanakareko begodu akakholelwa kuZimu. Udade waqunta ukungampheleli ihliziyo kodwana wamlethela incwajana ethi, A Satisfying Life—How to Attain It. Udade nekafumana umma lo asekhaya, wamtjela bona nanyana bekazi bonyana akakholelwa kuZimu, gade acabanga ngaye ngombana udade lo bekazi bona umbelethi oyedwana. Watjengisa umma lo isigaba 6 ekhasini 4 lencwajana, esikhuluma ngokuthi ungasifumana kuphi isiluleko esihle. Ngemva kwalokho wamkhuthaza bona afunde iimphakamiso ezikusifundo 2 ezimalungana nokukhulisa abantwana. Umma lo wathaba khulu wayithatha incwajana.