Muzisonyeza Chikondi

Vuto Limene Limakhalapo

Maganizo atsankho amakhala ovuta kuwachotsa, ngati mmene zimakhaliranso ndi kachirombo koyambitsa matenda ka vairasi. Pamafunika nthawi komanso khama kuti tichotse tsankho mumtima mwathu. Ndiye kodi mungatani kuti mukwanitse kuchita zimenezi?

Mfundo ya M’Baibulo

Zithunzi: 1. Bambo wa ku Asia wagwira chitseko kuti munthu wakuda yemwe wanyamula makapu a khofi adutse. 2. Munthu wakuda uja akupereka khofi uja kwa anthu omwe amagwira nawo ntchito kuphatikizapo mayi wa ku India uja.

“Valani chikondi, pakuti chimagwirizanitsa anthu mwamphamvu kwambiri kuposa chinthu china chilichonse.”—AKOLOSE 3:14.

Kodi lembali likutiphunzitsa chiyani? Kuchita zinthu zokomera mtima anthu ena kumathandiza kuti anthu azigwirizana. Ndiye mukamasonyeza kwambiri chikondi kwa ena, maganizo atsankho amakuchokerani. Mukaphunzira kukonda ena kwambiri zidzakuthandizani kuti musamawaganizire zolakwika.

Zimene Mungachite

Zithunzi: 1. Mayi wa ku India akuthandiza mayi wachikulire wamtundu wa Caucasia kukwera masitepe ndipo wamunyamulira zinthu zimene amakagula. 2. Mayi wachikulire wamtundu wa Caucasia uja akugawira mabisiketi neba wake yemwe ndi bambo wa ku Asia uja.

Ganizirani zimene mungachite kuti musonyeze chikondi anthu amtundu umene mwakhala mukuuona molakwika. Sikuti mufunika kuwachitira chinachake chachikulu. Mungayese kuchita chimodzi kapena zingapo mwa izi:

Chilichonse chimene mungachite posonyeza ena chikondi, chidzakuthandizani kuchepetsa mtima watsankho

Mungawasonyeze kuti ndinu munthu wakhalidwe labwino powatsegulira chitseko kapena powauza kuti akhale pampando umene mwakhala m’basi ngati iwo aimirira.
Yesani kukamba nawo tinkhani apa ndi apo ngakhale atakhala kuti sadziwa bwinobwino chilankhulo chanu.
Muzikhala oleza mtima akachita zinthu mwa njira imene simukuimvetsa.
Muziwamvera chisoni akamafotokoza mavuto awo.

Zimene Zinachitikadi: Nazaré (Guinea-Bissau)

“Nthawi inayake ndinali ndi maganizo atsankho kwa anthu obwera kuchokera mayiko ena. Ndinauzidwa kuti anthu obwera ambiri amanama ku boma n’cholinga choti azipatsidwa thandizo komanso kuti ambiri amakhala zigawenga. Ndiye zinkandivuta kuti ndiziwaona kuti ndi anthu abwinobwino. Komabe sindinkaganiza kuti limeneli ndi tsankho chifukwa ndi mmene anthu ambiri ankaonera anthu obwera.

“Koma kenako ndinazindikira kuti ndinali ndi maganizo atsankho kwa anthu obwera. Nzeru za m’Baibulo zandithandiza kuti ndiziwasonyeza chikondi anthuwa. Panopa sindiwapewa, koma ndimawapatsa moni komanso kucheza nawo. Ndimayesetsa kuti munthu aliyense payekha ndimudziwe bwino. Panopa anthu obwera sindiwaganizira zolakwika komanso sindikhala omangika ndikakhala nawo pafupi.”