Kuwonjezera Luso Lathu mu Utumiki—Muzithandiza Mnzanu Amene Mwayenda Naye

N’chifukwa Chiyani Kuchita Zimenezi N’kofunika? Yesu ankadziwa kufunika koti tikamalalikira tizikhala ndi munthu wina. Choncho pamene anatumiza ophunzira ake 70 kuti akalalikire, anawatumiza awiriawiri. (Luka 10:1) Munthu amene tayenda naye mu utumiki angatithandize ngati takumana ndi vuto linalake kapena ngati sitikudziwa zoyenera kuyankha kwa munthu amene tikukambirana naye. (Mlal. 4:9, 10) Angatiuzenso zinthu zothandiza zimene zinamuchitikira mu utumiki. Komanso angatipatse malangizo amene angatithandize kuti tizilalikira mogwira mtima. (Miy. 27:17) Tingathenso kumakambirana naye mfundo zolimbikitsa tikamachoka panyumba ina kupita nyumba ina.—Afil. 4:8.

Kodi Tingachite Bwanji Zimenezi?

Mnzanuyo akamalalikira munthu wina, muzikhala tcheru. (Yak. 1:19) Akamawerenga lemba, inunso muzitsatira m’Baibulo lanu. Zimenezi zingathandize kuti muthe kumuthandiza ngati pakufunika kutero.
Muzikhala wosamala kuti muzitha kudziwa ngati pakufunika kuti mulankhulepo, komanso nthawi yabwino yochita zimenezi. (Miy. 25:11) Ngati mwapita ndi munthu wina ku phunziro lake, mungamalankhulepo mwa apa ndi apo ndipo mnzanuyo angayamikire zimenezi. Koma mukakhala kuti mukulalikira kunyumba ndi nyumba, mwina mnzanuyo angakonde kuti musalankhule chilichonse pakhomo lomwe akulalikira ndi iyeyo. Komabe ngati ndi watsopano kapena ngati sakudziwa zoyenera kuyankha munthu amene akutsutsa, zingakhale bwino kumuthandiza. Koma kaya mukulalikira kunyumba ndi nyumba, mwapita ku ulendo wobwereza kapena mwapita naye ku phunziro lake, musamudule mawu, kumulanda n’kuyamba kulankhula ndi munthuyo kapena kuyambitsa nkhani ina.
Mungafotokozere mnzanuyo zinthu zothandiza zimene munakumana nazo. Ngati mukuona kuti pakufunika kum’patsa malangizo omwe angamuthandize kuti azilalikira mogwira mtima, musalephere kuchita zimenezo. (Miy. 3:27) Mungasankhe nthawi yabwino ndipo mwina mungayambe ndi mawu akuti: “Kodi mukuganiza kuti chinachititsa zimene zija n’chiyani?” kapena “Kodi ndingakuuzeni njira ina yomwe mwina ingakuthandizeni?” Kapenanso mungayambe n’kunena kuti: “Munthu akafunsa funso limene lija, ine ndimayankha kuti . . . ” Musaiwale kuti anthu ambiri amasangalala kupatsidwa malangizo mwa apo ndi apo, koma sasangalala kuti munthu aziwapatsa malangizo pa chilichonse chomwe alakwitsa.

Tayesani Kuchita Izi Mwezi Uno:

Mukaweruka mu utumiki, uzani munthu amene mwayenda naye zimene analankhula kapena zomwe anachita zimene zakulimbikitsani.