Kuwonjezera Luso Lathu mu Utumiki—Muzisiya Funso Loti Mudzakambirane pa Ulendo Wotsatira

N’chifukwa Chiyani Kuchita Zimenezi N’Kofunika? Tikapeza munthu wachidwi, tiyenera kupitakonso n’cholinga choti tikathirire mbewu za choonadi zimene tinadzala pa ulendo woyamba. (1 Akor. 3:6) Kuti zimenezi zitheke, timafunika kusiya funso loti tidzakambirane pa ulendo wotsatira komanso kugwirizana tsiku ndi nthawi. Zimenezi zingachititse kuti munthuyo adzakhalenso ndi chidwi pa ulendo wotsatira. Komanso ngati yankho la funso lomwe tamusiyiralo lili m’magazini kapena m’kapepala komwe tamupatsa, zingapangitse kuti awerenge magazini kapena kapepalako. Kusiya funso loti mudzayankhe pa ulendo wotsatira, kumathandizanso kuti inuyo musadzasowe poyambira komanso kuti munthuyo azidziwiratu nkhani yomwe mudzakambirane. Tikam’peza, tingamuuze kuti tabwera kudzayankha funso lomwe tinasiya lija, ndipo kenako tingapitirize.

Kodi Tingachite Bwanji Zimenezi?

Mukamakonzekera ulaliki wa kunyumba ndi nyumba, muzikonzekeranso funso lodzayankha pa ulendo wotsatira. Funsolo likhoza kukhala lochokera m’magazini kapena kapepala kamene munawasiyira kapenanso lochokera m’mabuku amene timagwiritsa ntchito pophunzitsa anthu.
Musanachoke panyumba ya munthu amene wasonyeza chidwi, muuzeni kuti mudzabweranso ndipo kenako tchulani funso lomwe munakonzekera lija n’kumuuza kuti mudzalikambirana pa ulendo wotsatira. M’madera ena, anthu amakhala otanganidwa kwambiri ndipo zimawavuta kulonjeza kuti tidzawapeza tikawauza kuti tidzabweranso. Mukapeza anthu oterewa, mwina mungawafunse kuti: “Kodi nditadzabweranso nthawi ngati yomwe ino mlungu wamawa ndingadzakupezeni?” Akavomera, munganene kuti: “Ndidzabwera, kuti tidzakambirane mwachidule funso ili. [Tchulani funsolo.] Koma ndikadzakupezani muli wotanganidwa, palibe vuto, ndiye kuti tidzakambirana ulendo wina.”
Mukalonjezana ndi munthu kuti mudzapitako pa nthawi inayake, sungani pangano. (Mat. 5:37) Musanachoke, funsani funso lina loti mudzakambirane pa ulendo wotsatira.

Tayesani Kuchita Izi Mwezi Uno:

Mukamakonzekera ulaliki, konzekeraninso funso loti mukafunse munthuyo n’cholinga choti mudzalikambirane pa ulendo wotsatira. Uzani munthu amene mwayenda naye funso lomwe mwakonzekeralo.