Kuwonjezera Luso Lathu mu Utumiki—Kugawira Buku Lakuti Baibulo Limaphunzitsa Chiyani

N’chifukwa Chiyani Kuchita Zimenezi N’kofunika? Buku lakuti Baibulo Limaphunzitsa Chiyani ndi limene timaligwiritsa ntchito kwambiri pophunzitsa anthu Baibulo. Koma tisanayambe kuphunzira ndi munthu timafunika kumugawira bukuli. Choncho tiyenera kuyesetsa kugawira bukuli mwaluso. (Miy. 22:29) Pali njira zambiri zimene tingagwiritse ntchito pogawira bukuli koma aliyense angagwiritse ntchito njira imene akuona kuti imamuthandiza.

Kodi tingachite bwanji zimenezi?

Funsani funso limene lingakuthandizeni kukambirana ndi munthu mutu wina wa m’bukuli. Mungasankhe funso limodzi la kumayambiriro kwa mutu. Akayankha, mungawerenge lemba limene likuyankha funsolo n’kumusonyeza ndime yake ndipo mwina mungakambirane ndimeyo mwachidule.
Mungagwiritse ntchito masamba oyambirira a bukuli. Mwachitsanzo, mungafotokoze vuto limene lalembedwa m’nyuzi ndipo kenako n’kunena kuti anthu ambiri amadzifunsa mafunso amene ali patsamba 3. Kapena munganene kuti mukukambirana ndi anthu mmene zinthu zidzakhalire mtsogolo. Muonetseni zithunzi patsamba 4 ndi 5 ndipo mufunseni kuti, “Kodi mungakonde mutaona lonjezo liti litakwaniritsidwa?” Munganene kuti mukucheza ndi anthu mwachidule kuwathandiza kupeza mayankho a mafunso ofunika kwambiri. Kenako musonyezeni mafunso omwe ali patsamba 6, ndipo mufunseni limene angakonde kudziwa yankho lake.
Mupempheni kuti muziphunzira naye Baibulo. Munganene kuti: “Bukuli ndi limene timagwiritsa ntchito pophunzira Baibulo ndi anzathu. Kodi munalionapo? [Yembekezerani ayankhe.] Ndikufuna ndikusonyezeni mmene timaphunzirira koma tigwiritsa ntchito Baibulo lanu kwa 5 minitsi.”

Tayesani Kuchita Izi Mwezi Uno:

Pa Kulambira kwa Pabanja muziyesera njira zimene takambiranazi.
Mukakhala mu utumiki muziuza anzanu njira imene mukufuna kugwiritsa ntchito. (Miy. 27:17) Muzisintha ngati njirayo sikuthandiza.