Kuwonjezera Luso Lathu mu Utumiki—Tizisonyeza Anthu Mmene Timaphunzirira Baibulo Pogwiritsa Ntchito Buku la Baibulo Limaphunzitsa Chiyani

N’chifukwa Chiyani Kuchita Zimenezi N’kofunika? Tikauza anthu kuti timaphunzira Baibulo ndi anthu kwaulere, ambiri sadziwa kuti phunziroli limachitika bwanji. Ena amaganiza kuti ndiye kuti alowa kagulu kenakake kophunzira Baibulo kapena tiwapatsa zinazake zoti aziphunzira kunyumba, n’kumawayendera kuti tiziona mmene akuchitira. Choncho m’malo mongowauza kuti tingathe kumaphunzira nawo, ndi bwino kuwasonyeza mmene timachitira phunziro la Baibulolo. Tingathe kuchita zimenezi kwa mphindi zochepa, ngakhale tili chiimire. Zimenezi zingathandize munthu kuona kuti phunziro la Baibulo ndi lothandiza komanso losavuta.

Kodi Tingachite Bwanji Zimenezi?

Mukafika pakhomo la munthu n’kumuuza dzina lanu komanso zimene mwabwerera, mufunseni ngati amadera nkhawa za m’tsogolo.
Akanena kuti amadera nkhawa zimenezi, muuzeni zoti palinso anthu ambiri omwe amadera nkhawa za m’tsogolo. Mukatero, musonyezeni mitu yomwe ili m’buku la Baibulo Limaphunzitsa Chiyani. Kenako mufotokozereni kuti m’bukuli muli mitu yomwe ingatithandize kudziwa zimene Baibulo limaphunzitsa zokhudza zomwe zidzachitike m’tsogolo komanso nkhani zina. Mupempheni kuti asankhe mutu umene akufuna kuti mukambirane.
M’patseni buku lake ndipo m’pempheni kuti atsegule tsamba lomwe pali mutu womwe wasankha. Kenako fotokozani kuti mafunso amene ali kumayambirirowo ayankhidwa m’mutuwo.
Pemphani munthuyo kuti ngati angakonde awerenge ndime yoyamba. Funsani funso la ndimeyo kenako kambiranani yankho lake. Werengani malemba omwe ali ndi mfundo zogwirizana ndi yankho la funsolo. Muthandizeni kudziwa zimene angachite pokonzekera phunzirolo pomuonetsa buku lanu lomwe munadula mzere pansi pa mayankho.
Werenganinso ndime yotsatira ndipo ulendo uno m’pempheni kuti ayese kuyankha funso la ndimeyo m’mawu akeake.
Muyamikireni ndipo konzani zoti mudzabwerenso n’cholinga choti mudzapitirize kuphunzira.
Mungathenso kumuonetsa vidiyo ya pa webusaiti yathu ya jw.org/ny yakuti, Kodi Phunziro la Baibulo Limachitika Bwanji?

Tayesani Kuchita Izi Mwezi Uno:

Pempherani kwa Yehova kuti akuthandizeni kuyambitsa phunziro la Baibulo.—Afil. 2:13.
Nthawi zonse mukamalalikira, yesetsani kusonyeza munthu mmene timaphunzirira Baibulo pogwiritsa ntchito buku la Baibulo Limaphunzitsa Chiyani. Mungathenso kumuonetsa vidiyo yakuti, Kodi Phunziro la Baibulo Limachitika Bwanji?