Kuwonjezera Luso Lathu mu Utumiki—Muziphunzitsa Anthu Amene Mumaphunzira Nawo Baibulo Kuti Azikonda Kuphunzira Paokha

N’chifukwa Chiyani Kuchita Zimenezi N’kofunika? Kuti anthu amene timaphunzira nawo Baibulo azikonda kwambiri Yehova, ayenera kuphunzira paokha zinthu zozama zopezeka m’Mawu a Mulungu, osati mfundo zoyambirira zokha basi. (Aheb. 5:12-14; 6:1) Koma pamafunika khama kuti munthu aziphunzira payekha. Kuti munthu amvetse zimene akuphunzira, amayenera kugwirizanitsa zimene akuphunzirazo ndi zimene akudziwa kale n’kuona mmene angazigwiritsire ntchito pa moyo wake. (Miy. 2:1-6) Wophunzira wathu akadziwa kufufuza zinthu m’mabuku athu, akhoza kumayankha mosavuta mafunso amene anthu angamufunse mu utumiki. Akamachita khama kuphunzira komanso kutsatira zimene akuphunzirazo, zingamuthandize kuti akakumana ndi mayesero asamagonje.—Luka 6:47, 48.

Kodi Tingachite Bwanji Zimenezi?

Mulimbikitseni kuti asanayambe kuphunzira payekha, azipemphera kuti Yehova amupatse mzimu wake.—Yoh. 14:26; 1 Akor. 2:10.
Mukangoyamba kuphunzira ndi munthu, mulimbikitseni kuti azikonzekera zimene mudzaphunzire ulendo wotsatira. Musonyezeni buku lanu lokonzekera, komanso m’phunzitseni mmene angatsekere mzere kunsi kwa mayankho kapena mfundo zofunika.
M’phunzitseni kuti aziyankha m’mawu akeake. M’malo momangofunsa mafunso muzikambirana naye. Zimenezi zingamuthandize kuti asamangowerenga mayankho omwe ali m’bukulo.
Mulimbikitseni kuti aziwerenga Mawu a Mulungu tsiku lililonse. Musonyezeni ndandanda imene ingamuthandize kuti aziwerenga Baibulo tsiku lililonse, yomwe ili mu Nsanja ya Olonda ya August 1, 2009, tsamba 15 mpaka 18. Pamafunika khama kuti munthu aziwerenga Baibulo tsiku lililonse, koma kuchita zimenezi kumathandiza kwambiri.—Sal. 1:2, 3.
Thandizani wophunzira Baibulo wanu mmene angapezere mayankho a mafunso a m’Baibulo pogwiritsa ntchito Watchtower Library, Buku la Mboni za Yehova Lofufuzira Nkhani kapena buku la Kukambitsirana. Muthandizeninso kudziwa mayina achidule a mabuku amene timagwiritsa ntchito kawirikawiri pamisonkhano yathu.

Tayesani Kuchita Izi Mwezi Uno:

Mukamaliza kuphunzira kamutu kapena mutu wonse, muzipempha wophunzira wanu kuti afotokoze mwachidule zimene waphunzira. Ngati simukuphunzira Baibulo ndi aliyense, yesererani kufotokoza mwachidule mfundo zimene mwawerenga m’mavesi angapo a m’Baibulo kapena mu ndime ya mu Nsanja ya Olonda. Zimenezi zingakuthandizeni kuti nanunso muzitha kufotokoza mfundo m’mawu anuanu.