Hoseʼaa
13 “Yommuu Efreem dubbatu namoonni ni hollatu turan;
Inni Israaʼel keessatti beekamaa ture.+
Haa taʼu malee, Baʼaalii wajjin haala wal qabateen yakkamaa ni taʼe,+ achiis ni duʼe.
2 Ammas isaan cubbuu isaanii irratti dabaluudhaan
Meetii isaanii irraa siidaawwan sibiilaa* tolfataniiru;+
Waaqolii tolfamoo ogummaadhaan ni tolfatu, hundi isaanii iyyuu hojii ogeeyyii harkaa ti.
Achiis, ‘Namoonni aarsaa dhiheessan jabbilee haa dhungatan’+ isaaniin jedhu.
3 Kanaafuu, isaan akkuma duumessa ganamaa,
Akkuma fixeensa dafee baduu,
Akkuma habaqii bubbeen oobdii irraa fuudhee sokkuu,
Akkuma aara qaawwa baaxii keessaa baʼuus ni taʼu.
4 Haa taʼu malee, ani biyya Gibxii irraa kaasee Waaqa kee Yihowaa dha;+
Ati ana malee Waaqa kan biraa hin beektu turte,
Ana malee fayyisaan hin jiru.+
5 Ani lafa onaa, biyya gogaa taʼe keessattan xiyyeeffannaa siif kenne.+
6 Isaan bakka dheedichaa isaanii irratti ni quufan;+
Waan quufaniifis garaan isaanii of tuule.
Kanaan kan kaʼes isaan na irraanfatan.+
7 Ani akka leenca saafelaa,+
Akka qeerransa daandii biratti riphee eeggatuu isaanitti nan taʼa.
8 Ani akkuma amaaketa ilmoolee ishii dhabdeetti isaanitti nan dhufa,
Laphee isaaniis* nan tarsaasa.
Achitti akka leencaatti isaan nan nyaadha;
Bineensi bosonaas isaan ni ciccira.
9 Yaa Israaʼel, inni si balleessa;
Sababiin isaas, ati ana irratti, eeyyee, gargaaraa kee irratti kaateetta.
10 Ati, ‘Mootii fi bulchitoota naa kenni’ jettee turte,+
Maarree, magaalota kee hundumaa keessatti akka si oolchuuf mootiin kee meerre?
Bulchitoonni* kee hoo meerre?+
11 Ani dheekkamsa kootiin mootii siif kenneen ture,+
Aarii koo isa guddaadhaanis achii isa nan kaasa.+
12 Balleessaan Efreem maramee kaaʼameera;
Cubbuun isaas kuufameera.
13 Ciniinsuun daʼumsaa isatti ni dhufa.
Inni garuu daaʼima ogummaa hin qabne dha;
Yeroon itti dhalatu yommuu gaʼu dhalachuu hin barbaanne.
Yaa Duʼaa, ilkeen kee meerre?+
Yaa Awwaalaa, badiisni ati geessistu meerre?+
Gara laafinni ija koo duraa ni dhokata.
15 Inni shomboqqoo gidduutti yoo dagaage illee,
Bubbeen bahaa, eeyyee, bubbeen Yihowaa ni dhufa,
Boolla bishaanii isaa fi burqaa bishaanii isaa gogsuuf lafa onaa irraa ni dhufa.
Manni kuusaa isaa inni miʼawwan isaa warra gatii guddaa qaban hundumaatiin guutame ni saamama.+
16 Samaariyaan Waaqa ishii irratti waan fincilteef,+ yakka ishiitiif itti gaafatamti.+
Isaan goraadeedhaan ni kufu,+
Ijoolleen isaanii ni caccabsamu,
Dubartoonni isaanii warri ulfaas garaan isaanii ni tarsaafama.”