Miikiyaas
7 Anaaf wayyoo! Ani akka nama
Firiin bonaa erga walitti qabamee fi
Yeroon firiin wayinii walitti qabamu darbee qaarmiin erga funaanamee booda
Firii wayinii walitti tuutaʼe nyaataaf hin argannee taʼeera,
Harbuu jalqaba gaʼu kanan* dharraʼe taʼus hin arganne.
2 Namni amanamaan lafa irraa badeera;
Namoota gidduu namni qajeelaan hin jiru.+
Hundi isaanii iyyuu dhiiga dhangalaasuuf riphanii eeggatu.+
Tokkoon tokkoon namaa obboleessuma isaa saaphana qurxummiitiin ni adamsa.
3 Harki isaanii wanta hamaa hojjechuu irratti dandeettii guddaa qaba;+
Bulchaan waa gaafata,+
Abbaan murtii gatii gaafata,
Namni beekamaan fedhii isaa* ibsata,+
Isaan waliin taʼanii hammina qopheessu.*
4 Isaan keessaa inni hundumaa irra wayyu akka qoree ti,
Inni hundumaa caalaa qajeelaa taʼes dallaa qoree caalaa hammaata.
Guyyaan eegdonni kee waaʼee isaa dubbatan, guyyaan ati itti qoratamtu ni dhufa.+
Amma isaan ni sodaatu.+
5 Hiriyaa keessan hin amaninaa,
Yookiin michuu dhihoo keessanitti hin amanaminaa.+
Ishii hammattee ciistu sanatti wanta dubbattu ilaalchisee of eeggadhu.
6 Sababiin isaas, ilmi abbaa isaa ni tuffata,
Intalli haadha ishii irratti ni kaati,+
Haati manaa ilmaas amaatii ishii irratti ni kaati;+
Diinonni namaa miseensota maatii isaa ti.+
7 Ani garuu dammaqinaan Yihowaa eeggachuu koo ittan fufa.+
Waaqa fayyinaa koo obsaan* nan eeggadha.+
Waaqni koo na dhagaʼa.+
8 Yaa diina* koo, rakkina kootti hin gammadin.
Kanan kufe taʼus, nan kaʼa;
Dukkana keessa kanan jiraadhu taʼus, Yihowaan ifa koo ni taʼa.
9 Ani cubbuu waanan isa irratti hojjedheef,+
Hamma inni dhimma koo irratti naaf falmuttii fi haqa naaf argamsiisutti
Dheekkamsa Yihowaa nan baadha.
Inni gara ifaatti na baasa;
Anis qajeelummaa isaa nan ilaala.
10 Diinni koos ni argiti,
Ishii, “Waaqni kee Yihowaan eessa jira?”+
Naan jette qaaniin ni haguuga.
Ijji koo ishii ni ilaala.
Amma ishiin akkuma dhoqqee daandii irra jiruutti ni dhidhiitamti.
11 Guyyaa sanatti dallaawwan dhagaa kee ni ijaaramu;
Guyyaa sanatti daangaan biyya keetii ni balʼata.
12 Guyyaa sanatti namoonni Asoorii fi magaalota Gibxii keessa jiran,
Akkasumas Gibxiidhaa hamma Lagichaatti,*
Galaanaa hamma galaanaattii fi gaaraa hamma gaaraatti jiran
Gara kee ni dhufu.+
13 Biyyattiinis jiraattota ishiitiin kan kaʼe,
Wanta isaan raawwataniin* kan kaʼe ona ni taati.
14 Saba kee, bushaayee dhaala keetii,
Isa bosona keessa, maasii fuduraa gidduu kophaa isaa jiraachaa ture sana ulee keetiin tiksi.+
Isaan akkuma bara durii Baashaanii fi Giiliyaad keessa haa dheedan.+
15 “Akkuman yeroo biyya Gibxii keessaa baatanitti godhe,
Wantoota dinqisiisoo isinitti nan argisiisa.+
16 Saboonni kana ni ilaalu, isaan ciccimoo taʼanis ni salphatu.+
Harka isaaniitiin afaan isaanii ni qabatu;
Gurri isaaniis ni duuda.
17 Isaan akkuma bofaa biyyoo arraabu;+
Akkuma uumamawwan lafa irra loʼaniis hollachaa dahoo isaanii keessaa ni baʼu.
Isaan sodaadhaan romʼaa gara Waaqa keenya Yihowaa ni dhufu,
Siinis ni sodaatu.”+
18 Waaqni akka keetti
Warra dhaala isaa keessaa hafaniif+ balleessaa isaanii isaaniif dhiisuu fi dogoggora isaanii irra isaaniif darbu eenyu?+
Inni jaalala amanamaatti waan gammaduuf,
Bara baraaf akkuma dheekkametti itti hin fufu.+
19 Inni ammas gara laafina nutti argisiisa;+ balleessaa keenyas toʼannaa jala ni galcha.*
Ati cubbuu isaanii hundumaa galaana gad fagoo keessatti ni darbatta.+
20 Ati akkuma bara duriitti abbootii keenyaaf kakattetti,+
Yaaqoobitti amanamummaa,
Abrahaamittis jaalala amanamaa ni argisiista.