Of Hin Daangessinaa—Yommuu Hojiin Isinitti Baayʼatu
1. Babalʼistoonni tokko tokko namoonni Macaafa Qulqulluu akka qayyabatan afeeruurraa duubatti kan jedhan maaliifi?
1 Babalʼistoonni tokko tokko hojiin waan isaanitti baayʼatuuf namoonni Macaafa Qulqulluu akka qayyabatan afeeruurraa duubatti jedhu. Nama Macaafa Qulqulluu qayyabatu tokko gargaaruun yeroo gaafata. Qayyabannaadhaaf qophaaʼuun, qayyabannaa sana geggeessuuniifi rakkina isa mudate akka moʼu isa gargaaruun yeroo gaafata. Phaawulos ergamaan, namoonni Tasaloniiqee Yihowaa akka beekan gargaaruuf lubbuusaallee akka isaaniin gaʼe dubbateera. (1 Tas. 2:7, 8) Maarree hojiin kan nutti baayʼatu yoo taʼeyyuu qayyabannaa Macaafa Qulqulluu geggeessuu kan dandeenyu akkamitti?
2. Jaalalli Yihowaadhaaf qabnu, akkaataa yeroo keenya itti fayyadamnurratti jijjiirama kan fidu akkamitti?
2 Waaqeffannaan Yeroo Gaafata: Waaqeffannaan yeroo akka gaafatu beekamaadha. Fakkeenyaaf, yeroo hunda walgaʼiirratti argamuuf, tajaajilarratti hirmaachuuf, Macaafa Qulqulluu dubbisuufi kadhannaa dhiheessuuf yeroo ramadna. Namni hojiin itti baayʼatu tokkos, yeroo hiriyaa gaaʼelaasaa wajjin dabarsu ni ramada. Yihowaa waan jaallannuuf, nutoo caalaatti wantoota kana raawwachuuf yeroo nuuf kenname ‘utuu hin dabarsin’ gammachuudhaan itti hojjechuu hin qabnuuree? (Efe. 5:15-17; 1 Yoh. 5:3) Akka Yesus dubbatetti, hojiin bartoota gochuu kutaa waaqeffannaa keenya keessaa isa guddaadha. (Mat. 28:19, 20) Kanaarratti xiinxaluun keenya, qayyabannaa Macaafa Qulqulluu geggeessuuf itti gaafatamummaa fudhachuurraa duubatti akka hin jenne nu gargaara.
3. Haalawwan tokko tokko sagantaa tajaajilaa keenya yeroo nu jalaa faallessanitti, nama Macaafa Qulqulluu qayyabsiisnuuf akka yaannu argisiisuu kan dandeenyu akkamitti?
3 Haataʼu malee hojiin keenya, dhibeen fayyaa cimaan ykn hojiin tiʼookraasii sagantaa keenya yoo nu jalaa faallessehoo maal gochuu qabna? Babalʼistoonni fagaatanii adeeman tokko tokko darbee darbee bilbilaan ykn kompiitaraan fayyadamanii qayyabannaa Macaafa Qulqulluusaanii geggeessu. Babalʼistoonni dhibee fayyaatiin sagantaansaanii jalaa faallessus, namni qayyabsiisan sun gara manasaanii akka dhufu gochuu dandaʼu. Warri kaanimmoo babalʼisaa yeroo isaan hin jirretti sagantaasaa eegee namoota kana qayyabsiisu qopheessu.
4. Qayyabannaa Macaafa Qulqulluu geggeessuurratti hirmaachuun eebba akkamii argamsiisa?
4 Phaawulos, namoonni waaʼee dhugaa akka baratan gargaaruuf yeroofi humnasaa kennuusaatti gammachuu guddaa argateera. (HoE. 20:35) Kanaaf, waaʼee namoota Tasanoliiqeetti gargaare hundumaa yeroo yaadu, Yihowaa galateeffateera. (1 Tas. 1:2) Hojiin nutti baayʼatus, qayyabannaa Macaafa Qulqulluu geggeessuurratti kan hirmaannu yoo taʼe, gammachuun tajaajilarraa argannu dabalaa adeema.