Walga’ii Koonyaa “Fayyinni Keenya Dhihaateera!” Jedhamu Beeksisuuf Duula Addunyaa Maratti Godhamu
Babal’istoonni Gumii Hundumaa Keessatti Argaman Waraqaa Afeerrii Adda Ta’e Kana Ni Raabsu
1 Walga’iin koonyaa ji’oota birraa 2006 kaasee biyyoota Awurooppaafi Ameerikaa kaabaatti jalqabamu addunyaa maratti walitti aanee kan geggeeffamu yommuu ta’u, walga’ii koonyaa biyyoota gara 155 ta’anitti geggeeffamu kana beeksisuuf addunyaa maratti duulli ni godhama. Duulli kun, walga’iiwwan koonyaa adda ta’an Adoolessaa hanga Hagayya 2006 torban jalqabaatti biyya Jarman, Cheek Riippabliikiifi Poolaanditti geggeeffaman beeksisuus kan dabalatudha.
2 Kan jiraannu xumura guyyoota gara dhumaa keessa waan ta’eef, walga’iiwwan koonyaa abdii Waaqayyo sirna hamaa kana keessaa nu oolchuuf gale addeessan kun, namoota jireenya bara baraatiif qophaa’an guddaa kan gammachiisan ta’uu qabu. Ergaan walga’ichaa wanta gara fuulduraa ta’urratti akka yaadan isaan gochuu qaba. Namoonni miliyoonaan lakkaa’aman ergaa nama jajjabeessuufi abdii kennu kana akka dhaga’an carraa isaanii banuuf, Dhugaa Baatonni Yihowaa gumiiwwan 98,000 keessatti argaman walga’ii koonyaa kana beeksisuurratti hinaaffaadhaan akka hirmaatan afeeramaniiru.
3 Babal’istoonni hundumtuu waraqaa afeerrii shantama shantama raabsuu akka danda’an gochuuf, gumiiwwaniif waraqaan afeerrii ga’aa ta’e ni ergama. Inni hafemmoo qajeelchitootaaf dabalama. Gumiiwwan hundumtuu walga’iinsaanii ga’uusaa torban sadii dura duula kana jalqabu. Kun ta’uunsaa, guutummaattis yoo ta’uu baate hamma ta’e naannoowwan keenya waliin ga’uuf yeroo akka argannu godha.
4 Yoo danda’ame waraqaan afeerrii kun dhuunfaadhaan warra manaatiif utuu kennamee gaariidha. Manaa yoo isaan dhabne garuu waraqaa kana balbalasaaniirra malaan kaa’uufii dandeenya. Torban sadan sana keessatti waraqaa afeerrii hundumaa raabsinee fixuuf carraaqqii cimaa gochuun nu barbaachisa.
5 Akka armaan olitti ibsametti, carraaqqii cimaan Walga’ii Koonyaa “Fayyinni Keenya Dhihaateera!” jedhamu addunyaa maratti beeksisuuf godhamu, bal’inaan dhugaa ba’uuf akka nu dandeessisu abdii qabna. Duula addunyaa maratti godhamu kanarratti hirmaachuuf carraaqqii gootan Yihowaan akka isiniif eebbisu ni kadhanna.