«Курын дӕ... Йегъовӕйы ныхасмӕ байхъус»

1, 2. Адӕмӕн сӕ фылдӕр цавӕр зондыл хӕст сты ӕмӕ ды сӕ зондыл цӕуылнӕ хъуамӕ цӕуай?

АБОН адӕм афтӕ сты, ӕмӕ сӕ никӕй коммӕ кӕсын фӕнды. Исты аразгӕйӕ, хорз цы у ӕмӕ ӕвзӕр цы у, ууыл хъуыды дӕр нӕ фӕкӕнынц. Бирӕтӕ хӕст сты ахӕм зондыл, зӕгъгӕ, куыд дӕ фӕнды, афтӕ цӕр, кӕнӕ, цы дӕ фӕнды, уый араз, ахсгӕ дӕ мачи ӕркӕнӕд, ӕндӕр. Уыцы зондахаст алкӕмдӕр зыны: шофыртӕ фӕндагыл, кӕй куыд фӕнды, афтӕ цӕуынц, ӕхцайы куыст чи кӕны, уыдон сӕ хъалонтӕ нӕ фидынц, стӕй хицӕуттӕ дӕр, сӕхӕдӕг цы закъӕттӕ сфидар кӕнынц, уыдон халынц. Ахӕм зондыл хӕст уыдысты Йеремийы рӕстӕджы цӕрӕг адӕм дӕр – уыдон размӕ бырстой, «иннӕтӕ цы фӕндагыл» цыдысты, ууыл, кӕд уый раст фӕндаг нӕ уыд ӕмӕ сын зиан йеддӕмӕ ницы хаста, уӕддӕр (Йер. 8:6).

² Фӕлӕ ды ӕмбарыс, Ӕппӕтхъомысджын Хуыцауы хорзӕх ссарын кӕй фӕнды, уыцы адӕймагӕн, «иннӕтӕ цы фӕндагыл цӕуынц», ууыл цӕугӕ кӕй нӕу. Йереми хорз равдыста, Йегъовӕмӕ хъусын кӕй фӕндыд, уыдон куыд тынг хицӕн кодтой, чи йӕм нӕ хъуыста, уыдонӕй (Йер. 3:25; 7:28; 26:13; 38:20; 43:4, 7). Уӕдӕ нӕ алчидӕр хъуамӕ ахъуыды кӕна: «Ӕз та дзы кӕцытӕм хауын?» Цӕмӕн? Уымӕн ӕмӕ Хӕйрӕг абон уӕлдай ӕгъатырӕй архайы, Хуыцауыл иузӕрдион чи у, уыдоны ныхмӕ. Хӕйрӕг у, йӕ амӕттаджы сусӕгӕй чи фӕхъахъхъӕны ӕмӕ йыл стӕй йӕхи ӕнӕнхъӕлӕджы чи ныццӕвы ӕмӕ дзы йӕ мӕлӕтдзаг марг чи ауадзы, ахӕм калмы хуызӕн. Фидарӕй куы аскъуыддзаг кӕнӕм, Йегъовӕмӕ алы хъуыддаджы дӕр кӕй хъусдзыстӕм, уӕд уыцы калмы амӕттаг никуы бауыдзыстӕм. Фӕлӕ нӕ цы хъӕуы аразын, цӕмӕй нӕ алкӕддӕр фӕнда Йегъовӕйы коммӕ кӕсын? Стыр ӕххуыс нын фӕуыдзысты, Йереми цы чингуытӕ ныффыста, уыдон.

КӔМӔ ХЪУАМӔ ХЪУСӔМ?

3. Йегъовӕ уый аккаг цӕмӕн у, ӕмӕ йӕм хъусӕм?

³ Йегъовӕ уый аккаг цӕмӕн у, ӕмӕ йӕм алкӕддӕр хъусӕм? Йереми Йегъовӕйы тыххӕй загъта, зӕгъгӕ, «уый зӕхх скодта йӕ тыхӕй, зӕхх ӕрфидар кодта йӕ зондӕй» (Йер. 10:12). Йегъовӕ у Дунедарӕг Хуыцау. Уымӕй тынгдӕр иу хицауӕй дӕр хъуамӕ ма тӕрсӕм. Ӕрмӕстдӕр уымӕ ис уыцы бар, цӕмӕй нӕ дома, йе стыр зондӕй нын цы фӕдзӕхстытӕ радта, уыдон иууылдӕр ӕххӕст кӕнын. Уыцы фӕдзӕхстытӕ та нын пайда сты абон дӕр ӕмӕ ӕнустӕм дӕр (Йер. 10:6, 7).

4, 5. а) Зӕрдӕвӕрд зӕххыл-иу хус рӕстӕджытӕ куы скодта, уӕд уый дзуттӕгтӕн цӕуыл дзурӕг уыд? ӕ) Иудӕйы цӕрджыты «царддӕттӕг дон» хъӕугӕ дӕр кӕй нӕ кодта, уый цӕмӕй уыд бӕрӕг? б) Хуыцау абон кӕй дӕтты, уыцы «царддӕттӕг донӕй» дӕ бон куыд у нуазын?

⁴ Йегъовӕ ӕрмӕст Дун-дунейы Хицау нӕу, фӕлӕ ма у нӕ Дарӕг дӕр. Ӕмӕ уый йӕхӕдӕг бӕлвырд равдыста Йеремийы рӕстӕджы цӕрӕг дзуттӕгтӕн. Кӕд Египеты зӕхх донӕй Нилы цӕугӕдон ӕфсӕста ӕмӕ Хуыцауы адӕмӕн сӕ цард ууыл баст уыди, уӕд Зӕрдӕвӕрд зӕххыл та сӕ уавӕр ӕндӕрхуызон уыд. Ныр сӕ цард фылдӕр баст уыди уалдзыгон ӕмӕ фӕззыгон къӕвдатыл. Уыцы къӕвдаты дон-иу ӕмбырд кодтой, цы дзыхъхъытӕ-иу скъахтой, уым (Дык. з. 11:13–17). Ӕмӕ къӕвда раттын та ӕрмӕстдӕр Йегъовӕйы бон уыди, цӕмӕй-иу зӕхх донӕй бафсӕстаид ӕмӕ-иу хъӕздыг тыллӕг раттаид. Фӕлӕ йӕ бон уыди арвы дуӕрттӕ сӕхгӕнын дӕр. Гъемӕ уыцы ӕгоммӕгӕс дзуттӕгтӕн цалдӕр хатты скодта хус рӕстӕджытӕ, ӕмӕ-иу сӕ быдыртӕ ӕмӕ сӕнӕфсирдӕттӕ хурӕй басыгъдысты, сӕ цъайтӕ ӕмӕ-иу сӕ доны дзыхъхъытӕ бахус сты (Йер. 3:3; 5:24; 12:4; 14:1–4, 22; 23:10).

⁵ Уыцы дзуттӕгтӕ, ӕнӕ донӕй цӕрӕн кӕй нӕй, уый хорз ӕмбӕрстой. Фӕлӕ сын Йегъовӕ парахатӕй кӕй лӕвӕрдта, уыцы «царддӕттӕг дон» та сӕ хъӕугӕ дӕр нӕ кодта – зонгӕ-зонын-иу Хуыцауы Закъоны сӕрты ахызтысты ӕмӕ-иу сӕ алыварс цӕрӕг адӕмтимӕ бадзырдтӕ скодтой. Ӕмӕ-иу афтӕмӕй сӕхи бӕллӕхы баппӕрстой, хус рӕстӕг адӕймаг, дон кӕм нӕ лӕууы, ахӕм хӕлд дзыхъхъы дон куыд ӕмбырд кӕна ӕмӕ афтӕмӕй йӕхи тӕссаг уавӕры куыд ӕппара, уыйау. (Бакӕс Йеремийы 2:13; 17:13.) Уый махӕн у зондзонӕн, цӕмӕй уыдоны хуызӕн ма суӕм, ӕмӕ нӕхи фыдбылызы ма баппарӕм. Абон мах дӕр Йегъовӕ йӕ разамындӕй цух нӕ уадзы – йӕ Ныхасы уылты нын амоны, алыхуызон уавӕрты нын куыд кӕнгӕ у, уый. Фӕлӕ нын уыцы «царддӕттӕг дон» пайда ӕрмӕстдӕр уӕд хӕсдзӕн, ӕмӕ дзы ӕдзухдӕр куы нуазӕм, ома Библи алы бон дӕр лӕмбынӕг куы иртасӕм ӕмӕ нӕ цард уымӕ гӕсгӕ куы аразӕм.

6. а) Паддзах Седеки Йегъовӕйы коммӕ касти? ӕ) Дӕумӕ гӕсгӕ, Седеки зондджын адӕймаг уыди?

⁶ Хуыцауы мастисӕн бон куыд ӕввахс кодта, афтӕ Иудӕйы цӕрджыты йӕ коммӕ кӕсын уӕлдай тынгдӕр хъуыди. Дзуттӕгтӕй Йегъовӕйы хорзӕх ссарын ӕмӕ йӕхи йӕ дӕлбазыр бакӕнын кӕй фӕндыд, уыдоны хъуыди ӕрфӕсмон кӕнын ӕмӕ, Хуыцау цы дзырдта, уымӕ хъусын. Афтӕ бакӕнын хъуыди паддзах Седекийы дӕр. Фӕлӕ, раст цы уыд, уый аразыныл фидарӕй нӕ архайдта. Йӕ лӕггадгӕнджытӕ йын куы загътой, Йеремийы хъуамӕ амарӕм, зӕгъгӕ, уӕд йӕхимӕ уыйбӕрц лӕгдзинад не ссардта, цӕмӕй сӕ ныхмӕ ӕрлӕууыдаид. Айразмӕйы сӕрӕй куыд базыдтам, афтӕмӕй Авдемелех Йеремийы мӕлӕтӕй фервӕзын кодта. Ӕмӕ уымӕй цасдӕры фӕстӕ Йереми Седекийӕн загъта: «Курын дӕ... Йегъовӕйы ныхасмӕ байхъус». (Бакӕс Йеремийы 38:4–6, 20.) Паддзах Хуыцаумӕ куы байхъуыстаид, уӕд уый уыдаид йӕхи пайдайӕн. Фӕлӕ йӕм байхъуыста?

ЙЕГЪОВӔМӔ ХЪУСЫН ТЫНГ АХСДЖИАГ У

7. Хуыцауы коммӕ кӕсын уӕлдай зындӕр цавӕр уавӕрты вӕййы?

⁷ Хуыцаумӕ хъусын Йеремийы рӕстӕджы куыд ахсджиаг уыд, афтӕ ахсджиаг у абон дӕр. Дӕхицӕн фидарӕй аскъуыддзаг кодтай, цыфӕндыйӕ дӕр Йегъовӕмӕ кӕй хъусдзынӕ? Зӕгъӕм, Интернеты, порнографи кӕм ис, ахӕм сайтмӕ ӕнӕнхъӕлӕджы куы бахауай, уӕд куыд бакӕндзынӕ: кӕсдзынӕ йӕм ӕви дӕ зӕрдӕйы монцтыл фӕтых уыдзынӕ ӕмӕ уыцы сайт сӕхгӕндзынӕ? Йе та дын скъолайы кӕнӕ куысты исчи куы зӕгъа, цӕмӕй йемӕ ӕмбӕлын райдайай, уӕд дӕхимӕ уыйбӕрц хъару ссардзынӕ ӕмӕ йын фидарӕй «нӕ» зӕгъдзынӕ? Раст дин чи ныууагъта, уыдон сӕ чингуыты кӕнӕ Интернеты цытӕ фӕфыссынц, уый куы фенай, уӕд сӕм сцымыдис уыдзынӕ ӕви уайтагъд дӕхи иуварс айсдзынӕ? Ахӕм уавӕрты-иу дӕ зӕрдыл дар Йеремийы 38:20 фыст ныхӕстӕ.

8, 9. а) Хистӕр нӕлгоймӕгты уынаффӕмӕ байхъусын зондыл дзурӕг цӕмӕн уыдзӕн? ӕ) Уыцы иу уынаффӕ дын цалдӕр хатты куы раттой, уӕд дӕ дӕ зӕрдыл дарын цы хъӕуы?

⁸ Йегъовӕ-иу арӕх Йеремийы йӕ адӕммӕ арвыста ахӕм ныхӕстимӕ: «Уӕ хорзӕхӕй, уе ’взӕр фӕндӕгтӕ ныууадзут ӕмӕ уӕ хъуыддӕгтӕ сраст кӕнут» (Йер. 7:3; 18:11; 25:5; бакӕс Йеремийы 35:15). Абон дӕр ӕмбырды хистӕр нӕлгоймӕгтӕ зӕрдиагӕй архайынц, цӕмӕй се ’мчырыстӕтты бахизой, сӕ уырнындзинадӕн тӕссаг кӕмӕй у, ахӕм хъуыддӕгтӕй. Дӕу дӕр искуы рӕдыд къахдзӕфӕй бахизын куы бахъӕуа ӕмӕ дын уынаффӕ куы раттой, уӕд-иу сӕм байхъус. Йеремийау уыдонӕн дӕр сӕ нысан у Хуыцауы адӕмӕн ӕххуыс кӕнын.

⁹ Чи зоны дын хистӕр нӕлгоймӕгтӕ дӕ зӕрдыл ӕрлӕууын кӕной, уый размӕ дын Библийӕ кӕй равдыстой, уыцы уагӕвӕрд. Рох дӕ ма уӕд, уыцы иу уынаффӕ цалдӕр хатты раттын ӕнцон никуы вӕййы, уӕлдайдӕр адӕймаг Йеремийы рӕстӕджы цӕрӕг дзуттӕгтау Хуыцауы ныхӕстӕ куы ницӕмӕ дара, уӕд. Хистӕр нӕлгоймӕгтӕ демӕ цалдӕр хатты куы ныхас кӕной, уӕд-иу дӕ зӕрдыл дар, уый Йегъовӕйы уарзондзинадыл дзурӕг кӕй у. Стӕй ма ахъуыды кӕн: дзуттӕгтӕ Йеремимӕ куы байхъуыстаиккой, уӕд ма сӕ дыккаг-ӕртыккаг хатт хъуыдаид фӕдзӕхсын? Уӕдӕ дын цӕмӕй уыцы иу уынаффӕ цалдӕр хатты раттын ма бахъӕуа, уый тыххӕй-иу ӕвӕстиатӕй бацархай, куыд дын загътой, афтӕ бакӕныныл.

ЙЕГЪОВӔ ХАТЫР КӔНЫ, ФӔЛӔ ЦЪЫНДЦӔСТӔЙ НӔ

10. Йегъовӕ адӕймагӕн цъындцӕстӕй цӕуылнӕ хатыр кӕны?

¹⁰ Ацы дунейы цӕргӕйӕ уый гӕнӕн нӕй, ӕмӕ Йегъовӕйы раз ӕппындӕр ма рӕдийӕм, куыдфӕнды ма архайӕм, уӕддӕр. Уӕдӕ куыд бузныг стӕм Йегъовӕйӕ, нӕ рӕдыдтытӕ хатыр кӕнынмӕ цӕттӕ кӕй у, уый тыххӕй. Фӕлӕ цъындцӕстӕй нӕ хатыр кӕны. Цӕуылнӕ? Уымӕн ӕмӕ тӕригъӕд йӕ цӕсты у ӕлгъаг (Ис. 59:2). Йегъовӕ хъуамӕ уына, уый аккаг кӕй стӕм, цӕмӕй нын ныххатыр кӕна.

11. Тӕригъӕд басусӕг кӕнӕн цӕуылнӕ ис?

¹¹ Куыд ӕй федтам, афтӕмӕй Йеремийы рӕстӕджы цӕрӕг дзуттӕгтӕй бирӕтӕ Йегъовӕмӕ нал хъуыстой – афтӕ хъуыды кӕнын райдыдтой, зӕгъгӕ, Йегъовӕ бирӕфӕразон ӕмӕ фӕлмӕнзӕрдӕ у, ӕмӕ мын уӕддӕр ныххатыр кӕндзӕн. Цымӕ уый гӕнӕн ис, ӕмӕ абон дӕр Хуыцауы лӕггадгӕнджытӕй исчи афтӕ хъуыды кӕнын райдайа? О, Йегъовӕйы фӕдзӕхстытӕ куы ницӕмӕ дара ӕмӕ зонгӕ-зонын тӕригъӕдтӕ аразын куы райдайа, уӕд. Хатт чырыстон тӕригъӕд ӕргом саразы, зӕгъӕм, йӕ цард кӕимӕдӕр баиу кӕны, Фыстадмӕ гӕсгӕ сӕ иуӕн йе та сӕ дыууӕйӕн дӕр уый бар нӕ вӕййы, афтӕмӕй. Фӕлӕ адӕймаг тӕригъӕд сусӕгӕй куы араза, уӕд дӕр йӕхи тӕссаг уавӕры ӕппары. Чи зоны, хъуыды кӕна, ничи мӕ базондзӕн, зӕгъгӕ. Фӕлӕ Хуыцау уыны, адӕймагӕн йӕ зонды ӕмӕ йӕ зӕрдӕйы цы ис, уый, ӕмӕ дзы ницы басусӕг кӕндзынӕ. (Бакӕс Йеремийы 32:19.) Уӕдӕ ӕмбырды исчи Хуыцауы раз тӕригъӕд куы сараза, уӕд куыд кӕнгӕ у?

12. Хистӕр нӕлгоймӕгты хатт цы бахъӕуы саразын, цӕмӕй ӕмбырды сыгъдӕгдзинад бахъахъхъӕной?

¹² Йегъовӕ бирӕ хӕттыты архайдта Йеремийы уылты дзуттӕгтӕн баххуыс кӕныныл, фӕлӕ та-иу ӕм сӕ чъылдым сыздӕхтой. Абон дӕр хатт афтӕ вӕййы, ӕмӕ стыр тӕригъӕд чи саразы, уый не ’рфӕсмон кӕны ӕмӕ йӕ нӕ фӕфӕнды, цӕмӕй йын хистӕр нӕлгоймӕгтӕ баххуыс кӕной. Ахӕм уавӕры хистӕр нӕлгоймӕгтӕ хъуамӕ Фыстадмӕ гӕсгӕ уыцы адӕймаджы ӕмбырдӕй ацух кӕной ӕмӕ афтӕмӕй ӕмбырды сыгъдӕгдзинад бахъахъхъӕной (1 Кор. 5:11–13; кӕс рамкӕ «Ӕнӕ закъонӕй», 97 фарс). Фӕлӕ цымӕ кӕй ацух кодтой, уымӕн уый ныфс нал ис, ӕмӕ та Йегъовӕйы хорзӕх ссара? Куыннӕ ис! Израилӕгтӕ бирӕ рӕстӕг Хуыцауы ныхмӕ цыдысты, фӕлӕ сын уӕддӕр загъта: «Раздӕхут, мӕнгард фырттӕ. Ӕз уӕ сдзӕбӕх кӕндзынӕн, фервӕзын уӕ кӕндзынӕн уӕ мӕнгарддзинадӕй» (Йер. 3:22)a. Йегъовӕ, йӕ коммӕ чи нӕ кӕсы, уыдоны хоны, цӕмӕй йӕм раздӕхой. Ӕниу сӕ ӕрмӕст хонгӕ нӕ кӕны, фӕлӕ сын фӕдзӕхсгӕ кӕны, раздӕхут мӕм, зӕгъгӕ.

ЙЕГЪОВӔМӔ ХЪУС – РАЗДӔХ ӔМ

13. Йегъовӕмӕ раздӕхын кӕй фӕнды, уыцы адӕймаг цы хъуамӕ ӕмбара?

¹³ Цӕмӕй адӕймаг фӕстӕмӕ Хуыцаумӕ раздӕха, уый тыххӕй, Йеремийы ныхӕстӕм гӕсгӕ, хъуамӕ ахъуыды кӕна, «ай цы бакуыстон», зӕгъгӕ. Ӕмӕ стӕй хъуамӕ лӕмбынӕг ӕркӕса, уый фӕдыл Библийы цы уагӕвӕрдтӕ ис, уыдонмӕ ӕмӕ басӕтта, ӕцӕгдӕр стыр тӕригъӕд кӕй сарӕзта, ууыл. Йеремийы рӕстӕджы цӕрӕг дзуттӕгтӕ уыцы фарстайыл нӕ хъуыды кодтой. Куыд тынг рӕдыдысты, уый бамбарын сӕ нӕ фӕндыд. Гъемӕ сын Йегъовӕ дӕр сӕ тӕригъӕдтӕ нӕ хатыр кодта, ӕмӕ сын уӕвгӕ куыд хъуамӕ ныххатыр кодтаид. (Бакӕс Йеремийы 8:6.) Уыдонӕй уӕлдай, йӕ тӕригъӕдыл чи ӕрфӕсмон кӕны, ахӕм адӕймаг фембары, Йегъовӕмӕ кӕй нӕ байхъуыста, уымӕй йын йӕ ном кӕй фӕчъизи кодта ӕмӕ ӕмбырды ном дӕр кӕй фӕхудинаг кодта. Стӕй кӕд тӕригъӕд саразгӕйӕ искӕмӕн зиан ӕрхаста, уӕд ууыл дӕр фӕмаст кӕны. Уый ӕмбары, Йегъовӕ йын йӕ лӕгъстӕтӕ ӕрмӕстдӕр уӕд кӕй фехъусдзӕн, ӕмӕ цы сарӕзта, уый йӕм куы бахъара. Фӕлӕ цӕмӕй адӕймаг Хуыцауы хорзӕх ссара, уый тыххӕй ма хъӕуы ноджы цыдӕр.

14. Адӕймаг Йегъовӕмӕ куыд раздӕхы? (Кӕс ма рамкӕ «Фӕсмон цы нысан кӕны?», 98 фарс.)

¹⁴ Ӕцӕгӕй чи фӕсмон кӕны, ахӕм адӕймаг йӕ зӕрдӕмӕ ныккӕсы ӕмӕ фены, цы дзы ис, уый. (Бакӕс Йеремийы хъарӕг 3:40, 41.) Лӕмбынӕг ахъуыды кӕны, цы лӕмӕгъдзинӕдтӕ йӕм ис кӕнӕ цы ӕвзӕр хъуыддӕгтыл бафтыд, ууыл. Зӕгъӕм, кӕд нӕлгоймаг у, уӕд йӕхи сылгоймӕгтимӕ куыд дары, нозт ӕмӕ тамако дымынмӕ цы цӕстӕй кӕсы, Интернетӕй куыд пайда кӕны кӕнӕ ӕхцаимӕ баст хъуыддӕгтӕ куыд кӕны. Хӕдзар ӕфснайгӕйӕ сылгоймаг рӕбинаг къуымтӕ дӕр куыд ныссыгъдӕг кӕны, афтӕ, фӕсмон чи кӕны, ахӕм адӕймаджы дӕр хъӕуы бирӕ фыдӕбон кӕнын, цӕмӕй йӕ зӕрдӕйы хъуыдытӕ ссыгъдӕг кӕна ӕмӕ, иннӕтӕ кӕй нӕ уынынц, уыцы хъуыддӕгтӕ дӕр сраст кӕна. Хъуамӕ «Йегъовӕмӕ раздӕха» – ногӕй та йӕ уагӕвӕрдтӕм гӕсгӕ цӕрын райдайа. Кӕд Йеремийы рӕстӕджы цӕрӕг дзуттӕгтӕй иуӕй-иутӕ Йегъовӕмӕ раздӕхтысты, уӕддӕр уый зӕрдӕйӕ нӕ бакодтой, фӕлӕ ӕрмӕстдӕр «ӕфсонӕн». Сӕхи афтӕ ӕвдыстой, цыма тынг фӕсмон кӕнынц, афтӕмӕй та сӕ зӕрдӕ ӕмӕ сӕ цард ӕппындӕр нӕ фӕивта (Йер. 3:10). Уыдонӕй уӕлдай, зӕрдӕйӕ чи ӕрфӕсмон кӕны ӕмӕ Йегъовӕйӕ хатыр чи фӕкуры, ахӕм адӕймаг ууыл нӕ фӕархайы, цӕмӕй Йегъовӕйы ӕмӕ йын йӕ адӕмы асайа. Йӕ нысан ӕрмӕст уый нӕ вӕййы, ӕмӕ йӕхицӕн фӕстӕмӕ хорз ном скӕна кӕнӕ йын цӕмӕй, йӕ хиуӕттӕй рӕстдзинады чи ис, уыдонимӕ ӕмӕ иннӕ чырыстон хотӕ ӕмӕ ӕфсымӕртимӕ дзурыны бар уа. Уый фӕнды йӕ рӕдыд фӕндаг бынтондӕр ныууадзын ӕмӕ, Хуыцауы хорзӕх зӕрдӕйӕ кӕй агуры, уый хъуыддагӕй равдисын.

15. Зӕрдӕйӕ чи ӕрфӕсмон кӕны, ахӕм адӕймаджы куывдтытӕ цавӕр вӕййынц?

¹⁵ Адӕймаг кӕй фӕсмон кӕны, уый фыццаджыдӕр бӕрӕг вӕййы йӕ куывдтытӕй. Раджы заманты-иу адӕм Хуыцаумӕ куы куывтой, уӕд-иу сӕ къухтӕ арвмӕ сдардтой. Абон дӕр йӕ тӕригъӕдыл чи ӕрфӕсмон кӕны, уый, Йереми куыд загъта, афтӕ, йӕ зӕрдӕ Хуыцаумӕ саразы ӕмӕ йӕм йӕ къухтӕ сивазы (Йер. хъ. 3:41, 42). Цы сарӕзта, ууыл тынг фӕмаст кӕны, ӕмӕ йӕ уый сразӕнгард кӕны, цӕмӕй йӕ куывдтытӕм гӕсгӕ архайгӕ дӕр кӕна. Ахӕм адӕймагӕн йӕ куывдтытӕ фӕцӕуынц йӕ зӕрдӕйы арфӕй.

16. Цӕмӕн ис фидарӕй зӕгъӕн, ӕмӕ адӕймагӕн йӕ бон у фӕстӕмӕ Хуыцаумӕ раздӕхын?

¹⁶ Цӕмӕй адӕймаг фӕстӕмӕ Хуыцаумӕ раздӕха, уый тыххӕй йӕ, чи зоны, бахъӕуа йӕ сӕрбӕрзонддзинад къӕхты бын ныккӕнын. Фӕлӕ рох кӕнын нӕ хъӕуы иу хъуыддаг: Йегъовӕйы фӕнды, цӕмӕй тӕригъӕд чи сарӕзта, уый йӕм фӕстӕмӕ раздӕха. Хуыцау ахӕм адӕймаджы зӕрдӕмӕ ныккӕсы ӕмӕ, йӕхи фӕсмонӕй кӕй хӕры, уый куы фены, уӕд йӕхи зӕрдӕ дӕр суынгӕг вӕййы. Уацарӕй чи ӕрыздӕхт, уыцы дзуттӕгты тӕригъӕдмӕ кӕсгӕйӕ йӕ «зӕрдӕ скъуыдтӕ кодта» ӕмӕ йӕ фӕндыд, цӕмӕй сын ныххатыр кодтаид. Ӕмӕ афтӕ у абон дӕр – тынг ӕй фӕнды, йӕ тӕригъӕдтыл чи фӕсмон кӕны, уыдонӕй алкӕмӕн дӕр ныххатыр кӕнын (Йер. 31:20). Куыд хорз у, Йегъовӕ, чи йӕм байхъусы ӕмӕ йӕм чи раздӕхы, уыдоны фарнӕй кӕй схайджын кӕны ӕмӕ сын ныфс кӕй ратты! (Йер. 29:11–14). Ахӕм адӕймӕгтӕн ис уый фадат, цӕмӕй та ногӕй Хуыцауы иузӕрдион лӕггадгӕнджытимӕ иумӕ уой.

КОММӔГӔСДЗИНАД ДӔ ХЪАХЪХЪӔНДЗӔН

17, 18. а) Чи уыдысты рехавиттӕ? ӕ) Рехавиттӕ нын фӕзминаг цӕмӕй сты? (Кӕс нывмӕ 102 фарсыл.)

¹⁷ Йегъовӕмӕ алкӕддӕр чи хъусы, ахӕм адӕймагӕн тӕссаг ницӕмӕй у. Уый хорз зыны Йеремийы рӕстӕджы цӕрӕг рехавитты цӕвиттонӕй. Дыууӕ ӕнусы раздӕр сын сӕ фыдӕл, кенейаг Ионадав, Ииуйы фарс чи слӕууыд, уый, бирӕ фӕдзӕхстытӕ ныууагъта. Уыдонӕй сӕ иу уыди ахӕм, зӕгъгӕ, сӕн ма нуазут. Ионадав раджы амард, фӕлӕ йын уӕддӕр йӕ фӕдзӕхст ӕххӕст кодтой. Хуыцауы ныхасмӕ гӕсгӕ Йереми рехавитты бакодта кувӕндоны хӕрӕндонмӕ, цӕмӕй сӕ бафӕлвӕрдтаид. Уым сын сӕ разы сӕн ӕрӕвӕрдта, бануазут, зӕгъгӕ. Фӕлӕ йын уыдон загътой: «Нӕ, мах сӕн нӕ бануаздзыстӕм» (Йер. 35:1–10).

¹⁸ Кӕд рехавиттӕн сӕ фыдӕл раджы амард, уӕддӕр тынг аргъ кодтой, цы сын ныффӕдзӕхста, уымӕн. Ӕмӕ уӕд мах та уӕлдай тынгдӕр куыннӕ хъуамӕ хъусӕм удӕгас Хуыцауы фӕдзӕхстытӕм! Рехавиттӕ ахӕм коммӕгӕс кӕй уыдысты, уый Йегъовӕйӕн афтӕ ӕхсызгон уыди, ӕмӕ сӕ ӕгоммӕгӕс дзуттӕгтӕн цӕвиттонӕн ӕрхаста. Хуыцау сын зӕрдӕ бавӕрдта, йӕ адӕммӕ цы бӕллӕх ӕнхъӕлмӕ каст, уымӕй сӕ кӕй бахиздзӕн. Ӕмӕ уӕд цы зӕгъӕн ис нӕ рӕстӕджы тыххӕй та? Ау, Йегъовӕ, алкӕддӕр ӕм чи хъусы, уыдоны стыр бӕллӕхы нӕ бахъахъхъӕндзӕн? (Бакӕс Йеремийы 35:19.)

ЙЕГЪОВӔМӔ ЧИ ХЪУСЫ, УЫДОН ИУНӔГ НЕ СТЫ

19. Хуыцаумӕ куы хъусай, уӕд дӕ уый куыд хъахъхъӕндзӕн?

¹⁹ Афтӕ зӕгъӕн нӕй, ӕмӕ Хуыцау йӕ адӕмы ӕрмӕстдӕр раджы заманты хъахъхъӕдта. Абон дӕр Йегъовӕ, йӕ коммӕ чи кӕсы, уыдоны хъахъхъӕны, сӕ уырнындзинадӕн тӕссаг цӕмӕй у, уымӕй. Раджы заманты-иу горӕтты бӕрзонд къултӕ сӕ цӕрджыты знӕгтӕй куыд хъахъхъӕдтой, афтӕ Хуыцауы закъӕттӕ дӕр хъахъхъӕнынц, чи сӕ иртасы ӕмӕ йӕ царды алы къахдзӕф дӕр уыцы закъӕттӕм гӕсгӕ чи аразы, уыдоны. Уӕдӕ дарддӕр дӕр Хуыцауы уагӕвӕрдтӕм гӕсгӕ архайдзынӕ, цӕмӕй дӕ ахӕм къултау хъахъхъӕной? Афтӕ куы кӕнай, уӕд дын алкӕддӕр уыдзӕн хорз (Йер. 7:23). Уый фенӕн ис бирӕ ӕфсымӕрты ӕмӕ хоты цардӕй. (Кӕс рамкӕ «Коммӕгӕсдзинад адӕймаджы хъахъхъӕны», 104 фарс.)

20, 21. а) Йегъовӕйӕн лӕггад кӕнгӕйӕ фидарӕй цы зоныс? ӕ) Хуыцау Йеремийы уылты цы дзырдта, уымӕ паддзах Иоаким цы цӕстӕй ракаст?

²⁰ Чи зоны, дӕ бинонтӕй, де ’мкусджытӕй, де ’мкъласонтӕй кӕнӕ хицӕуттӕй исчи, Хуыцауӕн кӕй лӕггад кӕныс, уый тыххӕй дӕ ныхмӕ цӕуа. Фӕлӕ йӕ фидарӕй зон, алкӕддӕр Йегъовӕмӕ куы хъусай, уӕд дын цыфӕнды зын уавӕрты дӕр кӕй ӕххуыс кӕндзӕн. Йегъовӕ Йеремийӕн загъта, йӕ ныхмӕ карзӕй куы цӕуой, уӕд йӕ фарсмӕ кӕй уыдзӕн, ӕмӕ кӕнгӕ дӕр афтӕ кодта. (Бакӕс Йеремийы 1:17–19.) Уый бӕрӕг у, зӕгъӕм, паддзах Иоакимы рӕстӕджы йын куыд ӕххуыс кодта, уымӕй.

²¹ Хуыцауы номӕй чи дзырдта, уыдоны ныхмӕ Израилы паддзӕхтӕй Иоакимы хуызӕн карзӕй бирӕтӕ нӕ цыдысты. Уый зыны пехуымпар Урийы хабарӕй. Ури дӕр цард Йеремийы заман. Иоаким уыцы пехуымпары фӕдыл зылди ӕмӕ суанг Египетмӕ дӕр адӕмы йӕ фӕдыл арвыста. Пехуымпар Урийы куы ’рцахстой ӕмӕ йӕ фӕстӕмӕ куы ’ркодтой, уӕд ӕй паддзах амарын кодта (Йер. 26:20–23). Иоаким цыппӕрӕм аз куы уыд паддзах, уӕд Йегъовӕ Йеремийӕн бафӕдзӕхста, цӕмӕй тыхтоны ныффыстаид, уӕды онг ын цыдӕриддӕр загъта, уый ӕмӕ стӕй уыцы ныхӕстӕ кувӕндоны хъӕрӕй бакастаид. Иоаким уыцы тыхтон ӕрбахӕссын кодта ӕмӕ йӕ йӕ фӕсдзӕуинтӕй иуӕн бакӕсын кодта. Ӕмӕ йын ӕй куыд касти, афтӕ йӕ паддзах скъуыдтӕ кодта ӕмӕ йӕ арты ӕппӕрста, кӕд ын йӕ кънйӕзтӕй чидӕртӕ дзырдтой, афтӕ ма бакӕн, зӕгъгӕ, уӕддӕр. Уый фӕстӕ йӕ адӕмы арвыста, цӕмӕй Йереми ӕмӕ Варухы ӕрцахстаиккой. Ӕмӕ цымӕ хабар куыд рауад? «Йегъовӕ [сӕ] ӕмбӕхста» (Йер. 36:1–6; бакӕс Йеремийы 36:21–26). Йегъовӕ уыцы дыууӕ иузӕрдион адӕймаджы бахъахъхъӕдта, ӕмӕ Иоакимӕн йӕ фыдвӕнд йӕ къухы нӕ бафтыд.

22, 23. Хуыцау йӕ лӕггадгӕнджытӕн куыд ӕххуыс кӕны, уый Гулистаны хабарӕй куыд зыны?

²² Абон дӕр Йегъовӕ, йӕ лӕггадгӕнджытӕ тӕссаг уавӕры куы вӕййынц, уӕд сӕ иуӕй-иу хатт диссаджы хуызы бахъахъхъӕны. Фӕлӕ сын арӕхдӕр ратты ныфс ӕмӕ зонд, цӕмӕй сӕ бон уа йӕ коммӕ кӕсын ӕмӕ дарддӕр хорз хабар хъусын кӕнын. Зӕгъӕм, нӕ хо, схондзыстӕм ӕй Гулистан, иунӕгӕй хъомыл кӕны цыппар сывӕллоны. Уый йӕхиуыл бавзӕрста, Йегъовӕ куыд ӕххуыс кӕны, уый. Гулистан у Астӕуккаг Азийӕ ӕмӕ, кӕм цӕры, уыцы ран цасдӕр рӕстӕг уый йеддӕмӕ Йегъовӕйы Ӕвдисӕнтӕй ничи уыд. Уыцы ран хицӕуттӕ хъусын кӕныны хъуыддаг къуылымпы кӕнынц. Стӕй йӕм ӕмбырд дӕр у тынг дард, 400 километрӕй йӕм фылдӕр хъӕуы цӕуын, ӕмӕ уымӕ гӕсгӕ фӕлтӕрд чырыстӕттимӕ арӕх нӕ фембӕлы. Кӕд Гулистанӕн йӕ ныхмӕ цӕуынц ӕмӕ йын ӕндӕр зындзинӕдтӕ дӕр ис, уӕддӕр хӕдзарӕй-хӕдзармӕ хъусын кӕны ӕмӕ ссары, Хуыцауы тыххӕй базонын кӕй фӕнды, бирӕ ахӕм адӕмы. Фӕстаг хыгъдмӕ гӕсгӕ, Гулистан Библи ахуыр кодта 20 адӕймагимӕ, ӕмӕ уыцы ран фӕзынд къорд дӕр. Уый сӕм йӕ хъус дары ӕмӕ сын ӕххуыс кӕны сӕ уырнындзинад фидар кӕнынӕн.

²³ Йегъовӕ кӕддӕр Йеремийӕн ӕмӕ нӕ рӕстӕджы та Гулистанӕн ӕмӕ йӕ иннӕ коммӕгӕс лӕггадгӕнджытӕн куыд ӕххуыс кодта, афтӕ ӕххуыс кӕндзӕн дӕуӕн дӕр. Хуыцау у нӕ хицау, ӕмӕ алкӕддӕр уымӕ хъус, адӕммӕ нӕ, фӕлӕ. Уӕд, дӕ ныхмӕ чифӕнды ма цӕуа кӕнӕ дӕ разы цавӕрфӕнды цӕлхдуртӕ ма уа, уӕддӕр иунӕг ӕцӕг Хуыцауы ӕргом кадджын кӕндзынӕ (Йер. 15:20, 21).

24. Хуыцаумӕ кӕй хъусыс, уый дын абон дӕр цы пайда хӕссы?

²⁴ Не Сфӕлдисӕджы разамындмӕ куы нӕ хъусӕм, уӕд нӕ цардӕй нӕ зӕрдӕ никуы райдзӕн (Йер. 10:23). Ацы сӕры ӕркастыстӕм, Йереми коммӕгӕсдзинады тыххӕй цы ныффыста, уымӕ ӕмӕ федтам, Йегъовӕйӕн нӕ царды алы хъуыддаджы дӕр кӕй хъуамӕ дӕттӕм уый бар, цӕмӕй нын нӕ къахдзӕфтӕ араза. Уыцы хъуыддаджы дӕу та цы хъӕуы фӕхуыздӕр кӕнын? Йӕ фӕдзӕхстытӕм ын куы хъусӕм, ӕрмӕстдӕр уӕд уыдзыстӕм ӕцӕг амондджын ӕмӕ бирӕ хорздзинӕдтӕй хайджын. «Хъусут мӕм,– зӕгъы Йегъовӕ,– цӕмӕй уын уа хорз» (Йер. 7:23).