Иоанн хъусын кодта Мессийӕйы ӕрцыды тыххӕй

Захари ӕмӕ Елизаветӕйы фырт Иоанн куы сыстыр, уӕд сси пехуымпар. Иоанн Йегъовӕйы номӕй адӕмӕн дзырдта Мессийӕйы ӕрцыды тыххӕй. Фӕлӕ Иоанн адӕмы ӕмбырдгӕнӕнты ӕмӕ горӕтты нӕ ахуыр кодта. Уый хъусын кодта ӕдзӕрӕг быдыры. Адӕм ӕм цыдысты Иерусалимӕй ӕмӕ ӕнӕхъӕн Иудейӕйӕ, цӕмӕй-иу ӕм байхъуыстаиккой. Иоанн сын ӕмбарын кодта, се ’взӕр хъуыддӕгтӕ кӕй хъуамӕ ныууадзой, цӕмӕй Хуыцауы зӕрдӕ рухс кӕной. Иоанмӕ-иу чи байхъуыста, уыдонӕй-иу бирӕтӕ сӕ тӕригъӕдтыл ӕрфӕсмон кодтой, ӕмӕ-иу сын Иорданы цӕугӕдоны донаргъуыд радта.

Иоанн кодта хуымӕтӕг цард. Йӕ уӕлӕдарӕс уыд теуайы хъуынӕй конд, хӕргӕ та кодта мӕтыхтӕ ӕмӕ хъӕддаг мыд. Адӕм Иоанныл тынг дис кодтой. Суанг ма-иу сӕрбӕрзонд фарисейтӕ ӕмӕ саддукейтӕ дӕр Иоанны фенынмӕ ӕрбацыдысты. Иоанн-иу сын дзырдта: «Уе ’взӕр хъуыддӕгтӕ ныууадзут ӕмӕ ӕрфӕсмон кӕнут. Кӕд уӕхи Авраамы цот хонут, уӕддӕр афтӕ зӕгъӕн нӕй, ӕмӕ Хуыцауы сывӕллӕттӕ стут».

Иоанмӕ бирӕ адӕм цыд ӕмӕ-иу ӕй фарстой: «Цы хъуамӕ аразӕм, цӕмӕй Хуыцауы зӕрдӕ рухс кӕнӕм?» Ӕмӕ-иу сын Иоанн загъта: «Дыууӕ хӕдоны уӕ кӕмӕн ис, уый дзы иу раттӕд, ӕппындӕр кӕмӕн нӕй, уымӕн». Зоныс ӕй, афтӕ цӕмӕн дзырдта? Фӕндыд ӕй, цӕмӕй бамбӕрстаиккой иу ахсджиаг хъуыддаг: цӕмӕй Хуыцауы зӕрдӕ рухс кӕной, уый тыххӕй хъуамӕ иннӕты уарзой.

Иоанн хъалонисджытӕн загъта: «Макӕй сайут ӕмӕ рӕстӕй архайут». Ӕфсӕддонтӕн та загъта: «Гӕртӕмттӕ ма исут ӕмӕ ӕнаххосӕй макӕй аххосджын кӕнут».

Сауджынтӕ ӕмӕ йӕм левиттӕ дӕр бацыдысты ӕмӕ йӕ бафарстой: «Зӕгъ-ма нын, чи дӕ? Алкӕй дӕр уый базонын фӕнды». Иоанн сын загъта: «Ӕз дӕн, ӕдзӕрӕг быдыры чи хъӕр кӕны, уый. Ӕз адӕмы кӕнын Йегъовӕмӕ, пехуымпар Исай куыд загъта, афтӕ».

Адӕмы зӕрдӕмӕ цыди, Иоанн сын цы амыдта, уый. Бирӕтӕ афтӕ хъуыды кодтой, ӕмӕ уый у Мессийӕ. Фӕлӕ сын уый загъта: «Тагъд ӕрцӕудзӕн, мӕнӕй уӕлдӕр чи у, уый. Ӕмӕ ӕз уымӕн йӕ дзабырты бӕттӕнтӕ райхалыны аккаг дӕр нӕ дӕн. Ӕз аргъуыд дӕттын донӕй, уый та аргъуыд дӕтдзӕн сыгъдӕг тыхӕй».