«Алцыдӕр... уарзондзинадимӕ» аразут
1 Облӕстон конгрестӕ Уӕрӕсейы горӕттӕй кӕм цыдысты, уыдонӕй иу ӕмдзӕрӕны администраци загъта ахӕм ныхӕстӕ: «Бузныг стӕм Иегъовӕйы Ӕвдисӕнтӕй, нӕ кусджытӕм нын хорз цӕстӕй кӕй ракастысты, ӕмдзӕрӕны мулк кӕй хъахъхъӕдтой, уый тыххӕй». Тынг ӕхсызгон нын вӕййы, адӕмы ’хсӕн нӕхи куыд дарӕм, уый тыххӕй ахӕм ныхӕстӕ хъусын. Уый ууыл дзурӕг у, ӕмӕ ӕмткӕй райсгӕйӕ, «алцыдӕр... уарзондзинадимӕ» кӕй аразӕм (1 Кор. 16:14). Фӕлӕ нӕ уыцы иу рӕстӕджы ӕркӕсын хъӕуы иуӕй-иу хъуыддӕгтӕм, ӕмӕ сӕм нӕ хъус куы не ’рдарӕм, уӕд Хуыцауы адӕмы хорз ном гӕнӕн ис фегад кӕной.
2 Зындзинӕдтӕ цӕрӕнбынӕтты курдиӕттимӕ: Конгрестӕ цы горӕтты фӕцӕуынц, уыдонӕй алкӕцыйы дӕр вӕййы цӕрӕнуатон хайад, цӕмӕй ӕмдзӕрӕнтӕ ӕмӕ уазӕгдзӕрӕнты администрациимӕ ӕмбӕлон ӕргътыл баныхас кӕна ӕмӕ алкӕмӕн дӕр йӕ бон конгресмӕ ацӕуын суа. Мах тыххӕй не ’фсымӕртӕ бахардз кӕнынц бирӕ рӕстӕг ӕмӕ хъарутӕ. Иуӕй-иу ӕмдзӕрӕнты коменданттӕ фыццаг къаддӕр ӕргътыл нӕ разы кодтой, уымӕн ӕмӕ-иу сын уый размӕ ӕндӕр дины адӕмимӕ уыд зындзинӕдтӕ ӕмӕ сӕ уӕлдай сӕрниз сӕхицӕн нӕ фӕндыд саразын. Нӕ цӕрӕнуатон хайад-иу сын зӕрдӕ куы бавӕрдта, нӕ делегаттӕ сын сӕ уагӕвӕрдтӕ кӕй ӕххӕст кӕндзысты, уымӕй, уӕд-иу нын бирӕ уагдӕтты ӕхсызгонӕй радтой цӕрӕнбынӕттӕ.
3 Фарон цалдӕр ӕмдзӕрӕны администрацийы кусджытӕ хъаст кодтой, конгрессы делегаттӕн цы бынӕттӕ ӕрцӕттӕ кодтой, уыдонӕй бирӕтӕ афтидӕй кӕй баззадысты, уый тыххӕй. Афтӕ цӕмӕ рауад? Иуӕй-иу делегатты нал бафӕндыд ӕмдзӕрӕны цӕрын ӕмӕ уый тыххӕй никӕмӕн фехъусын кодтой. Рауад ма-иу афтӕ дӕр, ӕмӕ-иу ӕнӕхъӕн ӕмбырдтӕ бахъуаджы сахатмӕ арвыстой курдиӕттӕ ӕппӕт хъусынгӕнджытӕн цӕрӕнбынӕттӕ скӕныны тыххӕй, ӕмӕ ма цалдӕр уӕлдай бынатӕн, хъуыдыгӕнгӕйӕ, семӕ чи ӕрцӕудзӕн, уыдонӕн уымӕй кӕй баххуыс кӕндзысты; фӕлӕ курдиӕттӕ кӕй тыххӕй арвыстой, уыдонӕй бирӕтӕ райдианӕй дӕр хъавыдысты ӕндӕр конгресмӕ цӕуынмӕ. Куы-иу ӕрцыдысты, уӕд-иу рабӕрӕг, ӕрмӕстдӕр хъусынгӕнджытӕн се ’рдӕг кӕй ӕрцыд. Ӕмдзӕрӕнты кусджытӕ загътой, зӕгъгӕ, Иегъовӕйы Ӕвдисӕнты делегаттӕ ныронг афтӕ никуы кодтой.
4 Уыдӕтты тыххӕй фӕзыны зындзинӕдтӕ куыд ӕмдзӕрӕнты ӕмӕ уазӕгдзӕрӕнты, афтӕ конгрестӕ цӕттӕ кӕныны хъуыддаджы дӕр. Уыдон нӕ делегаттӕн ӕрцӕттӕ кӕнынц бынӕттӕ кӕнӕ агъуысты кӕцыдӕр хай ӕмӕ сӕ ныфс вӕййы, иууылдӕр сӕ кӕй бацахсдзысты, фӕлӕ дзы конгрессы рӕстӕджы, куыд зыны, афтӕмӕй афтид бынӕттӕ баззайы. Кӕд дарддӕр дӕр афтӕ уа, уӕд сомбон уыцы уазӕгдзӕрӕнтӕ ӕмӕ ӕмдзӕрӕнты администрациимӕ конгресты рӕстӕджы зын уыдзӕн баныхасгӕнӕн. Цӕмӕй уымӕй нӕхи бахизӕм, уый тыххӕй хъуамӕ курдиӕттӕ ӕрвитӕм, ӕцӕгӕйдӕр нӕ цал бынаты хъӕуы, уымӕн. Кӕд дӕ фӕнды, цӕмӕй дын цӕрынӕн бынат уа, уӕд курдиат дӕхӕдӕг байдзаг кӕн. «Сӕрмагонд домӕнтӕ кӕмӕн ис, уыцы адӕмӕн бынат скӕныны курдиат» дӕ конгрессы цӕрӕнуатон хайадмӕ арвыстай?
5 Алкӕмӕн дӕр хорздзинад кӕнын: Иегъовӕ ӕмӕ адӕмы кӕй уарзӕм, уый нӕ разӕнгард кӕны, цӕмӕй уӕм ӕгъдауджын ӕмӕ нӕ уагахаст уа фӕзминаг (Мтф. 22:37—39; Иак. 3:13). Библи нын дзуры, цӕмӕй алкӕйдӕр уарзӕм ӕмӕ алкӕмӕн дӕр аргъ кӕнӕм (Гал. 6:10). Кӕй зӕгъын ӕй хъӕуы, уыцы принципмӕ гӕсгӕ цӕрын хъӕуы уазӕгдзӕрӕнты дӕр ӕмӕ ӕмдзӕрӕнты дӕр. Куы нӕ нӕ фӕнда цӕрӕнбынӕттӕ скӕныны хъуыддаджы кӕрӕдзийӕн ӕххуыс кӕнын, уӕд нӕ организацийыл гӕнӕн ис къӕм сбада, цӕрӕнбынӕтты ӕргътыл бандава ӕмӕ ӕфсымӕртӕ дӕр гӕнӕн ис фӕхъыг уой. Кӕд ӕмдзӕрӕнтӕ кӕнӕ ӕндӕр агъуыстытӕ къаддӕр ӕргътыл нал сразы уой, уӕд ма уыцы горӕтмӕ конгресмӕ цы делегаттӕ хъава цӕуынмӕ, уӕлдайдӕр та хатӕнӕн йӕ бон фылдӕр ӕхца бафидын кӕмӕн нӕу, уыдонӕн уый гӕнӕн ис сӕ къухы мауал бафта.
6 Мах цӕрӕнбынат скӕныны курдиат куы арвитӕм, уӕд ӕфсымӕртӕ батыхсынц, цӕмӕй нын хорз бынӕттӕ ссарой, фӕлӕ уый фӕстӕ цӕрӕнуатон хайадӕн куы нӕ зӕгъӕм, афтӕмӕй ӕндӕр ранмӕ цӕрынмӕ куы ацӕуӕм, уӕд уый нысан кӕны, цавӕрдӕр ӕфсымӕр уыцы бынат кӕй фесӕфта. Уый тыххӕй йӕ гӕнӕн ис бахъӕуа, конгресс кӕм уа, уыцы бынатӕй дарддӕр кӕнӕ ӕвзӕрдӕр уавӕрты цӕрын. Уый уарзондзинад ӕмӕ ӕнувыддзинадыл дзурӕг у? Цас хуыздӕр у, иннӕтыл дӕхицӕй фылдӕр хъуыды кӕнын, уарзондзинад ӕвдисын ӕмӕ алкӕмӕн дӕр хорздзинад кӕнын! (Мтф. 7:12; Иоан. 13:34, 35).
7 Мах тынг ӕнхъӕлмӕ кӕсӕм облӕстон конгресмӕ «Хуыцауы Ныхас ӕххӕстгӕнджытӕ». Алцыдӕр спълан кодтай, уыимӕ цӕрӕнбынат сзаказ кодтай ӕмӕ дӕхи бацӕттӕ кодтай? Уӕдӕ уазӕгдзӕрӕнты дӕр ӕмӕ конгресс цы горӕты уа, уым дӕр алкӕддӕр нӕ уагахастӕй ӕвдисӕм, нӕ зӕрдӕты ӕцӕгад кӕй ис ӕмӕ не Сфӕлдисӕджы кӕй уарзӕм, уый.