2006 азы облӕстон конгресс «Ирвӕзындзинад ӕввахс у»
1. Раджы заманты Хуыцауы адӕм, раст динӕн кӕй аргъ кодтой, уый куыд равдыстой, ӕмӕ абон уый махӕн дӕр нӕ бон куыд у равдисын?
1 Рагзаманты Иудӕйы паддзах Езеки сфӕнд кодта адӕмы Иерусалимы ӕрӕмбырд кӕнын, ӕмӕ сӕм арвыста хабархӕсджыты хуынды фыстӕджытимӕ (2 Пар. 30:6, 13). Адӕм уыцы хуындмӕ цы цӕстӕй ракастысты, уымӕй рабӕрӕг, Иегъовӕйӕн кувын сӕ куыд зӕрдиагӕй фӕндыдис, уый (2 Пар. 30:10–12). Абон Иегъовӕйӕн чи лӕггад кӕны, уыдонӕн дӕр тагъд рӕстӕджы уыдзӕн фадат, цӕмӕй хъуыддагӕй равдисой, сӕ бон иумӕ ӕмбырд кӕнын ӕмӕ Иегъовӕйӕн кувын кӕй у, уымӕн куыд тынг аргъ кӕнынц. Уӕ ӕмбырдмӕ дӕр арвыстӕуыд хуынды фыстӕг – сымах хуынд стут облӕстон конгресмӕ, «Ирвӕзындзинад ӕввахс у», зӕгъгӕ. Цы цӕстӕй ракӕсдзынӕ уыцы хуындмӕ?
2. Цӕмӕй нын конгрессы программӕ фӕахъаз уа, уый тыххӕй ныр цы у нӕ бон аразын?
2 Ныр райдай цӕттӕ кӕнын. Ӕфсымӕртӕ цӕстуарзонӕй цы программӕ бацӕттӕ кодтой, уый нын цӕмӕй фӕахъаз уа, уый тыххӕй хъуамӕ конгрессӕй иу бон дӕр ма фӕцух кӕнӕм. Хорз уаид, ныр куы райдаис цӕттӕ кӕнын, дӕхи дӕр ӕмӕ дӕ бинонты дӕр цы хъӕуы, уый, цӕмӕй программӕйы ӕртӕ боны дӕр уат (Ӕмб. 21:5). Зӕгъӕм дӕ дӕхи куыстӕй ракурын хъӕуы, кӕнӕ дӕ цардӕмбал ӕнӕуырнӕг у ӕмӕ дӕ йемӕ аныхас кӕнын хъӕуы. Йе та дӕ хъӕуы конгрессы рӕстӕгмӕ цӕрӕнбынат бацагурын. Стӕй ма – Библи кӕимӕ ахуыр кӕныс, уыдонӕн баххуыс кӕнын, иу бон дӕр куыд нӕ фӕцух кӕной. Уыцы ахсджиаг хъуыддӕгтӕ бакӕнын къуырцдзӕвӕнмӕ ма ӕрхӕсс. Стӕй хорз уаид уыдӕтты тыххӕй Иегъовӕмӕ кувын ӕмӕ йыл ныфс дарын, «Уый [кӕй] сӕххӕст кӕндзӕн» (Пс. 36:5).
3. Цӕрӕнбынӕттӕ ссарыны тыххӕй нын цы разамынд лӕвӕрдӕуы, уымӕ гӕсгӕ цӕмӕн хъуамӕ архайӕм?
3 Иегъовӕйы организаци бирӕ аразы, цӕмӕй, конгресстӕ цы горӕтты цӕудзысты, уым цӕрӕнбынӕттӕ фаг уой. Ацы хъуыддаджы удуӕлдайӕ чи фыдӕбон кӕны, уыцы ӕфсымӕртӕй бузныг куы уӕм, конгресмӕ ма цы хотӕ ӕмӕ ӕфсымӕртӕ цӕуы, уыдоныл куы хъуыды кӕнӕм ӕмӕ Хуыцауы разамындӕн куы аргъ кӕнӕм, уӕд алцыдӕр бакӕндзыстӕм ацы статьяйы лӕвӕрд уынаффӕтӕм гӕсгӕ (1 Кор. 13:5; 1 Фес. 5:12, 13; Дзут. 13:17).
4–6. Уазӕгдзӕрӕнты бынат закъазгӕнгӕйӕ нӕ зӕрдыл цы хъуамӕ дарӕм ӕмӕ цӕмӕн? (Кӕс 4-ӕм фарсыл фӕлгӕт дӕр.)
4 Ацы статья Хъусын кӕныны фембӕлды ӕвзӕрст куы ’рцӕуа, уӕд хъусинӕгты фӕйнӕгыл ауыгъд ӕрцӕудзӕн «Цӕрӕнбынӕтты номхыгъд». Курӕг дӕ стӕм, цӕмӕй бынӕттӕ заказ кӕнай 4-ӕм фарсыл фӕлгӕты амындтӕм гӕсгӕ – «Цӕрӕнбынӕтты номхыгъд»-ы цы уазӕгдзӕрӕнтӕ ис, ӕрмӕстдӕр уым, ӕмӕ дзы цы ӕргътӕ ис фыст, ӕрмӕстдӕр уыцы ӕргътыл. Курӕг дӕ стӕм, уыцы номхыгъды цы уазӕгдзӕрӕнтӕ нӕй, уыдонмӕ телефонӕй ма дзур, нӕ конгрессдзаутӕн уӕм асламдӕр аргъыл бынӕттӕ ис, зӕгъгӕ. Ахӕм уазӕгдзӕрӕнты арӕх барӕй фӕзӕгъынц, зӕгъгӕ, мах зонӕм конгрессы тыххӕй, ӕмӕ нӕм Иегъовӕйы Ӕвдисӕнтӕн ис бынӕттӕ. Ӕфсымӕрты амындтӕм гӕсгӕ куы архайай, уӕд-иу алы аз дӕр сӕ бон уыдзӕн хорз цӕрӕнбынӕттӕ ссарын ӕмӕ асламдӕр аргъыл баныхас кӕнын (1 Кор. 14:40).
5 Ахсджиаг у, цӕмӕй дӕ ӕцӕг цал бынаты бахъӕудзӕн, уымӕй фылдӕр ма закъаз кӕнай. Дӕ хорзӕхӕй, ӕндӕр искӕмӕн бынӕттӕ ма закъаз кӕн, семӕ рагацау куы нӕ баныхас кӕнай ӕмӕ сын сӕ нӕмттӕ куы нӕ зонай, уӕд. Науӕд иннӕтӕн зын уыдзӕн бынат ныззакъаз кӕнын, уымӕн ӕмӕ афтӕ зындзӕн, цыма бынӕттӕ уыйбӕрц нал ис. Алы хицӕн уат дӕр хъуамӕ фыст уа, чи дзы цӕрдзӕн, уыдонӕй сӕ иуы номыл.
6 Цӕмӕй дӕ закъаз дӕ номыл баззайа, уый тыххӕй дӕ йӕ аргъӕй цасдӕр хъӕудзӕн рагацау бафидын. Науӕд уазӕгдзӕрӕны кусджытӕн сӕ бон у дӕ уат ӕндӕр искӕмӕн раттын. Номхыгъды цы уазӕгдзӕрӕнтӕ ис амынд, уыдонӕй бынӕттӕ куы никӕцыйы разына, кӕнӕ та дӕм цыдӕр фарста куы уа, уӕд фехъусын кӕн де ’мбырды секретарӕн. Уый хъуамӕ фӕдзура уыцы конгрессы цӕрӕнуаты хайадмӕ (филиалмӕ нӕ), номхыгъды уӕлейӕ цы фыст ис, уымӕ гӕсгӕ. Номхыгъды цы уазӕгдзӕрӕн нӕй амынд, уырдӕм дзурыны бӕсты уал хуыздӕр уаид банхъӕлмӕ кӕсын, цалынмӕ, ды кӕдӕм цӕуинаг дӕ, уыцы конгрессы цӕрӕнуаты хайад уазӕгдзӕрӕнты фӕстаг номхыгъд нӕ ӕрӕрвита, уӕдмӕ.
7, 8. Фӕкӕсын кӕмӕ хъӕуы, уыдонӕн куыд баххуыс кӕнӕн ис?
7 Ӕххуыс, уӕлдай тынгдӕр фӕкӕсын кӕмӕ хъӕуы, уыдонӕн. Ӕмбисӕндты 3:27 фыст ис: «Дӕ къух дӕ куы амона, уӕд, ӕххуысхъуаг чи у, уыдонӕн хорздзинад ракӕнын ма бавгъау кӕн». Конгрессыл куы цӕуа дзырд, уӕд куыд у дӕ бон иннӕтӕн хорздзинад ракӕнын? Ацӕргӕ кӕнӕ рынчын хотӕ ӕмӕ ӕфсымӕртӕ, ӕххӕстрӕстӕг лӕггадгӕнджытӕ ӕмӕ ӕндӕрты, чи зоны, хъӕуа ӕххуыс конгресмӕ ацӕуынӕн ӕмӕ цӕрӕнбынат ссарынӕн. Ахӕмтыл хъуамӕ сӕйраджыдӕр тыхсой сӕ хӕстӕджытӕ (1 Тим. 5:4). Фӕлӕ кӕд уыдонӕн уый фадат нӕй, уӕд уыцы хъусынгӕнджытӕн гӕнӕн ис, ӕмӕ се ’муырнджытӕ баххуыс кӕной (Гал. 6:10). Чиныгахуыры цӕстдарджытӕ хъуамӕ батыхсой ууыл, цӕмӕй, сӕ къорды ӕххуыс кӕй хъӕуы, уыдонӕн сӕ хъуыддӕгтӕ рагацау спълан кӕной.
8 «Ӕххуыс кӕй хъӕуы, уыдонӕн бынат скӕныны курдиат» раттӕн ис, бинонтӕ кӕнӕ ӕмбырдӕн куы нӕ уа сӕ бон уыцы хъусынгӕнджытӕн баххуыс кӕнын, ӕрмӕстдӕр уӕд. Ӕмбырды комитеты ахӕм хъусынгӕнджыты уавӕртӕм ӕркӕсын хъӕуы курдиаты фыст амындтӕм гӕсгӕ, стӕй ма, 2004 азы 14 декабрӕй ӕппӕт хистӕр нӕлгоймӕгты советтӕм дӕр цы фыстӕг ӕрвыст ӕрцыд, уымӕ гӕсгӕ дӕр. Ацы ӕххуыс у ӕрмӕстдӕр, фӕзминаг чи у ӕмӕ хӕрзӕгъдау сывӕллӕттӕ кӕмӕн ис, уыцы чырыстӕттӕн.
9. а) Не ’мбырд кӕдӕм у нысангонд, уыцы конгресмӕ цӕмӕн хъуамӕ ацӕуӕм? ӕ) Дӕ уавӕртӕм гӕсгӕ дӕ ӕндӕр конгресмӕ цӕуын куы хъӕуа, уӕд дӕ цы бакӕнын хъӕуы?
9 Ӕндӕр конгресмӕ куы цӕуай. Хорз уаид, алы хъусынгӕнӕг дӕр, йе ’мбырд кӕдӕм у нысангонд, уыцы конгресмӕ куы ацӕуид, цӕмӕй конгрессы рӕстӕджы фаг кӕной бадӕн бынӕттӕ, литературӕ, цӕрӕнбынӕттӕ ӕмӕ афтӕ дарддӕр. Дӕ уавӕртӕм гӕсгӕ дӕ ӕндӕр конгресмӕ цӕуын куы хъӕуа, уӕд филиалмӕ ма дзур, фӕлӕ де ’мбырды секретары бафӕрс, ӕмӕ дын уый зӕгъдзӕн, кӕм ӕмӕ кӕд цӕудзӕн конгресс. Кӕд дӕ уӕлдай ӕххуыс хъӕуа, уӕд дӕ бон у де ’мбырды секретарӕй райсын бланк «Ӕххуыс кӕй хъӕуы, уыдонӕн бынат скӕныны курдиат» (СО-5). Байдзаг ӕй кӕн ӕмӕ йӕ фӕстӕмӕ секретармӕ ратт. Кӕд дӕ фӕнды, уӕд бланкы къопи дӕхимӕ ныууадз. Курӕг дӕ стӕм, цӕмӕй цӕрӕнбынаты тыххӕй филиалмӕ ма фыссай, Санкт-Петербургмӕ куы цӕуай конгресмӕ, уӕд дӕр. Цӕрӕнбынӕтты номхыгъд йе та ӕндӕр исты базоныны тыххӕй курдиат куы ӕрвитай, кӕнӕ секретарӕн бланк СО-5 куы дӕттай, уӕд ын йемӕ ма ферох кӕн нывӕрын къонверт маркӕтимӕ ӕмӕ дӕ адрисимӕ. Цы горӕтмӕ цӕуай, уым цалдӕр конгрессы куы уа, уӕд ӕнӕмӕнг фӕнысан кӕн, конгресстӕй кӕцыйы уыдзынӕ, уый.
10. Куыд у нӕ бон, ӕмӕ облӕстон конгрессы фылдӕр циндзинад ссарӕм?
10 Ӕнӕзивӕг бархи кусджытӕ. Конгресмӕ чи ацӕуы, уыдон байхъусынц уырнындзинадӕн ахъаз программӕмӕ ӕмӕ зӕрдӕбын ныхас фӕкӕнынц се ’фсымӕртимӕ. Ӕмӕ сӕ уый алкӕмӕндӕр, кӕй зӕгъын ӕй хъӕуы, стыр цины хос у. Фылдӕр циндзинад та ссардзыстӕм, конгрессимӕ баст хъуыддӕгты ӕнӕзивӕгӕй куы балӕггад кӕнӕм, уӕд (Ап. к. 20:35). Тагъд рӕстӕджы бынӕттон Конгрессы комитет ӕххуысмӕ фӕсиддзӕн. Дӕуӕн дӕ бон уыдзӕн балӕггад кӕнын? (Пс. 109:3).
11. Ӕрвылаз нын цы облӕстон конгресстӕ вӕййы, уыдонӕн цӕмӕн аргъ кӕныс ӕмӕ цы хъуамӕ аскъуыддзаг кӕнай?
11 Иу облӕстон конгрессы иу фондзаздзыд лӕппу загъта: «Облӕстон конгрессӕй тынгдӕр ницы уарзын!». Уыцы зӕрдиаг ныхӕстӕй не ’ппӕт дӕр хуыздӕр ӕмбарӕм, ӕрвылаз дӕр цы облӕстон конгресстӕ вӕййы, уыдон ӕцӕгдӕр стыр арфӕдзинад кӕй сты. Уый у, растдӕр, псаломзарӕггӕнӕг куыд зарыд, афтӕ: «Иу бон Дӕу кӕрты уӕвын хуыздӕр у мин бонӕй» (Пс. 83:11). Давид дӕр фыста, кӕй йӕ фӕндыд, цӕмӕй уа Иегъовӕйы «хӕдзары [йӕ] царды ӕппӕт бонты... ӕмӕ бӕрӕг кӕна Йӕ кувӕндон» (Пс. 26:4). Давидӕн тынг ӕхсызгон уыди, Иегъовӕйы лӕггадгӕнджыты ’хсӕн уа, уый. Цӕй уӕдӕ мах дӕр Давидау аргъ кӕнӕм, ӕцӕг Хуыцауӕн кӕй кувӕм, уымӕн, ӕмӕ ӕртӕ боны дӕр уӕм облӕстон конгрессы, «Ирвӕзындзинад ӕввахс у», зӕгъгӕ.
[Рамкӕ 3 фарсыл]
Конгрессы рӕстӕг
Майрӕмбон ӕмӕ сабаты
9.30 – 17.05
Хуыцаубоны
9.30 – 16. 10
[Рамкӕ 4 фарсыл]
Куыд хъӕуы уазӕгдзӕрӕны бынаты тыххӕй баныхас кӕнын
1. Уазӕгдзӕрӕнтӕм фӕдзур сӕ куысты рӕстӕг, «Цӕрӕнбынӕтты номхыгъд»-ы амынд телефоны номыртӕй.
2. Уазӕгдзӕрӕны кусджытӕн зӕгъ, Иегъовӕйы Ӕвдисӕнты конгресмӕ кӕй цӕуыс.
3. Бӕлвырд бамбарын кӕн, уазӕгдзӕрӕнмӕ цы бон ӕрцӕудзынӕ ӕмӕ цы бон ацӕудзынӕ, уый.
4. Кӕцыдӕр уазӕгдзӕрӕны бынат куы нӕ уа, уӕд номхыгъды амынд уазӕгдзӕрӕнтӕй ӕндӕрмӕ фӕдзур.
5. «Цӕрӕнбынӕтты номхыгъд»-ы цы ӕргътӕ ис амынд, уыдонӕй фылдӕр ма бафид.
6. Бынатыл баныхас кӕн ӕмӕ сын зӕгъ, цӕмӕй дын фехъусын кӕной, разы сты ӕви нӕ.
7. Цы рӕстӕг дын зӕгъой, уыцы рӕстӕджы дӕргъы бынаты аргъӕй иу-цасдӕр бафид банчы карточкӕйӕ кӕнӕ та йӕ арвит постӕй. Ӕхца къонверты макуы ӕрвит. Зӕрдыл дарын хъӕуы уый, ӕмӕ иуӕй-иу уазӕгдзӕрӕнтӕ бынат рагацау ӕххуырсыны тыххӕй исынц уӕлдай ӕхца.
Уынаффӕтӕ
◼ Ӕрлӕуу-иу, ӕрмӕстдӕр «Цӕрӕнбынӕтты номхыгъд»-ы цы уазӕгдзӕрӕнтӕ ис, уыдонӕй искӕцыйы.
◼ Баныхас кӕн, цал бынаты дӕ бахъӕудзӕн, ӕрмӕстдӕр уалы тыххӕй.
◼ Дӕ фыццаг бадзырд ма аив (Матф. 5:37).
◼ Уаты цал адӕймагӕн ис цӕрӕн, уымӕй фылдӕр дзы хъуамӕ ма цӕра.