Иегъовӕйы Ӕвдисӕнты облӕстон конгресс 2002-ӕм азӕн «Паддзахады ӕнувыд хъусынгӕнджытӕ»
1 «Сцин кодтон ӕз, куы загътой мӕнӕн: „цом Хицауы [«Иегъовӕйы», НД] хӕдзармӕ“» (Пс. 121:1). Псаломзарӕггӕнӕджы ныхӕстӕ кӕсгӕйӕ ма дӕ хъус ӕрдар: 1) йе ’нкъарӕнтӕм, Иегъовӕйы хӕдзармӕ йӕ куы фӕхуыдтой, уӕд; 2) йӕ хӕлӕрттӕм, раст кувынадыл йӕхи хуызӕн ӕнувыд чи уыд, уыдонмӕ, ӕмӕ 3) куыд батыхстысты, цӕмӕй зонгӕты фӕхуыдтаиккой, иумӕ ӕрӕмбырд уыдаиккой ӕмӕ Хуыцауы хӕдзармӕ ацыдаиккой.
2 Куы фехъусӕм конгресс цӕттӕ кӕныны тыххӕй, уӕд псаломзарӕггӕнӕгау не сцин кӕнӕм мах дӕр? Бӕгуыдӕр, нӕ зӕрдӕ дзаг вӕййы ивгъуыд конгресты циндзинадӕй, ӕмӕ та ӕнӕрхъӕцӕй фенхъӕлмӕ кӕсӕм нӕ иннӕ сӕрмагонд фембӕлдмӕ. Беларусы, Гуырдзыстоны, Уӕрӕсейы, Таджикистаны, Хъазахстаны ӕмӕ Хъыргъызстаны цӕттӕ кӕнынц 2002-ӕм азы ӕртӕбойнон облӕстон конгресстӕ «Паддзахады ӕнувыд хъусынгӕнджытӕ». Ныр хъӕуы алцы дӕр афтӕ спълан кӕнын, цӕмӕй нӕм цы монон куывд ӕнхъӕлмӕ кӕсы, уырдӕм ацӕуӕм ӕмӕ дзы фылдӕр пайда райсӕм.
3 «Ӕууӕнкджын ӕмӕ ӕмбаргӕ хӕдзармӕгӕсӕг» райдыдта афойнадыл цӕттӕ кӕнын монон хӕринаг конгрессӕн (Лук. 12:42). Алы ӕмбырд дӕр нысангонд у бӕрӕг конгресмӕ, цӕмӕй конгрессы алкӕмӕндӕр уа бынат ӕмӕ уым ӕввахс цы уазӕгдзӕрӕнтӕ уа, уырдӕм уыциу рӕстӕг ӕгӕр бирӕ адӕм ма ӕрцӕуа. Уыимӕ иумӕ, ӕфсымӕртӕй бирӕтӕ райдыдтой цӕттӕ кӕнын конгрессы алыхуызон хайӕдтӕ, цӕмӕй «алцыдӕр... уа ӕфсармимӕ ӕмӕ ӕгъдауыл» (1 Кор. 14:40). Цӕмӕй конгрессы рӕстӕджы мацӕуыл стыхсӕм, уый тыххӕй бирӕ цыдӕртӕ арӕзт кӕй цӕуы, уымӕ гӕсгӕ махӕн та куыд у нӕ бон конгресмӕ цӕттӕ кӕнын?
4 Абон аскъуыддзаг кӕн, конгрессы ӕртӕ боны дӕр кӕй уыдзынӕ. Куыстӕй дӕ дӕхи ракурын нӕ хъӕуы, цӕмӕй де ’мбырдимӕ конгресмӕ ацӕуай ӕмӕ дзы иу бон дӕр ма рауадзай? Иегъовӕ ӕмбары, иуӕй-иу куыстуӕтты хицӕуттӕ «тызмӕг» кӕй сты, уый (1 Пет. 2:18). Фӕлӕ нӕ конгресстӕ тынг ахсджиаг сты, ӕмӕ мах фӕнды ӕппӕт тыхтӕй дӕр архайын, цӕмӕй программӕйӕ иу хай дӕр ма рауадзӕм. Уый тыххӕй Иегъовӕмӕ кув, кур дзы разамынд, цӕмӕй уый дӕ къухы бафта (Неем. 2:4).
5 Цӕрӕнбынат равзарынӕн спайда кӕн «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд»-ӕй. Тагъд рӕстӕджы уе ’мбырд райсдзӕн конгрессӕн «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд». Бынат сзаказ кӕн, 4-ӕм фарсыл рамкӕйы цы амындтӕ ис, уыдонмӕ гӕсгӕ.
6 Уазӕгдзӕрӕнӕн йӕ бон кӕмӕн нӕу бафидын, сӕрмагондӕй ахӕм хъусынгӕнджытӕн цӕрӕнуатон хайад баныхас кӕны асламдӕр бынӕттыл ӕмдзӕрӕнты ӕмӕ ӕндӕр агъуыстыты. Цӕрӕнуатон хайад цалынмӕ курдиӕттӕ нӕ райса, уӕдмӕ йӕ бон нӕу бынӕтты тыххӕй бадзырд скӕнын ӕмдзӕрӕнтӕ ӕмӕ ӕндӕр агъуыстытимӕ. Кӕд конгресмӕ ӕндӕр горӕтмӕ цӕуыс, уӕд дӕ хъӕуы райсын уыцы конгрессы бланк «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд». Ӕмбырды секретарь дын ратдзӕн уыцы конгрессы бюройы адрис, уый ис «Сӕрмагонд домӕнтӕ кӕмӕн ис, уыцы адӕмӕн бынат скӕныны курдиат»-ы бланкы иннӕ фарсыл. Дӕ курдиат куы ӕрвитай, уӕд ын йемӕ нывӕр маркӕ ӕмӕ къонверт дӕ адрисимӕ. Цы горӕтмӕ цӕуай, уым цалдӕр конгрессы куы уа, уӕд ӕнӕмӕнг фӕнысан кӕн, цы конгрессы уыдзынӕ, уый цы бонты цӕудзӕнис.
7 Истӕуыл куы фӕтыхсай, уӕд, дӕ хорзӕхӕй, уый тыххӕй де ’мбырды секретары уылты фехъусын кӕн конгрессы цӕрӕнуатон хайадмӕ. («Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд»-ы цы уазӕгдзӕрӕнтӕ уа амынд, уыдонӕй уал алкӕмӕдӕр фӕдзур ӕмӕ сӕм бынат куы нал уа, уӕд ӕрмӕстдӕр уый фӕстӕ фехъусын кӕн ӕмбырды секретарӕн). Дӕ конгрессы цӕрӕнуатон хайады адрис ӕмӕ телефоны номыр ссарӕн ис «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд»-ы фыццаг фарсыл, уӕлейӕ.
8 Дӕ цӕст ахӕсс ӕмбырдыл. Куы зонӕм, не ’фсымӕртӕ ӕмӕ нӕ хотӕй кӕмӕндӕр конгресмӕ ацӕуын йӕ бон кӕй нӕу — йе ’нӕниздзинад ӕй кӕй нӕ уадзы кӕнӕ йӕ йӕ къух кӕй нӕ амоны, уый тыххӕй — уӕд нӕ уарзондзинад нӕ «ауӕрӕх кӕндзыстӕм», ӕмӕ йын истӕмӕй нӕ баххуыс кӕндзыстӕм? (2 Кор. 6:12, 13, НД; Дык. з. 15:7). Ахӕм зӕрдӕйы уаг ӕвдисынмӕ разӕнгард кодта Павел йе ’рвысты 2 Коринфӕгтӕм 8:14-ӕм стихы. Цӕуылнӕ ис уыдоны немӕ конгресмӕ акӕнӕн? Кӕд пионертӕ сты, уӕд дын фӕндагыл бирӕ цымыдисаг цаутӕ радзурдзысты. Кӕд ацӕргӕ чырыстӕттӕ сты, уӕд та дын радзурдзысты, ды кӕй никуыма фехъуыстай, ахӕм диссаджы хабӕрттӕ сӕ лӕггаддзинадӕй. Ахӕм ӕфсымӕртӕ ӕмӕ хотӕн рӕстӕг куы ссарай, уӕд уый хорзырдӕм нӕ фӕзындзӕн дӕуыл дӕр ӕмӕ дӕ бинонтыл дӕр? Дӕ хӕларзӕрдӕдзинадӕй уыдон дӕр бузныг уыдзысты ӕмӕ дын Иегъовӕ дӕр раарфӕ кӕндзӕн (Ӕмб. 28:27; Матф. 10:42).
9 Сӕрмагонд домӕнтӕ кӕмӕн ис, уыдоныл кӕд сӕйраджыдӕр сӕ чырыстон хӕстӕджытӕ тыхсынц, уӕддӕр сын ӕмбырды сӕ уавӕр чи зоны, уыдонӕн — хистӕр нӕлгоймӕгтӕ ӕмӕ иннӕ хъусынгӕнджытӕн дӕр сӕ бон у зӕрдӕхӕларӕй баххуыс кӕнын (1 Тим. 5:4). «Сӕрмагонд домӕнтӕ кӕмӕн ис, уыцы адӕмӕн бынат скӕныны курдиат»-ы бланктӕ чи байдзаг кӕна, уыдон сӕ ӕмбырды службӕйон комитетмӕ куы радтой, уӕд комитет алкӕцы курдиатмӕ дӕр ӕркӕсдзӕн, цалынмӕ сӕ цӕрӕнуатон хайадмӕ арвита, уӕдмӕ. Ӕмбырды секретарь бланкыл хъуамӕ ныффысса йӕ телефоны номыр, цӕмӕй цӕрӕнуатон хайады исты фарстытӕ куы фӕзына, уӕд ӕм фӕдзурой. Службӕйон комитет рекомендаци кӕмӕн радта, уыдоны бланктӕ хъӕуы арвитын, бланкы иннӕ фарсыл амынд адрисыл.
10 Цӕттӕ у бархи кусӕгӕй лӕггад кӕнынмӕ. Конгрессы рӕстӕджы сӕдӕгай бархи кусджытӕ феххуыс кӕнынц алыхуызон хайӕдты хорз куыстӕн. Уагдартӕ, программӕ кӕм фӕцӕуы, уым ӕрбацӕуджытӕн феххуыс кӕнынц бынӕттӕ ссарынӕн ӕмӕ нын программӕйы рӕстӕджы сӕ хъус фӕдарынц нӕ машинӕтӕм. Мах зонынц сыгъдӕг адӕмӕй, ӕмӕ уыцы хорз ном бахъахъхъӕнынӕн ӕххуыс кӕны Сыгъдӕгдзинады хайад, нӕ кувынады рӕстӕгмӕйы бынат, цы вӕййы, уымӕй сыгъдӕгдӕрӕй кӕй ныууадзы. Нӕ бон нӕу ацы хайады кӕнӕ ӕндӕр хайӕдты, не ’ххуыс кӕм хъӕуа, уым бакусын? Цӕттӕ уыдзынӕ де ’фсымӕртимӕ «уӕхски-уӕхск» лӕггад кӕнын? (Соф. 3:9).
11 Нӕ хъуыддӕгтӕ нын адӕм ӕцӕгӕйдӕр фиппайынц? Фарон облӕстон конгрессы рӕстӕджы не ’фсымӕртӕ цы уазӕгдзӕрӕны ӕрлӕууыдысты, уым куыста иу лӕг, 20 азы размӕ Иегъовӕйы Ӕвдисӕнтимӕ Библи чи ахуыр кодта, ахӕм. Уый Ӕвдисӕнтӕн загъта, кӕй йӕ фӕнды райдайын ногӕй Библи ахуыр кӕнын ӕмӕ ӕмбырды фембӕлдтӕм цӕуын. Цӕмӕн? Уымӕн ӕмӕ, уазӕгдзӕрӕны цы Ӕвдисӕнтӕ цард, уыдоны хӕларзӕрдӕ ахаст ын йӕ зӕрдӕ бацагайдта.
12 Уазӕгдзӕрӕны уӕйгӕнджытӕй иу не ’фсымӕртӕн загъта: «Нӕ уазӕгдзӕрӕнты чи ӕрлӕууы, уыдонӕй сымах иууыл хуыздӕр стут. Уӕ адӕм уыцы сабыр ӕмӕ уӕздан сты». Куыд ӕхсызгон у, ӕвӕдза, нӕ уӕларвон Фыдӕн, Йесойы амындмӕ гӕсгӕ кӕй архайӕм, уый: «Афтӕ ӕрттивӕд уӕ рухс адӕмы раз, цӕмӕй уыдон уыной уӕ хорз хъуыддӕгтӕ ӕмӕ кадджын кӕной уӕ Уӕларвон Фыды»! (Матф. 5:16, НФ).
13 Цӕй уӕдӕ мах дӕр хъуыды кӕнӕм паддзах Давидау, уый Иегъовӕйы хӕдзармӕ ацӕуынмӕ цингӕнгӕйӕ ӕнхъӕлмӕ каст. Нӕ облӕстон конгресстӕ сты ахсджиаг мадзал монон хӕринаг исынӕн ӕмӕ дӕттынц диссаджы фадат нӕ ӕфсымӕртӕ ӕмӕ хотимӕ ӕмбӕлынӕн. Уӕдӕ дӕ зӕрдиагӕй курӕг стӕм, цӕмӕй райдайай дӕхи цӕттӕ кӕнын ацы азы облӕстон конгресмӕ «Паддзахады ӕнувыд хъусынгӕнджытӕ», цӕмӕй ӕртӕ боны дӕр ӕмӕ программӕйы алы хайы дӕр уай!
[Рамкӕ 3 фарсыл]
Конгрессы расписани
Майрӕмбон ӕмӕ сабаты
9.30—17.00
Хуыцаубоны
9.30 — 16.00
[Рамкӕ 4 фарсыл]
Куыд хъӕуы цӕрӕнбынат заказ кӕнын
1. Уазӕгдзӕрӕнмӕ фӕдзур кусгӕ сахатты, цас тагъддӕр, уыйас хуыздӕр. Спайда кӕн бланк «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд»-ы бланкыл цы телефоны номыртӕ ис, уыдонӕй фӕдзур.
2. Зӕгъ сын, Иегъовӕйы Ӕвдисӕнты конгресмӕ кӕй цӕуыс, уый тыххӕй.
3. Зӕгъ сын, уазӕгдзӕрӕны цы бонты уыдзынӕ, уый.
4. Базон, «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд»-ы цы ӕргътӕ ис амынд, уыдонмӕ гӕсгӕ кӕй фидыс бынатӕн. Фылдӕр ма бафид.
Курӕг дӕ стӕм:
◼ Ӕрбынат кӕн, ӕрмӕстдӕр «Номхыгъд»-ы цы уазӕгдзӕрӕнтӕ, ӕмдзӕрӕнтӕ ӕмӕ цӕрӕнуӕттӕ ис, уым.
◼ Ныззаказ кӕн, ӕцӕгдӕр дӕ цал бынат бахъӕудзӕн, ӕрмӕстдӕр уал.
◼ Дӕ фыццаг заказ ма аив.
Сӕрмагонд домӕнтӕ кӕмӕн ис, уыцы адӕмӕн бынат скӕныны тыххӕй курдиат бадӕттын куыд хъӕуы:
1. Уый тыххӕй дӕ нӕ хъӕуы фыстӕг фыссын, телефонӕй дзурын ӕмӕ а. д.
2. Раст байдзаг кӕн бланк «Сӕрмагонд домӕнтӕ кӕмӕн ис, уыцы адӕмӕн бынат скӕныны курдиат».
3. Дӕ бланк байдзаг кӕн, куыддӕриддӕр ӕмбырды фехъусын кӕной, «Амынд цӕрӕнбынӕтты номхыгъд» кӕй райстой, уый.
4. Дӕ зӕрдыл дар, ӕппӕт хӕрдзтӕ дӕр дӕхӕдӕг кӕй хъуамӕ бафидай.
5. Ӕргъты тыххӕй кӕс «Амынд цӕрӕнбынӕтты номхыгъд»-мӕ.