Иегъовӕйы Ӕвдисӕнты облӕстон конгресс 2001-ӕм азы «Хуыцауы Ныхас амонджытӕ»
1 Пехуымпар Исай Иегъовӕйы схуыдта Номдзыд Ахуыргӕнӕг. Уый нӕм фыдау дзуры: «Мӕнӕ фӕндаг. Цӕут ыл, адӕм» (Ис. 30:20, 21). Фӕлӕ нын Иегъовӕ зонд амонынӕн цы дзуры, уый куыд фехъусӕм? Иегъовӕ йӕ адӕмимӕ дзуры Библийы уылты ӕмӕ ма «ӕууӕнкджын ӕмӕ зондджын цагъар» кӕй цӕттӕ кӕны, уыцы библион публикациты, фембӕлдты, районон ӕмӕ облӕстон конгресты уылты (Матф. 24:45). Мах хъуамӕ бузныг уӕм Иегъовӕйӕ, цы фӕндагыл нӕ хъӕуы цӕуын, ууыл нӕ кӕй кӕны, уый тыххӕй.
2 Алы аз дӕр нын облӕстон конгресты рӕстӕджы вӕййы фадат не ’муырнджытимӕ ӕрӕмбырд уӕвынӕн ӕмӕ Иегъовӕйы амындтӕм лӕмбынӕг хъусынӕн. Фарон облӕстон конгрестӕм «Хуыцауы ныхас ӕххӕстгӕнджытӕ» ӕрбацыд 138 155 адӕймаджы ӕмӕ уый ахъаз фӕци сӕ уырнындзинадӕн. 2001 азы ӕртӕ боны цӕудзысты облӕстон конгрестӕ «Хуыцауы Ныхас амонджытӕ» Белорусы, Гуырдзыстоны, Хъазахстаны, Хъыргъыстаны ӕмӕ Уӕрӕсейы. Мах ӕй зонӕм, кӕй дӕ фӕнды дӕ хъуыддӕгтӕ афтӕ саразын, цӕмӕй конгрессы уай, ӕмӕ дын ӕххуысӕн бацӕттӕ кодтам ацы амындтӕ.
3 Бынӕттӕ скӕныны фӕтк. Нӕ территорийы бынӕттӕ кӕнынц дыууӕ хуызмӕ гӕсгӕ. Фыццаг: цӕрӕнбынӕттӕ лӕвӕрд цӕуынц уазӕгдзӕрӕнты. Делегаттӕ хъуамӕ сӕхӕдӕг фӕдзурой, «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд»-ы цы уазӕгдзӕрӕнтӕ ис, уыдонмӕ ӕмӕ баныхас кӕной цӕрӕнбынаты тыххӕй. Дыккаг: цӕрӕнбынат лӕвӕрд цӕуы сӕрмагонд домӕнтӕм гӕсгӕ. Январы фыццаг къуыримӕ уе ’мбырдмӕ ӕрвыст ӕрцӕудзӕн, уӕ конгрессы рӕстӕджы кӕм цӕрдзыстут, уыцы «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд». Бынат куы заказ кӕнай, уӕд архай, ацы уӕлӕмхасӕн сыфы рамкӕйы «Цӕрӕнбынат ӕвзаргӕйӕ цы аразын хъӕуы» цы фыст ис, уымӕ гӕсгӕ. Фӕдзур, «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд»-ы цы уазӕгдзӕрӕнтӕ ис, уыдонмӕ. Цалынмӕ ӕмбырды секретарӕн зӕгъай, бынӕттӕ нӕй зӕгъгӕ, уӕдмӕ уал сбӕлвырд кӕн, «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд»-ы цы уазӕгдзӕрӕнтӕ ис, уыдонмӕ се ’ппӕтмӕ дӕр кӕй фӕдзырдтай, уый. Кӕд дзы нӕй, уӕд секретарь спайда кӕндзӕн, номхыгъды сӕрмӕ цы адрис ӕмӕ телефон ис, уыдонӕй, фӕдзурдзӕн цӕрӕнуатон хайадмӕ ӕмӕ ӕфсымӕртӕн уавӕр бамбарын кӕндзӕн. Уе ’мбырдмӕ ӕрвыст ӕрцӕудзӕн ног номхыгъд. Дӕ хорзӕхӕй, цы бынат равзарай, уый мауал аив. Ног номхыгъды ис уӕлӕмхасӕн уазӕгдзӕрӕнтӕ, ӕмдзӕрӕнтӕ ӕмӕ ӕндӕр агъуыстытӕ, бынат чи сзаказ кодта, уыдонӕн нӕ, фӕлӕ бынат кӕмӕн нӕй, уыдонӕн. Ацы амынд ӕххӕстгӕнгӕйӕ, нӕ бон у не ’мчырыстӕттӕм уарзондзинад равдисын ӕмӕ ацы дунейы хиуарзон ахастӕй нӕхи бахизын (1 Кор. 10:24).
4 Конгрессы размӕ кӕнӕ йӕ фӕстӕ истӕуыл куы фӕтыхсай, уӕд дӕ бон у спайда кӕнын «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд»-ы фыст цӕрӕнуатон хайады адрис ӕмӕ телефонӕй. Конгрессы рӕстӕджы истӕуыл куы фӕтыхсай, уӕд фехъусын кӕн конгрессы цӕрӕнуатон хайадмӕ, цӕмӕй дын баххуыс кӕной, цалынмӕ ма уазӕгдзӕрӕны уай, уӕдмӕ.
5 Сӕрмагонд домӕнтӕ. Сӕйраг зындзинад уый мидӕг ис, ӕмӕ аслам цӕрӕнбынӕттӕ нӕ фаг кӕны, ӕмӕ уымӕ гӕсгӕ цӕрӕнуатон хайад фӕархайы скъолаты, спортзалты, сӕрдыгон лагерты ӕмӕ ӕндӕр агъуыстыты хицӕуттимӕ баныхас кӕныныл. Уыцы агъуыстытӕ вӕййынц асламдӕр, фӕлӕ дзы, кӕй зӕгъын ӕй хъӕуы, нӕ вӕййы хорз уавӕртӕ цӕрынӕн ӕмӕ улӕфынӕн. Алы бинонтӕ дӕр ӕмӕ ӕмбырды уӕнгтӕ дӕр хъуамӕ ӕмбарой, ацӕуынӕн сӕ цы хӕрдзтӕ бахъӕудзӕн скӕнын, уыдоныл сӕхӕдӕг кӕй хъуамӕ батыхсой ӕмӕ рагацау ӕхца бавӕрой, цӕмӕй сӕ бон уа хорз уавӕрты цӕрын ӕмӕ алы бон дӕр конгрессы фӕстӕ улӕфын. Ацӕргӕ адӕм, инвалидтӕ, ӕххӕстрӕстӕг лӕггадгӕнджытӕ ӕмӕ ма ӕмбырды зын уавӕртӕ кӕмӕн ис, уыцы ӕфсымӕртӕ ӕмӕ хоты бон у конгресмӕ ацӕуынӕн ӕххуыс курын. Кӕд хӕстӕджытӕ, хистӕр нӕлгоймӕгтӕ ӕмӕ иннӕтӕй ӕмбырды исчи зоны ӕфсымӕртӕ ӕмӕ хоты сӕрмагонд уавӕрты тыххӕй, уӕд сӕ бон у уыдоныл батыхсын ӕмӕ сын баххуыс кӕнын. Бинонтӕ ӕмӕ ӕмбырдыл цы хӕс ис, уый сӕ бон нӕу, конгресс чи цӕттӕ кӕны, уыцы хайадыл ӕвӕрын (1 Тим. 5:4). Ӕхсӕнады бланк «Сӕрмагонд домӕнтӕ кӕмӕн ис, уыцы адӕмӕн бынат скӕныны курдиат»-ы (CO-5) лӕвӕрд цӕуынц амындтӕ, ацы бланк байдзаг кӕнын кӕмӕн ӕмбӕлы, уый тыххӕй. Ӕмбырды службӕйон комитет цалынмӕ бланк цӕрӕнуатон хайадмӕ арвита, уӕдмӕ уал хъуамӕ равзара, бланк чи байдзаг кодта, уыдонӕй алкӕй уавӕр дӕр. Ӕмбырды секретарь бланкыл хъуамӕ ныффысса йӕ телефоны номыр, цӕмӕй йӕм цӕрӕнуатон хайад фӕдзура, исты фарстытӕ сӕм куы фӕзына, уӕд. Службӕйон комитет рекомендаци кӕмӕн радта, уыдоны бланктӕ хъуамӕ ӕрвыст ӕрцӕуой, бланкы иннӕ фарсыл цы адрис ис, ууыл.
6 Цӕрӕнуатон хайад бынӕттӕ фӕагуры, бланкты цы домӕнты тыххӕй ис фыст, уыдонмӕ гӕсгӕ. Ӕмӕ уыцы хъуыддаджы тынг баххуыс кӕнынц ӕфсымӕртӕ ӕмӕ хотӕ, сӕ хатӕнты делегаттӕн ӕнӕзивӕгӕй бынӕттӕ кӕй скӕнынц, уымӕй. Кӕд цӕрыс, облӕстон конгресс цы горӕты цӕудзӕн, уым ӕмӕ дӕ фӕнды дӕ хатӕны делегаттӕн бынат скӕнын, уӕд дын ӕмбырды секретарь ратдзӕн бланк «Хатӕнтӕ» (CO-4) ӕмӕ дзы ныффысс иуӕй-иу ахсджиаг лыстӕгдзинӕдтӕ, зӕгъӕм, ис дӕм ӕви нӕ хуыссӕнгӕрзтӕ, хӕринаг ӕмӕ а. д.
7 Ӕндӕр конгресмӕ куы цӕуай. Ӕндӕр горӕты цы уазӕгдзӕрӕнты, ӕмдзӕрӕнты ӕмӕ ӕндӕр агъуыстыты ис ӕрлӕууӕн, уыдоны номхыгъд кӕнӕ дӕ ӕндӕр конгрессы тыххӕй информаци куы хъӕуа, уӕд дын ӕмбырды секретарь ратдзӕн, конгресс чи цӕттӕ кӕндзӕн, уыцы бюройы адрис, уый ис бланк «Сӕрмагонд домӕнтӕ кӕмӕн ис, уыцы адӕмӕн бынат скӕныны курдиат»-ы иннӕ фарсыл. Бынаты тыххӕй курдиат куы ӕрвитай, уӕд ын йемӕ нывӕр къонверт маркӕ ӕмӕ дӕ адрисимӕ. Цы горӕтмӕ цӕуай, уым цалдӕр конгрессы куы уа, уӕд ӕнӕмӕнг ныффысс, цы конгрессы уай, уый цы бонты цӕудзӕн, уый.
8 Уазӕгдзӕрӕнты кусджытӕ Иегъовӕйы Ӕвдисӕнты тыххӕй цы хъуыды кӕнынц? АИШ-ы иу уазӕгдзӕрӕны хицау раппӕлыд Иегъовӕйы адӕмӕй, сӕхи хорз кӕй дарынц, уый тыххӕй, ӕмӕ ма загъта: «Цыппӕрӕмы Иегъовӕйы Ӕвдисӕнты ӕрцӕугӕ куы фенын, уӕд ӕз та улӕфынмӕ ацӕуын къуырисӕры онг. Ӕз ӕй зонын, ӕвзӕрӕй кӕй ницы бакӕндзысты, уый. Алкӕддӕр нын ӕхсызгон вӕййы, куы нӕм ӕрцӕут, уӕд». Уазӕгдзӕрӕны уӕйгӕнӕг та цингӕнгӕйӕ загъта: «Диссаджы адӕм! Иууылдӕр сты тынг уӕздан». Сӕрыстыр нӕ дӕ, не ’фсымӕртӕй афтӕ кӕй ӕппӕлынц, уый тыххӕй? Уӕдӕ ма ахъуыды кӕн, Иегъовӕ Хуыцауӕн та куыд ӕхсызгон вӕййы, нӕ уагахастӕй йын йӕ ном куы фӕкадджын кӕнӕм, уӕд!
9 Кӕронбӕттӕн. Конгрессы рӕстӕг куыд хӕстӕгдӕр кӕны, афтӕ тынгдӕр кув Иегъовӕмӕ, цӕмӕй дӕ бон суа ӕртӕ боны конгрессы алы хайы дӕр уӕвын ӕмӕ программӕйӕ стыр пайда райсын. Конгрессы ӕртӕ бонмӕ дӕр дӕхи куыстӕй ракуырдтай? Кӕд нӕ, уӕд бакӕ уыцы хъуыддаг, гӕнӕн уӕвгӕйӕ, тагъддӕр. Тӕккӕ къуырцдзӕвӕнмӕ йӕ куы ӕрхӕссай, уӕд дӕ, чи зоны, ма ауадзой. «Ӕууӕнкджын ӕмӕ зондджын цагъар» облӕстон конгресс «Хуыцауы Ныхас амонджытӕ» бацӕттӕ кодта, цӕмӕй нын амындтӕ лӕвӕрд ӕрцӕуой ӕмӕ нӕ уырнындзинад бафидар уа. Уӕдӕ абон райдай дӕхи цӕттӕ кӕнын, цӕмӕй конгрессы уай ӕмӕ псаломзарӕггӕнӕджы фӕдзӕхст сӕххӕст кӕнай: «Ӕмбырдты арфӕ кӕнут Хицау Хуыцауӕн!» (Пс. 67:27).
[Рамкӕ 3 фарсыл]
Конгрессы расписани
Майрӕмбон ӕмӕ сабат
9.30 — 17.00
Хуыцаубон
9.30 — 16.00
[Рамкӕ 4 фарсыл]
Цӕрӕнбынат ӕвзаргӕйӕ, цы аразын хъӕуы:
1. Уазӕгдзӕрӕнмӕ фӕдзур кусгӕ сахатты. Спайда кӕн «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд»-ы фыст телефонты номыртӕй.
2. Зӕгъ сын, кӕй дӕ Иегъовӕйы Ӕвдисӕн ӕмӕ Хъахъхъӕнӕг Мӕсыджы Ӕхсӕнады конгресмӕ кӕй цӕуыс, уый тыххӕй.
3. Зӕгъ сын, уазӕгдзӕрӕны цы бонты ӕрлӕудзынӕ, уый.
4. Базон ӕй, бынатӕн кӕй фидыс, «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд»-ы цы ӕргътӕ ис, уыдонмӕ гӕсгӕ. Фылдӕр ма бафид.
5. Уазӕгдзӕрӕны бынат куы нал уа, уӕд ма номхыгъды цы уазӕгдзӕрӕнтӕ ис, уыдонӕй искӕцымӕ фӕдзур.
Кӕд дын ис сӕрмагонд домӕнтӕ, уӕд:
1. Секретарӕй райс бланк «Сӕрмагонд домӕнтӕ кӕмӕн ис, уыцы адӕмӕн бынат скӕныны курдиат», байдзаг ӕй кӕн ӕмӕ йӕ фӕстӕмӕ секретармӕ радт.
2. Дӕ зӕрдыл дар, цӕрынӕн ма дӕ цы хӕрдзтӕ бахъӕудзӕн, уыдоныл дӕхӕдӕг кӕй хъуамӕ батыхсай, уый.
3. Кӕм цӕрдзынӕ, уый кӕд искӕй хатӕн у, уӕд рагацау фӕдзур хӕдзары хицаумӕ, цӕмӕй йын зӕгъай, кӕд ӕрцӕудзынӕ ӕмӕ а. д.
Ноджыдӕр ма дӕ зӕрдыл дар:
◼ Ӕрбынат кӕн ӕрмӕстдӕр, «Номхыгъд»-ы цы уазӕгдзӕрӕнтӕ, ӕмдзӕрӕнтӕ ӕмӕ а. д. ис, уым.
◼ Бынат (бынӕттӕ) заказ кӕн ӕрмӕстдӕр дӕхицӕн ӕмӕ кӕимӕ баныхас кӕнай, уыдонӕн.
◼ Дӕ фыццаг заказ ма аив.
◼ «Амынд уазӕгдзӕрӕнты, ӕмдзӕрӕнты ӕмӕ ӕндӕр агъуыстыты номхыгъд»-ы цы ӕргътӕ ис, уыдонмӕ гӕсгӕ агур цӕрӕнбынат. «Сӕрмагонд домӕнтӕ кӕмӕн ис, уыцы адӕмӕн бынат скӕныны курдиат»-ы фыст ӕргътӕ нырма бынтон бӕлвырд не сты.
◼ Цы агъуысты цӕрдзынӕ, уый хицауимӕ ӕмгуыст кӕн, цы фӕтк дзы ис, уымӕ гӕсгӕ архай, дӕ фӕстӕ ӕфснай ӕмӕ а. д.