2005 азы облӕстон конгресс «Хуыцауӕн коммӕгӕс ут»
1 Иегъовӕ Хуыцау у не Стыр Зондамонӕг ӕмӕ нӕ ӕмбырд кӕны, цӕмӕй нӕ йӕ фӕндӕгтыл цӕуын ахуыр кӕна (Ис. 30:20, 21; 54:13). Иегъовӕ уый аразы «ӕууӕнкджын ӕмӕ зондджын цагъары» уылты. Уыцы «цагъар» нын ӕрвылаз дӕр бацӕттӕ кӕны облӕстон конгресстӕ (Матф. 24:45–47). Махмӕ дӕр нӕ зӕрдӕ дзуры, псаломзарӕггӕнӕг Давидмӕ куыд дзырдта, афтӕ: «Ӕмбырдты арфӕ кӕндзынӕн Хицауӕн» (Пс. 25:12). Давид хорз ӕмбӕрста, Иегъовӕ дын зонд амона, уый цӕй стыр кад у ӕмӕ йӕхицӕн загъта, зӕгъгӕ, Хуыцауы адӕм кӕдфӕнды ма ӕмбырд кӕной,– семӕ уыдзынӕн.
2 Ацы аз облӕстон конгресмӕ, «Хуыцауӕн коммӕгӕс ут», зӕгъгӕ, цы адӕм ӕрӕмбырд уыдзӕн, уыдоны ’хсӕн уыдзынӕ? Кӕд о, уӕд дын ацы ӕрмӕг фӕахъаз уыдзӕн конгресмӕ дӕхи бацӕттӕ кӕнынӕн.
3 Афтӕ спълан кӕн, иу бон дӕр куыд нӕ фӕцух кӕнай. «Бӕстонгӕнӕгӕн йӕ фӕндтӕ йӕ къухы бафтынц» (Ӕмб. 21:5). Конгресмӕ нӕ нӕхи рагацау цӕттӕ кӕнын кӕй хъӕуы, ацы ныхӕстӕ ууыл дзурӕг не сты? Кӕд дӕ фӕнды, ӕмӕ конгрессы уӕнгроггӕнӕн программӕйӕ мацы ауадзай, уӕд, хорз уаид, ныртӕккӕ куы райдаис алцыдӕр афтӕ пълан кӕнын, цӕмӕй конгрессӕй иу бон дӕр ма фӕцух кӕнай. Куыстӕй дӕ дӕхи ракурын куы хъӕуа, уӕд фӕстиат ма кӕн. Кӕд дӕ цардӕмбал ӕнӕуырнӕг у ӕмӕ дӕ йемӕ аныхас кӕнын хъӕуы, уӕд абон-райсом ма кӕн, къуырцдзӕвӕнмӕ йӕ ма ӕрхӕсс. Истӕуыл куы фӕтыхсай – Иегъовӕмӕ кув, ӕмӕ дӕ ныфс уӕд: йӕ фӕрцы «дӕ фӕндтӕ ӕнӕмӕнг дӕ къухы бафтдзысты» (Ӕмб. 16:3). Уыимӕ ма хорз уаид, Библи кӕимӕ ахуыр кӕныс, уыдонӕн дӕр куы баххуыс кӕнис, цӕмӕй сӕхи бацӕттӕ кӕной ӕмӕ программӕйы алы хаймӕ дӕр байхъусой.
4 Цӕрӕнбынӕттӕ. Конгресстӕ кӕм фӕцӕуы, уыцы горӕтты ӕфсымӕртӕ бирӕ бафыдӕбон кӕнынц конгрессдзаутӕн хорз цӕрӕнбынӕттӕ ссарынӕн. Бирӕ горӕтты азӕй-азмӕ зындӕр кӕны ӕмдзӕрӕнты аслам цӕрӕнбынӕттыл баныхас кӕнын. Уымӕ гӕсгӕ конгрессдзаутӕн сӕ бон у рагацау ӕхца ӕмбырд кӕнын, цӕмӕй ӕнӕуи уазӕгдзӕрӕнты ӕрцӕрой (1 Кор. 16:2). Хъусын кӕныны фембӕлды ацы статья ӕвзӕрст куы ’рцӕуа, уӕд хъусинӕгты фӕйнӕгыл ауыгъд ӕрцӕудзӕн «Цӕрӕнбынӕтты номхыгъд». Курӕг дӕ стӕм, цӕмӕй бынӕттӕ заказ кӕнай, «Цӕрӕнбынӕтты номхыгъд»-ы цы уазӕгдзӕрӕнтӕ ис, ӕрмӕстдӕр уым, ӕмӕ дзы цы ӕргътӕ ис фыст, ӕрмӕстдӕр уыцы ӕргътыл. Ацы амындтӕм гӕсгӕ куы архайай, уӕд филиалӕн дарддӕр дӕр йӕ бон уыдзӕн хорз уазӕгдзӕрӕнтимӕ асламдӕр бынӕттыл ныхас кӕнын. Зӕрдыл ма бадарын хъӕуы уый, ӕмӕ конгрессы бынатмӕ ӕввахсдӕр уазӕгдзӕрӕнтӕ алкӕд ӕппӕты хуыздӕр нӕ вӕййынц. Уазӕгдзӕрӕнмӕ фӕдзурыны размӕ уал ӕркӕс фӕлгӕтмӕ «Цӕрӕнуатон хайадимӕ ӕмгуыст кӕн». Афтӕ ма дӕ зӕрдыл дар фӕлгӕт «Куыд хъӕуы уазӕгдзӕрӕны бынат заказ кӕнын»-ы цы уынаффӕтӕ ис, уыдон дӕр.
5 Ӕххуыс, фӕкӕсинаг чи у, уыдонӕн. Апостол Павел иуӕй-иу ӕфсымӕртӕй загъта, зӕгъгӕ мын зӕрдӕрухсы хос уыдысты (Кол. 4:7–11, НФ). Куыд ын ӕххуыс кодтой? Зӕгъӕм, цӕмӕй тыхсти, уымӕй-иу ӕм фӕкастысты. Дӕуӕн та куыд у дӕ бон, ӕмӕ де ’муырнджытӕн конгресмӕ цӕуыны хъуыддаджы зӕрдӕрухсы хос уай? Ацӕргӕ кӕнӕ рынчын хотӕ ӕмӕ ӕфсымӕрты, ӕххӕстрӕстӕг лӕггадгӕнджыты кӕнӕ ма ӕндӕр искӕйты, гӕнӕн ис, ӕмӕ ӕххуыс хъӕуа, куыд цӕудзысты, кӕм цӕрдзысты, уыцы хъуыддӕгты. Ахӕм хъусынгӕнджытыл сӕйраджыдӕр хъуамӕ тыхсой сӕ хӕстӕджытӕ (1 Тим. 5:4). Фӕлӕ кӕд хӕстӕджыты бон нӕу баххуыс кӕнын, уӕд сӕм фӕкӕсӕт се ’муырнджытӕ (Иак. 1:27). Чиныгахуыры цӕстдарджытӕн сӕ къордты фӕкӕсын искӕмӕ куы хъӕуа, уӕд хъуамӕ йемӕ алцӕуылдӕр рагацау аныхас кӕной.
6 «Ӕххуыс кӕй хъӕуы, уыдонӕн бынат скӕныны курдиат»-ы бланктӕ сты, ӕцӕгдӕр ӕххуысхъуаг чи у, фӕлӕ йӕ бинонтӕн йе та йе ’мбырдӕн кӕмӕн нӕу сӕ бон баххуыс кӕнын, ӕрмӕстдӕр уыцы хъусынгӕнджытӕн. Ӕмбырды комитеты ахӕм хъусынгӕнӕджы уавӕртӕм ӕркӕсын хъӕуы курдиаты фыст амындтӕм гӕсгӕ, стӕй ма, 2004 азы 14 декабрӕй ӕппӕт хистӕр нӕлгоймӕгты советтӕм дӕр цы фыстӕг ӕрвыст ӕрцыд, уымӕ гӕсгӕ дӕр. Ацы ӕххуыс у ӕрмӕстдӕр, фӕзминаг чи у ӕмӕ хӕрзӕгъдау сывӕллӕттӕ кӕмӕн ис, уыцы чырыстӕттӕн.
7 Ӕндӕр конгресмӕ куы цӕуай. Хорз уаид, алы хъусынгӕнӕг дӕр, йе ’мбырд кӕдӕм у нысангонд, уыцы конгресмӕ куы ацӕуид, цӕмӕй конгрессы рӕстӕджы фаг кӕной бадӕн бынӕттӕ, литературӕ, цӕрӕнбынӕттӕ ӕмӕ афтӕ дарддӕр. Дӕ уавӕртӕм гӕсгӕ дӕ ӕндӕр конгресмӕ цӕуын куы хъӕуа, уӕд дӕ хорзӕхӕй, де ’мбырды секретары бафӕрс, кӕдӕм цӕуынвӕнд кӕныс, уыцы конгрессы бюройы адрисӕй,– фыст у «Ӕххуыс кӕй хъӕуы, уыдонӕн бынат скӕныны курдиат»-ы иннӕ фарсыл. Курӕг уӕ стӕм, цӕмӕй цӕрӕнбынаты тыххӕй филиалмӕ ма фыссат, Санкт-Петербургмӕ куы цӕуат конгресмӕ, уӕд дӕр. Цӕрӕнбынӕтты номхыгъд, йе та ӕндӕр исты базоныны тыххӕй дӕ курдиат куы ӕрвитай, уӕд ын йемӕ ма ферох кӕн нывӕрын къонверт маркӕтимӕ ӕмӕ дӕ адрисимӕ. Цы горӕтмӕ цӕуай, уым цалдӕр конгрессы куы уа, уӕд ӕнӕмӕнг фӕнысан кӕн, конгресстӕй кӕцыйы уыдзынӕ, уый.
8 Хъӕуы бархи кусджытӕ. Йесо иннӕтӕн сӕрныллӕгӕй лӕггад кодта ӕмӕ нын уымӕй диссаджы цӕвиттон ныууагъта (Лук. 9:12–17; Иоан. 13:5, 14–16). Конгрессты бархи кусджытӕ чи вӕййы, уыдон дӕр равдисынц ахӕм зӕрдӕйы уаг. Цӕмӕй конгрессы хайӕдтӕн фаг кусджытӕ уа, уый тыххӕй бынӕттон Конгрессы комитет тагъд рӕстӕджы ӕххуысмӕ фӕсиддзӕн. Бархи куыстӕн, сӕхимӕ алыхуызон хӕслӕвӕрдтӕ райсынӕн, уӕлдай тынгдӕр хъӕуы хистӕр нӕлгоймӕгтӕ. Ӕнӕзивӕгӕй куы лӕггад кӕной, уӕд конгрессы алкӕмӕндӕр равдисдзысты хорз цӕвиттон (1 Пет. 5:2, 3).
9 Адӕм цы уынынц. Иу уазӕгдзӕрӕны администратор загъта: «Чи нӕм ӕрцӕры, уыдонӕй сымахӕй тынгдӕр нӕ зӕрдӕмӕ ничи цӕуы. Уӕ хорз ӕгъдауӕй иннӕтӕй афтӕ тынг хицӕн кӕнут, ӕмӕ диссаг! Нӕ уазӕгдзӕрӕны ӕфснайджытӕ ӕндӕр дзырд нӕ кӕнынц, зӕгъгӕ нӕм хорз цӕстӕй кӕсынц ӕмӕ нын нӕ къух дӕр арӕвдауынц. Сымах нӕм цы улӕфты бонты вӕййут, уыцы бонты алкӕй дӕр фӕфӕнды кусын!» Ӕндӕр уазӕгдзӕрӕны кусӕг та банысан кодта: «Иегъовӕйы Ӕвдисӕнтӕй ӕнцондӕр кусӕн никӕимӕ у». Ӕвӕццӕгӕн, дӕ хорз уагахаст дӕр фӕахъаз, цӕмӕй ахӕм хорз ныхӕстӕ фехъуыстаиккам. Ахъуыды ма кӕн, Иегъовӕйӕн куыд ӕхсызгон вӕййы, нӕ хъуыддӕгты тыххӕй нӕ куы феппӕлынц! (1 Пет. 2:12).
10 Ацы сӕрды та Иегъовӕ Хуыцау «ӕууӕнкджын хӕдзармӕгӕсӕджы» уылты йӕ адӕмы ӕрӕмбырд кӕндзӕн уырнындзинад фидаргӕнӕн амындтӕ исынмӕ (Лук. 12:42). Конгрессы ӕртӕ бонӕй цӕмӕй иу дӕр ма ауадзай, уый тыххӕй хъӕудзӕн бафыдӕбон кӕнын, фӕлӕ уый уый аргъ у. Ацы азы облӕстон конгресс «Хуыцауӕн коммӕгӕс ут» нын ӕнӕмӕнгдӕр фӕфидар кӕндзӕн нӕ зӕрдӕты фӕнд – Иегъовӕйӕн ныр дӕр ӕмӕ ӕнусты дӕргъы дӕр лӕггад кӕнын. Цӕй уӕдӕ фӕндвидарӕй ӕххӕст кӕнӕм псаломзарӕггӕнӕджы фӕдзӕхст: «Ӕмбырдты арфӕ кӕнут... Хуыцауӕн» (Пс. 67:27).
[Рамкӕ 4 фарсыл]
Конгрессы рӕстӕг
Майрӕмбон ӕмӕ сабаты
9.30 — 17.05
Хуыцаубоны
9.30 — 16. 10
[Рамкӕ 4 фарсыл]
Цӕрӕнуаты хайадимӕ ӕмгуыст кӕн
◼ Ӕрлӕуу-иу, ӕрмӕстдӕр ацы азы «Цӕрӕнбынӕтты номхыгъд»-ы цы уазӕгдзӕрӕнтӕ ис, уыдонӕй искӕцыйы. Номхыгъды цы уазӕгдзӕрӕнтӕ нӕй, уыдонмӕ ма дзур.
◼ Номхыгъды цы уазӕгдзӕрӕнтӕ ис амынд, уыдонӕй бынӕттӕ куы никӕцыйы уа, кӕнӕ та кӕцыдӕр уазӕгдзӕрӕны, номхыгъды цы ӕргътӕ ис, уымӕй зынаргъдӕр куы уой, уӕд фехъусын кӕн де ’мбырды секретарӕн. Уый хъуамӕ фӕдзура уыцы конгрессы цӕрӕнуаты хайадмӕ, номхыгъды уӕлейӕ цы фыст ис, уымӕ гӕсгӕ. Номхыгъды цы уазӕгдзӕрӕн нӕй амынд, уырдӕм дзурыны бӕсты уал хуыздӕр уаид банхъӕлмӕ кӕсын, цалынмӕ, ды кӕдӕм цӕуинаг дӕ, уыцы конгрессы цӕрӕнуаты хайад уазӕгдзӕрӕнты фӕстаг номхыгъд нӕ ӕрӕрвита, уӕдмӕ.
◼ Баныхас кӕн, ӕцӕгдӕр дӕ цал бынаты бахъӕудзӕн, ӕрмӕстдӕр уалы тыххӕй.
◼ Куы хъӕуа, уӕд дӕ бадзырд бафидар кӕнынӕн бафид, цал уаты тыххӕй баныхас кодтай, уыдоны аргъӕй кӕцыдӕр хай. Науӕд дын дӕ бынат ӕндӕр искӕмӕн ратдзысты.
◼ Дӕ фыццаг бадзырд ма аив.
◼ Облӕстон конгрессы фӕдыл фыстӕг ӕмбырды цы къуыри хъӕуа бакӕсын, уыцы къуыри ӕмбырдӕн районон конгресс куы уа, уӕд ӕмбырды секретарӕн йӕ бон у «Цӕрӕнбынӕтты номхыгъд»-ы къопитӕ скӕнын ӕмӕ сӕ чиныгахуырты цӕстдарджытӕй алкӕмӕн дӕр раттын, цӕмӕй сӕ сӕ къордты бакӕсой. Фӕлӕ уӕд дӕр хицӕн хъусынгӕнджытӕн «Цӕрӕнбынӕтты номхыгъд»-ы сӕрмагонд къопитӕ кӕнӕн нӕй.
[Рамкӕ 4 фарсыл]
Куыд хъӕуы уазӕгдзӕрӕны бынаты тыххӕй баныхас кӕнын
1. Уазӕгдзӕрӕнтӕм фӕдзур куысты рӕстӕг, «Цӕрӕнбынӕтты номхыгъд»-ы амынд телефоны номыртӕй.
2. Уазӕгдзӕрӕны кусджытӕн зӕгъ, Иегъовӕйы Ӕвдисӕнты конгресмӕ кӕй цӕуыс.
3. Бӕлвырд бамбарын кӕн, уазӕгдзӕрӕнмӕ цы бон ӕрцӕудзынӕ ӕмӕ цы бон ацӕудзынӕ, уый.
4. Иу уазӕгдзӕрӕны бынат куы нӕ уа, уӕд номхыгъды амынд уазӕгдзӕрӕнтӕй ӕндӕрмӕ фӕдзур.
5. «Цӕрӕнбынӕтты номхыгъд»-ы цы ӕргътӕ ис амынд, уыдонӕй фылдӕр ма бафид.
6. Бынатыл баныхас кӕн ӕмӕ сын зӕгъ, цӕмӕй дын фехъусын кӕной, разы сты ӕви нӕ.
7. Цы рӕстӕг дын зӕгъой, уыцы рӕстӕджы дӕргъы бынаты аргъӕй иу-цасдӕр бафид банчы карточкӕйӕ кӕнӕ та йӕ арвит постӕй. Ӕхца къонверты макуы ӕрвит. Зӕгъын хъӕуы уый, ӕмӕ иуӕй-иу уазӕгдзӕрӕнтӕ бынат рагацау ӕххуырсыны тыххӕй исынц уӕлдай ӕхца.