Хуыцауӕн кадхӕссӕг уагахаст
1 Кӕмфӕнды ма уӕм, уӕддӕр нӕ уагахаст, нӕ дарӕс ӕмӕ нӕ ӕддаг бакастӕй бӕрӕг у, цавӕр адӕм стӕм ӕмӕ цавӕр Хуыцауӕн кувӕм, уый. Уый тынгдӕр бӕрӕг вӕййы, Хуыцауы адӕм стыр фембӕлдты иумӕ куы ӕрӕмбырд вӕййынц ӕмӕ сӕ бирӕ адӕм куы фӕуынынц, уӕд. Нӕхи хорз куы фӕдарӕм, уӕд уый кад фӕхӕссы Иегъовӕйы номӕн дӕр (1 Пет. 2:12). Фӕлӕ цалдӕр адӕймаджы ӕвзӕр уагахаст ӕмӕ ӕнӕрхъуыды митӕй дӕр гӕнӕн ис Хуыцауы номыл ӕмӕ йӕ адӕмыл къӕм сбада (Еккл. 9:18ӕ). Нӕ уагахастыл баст у, адӕм нӕ организаци ӕмӕ нӕ Хуыцауӕй цы хъуыды кӕндзысты, уый. Уыцы хъуыды нӕ зӕрдыл даргӕйӕ, хъуамӕ «алцыдӕр кӕнӕм Хуыцауы кадӕн» (1 Кор. 10:31).
2 Фӕзминаг уагахаст ӕмдзӕрӕнты ӕмӕ уазӕгдзӕрӕнты: Фылдӕр хатт уагдӕтты кусджытӕ тынг райгонд вӕййынц, Иегъовӕйы Ӕвдисӕнтӕ алцыдӕр сӕ фӕстӕ куыд бафснайынц, сӕхи куыд хорз фӕдарынц ӕмӕ куыд сыгъдӕг конд вӕййынц, уымӕй. Иу администратор, йӕ уазӕгдзӕрӕны цы Ӕвдисӕнты бинонтӕ ӕрлӕууыд, уыдонӕй загъта: «Иегъовӕйы Ӕвдисӕнты сывӕллӕттӕ сты ӕппӕты хуыздӕр сывӕллӕттӕ! Уыдон дарынц аив дарӕс, сты уӕздан, ӕгъдауджын, хорз хъомыл ӕмӕ зындзинад никуы никӕмӕн саразынц. Кӕй зӕгъын ӕй хъӕуы, уӕ сывӕллӕтты тыххӕй стут раппӕлинаг. Тынг ӕхсызгон нын уыд, уӕ сывӕллӕттӕ ам кӕй уыдысты, уый». Ахӕм ныхӕстӕ бирӕ хӕттыты фехъусӕм, уымӕн ӕмӕ немӕ чи ӕмбӕлы, уыдон уынынц, Иегъовӕйы адӕм сӕ кӕрӕдзийы куыд уарзынц ӕмӕ сӕ кӕрӕдзийӕн куыд аргъ кӕнынц, уый.
3 Фӕлӕ иуӕй-иу уазӕгдзӕрӕнтӕ ӕмӕ ӕмдзӕрӕнты кусджытӕ фӕхъаст кӕнынц, ӕмӕ уый ууыл дзурӕг у, иуӕй-иутӕ сӕхи ӕвзӕр кӕй фӕдарынц ӕмӕ агъуысты дзауматӕй раст кӕй нӕ фӕпайда кӕнынц. Уый тыххӕй фӕзыны зындзинӕдтӕ ӕмӕ не ’взӕры кой фӕкӕнынц, уый та хорз нӕу. Администратортӕй иуӕй-иутӕ фӕхъаст кӕнынц, зӕгъгӕ, ныййарджытӕ сӕ сывӕллӕттӕм кӕй нӕ фӕкӕсынц, уымӕ гӕсгӕ сывӕллӕттӕ ӕмӕ ӕрыгон фӕсивӕд фӕхъӕлӕба кӕнынц, коммӕ нӕ фӕкӕсынц ӕмӕ агъуысты фӕралидз-балидз кӕнынц.
4 Бирӕ ӕмдзӕрӕнты ӕмӕ ӕндӕр агъуыстыты ис уагӕвӕрдтӕ, ӕмӕ сӕ уазджытӕ хъуамӕ ӕххӕст кӕной. Ӕфсымӕртӕй иуӕй-иутӕ уыцы уагӕвӕрдтӕ фехӕлдтой, кӕй-иу хъӕлӕба кодтой, ӕрӕгмӕ-иу кӕй ӕрбацыдысты ӕмӕ-иу сӕ фӕстӕ кӕй не ’фснайдтой, уымӕй. Тынг ахсджиаг у, цӕмӕй алцӕмӕй дӕр нӕхи сыгъдӕг дарӕм. Хъуамӕ конгресмӕ ацӕуыны размӕ нӕ хатӕн бафснайӕм. Хорз уаид бырон рахӕссын, уӕлдайдӕр та хӕринаджы бырӕттӕ. Уӕлдай ахсджиаг у, цӕмӕй конгрессӕй хӕдзармӕ куы цӕуӕм, уӕд нӕ хатӕн нӕ фӕстӕ ӕфснайдӕй ныууадзӕм. Исты дзаума куы асӕттай, уӕд уый тыххӕй ӕнӕмӕнг зӕгъ, дӕ къордӕн дзуапп чи дӕтты, уымӕн, цӕмӕй цы хъӕуы, уый саразат кӕнӕ конгрессы цӕрӕнуатон хайадӕн фехъусын кӕнат.
5 Бацархайын нӕ хъӕуы, цӕмӕй администрациимӕ ӕмгуыст кӕнӕм. Кӕй зӕгъын ӕй хъӕуы, нӕ нӕ фӕнды, цӕмӕй Иегъовӕйы адӕмы хорз ном фегад кӕнӕм. Чырыстӕттӕ кӕй стӕм, уымӕ гӕсгӕ хъуамӕ алкӕддӕр нӕхи афтӕ дарӕм, цӕмӕй ныл ӕууӕндой. Агъуыстӕй нӕй исӕн хуыссӕн дзауматы ивӕнтӕ кӕнӕ «зӕрдылдарынӕн» ӕндӕр исты дзаумӕттӕ, уымӕн ӕмӕ уый нымад цӕуы давдыл; кӕм цӕрдзыстӕм, уырдӕм бацӕугӕйӕ нӕхи куы фыссӕм, уӕд хъуамӕ зӕгъӕм, ӕцӕгӕй уаты цал адӕймаджы цӕрдзӕн, уый.
6 Хорз уагахаст конгрессы: Конгресс цыфӕнды агъуысты дӕр ма уа, конгрессы рӕстӕджы йӕ нымайын хъӕуы стыр Паддзахады Залыл. Хъуамӕ нӕ дарӕс ӕмӕ нӕ ӕддаг бакаст уой, нӕ бынӕттон ӕмбырды фембӕлдты нын цыхуызӕн вӕййынц, афтӕ. Конгрессы рӕстӕджы ӕмӕ йӕ фӕстӕ дӕр ӕфсымӕртӕ ӕмӕ хотӕ хъуамӕ ма дарой ӕгӕр гом, цыбыр кӕнӕ ӕнахуыр дарӕс, дунейы зондахаст чи ӕвдиса ӕмӕ нӕ ӕгъдауджынӕй чи не ’вдиса, ахӕм. Хотӕ хъуамӕ сӕ цӕст ӕрдарой, цӕмӕй сӕ дӕллаггуыртӕ ӕмӕ сӕ къабатӕ цыбыр ма уой ӕмӕ уой аив (1 Тим. 2:9, 10). Конрессы уӕм, уазӕгдзӕрӕн кӕнӕ ӕмдзӕрӕны, хӕрӕндоны кӕнӕ дуканийы, алы ран дӕр хъуамӕ ӕвдисӕм, Хуыцауы лӕггадгӕнджытӕ кӕй стӕм, уый ӕмӕ цӕлхдур макӕмӕн уӕм (2 Кор. 6:3, НД).
7 Конгрессы сабаты райсомӕй уыдзӕн аргъуыд райсӕн. «Хъахъхъӕнӕг мӕсыджы» 1 апрелы номыры 1995 азӕн, 30-ӕм фарсыл (уыр.) ис фыст, уыцы цаумӕ нын хъуамӕ цавӕр ахаст уа, уый тыххӕй. Уым дзырдӕуы, зӕгъгӕ, нын «хъуамӕ аргъуыдмӕ уа ӕмбӕлон ахаст. Аргъуыд нӕу не ’нкъарӕнтӕ ӕнӕмбӕлон хуызы ӕвдисыны, хъазтизӕрты ӕмӕ цӕл кӕныны рӕстӕг. Фӕлӕ уыцы иу рӕстӕджы уый нӕу ӕрхӕндӕг цау дӕр». Раст нӕ уаид аргъуыдисджытӕн — нӕлгоймӕгтӕн дӕр ӕмӕ сылгоймӕгтӕн дӕр — ӕгӕр гом найӕн дарӕс скӕнын. Кӕй зӕгъын ӕй хъӕуы, алцыдӕр хъуамӕ дзурӕг уа чырыстон аргъуыды ахсджиагдзинад ӕмӕ циндзинадыл.
8 Петр нын нӕ зӕрдыл лӕууын кӕны, цыхуызӕн «хъуамӕ уӕм мах сыгъдӕг царды ӕмӕ Хуыцауы ӕфсармы», уый (2 Пет. 3:11, НФ). Уӕдӕ облӕстон конгрессы «Хуыцауы Ныхас ӕххӕстгӕнджытӕ», зӕгъгӕ, нӕ ныхӕстӕ ӕмӕ нӕ хъуыддӕгтӕй сыгъдӕгзӕрдӕ адӕмӕн баххуыс кӕнӕм нӕ кадджын Хуыцауы, ӕппӕт кад дӕр кӕмӕ ӕмбӕлы, уый базонын ӕмӕ йын лӕггад кӕнын (1 Кор. 14:24, 25).