Кӕнӕм хорз хъуыддӕгтӕ ӕмӕ нӕ раппӕлой!
1 «Ӕз ахӕм ӕнӕмаст адӕм нырма никуы федтон». «Куыд ӕхсызгон у ахӕм адӕмы суазӕг кӕнын». Ахӕм дзӕбӕх ныхӕстӕ бирӕ фехъуыстам ӕцӕгӕлон адӕмӕй фарон облӕстон конгресты фӕстӕ, ӕмӕ уымӕй бӕрӕг у, нӕ организацийӕн хорз ном кӕй ис, уый (Фӕс. н. 27:2; 1 Кор. 4:9). Уымӕй кад кӕнӕм Иегъовӕйӕн (Матф. 5:16). Хуыцауы скадджын кӕнынӕн ма нын ноджыдӕр иу хорз фадат ис ацы азы облӕстон конгрессы рӕстӕджы, «Хуыцауы Ныхас амонджытӕ», зӕгъгӕ.
2 Алы аз дӕр нын зӕрдӕхӕларӕй нӕ зӕрдыл ӕрлӕууын кӕнынц, цӕмӕй нӕхи конгрессы уӕздан дарӕм. Цӕмӕн? Уымӕн ӕмӕ дунейы адӕм сӕ зондахаст, сӕ дарӕс ӕмӕ сӕ уагахастӕй ӕвдисынц, ӕфсарм ӕмӕ сӕм ӕгъдау кӕй нал ис, уый, мах та нӕ фӕнды сӕ фӕдыл цӕуын. Мах нӕ фӕнды, цӕмӕй нӕ хорз ном счъизи кӕнӕм (Еф. 2:2; 4:17). Уӕдӕ нӕ зӕрдыл бадарӕм дӕлдӕр лӕвӕрд фӕдзӕхстытӕ.
3 Кӕнӕм хорз хъуыддӕгтӕ уазӕгдзӕрӕнты. Мах зонынц ӕууӕнкджын адӕмӕй (Дзут. 13:18). Уымӕ гӕсгӕ уазӕгдзӕрӕнмӕ куы ӕрбацӕуӕм, уӕд хъуамӕ раст зӕгъӕм, иу хатӕны цалӕй цӕрдзыстӕм, уый. Хатӕны хӕринаг кӕныны бар куы нӕ уа, уӕд дзы хъуамӕ ма кӕнӕм. Иу уазӕгдзӕрӕны администратор загъта, зӕгъгӕ, Иегъовӕйы Ӕвдисӕнтӕн асламдӕр ӕргътыл уымӕн сразы, ӕмӕ дзы хисӕрфӕнтӕ никуы фесӕфт ӕмӕ йӕ ногтӕ ӕвӕрын никуы бахъуыд. Уый зоны, сӕхи хорз кӕй дардзысты, кӕй ницы фехалдзысты ӕмӕ кӕй ницы ацъӕл кӕндзысты. Кӕй зӕгъын ӕй хъӕуы, уазӕгдзӕрӕнӕй «зӕрдылдарынӕн» нӕхицӕн ницы рахӕсдзыстӕм. Уый нӕ, фӕлӕ ма хорз уаид, ӕмбӕлон кӕм у, уым уазӕгдзӕрӕны кусджытӕй искӕмӕн ӕхца авӕрын, кӕй нын балӕггад кодтой, уый тыххӕй сӕ кӕй фӕбузныг стӕм, уый равдисынӕн. Уазӕгдзӕрӕны кусджытимӕ та уыдзыстӕм уӕздан ӕмӕ фӕразон.
4 Адӕмы зӕрдӕмӕ тынг цӕуы, нӕ сывӕллӕттӕ сӕхи куыд уӕздан дарынц ӕмӕ куыд коммӕгӕс сты, уый (Еф. 6:1, 2). Ныййарджытӕ, уӕ хорзӕхӕй, уӕ сывӕллӕттӕм уӕ хъус дарут, цӕмӕй иннӕты ма хъыгдарой, уыимӕ бассейны сӕхи куы найой кӕнӕ ӕндӕр искуы куы хъазой, уӕд. Стӕй не ’ппӕт дӕр хъуамӕ архайӕм, цӕмӕй дуӕрттӕ сабыргай ӕхгӕнӕм ӕмӕ ма хъӕлӕба кӕнӕм, уӕлдайдӕр та ӕхсӕвыгон.
5 Хорз ма кӕндзыстӕм, уазӕгдзӕрӕны ма Ӕвдисӕнтӕй уӕлдай чи цӕры, уыдоныл куы хъуыды кӕнӕм, уӕд. Иуӕй-иу уазӕгдзӕрӕнты кусджытӕ хъаст кодтой, конгрессы делегаттӕ-иу, уазӕгдзӕрӕны уазалгӕнӕны-иу цы их уыд, уый иууылдӕр кӕй райстой ӕмӕ-иу дзы сӕ хӕсгӕ уазалгӕнӕнтӕ кӕй байдзаг кодтой, уый тыххӕй. Раст ма нӕ уыдзӕн, уазӕгдзӕрӕн йӕ уазджытӕн лӕвар цы хӕринаг ӕмӕ къофи ӕрцӕттӕ кӕны, уымӕй немӕ конгресмӕ куы хӕссӕм, уӕд уый дӕр. Хъуамӕ макуы хъуыды кӕнӕм, уазӕгдзӕрӕны уагӕвӕрдтӕ махмӕ нӕ хауынц, зӕгъгӕ.
6 Кӕнӕм хорз хъуыддӕгтӕ конгрессы. Куыд рабӕрӕг, афтӕмӕй делегаттӕй иуӕй-иутӕ нӕ хъуыстой уагдартӕм, суанг ма семӕ ныхас кодтой, чырыстонӕн куыд не ’мбӕлы, афтӕ. Иуӕй-иутӕ та ӕфсымӕрты амындтӕм нӕ байхъуыстой ӕмӕ сӕ машинӕтӕ, бар кӕм нӕ уыд, уым сӕвӕрдтой, ӕмӕ сын сӕ уымӕ гӕсгӕ милицӕйы кусджытӕ акодтой. Кӕй зӕгъын ӕй хъӕуы, ӕрмӕстдӕр йӕхи мӕт чи кӕны, уымӕй нӕй зӕгъӕн, ӕмӕ хорз хъуыддӕгтӕ кӕны, уымӕй уӕлдай ма уый кад нӕ хӕссы Иегъовӕ Хуыцауӕн дӕр. Цӕй уӕдӕ уарзондзинад ӕмӕ фӕразондзинад ӕвдисӕм, стӕй кӕрӕдзийӕн аргъ кӕнӕм (Гал. 5:22, 23, 25).
7 Конгресс кӕм фӕцӕуы, уым дуӕрттӕ райсомӕй 8 сахатыл куы байгом вӕййынц, уӕд иуӕй-иу ӕфсымӕртӕ ӕмӕ хоты фенӕн вӕййы, тагъд-тагъд куыд фӕцӕйуайынц, иу иннӕйы схойгӕйӕ, цӕмӕй сӕхицӕн «хуыздӕр» бынӕттӕ бацахсой. Ахӕм уагахасты тыххӕй иуӕй-иутӕ сӕхи ныццавтой. Лӕвӕрд нын цыд уынаффӕ, цӕмӕй-иу сихорыл бахӕрынӕн гыццыл хӕринаг ӕрбахӕссӕм, ӕмӕ уымӕ гӕсгӕ раст нӕ уаид машинӕты лӕууӕндӕтты стыр фынгтӕ равӕрын. Уый уаид, спортивон ерысты рӕстӕджы фынгтӕ куыд равӕрынц, уый хуызӕн.
8 Кӕнӕм хорз хъуыддӕгтӕ нӕ дарӕс ӕмӕ нӕ ӕддаг бакастӕй. Фарон облӕстон конгрестӕй иуы фӕстӕ иу стыр горӕты иу газеты редактор ныффыста: «Ӕппӕты диссагдӕр уыд Ӕвдисӕнты уагахаст. Куыд ӕхсызгон уыд фенын, уыйбӕрц адӕм сӕхи афтӕ уӕздан кӕй дардтой ӕмӕ кӕрӕдзийӕн афтӕ кӕй кад кодтой, уый. Сӕ уӕлӕ сӕ хуыздӕр дарӕс, афтӕмӕй сӕдӕгай бинонтӕ алыхуызон адӕмыхӕттытӕй сабыргай, ӕнӕ хъӕлӕбайӕ цыдысты стадионмӕ. Сӕ уагахаст тынг хицӕн кӕны, ӕндӕр хӕттыты стадионмӕ чи фӕцӕуы, уыдоны уагахастӕй. Раст зӕгъгӕйӕ, Ӕвдисӕнтӕ тынг хицӕн кӕнынц адӕмӕй ӕмткӕй райсгӕйӕ, уымӕн ӕмӕ ныртӕккӕ фылдӕр фенӕн ис ӕдзӕсгом, ӕфсарм кӕмӕ нал ис, ахӕм адӕм... Ӕвдисӕнтӕ ӕцӕгӕйдӕр хӕссынц циндзинад». Уӕдӕ нӕ дарӕс ӕмӕ нӕ ӕддаг бакастӕй, стӕй нӕ уагахастӕй дӕр бӕрӕг уӕд, кӕй аргъ кӕнӕм, конгрессы нӕ уырнындзинад фидар кӕнынӕн кӕй ӕрӕмбырд стӕм, уымӕн (Фил. 1:10, НД; 1 Тим. 2:9, 10).
9 Кӕнӕм хорз хъуыддӕгтӕ аргъуыд исгӕйӕ. Аргъуыд исынмӕ чи хъавы, уыдон хъуамӕ ацы цау ахсджиагыл нымайой. Куы сыл уа ӕмбӕлон найӕн дарӕс, уӕд равдисдзысты, уыцы цауӕн кӕй аргъ кӕнынц, уый. Уӕлдайдӕр хорз уаид, семӕ Библи чи ахуыр кодта, уыдон семӕ конгресмӕ ацӕуыны размӕ куы равзариккой «Кӕсджыты фарстытӕ» 1995 азы 1 апрелы номыры «Хъахъхъӕнӕг мӕсыг»-ӕй (уыр.).
10 Нӕ ӕддаг бакаст ӕмӕ Хуыцауӕн кадхӕссӕг уагахаст ӕвдисӕн лӕууынц нӕ чырыстон уырнындзинӕдтӕн, сыгъдӕгзӕрдӕ адӕмӕн та ӕххуыс кӕнынц ӕцӕгад ссарынӕн. Уӕдӕ уымӕ гӕсгӕ облӕстон конгрессы рӕстӕджы, «Хуыцауы Ныхас амонджытӕ», зӕгъгӕ, кӕмфӕнды ма уӕм, уӕддӕр «кӕнӕм хорз хъуыддӕгтӕ» ӕмӕ нӕ раппӕлой (Ром. 13:3).