«Раст тох кӕн уырнындзинадыл»
1 Апостол Павел фӕдзӕхста Тимофейы: «Раст тох кӕн уырнындзинадыл» (1 Тим. 6:12, НТ). Павел йӕхӕдӕг цард ацы ныхӕстӕм гӕсгӕ. Йӕ царды кӕрон уый фидарӕй загъта, хъӕбатырӕй кӕй тох кодта (2 Тим. 4:6—8, НТ). Уый куы лӕггад кодта, уӕд алкӕддӕр уыд ныфсджын, хъӕбатыр ӕмӕ фӕразон. Павелы куы фӕзмӕм, уӕд мах дӕр фидарӕй зондзыстӕм, нӕ чырыстон уырнындзинадыл нӕ бон куыд у, афтӕ кӕй тох кӕнӕм.
2 Ӕппӕт тыхтӕй архайын. Павел тынг бирӕ бафыдӕбон кодта хъусын кӕныны хъуыддаджы (1 Кор. 15:10). Мах дӕр афтӕ кӕнӕм, нӕ территорийы аккаг чи у, уыдоны куы фӕагурӕм, уӕд (Мтф. 10:11). Цӕмӕй дзы искӕй ссарӕм, уый тыххӕй нӕ, чи зоны, бахъӕуы райсом раджы сыстын ӕмӕ уынджы хъусын кӕнын. Хъусын кӕнынмӕ ма ацӕуӕм фӕссихор кӕнӕ та изӕрырдӕм, адӕм сӕ хӕдзӕрттӕм куы ӕрбаздӕхынц, уӕд.
3 Нӕ чиныгахуыркӕнынадӕн уацамындон фембӕлд куы уа, уӕд цӕмӕй ма рӕджы кӕнӕм, уый тыххӕй хъӕуы хиуыл кусын ӕмӕ хорз пълан кӕнын. Зӕгъӕм, цӕмӕй Вефилы уӕнгтӕй иуӕй-иутӕ се ’мбырдимӕ сабат-хуыцаубон хъусын кӕной, уый тыххӕй сын фӕндагыл, иуырдӕм, бахардз вӕййы иу сахаты бӕрц, йе та фылдӕр. Тынг ӕхсызгон ма нын вӕййы, не ’мбырдӕй иуӕй-иу хъусынгӕнджытӕ кӕнӕ та иуӕй-иу бинонтӕ дард рӕттӕй кӕй ӕрцӕуынц ӕмӕ ма рӕджы дӕр кӕй нӕ бакӕнынц, уый. Афтӕ зӕрдӕбынӕй ӕмӕ арӕхстджынӕй чи архайы, уыдон хъӕуы фӕзмынын.
4 Адӕймаг гыццылдӕр куы бацымыдис кӕна, уӕддӕр хъуамӕ бацархайӕм, цӕмӕй йӕ рохуаты ма ныууадзӕм. Ӕгӕрыстӕмӕй ма уынджы кӕнӕ та адӕм кӕмдӕриддӕр ис, уым журналтӕ куы радтӕм, уӕддӕр хъуамӕ бацархайӕм, цӕмӕй адӕймаджы адрис кӕнӕ телефоны номыр базонӕм. Уый фӕрцы йӕм фӕстӕдӕр бацӕудзыстӕм кӕнӕ йӕм фӕдзурдзыстӕм, цӕмӕй йӕ тынгдӕр бацымыдис кӕнӕм ӕмӕ бацархайдзыстӕм Библи ахуыр кӕнын райдайыныл.
5 Иудадзыг уацамынды цу. Павел хъусын кодта иудадзыг ӕмӕ бӕстон (Ром. 15:19). Ды та? Уацамынды иудадзыг цӕуыс? Ацы мӕй уацамынды уыдтӕ? Ӕмбырды чиныгахуыркӕнынады разамонӕг хъуамӕ бацархайа, цӕмӕй августы йӕ къордӕй алчидӕр уацамынды хайад райса. Уый дын баххуыс кӕндзӕн хъусын кӕнынӕн.
6 Павелау мах дӕр хорз уацхъуыд ӕппӕт тыхтӕй куы хъусын кӕнӕм, уӕд дарддӕр дӕр «раст тох кӕндзыстӕм уырнындзинадыл».