«Дӕхи ӕгасӕй дӕр... ратт» дӕ лӕггаддзинадӕн
1 Апостол Павел Коринфы куы царди, уӕд хуыдта цатыртӕ, ӕмӕ уый тыххӕй Библийы кӕсгӕйӕ нӕ, чи зоны, исчи ахъуыды кӕна, зӕгъгӕ йӕ уыцы куыст хъыгдардта хъусын кӕнынӕн. Фӕлӕ Куыстыты 18:5-ӕм стихы (НФ) дзырдӕуы: «Павел йӕхи ӕгасӕй дӕр дзырды куыстӕн ратта, ӕмӕ ӕвдисӕн ныллӕууыд Иудеӕгты раз, Йесо тӕккӕ Чырысти кӕй у,— уымӕн». Цымӕ Павел йӕхи ӕгасӕй дӕр хъусын кӕныны хъуыддагӕн цӕмӕн радта? Кӕд Коринфы бирӕтӕ систы уырнджытӕ, уӕддӕр ын Хицау загъта, зӕгъгӕ, нырма уыцы сахары бирӕ ахуыргӕнинӕгтӕ хъӕуы бацӕттӕ кӕнын (Ап. к. 18:8—11). Цымӕ мах дӕр хъӕуы нӕхи ӕгасӕй дӕр нӕ лӕггаддзинадӕн радтын? О. Нырма нӕ бон у бирӕ адӕмы ссарын ӕмӕ сын ӕцӕгад бацамонын.
2 Апрелы уацамындӕн фылдӕр рӕстӕг рахицӕн кӕн. Кӕй зӕгъын ӕй хъӕуы, алы мӕй дӕр фӕархайыс, цӕмӕй хорз уацхъуыд хъусын кӕныны хъуыддаджы хайад исай. Фӕлӕ нын иуӕй-иу мӕйты вӕййы фылдӕр фадӕттӕ уыцы хъуыддагӕн «нӕхи ӕгасӕй дӕр... радтынӕн». Уый хауы апрелмӕ дӕр, Ӕрымысӕн изӕр цы мӕй уыдзӕн, уымӕ. Ацы уалдзӕг дын дӕ уавӕртӕ фадат дӕттынц, цӕмӕй ӕххуысгӕнӕг пионерӕй лӕггад кӕнай кӕнӕ фылдӕр рӕстӕг хъусын кӕнай? Хъусынгӕнджытӕй ууыл бирӕтӕ архайынц ӕмӕ цӕуынц тынг арфӕгонд (2 Кор. 9:6). Дӕ бон цы у, уый кӕд аразыс, уӕд дӕ зӕрдыл дар, Иегъовӕйӕн тынг ӕхсызгон кӕй у, ӕппӕт зӕрдӕйӕ йын кӕй лӕггад кӕныс, уый (Лук. 21:2—4). Дӕ уавӕртӕ цавӕрфӕнды ма уой, уӕддӕр дӕ разы сӕвӕр нысан — апрелы дӕ лӕггаддзинадӕн «дӕхи ӕгасӕй дӕр... радтын». Ӕмӕ дӕ ма ферох уӕд мӕйы кӕрон дӕ уацамынды хыгъд радтын, цӕмӕй дӕ зӕрдиаг куыст нымад ӕрцӕуа Иегъовӕйы адӕмы куыстимӕ.
3 Ӕрымысӕн изӕрмӕ ногтӕй чи ӕрбацыд, уыдоны бабӕрӕг кӕн. Фарон Уӕрӕсейы Ӕрымысӕн изӕрмӕ ӕрбацыд 267 617 адӕймаджы. Ацы аз цас уыдзысты, уый нырма бӕрӕг нӕу. Фӕлӕ хыгъдтӕ куыд ӕвдисынц, афтӕмӕй нырма «кӕрдинаг» тынг бирӕ ис (Матф. 9:37, 38). Уымӕ гӕсгӕ, гӕнӕн уӕвгӕйӕ, тагъддӕр бацу, Ӕрымысӕн изӕрмӕ чи ӕрбацыд, уыцы цымыдисгӕнаг адӕммӕ, цӕмӕй сын сӕ уырнындзинад бафидар кӕнынӕн баххуыс кӕнай. Уыцы хъуыддаг куы фӕстӕмӕ-фӕстӕмӕ кӕнӕм, уӕд, гӕнӕн ис, «хинӕйдзаг... аскъӕфа» Паддзахады тыххӕй дзырд, кӕцы тыд ӕрцӕуы сӕ зӕрдӕты (Матф. 13:19). Адӕймагмӕ ӕвӕстиатӕй куы бацӕуай, уӕд уый ууыл дзурӕг уыдзӕн, ӕмӕ «дӕхи ӕгасӕй дӕр... дӕттыс» дӕ лӕггаддзинадӕн.
4 Уацамынды хайад рагӕй чи нӕ исы, уыдонӕн дарддӕр дӕр ӕххуыс кӕн. Февралы уӕлдай зӕрдиагӕй райдыдтой ӕххуыс кӕнын, уацамынды хайад рагӕй чи нӕ исы, уыдонӕн. Кӕд хистӕр нӕлгоймӕгтӕ уыдонӕй алкӕйдӕр нӕма бабӕрӕг кодтой, уӕд хъуамӕ спълан кӕной, цӕмӕй сӕм апрелы ӕнӕмӕнг бацӕуой. Хистӕр нӕлгоймӕгтӕ бацархайдзысты, цӕмӕй сбӕлвырд кӕной адӕймагӕн йӕ зындзинӕдты аххосаг ӕмӕ йын ӕппӕты хуыздӕр цы баххуыс кӕндзӕн, цӕмӕй фӕстӕмӕ Иегъовӕйӕн зӕрдиагӕй лӕггад кӕнын райдайа. Ахӕм уарзӕгой ахаст ууыл дзурӕг у, ӕмӕ хистӕр нӕлгоймӕгтӕ сӕ бӕрндзинад, куыд «Хуыцауы дзуджы» фыййӕуттӕ, афтӕ, нымайынц ахсджиагыл (1 Пет. 5:2; Ап. к. 20:28). 1993 азы 15 сентябры номыры «Хъахъхъӕнӕг мӕсыджы» 22, 23-ӕм фӕрстыл (уыр.) ис, хъусынгӕнджытӕ арӕхдӕр цы фондз зындзинадыл сӕмбӕлынц, уыдон аиуварс кӕнынӕн хорз уынаффӕтӕ. Чи зоны, уацамынды хайад рагӕй чи нӕ исы, уыдон уыцы зындзинӕдтӕй искӕцыйыл сӕмбӕлдысты, ӕмӕ хистӕр нӕлгоймӕгты бон у уыцы уынаффӕтӕй спайда кӕнын, цӕмӕй сын баххуыс кӕной. Иуӕй-иутӕ сӕ апрелы фӕстӕмӕ хъусын кӕнын куы райдайой, уӕд уый уыдзӕн тынг хорз.
5 Фылдӕр адӕмӕн баххуыс кӕн ӕнӕаргъуыд хъусынгӕнджытӕ суӕвынӕн. Дӕ сывӕллӕттӕн сӕ бон у хорз уацхъуыды хъусынгӕнджытӕ суӕвын? Библи кӕимӕ ахуыр кӕныс, уыдоны тыххӕй та цы ис зӕгъӕн? Хистӕр нӕлгоймӕгтӕ сӕ кӕд ӕнӕаргъуыд хъусынгӕнджытыл банымайой, уӕд апрелы мӕй хорз рӕстӕг нӕ уыдзӕн, цӕмӕй хъусын кӕнын райдайой? Кӕд адӕймагӕн йӕ уырнындзинад фидар кӕны ӕмӕ сахуыр кодта брошюрӕ «Цы домы» кӕнӕ чиныг «Базонынад», уӕд дарддӕр йемӕ Библи ахуыр кӕнӕн ис ӕндӕр чиныджы ӕххуысӕй — чиныг «Хуыцауы Ныхас» (уыр.) йе та «Иугондӕй кувынц» (уыр.). Дӕ нысан у ахуыргӕнинагӕн баххуыс кӕнын, цӕмӕй ӕцӕгад арфдӕр бамбара, ӕнӕаргъуыд хъусынгӕнӕг суа, стӕй Иегъовӕйӕн нывонддзырд радта ӕмӕ аргъуыд Ӕвдисӕн суа (Еф. 3:17—19; 1 Тим. 1:12; 1 Пет. 3:21).
6 Библи кӕимӕ ахуыр кӕныс, уыдоныл ӕдзухдӕр зӕрдиагӕй куы тыхсай, уӕд сын уый баххуыс кӕндзӕн, цӕмӕй ӕцӕгад сӕхи бакӕной. Афтӕ, иу Ӕвдисӕн сӕмбӕлд ацӕргӕ лӕг ӕмӕ усыл, ӕмӕ уыдон цингӕнгӕйӕ сразы сты Библи ахуыр кӕныныл. Фӕлӕ сӕ ӕртӕ къуырийы фӕд-фӕдыл нӕ равдӕлд ахуыр кӕнынмӕ. Фӕстагмӕ уӕддӕр райдыдтой Библи ахуыр кӕнын. Стӕй та уыцы бинонтӕ ахуыр ӕргъӕвтой алы дыккаг къуыри дӕр. Фӕлӕ ӕппынфӕстаг сылгоймагӕн йӕ къухы бафтыд стыр ӕнтыстдзинӕдтӕ ӕмӕ аргъуыд райста. «Аргъуыд куы райста,— загъта ӕфсымӕр,— уӕд фырцинӕй йӕ цӕссыгтӕ ӕркалдысты, ӕмӕ ӕз дӕр ӕмӕ мӕ бинойнаг дӕр фырцинӕй нӕ цӕссыг нал урӕдтам». О, хорз уацхъуыдӕн «хи ӕгасӕй дӕр... раттын» хӕссы стыр циндзинад!
7 Библийы пехуымпарӕдтӕй ӕмӕ зӕххыл цы цаутӕ цӕуы, уыдонӕй бӕрӕг у, рӕстӕджыты фӕудӕн йӕ тӕккӕ кӕрон кӕй цӕрӕм, уый. Ныр ахӕм рӕстӕг у, ӕмӕ Хуыцауы адӕм иууылдӕр хъуамӕ «сӕхи ӕгасӕй дӕр... раттой», цӕмӕй хорз уацхъуыд иннӕтӕн фехъусын кӕной. Апостол Павел нын зӕрдӕ ӕвӕры, нӕ «фыдӕбон дзӕгъӕлы кӕй нӕу Хицауы раз», уымӕй (1 Кор. 15:58).