Искӕимӕ Библи ахуыр кӕнын райдайынӕн нӕм ис ног кусӕнгарз!
1 Иу америкӕйаг сылгоймаг уыд ӕнувыд католик. Йӕ аргъуаны ахуырӕдтыл фидарӕй хӕцыд. Суанг ма уый фӕдыл Ватиканмӕ дӕр ацыд. Фӕлӕ йӕм Иегъовӕйы Ӕвдисӕнтӕ куы бацыдысты, уӕд сразы хӕдзары Библи ахуыр кӕныныл. Цымӕ цӕмӕн? Фӕндыд ӕй базонын, Библийы цы фыст ис, уый, уымӕн ӕмӕ йын йӕ аргъуаны никуы загътой, цӕмӕй йемӕ хӕдзары Библи ахуыр кӕной. Ацы цау цӕуыл дзурӕг у? Развӕлгъау кӕй нӕ фӕзонӕм, Библи ахуыр кӕныныл чи сразы уыдзӕн, уый (Екк. 11:6).
2 Библи кӕй цымыдис кӕны, уыдонимӕ йӕ ахуыр кӕнын цӕттӕ кӕй стӕм, уый адӕмӕн алкӕддӕр фӕдзурыс? Кӕм цӕрыс, уым ӕй адӕм зонынц, Библи ахуыр кӕнын кӕй фӕнды, уыдонимӕ йӕ лӕварӕй кӕй ахуыр кӕнӕм? Цы хъуамӕ саразӕм, цӕмӕй ацы хъуыддаг адӕм базоной? Хъуамӕ пайда кӕнӕм ног кусӕнгарзӕй! Уый у 6-фарсон аив фӕлгонцгонд трактат, хуыйны «Фӕнды дӕ Библи хуыздӕр базонын?». Цӕй уӕдӕ ӕркӕсӕм трактатмӕ ӕмӕ йын йӕ сӕргондтӕ равзарӕм.
3 «Цӕмӕн хъӕуы Библи кӕсын?» Трактат цы аххосӕгты кой кӕны, уыдон хъӕуы равзарын. Уым фыст ис, Библийы «нын Хуыцау зӕрдӕхӕларӕй [кӕй] амоны», куыд ис уымӕ куывды руаджы баввахс уын ӕмӕ куыд ис райсӕн йӕ лӕвар — ӕнусон цард (1 Фес. 2:13). Трактаты дзырдӕуы, зӕгъгӕ, «Библийы ӕцӕгады фӕрцы адӕймаджы цӕстытӕ байгом вӕййынц» алыхуызон фарстатӕм, зӕгъӕм: мӕлӕты фӕстӕ цы ’рцӕуы ӕмӕ зӕххыл афтӕ бирӕ бӕллӕхтӕ цӕмӕн цӕуы. Афтӕ ма дзы дзырдӕуы, «Хуыцау Библийы цы уагӕвӕрдтӕ сфидар кодта», уыдон тыххӕй. Ацы уагӕвӕрдтӕ адӕймаджы ахуыр кӕнынц ӕнӕниз цард кӕныныл, уыдон руаджы ма уыдзӕн амондджындӕр, ныфсджындӕр ӕмӕ ма йӕм фӕзындзӕн хъӕугӕ миниуджытӕ дӕр. Трактаты ма ис иу аххосаг, Библи кӕсын кӕй хъӕуы, уымӕн. Уым ис фидӕны тыххӕй пехуымпарӕдтӕ, уыдон ӕвдисынц, цы нӕм ӕнхъӕлмӕ кӕсы, уый (Рар. 21:3, 4).
4 «Ӕххуыс Библи ӕмбарынӕн». Трактаты дзырдӕуы, «Хуыцауы Ныхас йӕхигъӕдӕй йӕ бон [кӕй] никӕмӕн у бамбарын». Уым ма ис амындтӕ, Библи куыд фӕахуыр кӕнӕм, уымӕн. Уым дзырдӕуы: «Библи хорз базонынӕн иууыл хуыздӕр у, цы сӕйраг ахуырӕдтӕ дзы ис, уыдонӕй райдайын». Уый ӕмбарын кӕны, «Библи [кӕй] у сӕйраг чиныг», ӕмӕ ма нын амоны брошюрӕ «Цы домы»-мӕ. Ацы брошюрӕ баххуыс кӕндзӕн, Библи чи ахуыр кӕны, уымӕн, «Библи алыхуызон фарстаты фӕдыл цы дзуры, уый бамбарынӕн». Иннӕ сӕргонд та дзуры ахсджиаг фарстайыл.
5 «Цӕмӕй Библи бамбарай, уый тыххӕй цӕттӕ дӕ алы къуыри дӕр рӕстӕг арынмӕ?» Ацы сӕргонды дзырдӕуы, Библи кӕй ис ахуыр кӕнӕн ахуыргӕнинагӕн йӕ бон кӕд у ӕмӕ йӕ кӕм фӕнды, йӕ хӕдзары, ӕндӕр искуы кӕнӕ та телефонӕй. Кӕй ма у дӕ бон Библи ахуыр кӕнынмӕ фӕхонын? Трактат дзуапп дӕтты: «Дӕ бинонты, дӕ хӕлӕрттӕй дӕ кӕй фӕнды, уыдоны. Йе та дӕхӕдӕг иунӕгӕй, кӕд дын афтӕ хуыздӕр у, уӕд». Иу урок цас цӕуы? Трактат ӕмбарын кӕны, «бирӕтӕ Библи ахуыр кӕнынӕн алы къуыри дӕр [кӕй] ссарынц сахаты бӕрц. Алы къуыри дӕр дын уымӕй фылдӕр рӕстӕг ис ӕви къаддӕр, уӕддӕр дын Иегъовӕйы Ӕвдисӕнтӕ ӕххуыс кӕндзысты, дӕ уавӕр дӕ куыд амоны, уымӕ гӕсгӕ». Уый ахсджиаг у! Мах кӕддӕриддӕр кӕсдзыстӕм алы ахуыргӕнинаджы уавӕрмӕ.
6 «Хонӕм дӕ ахуырмӕ». Трактаты цы купон ис, уый руаджы адӕймагӕн йӕ бон у заказ скӕнӕн брошюрӕ «Цы домы» кӕнӕ ныффыссын, цӕмӕй йӕм хӕдзармӕ ӕрбацӕуой, ӕмӕ йын равдисой, Библийы ахуыр хӕдзары куыд фӕцӕуы, уый. Купоныл ис брошюрӕ «Цы домы»-йы ныв. Уӕдӕ нӕй зӕгъӕн, ацы ног трактат кӕй сразӕнгард кӕндзӕн бирӕ сыгъдӕгзӕрдӕ адӕмы не ’ххуыс райсынмӕ? Ныр аныхас кӕнӕм, куыд ис ацы кусӕнгарзӕй хуыздӕр пайда кӕнӕн.
7 Кӕмӕн ис радтӕн трактат? Трактат радтӕн ис адӕймагӕн йӕхимӕ кӕнӕ йӕ ис ныууадзӕн, хӕдзары кӕй нӕ баййӕфтам, уыдонӕн. Дӕттӕн ӕй ис хӕдзарӕй-хӕдзармӕ, уынджы, кӕнӕ ӕхсӕнадон бынӕтты. Адӕм нын нӕ литературӕ куы нӕ исой, уӕддӕр-иу сын ацы трактат радтут. Цы журналтӕ ӕмӕ цы чингуытӕ дӕттӕм, уыдон мидӕг-иу ӕй бавӕрут. Искӕмӕ фыстӕг куы ӕрвитай, уӕд-иу ын ӕй къонверты нывӕр. Телефонӕй кӕимӕ фӕныхас кӕныс, уыдонӕн дӕр ӕй арвит. Демӕ алкӕддӕр хӕсс трактаттӕ, цӕмӕй сӕ радтай истытӕ ӕлхӕнгӕйӕ, транспорты цӕугӕйӕ, кӕнӕ дын искӕимӕ ныхас куы рауайа, уӕд. Радт ӕй, хӕдзармӕ дӕм чи бацӕуа, уымӕн. Радт-иу ӕй дӕ хӕстӕджытӕн, дӕ сыхӕгтӕн, де ’мкусджытӕн, де ’мкъласонтӕн ӕмӕ дӕ зонгӕтӕн. Архайӕм, цӕмӕй ацы трактат алкӕмӕндӕр радтӕм! Уый фӕстӕ та цы хъӕуы аразын?
8 Чи байхъуыста, уымӕ цалдӕр боны фӕстӕ бацу. Иуӕй-иутӕ гӕнӕн ис, ӕмӕ уайтагъд сразы уой Библи ахуыр кӕныныл. Уымӕ гӕсгӕ уацамынды куы цӕуай, уӕд дӕм хъуамӕ кӕддӕриддӕр уа дыууӕ брошюрӕ «Цы домы»: иу кӕимӕ ахуыр кӕнай, уымӕн, иннӕ та дӕхицӕн. Кӕд адӕймаджы бафӕнда Библи ахуыр кӕнын, уӕд ӕй ма аргъӕв, уыцы тӕккӕ райдай. Байгом кӕн брошюрӕ фыццаг фарсыл ӕмӕ бакӕс текст «Куыд пайда кӕнын хъӕуы ацы брошюрӕйӕ». Уый фӕстӕ рахиз 1-аг урокмӕ ӕмӕ равдис, ахуыр куыд фӕцӕуы, уый. Уымӕй ӕнцондӕр ма цы хъуамӕ уа?
9 Адӕймаджы рӕстӕг куы хъӕуа ахуыры тыххӕй ахъуыды кӕнынӕн. Цалдӕр боны фӕстӕ адӕймагмӕ фӕстӕмӕ бацу. Хъуамӕ дӕм уа брошюрӕ «Цы домы». Равдис ын дыккаг фарсыл урокты сӕргӕндтӕ. Зӕгъ ын, цӕмӕй йӕхӕдӕг равзара, фылдӕр ӕй цы урок цымыдис кӕны, уый. Уый фӕстӕ, цы урок равзара, уый байгом кӕн, ӕмӕ дӕ ныхас райдай.
10 Журналтӕ кӕм ныууагътай. Кӕд искӕмӕн ныууагътай трактат журналимӕ, уӕд бацу ӕмӕ йын зӕгъ: «Амӕй размӕ дын ныууагътон журнал „Хъахъхъӕнӕг мӕсыг“. Ӕвӕццӕгӕн, бафиппайдтай журналы йӕ фыццаг фарсыл кӕй ис фыст: „Хъахъхъӕнӕг мӕсыг хъусын кӕны Иегъовӕйы Паддзахад“. Абон та мӕ фӕнды зӕгъын, ацы Паддзахад цы у ӕмӕ дӕуӕн ӕмӕ дӕ бинонтӕн цы ӕрхӕсдзӕн, уый тыххӕй». Уый фӕстӕ брошюрӕ «Цы домы» байгом кӕн 6-ӕм урокыл, райдай фыццаг абзацӕй, бакӕс ӕй ӕмӕ ӕрныхас кӕн ӕрмӕстдӕр адӕймагӕн йӕ рӕстӕг цас амоны, уыйбӕрц. Уӕ ныхас куы фӕуат, уӕд баныхас кӕн, ӕндӕр хатт ӕм кӕй ӕрбацӕудзынӕ ӕмӕ урок кӕронмӕ кӕй фӕуыдзыстут.
11 Демӕ хӕсс трактаттӕ. Службӕйон цӕстдарӕг ӕмӕ ӕфсымӕртӕй литературӕйӕн дзуапп чи дӕтты, уыдон хъуамӕ кӕсой, цӕмӕй ӕмбырды уа трактаттӕ «Библи базонын». Трактаттӕй цалдӕр уӕт дӕ дзыппы, дӕ сумкӕйы, дӕ машинӕйы, дӕ куысты, скъолайы, хӕдзары дуары цур — ахсджиаг у, цӕмӕй алкӕддӕр дӕ къухы бын уой. Кӕй зӕгъын ӕй хъӕуы, уацамынды цы хызын фӕхӕссыс, уым дӕр дын дзы хъуамӕ уа иу цалдӕр, цӕмӕй сӕ радтай, Библийы тыххӕй исты базонын кӕй фӕнда, уымӕн.
12 Иегъовӕ нын нӕ куыстӕн раафӕ кӕнӕд. Алы чырыстоны дӕр тынг фӕнды искӕимӕ Библи ахуыр кӕнын (Матф. 28:19, 20). Искӕимӕ хӕдзары Библи ахуыр кӕныс? Кӕд о, уӕд ӕндӕр ахуыргӕнинагӕн рӕстӕг не ссарис? Кӕд ныр Библи никӕимӕ ахуыр кӕныс, уӕд дӕ, кӕй зӕгъын ӕй хъӕуы, тынг фӕнды ссарын ахӕм адӕймаг. Уый тыххӕй кув Иегъовӕмӕ, цӕмӕй дын раафӕ кӕна дӕ куыстӕн, ӕмӕ ссардзынӕ Библи ахуыр кӕнын кӕй фӕнды, ахӕм адӕймаг. Стӕй, цӕй тыххӕй кувай, уымӕ гӕсгӕ архай (1 Иоан. 5:14, 15).
13 Библи ахуыр кӕнын райдайынӕн нӕм ис ног кусӕнгарз! Дзӕбӕх ӕм ӕркӕс. Фадат дын куы фӕзына, уӕд ӕй радт. Архай «хорздзинад аразын, хорз хъуыддӕгтӕй хъӕздыг кӕнын, рӕдау уын», ӕмӕ Хуыцауы Ныхасӕй дӕхӕдӕг цы зоныс, уый иннӕтӕн «ӕнӕзивӕгӕй хай кӕн» (1 Тим. 6:18, НД).
[Рамкӕ 4 фарсыл]
ТРАКТАТ РАДТӔН ИС
◼ Алыбон ныхас кӕнгӕйӕ
◼ Исчи нын нӕ литературӕ куы иса
◼ Хӕдзары куы ничи уа
◼ Дыккаг хатт бацӕугӕйӕ
◼ Уынджы дзургӕйӕ
◼ Ӕхсӕнадон бынӕтты хъусынгӕнгӕйӕ
◼ Ӕнӕнхъӕлӕджы нын ныхас куы бацайдагъ уа
◼ Фыстӕджытӕ фысгӕйӕ
◼ Транспорты цӕугӕйӕ
◼ Исчи нӕм хӕдзармӕ куы ӕрбацӕуа
◼ Нӕ хӕстӕджытимӕ, нӕ сыхӕгтимӕ, не ’мкусджытимӕ, не ’мкъласонтимӕ ӕмӕ нӕ зонгӕтимӕ ныхасгӕнгӕйӕ