Цӕттӕ у адӕймагимӕ Библи ахуыр кӕнын райдайынмӕ
1. Чырысти нын Матфейы 28:19, 20 цы бафӕдзӕхста, уый ӕххӕст кӕнынмӕ цы хауы?
1 Чырысти йӕ фӕдылдзӕуджытӕн бафӕдзӕхста, «цӕттӕ кӕнут ахуыргӕнинӕгтӕ... ӕмӕ сын амонут», зӕгъгӕ (Матф. 28:19, 20). Уымӕ гӕсгӕ мах дӕр фӕнды, цӕмӕй алкӕддӕр цӕттӕ уӕм, адӕймагӕн Библи ахуыр кӕныны тыххӕй зӕгъынмӕ, не ’мбырд уыцы хъуыддагыл цы бон фӕархайы, ӕрмӕст уӕд нӕ, фӕлӕ иннӕ бонты дӕр. Дӕлдӕр уый фӕдыл ис цалдӕр хорз уынаффӕйы.
2. Кӕмӕн ис Библи ахуыр кӕныны тыххӕй зӕгъӕн?
2 Архай искӕимӕ Библи ахуыр кӕнын райдайыныл. Цас арӕхдӕр дзурӕм Библи ахуыр кӕныны тыххӕй, уыйас нын фылдӕр фадӕттӕ уыдзӕн искӕимӕ ахуыр кӕнын райдайынӕн (Еккл. 11:6). Искуы адӕймагӕн комкоммӕ Библи ахуыр кӕныны тыххӕй загътай? Америкӕйы иу ӕмбырды хотӕ ӕмӕ ’фсымӕртӕ сӕ разы нысан сӕвӕрдтой, ӕнӕхъӕн мӕй сӕ хъарутӕ иууылдӕр уыцы хъуыддагмӕ кӕй сараздзысты. Куыд ӕхсызгон сын уыд мӕйы кӕрон базонын, иумӕ 42 ахуыры кӕй райдыдтой, уый! Афтӕ ма хъуыды кӕнӕм, адӕм ӕнӕуи дӕр кӕй зонынц, нӕ бон кӕй у семӕ Библи ахуыр кӕнын. Адӕймаджы та ногӕй куы бӕрӕг кӕнай, уӕд ын Библи ахуыр кӕныны тыххӕй цӕуылнӕ ис зӕгъӕн? Кӕд ӕй нӕ бафӕнда, уӕд дӕ ныфс ма асӕттӕд. Дарддӕр-иу ӕм цу ӕмӕ йын йӕ уырнындзинад фидар кӕн. Библи ахуыр кӕныны тыххӕй дӕ сыхӕгтӕн, дӕ хӕстӕджытӕн, де ’мкусджытӕн кӕнӕ де ’мкъласӕгтӕн никуы дзырдтай? Кӕд искӕимӕ Библи ахуыр кӕныс, уӕд–иу ӕй бафӕрс, де ’мбӕлттӕй кӕнӕ дӕ хӕстӕджытӕй Библи ахуыр кӕнын никӕй фӕнды, зӕгъгӕ.
3. Цавӕр трактат нын баххуыс кӕндзӕн адӕмимӕ Библи ахуыр кӕнын райдайынӕн ӕмӕ дзы нӕ бон пайда кӕнын кӕд у?
3 Цы нын баххуыс кӕндзӕн? Адӕмимӕ Библи ахуыр кӕнынӕн нын баххуыс кӕндзӕн трактат «Рӕстдзинад базонын дӕ фӕнды?». Адӕймаг нӕ ӕндӕр литературӕ айса ӕви нӕ, уӕддӕр ын нӕ бон у ацы трактат раттын. Нӕ бон ма йӕ у дӕттын кусӕнуӕтты, уынджы, писмоты руаджы хъусын кӕнгӕйӕ кӕнӕ адӕймаджы ногӕй куы фӕбӕрӕг кӕнӕм, уӕд. Хӕдзарӕй куы ничи ракӕса, уӕд ӕй ис дуары ныууадзӕн. Цӕуылнӕ ис ацы трактат немӕ райсӕн, автобусыл цӕуын нӕ куы хъӕуа, уӕд, йе та дуканимӕ кӕнӕ куыстмӕ цӕугӕйӕ? Трактаты фӕстаг фарсыл фыст ис, алкӕмӕн дӕр йӕ бон кӕй у Библи ахуыр кӕнын райдайын.
4. Нӕ бон куыд у пайда кӕнын трактатӕй «Рӕстдзинад базонын дӕ фӕнды?», цӕмӕй адӕймагимӕ Библи ахуыр кӕнын райдайӕм?
4 Адӕймагӕн трактат куы раттай, уӕд ын равдис, фыццаг фарсыл цы фарстатӕ ис, уыдон ӕмӕ йӕ бафӕрс: «Ацы фарстатӕй дӕ кӕцыйӕн фӕнды дзуапп базонын?» Стӕй, уыцы фарстайӕн трактаты цы дзуапп ис, ууыл иумӕ аныхас кӕнут. Уый фӕстӕ йын бакӕс кӕнӕ йын дӕхи ныхӕстӕй зӕгъ, трактаты фӕстаг фарсыл Библи ахуыр кӕныны тыххӕй цы фыст ис, уый. Стӕй йын дӕ бон у равдисын, уыцы фарстайы фӕдыл фылдӕр кӕм бакӕсӕн ис, уыцы чиныг. Уый фӕстӕ-иу йемӕ баныхас кӕн иннӕ фембӕлдмӕ.
5. Адӕмимӕ Библи ахуыр кӕнын райдайынмӕ цӕттӕ цӕмӕн хъуамӕ уӕм?
5 Нӕ участокты нырма ис, Библи бӕлвырдӕй цы дзуры, уый зӕрдиагӕй базонын кӕй фӕнды, ахӕм адӕм. Нӕ нысан семӕ Библи ахуыр кӕнын райдайын куы уа, уӕд нын фылдӕр фадӕттӕ уыдзӕн, цӕмӕй иннӕтӕн царды фӕндагыл ӕрлӕууынӕн баххуыс кӕнӕм (Матф. 7:13, 14).