Дӕ хӕдзары фембӕлдтӕ уадзӕн ис?
1 Фыццаг ӕнусы чырыстӕттӕй бирӕтӕн сӕ хӕдзӕртты уагътой ӕмбырдтӕ (1 Кор. 16:19, НФ; Кол. 4:15, НФ; Филим. 1, 2, НФ). Абон иуӕй-иу ӕмбырдтӕн нӕ фаг кӕны, ӕмбырды чиныгахуыр ӕмӕ уацамындон фембӕлд кӕм уадзой, ахӕм бынӕттӕ. Уымӕ гӕсгӕ бирӕ чиныгахуыры къордтӕм ӕрбацӕуы 30 адӕймагӕй фылдӕр, кӕд дзы 15 адӕймагӕй фылдӕр хъуамӕ ма уа, уӕддӕр.
2 Стыр кад. Никуы ахъуыды кодтай, цӕмӕй дӕ хӕдзары чиныгахуыры фембӕлд цӕуа, ууыл? Уый тыххӕй хъӕуы стыр, райдзаст уат, ӕмӕ ма йӕм сыгъдӕг уӕлдӕф ӕрбауадзыны фадат дӕр куыд уа. Чиныгахуыр у ӕмбырды фембӕлд ӕмӕ, Иегъовӕ йӕ адӕмы ахуыр кӕнынӕн цы мадзӕлттӕй пайда кӕны, уыдонӕй иу, уымӕ гӕсгӕ, дӕ хӕдзары чиныгахуыр цӕуа, уый стыр кад у. Бирӕтӕ дзурынц, зӕгъгӕ, сӕ хӕдзары чиныгахуыр кӕй вӕййы, уый ахъаз у сӕ уырнындзинадӕн.
3 Кӕд дӕуӕн дӕр дӕ хӕдзары ахӕм бынат ис, уӕд, дӕ хорзӕхӕй, зӕгъ уый тыххӕй хистӕр нӕлгоймӕгтӕн. Чи зоны, ӕмӕ уыдон фембӕлдтӕ уадзынӕн фылдӕр бынӕттӕ агурынц. Кӕд дӕ хӕдзары чиныгахуыры фембӕлд уадзыны фадат нӕй, уӕд та дӕм чи зоны уацамындон фембӕлдтӕ ис уадзӕн? Ӕмӕ кӕд бынӕттӕ ныртӕккӕ нӕ хъӕуа, уӕддӕр хистӕр нӕлгоймӕгтӕн ӕхсызгон уыдзӕн, дӕ хӕдзары фембӕлдтӕ уадзыны фадат кӕй ис, уый. Чи зоны дӕм фидӕны ахӕм стыр кад ӕрхауа.
4 Уӕздан уагахаст. Искӕй хӕдзары чи ӕмбырд кӕны, уыдон иууылдӕр хъуамӕ архайой, цӕмӕй фысымы хӕдзары мацы разиан кӕной. Ныййарджытӕ хъуамӕ сӕ сывӕллӕттӕм кӕсой, цӕмӕй фембӕлд кӕм цӕуы, уыцы уатӕй ӕддӕмӕ ма цӕуой, ӕмӕ хӕдзары къуымты ма рацу-бацу кӕной. Уӕ зӕрдыл дарут сыхӕгты дӕр, ма сӕ тыхсын кӕнут (2 Кор. 6:3, 4; 1 Пет. 2:12).
5 Дзуттытӕм 13:16 (НФ) нӕ разӕнгард кӕны, цӕмӕй «ма рох кӕнӕм хорз ракӕнын ӕмӕ кӕрӕдзимӕ зӕрдиагӕй фӕкӕсын; цӕвиттон ахӕм нывӕндтӕ Хуыцауӕн ӕхцон сты». Ӕмбырды фембӕлд дӕ хӕдзары куы уа, уӕд уый у диссаджы фадат иннӕтӕн хорздзинад кӕнынӕн ӕмӕ дӕм «зынаргъӕй цы ис, уымӕй Иегъовӕйы кадджын кӕнынӕн» (Ӕмб. 3:9, НД).