Дӕ цӕст хуымӕтӕг уӕд
1. Хуымӕтӕг цӕст кӕмӕн ис ӕмӕ уый ахсджиаг цӕмӕн у?
1 Йесо йӕ Уӕлхох уацамынды йӕ хъус ӕрдардта, адӕймаг цардмӕ цы цӕстӕй кӕсы, аразгӕ дӕр ӕй уымӕ гӕсгӕ кӕй кӕны. Уый загъта: «Дӕ цӕст сыгъдӕг куы уа, уӕд дӕ буар иуылдӕр уыдзӕн рухс; фӕлӕ дӕ цӕст куы уа ӕвзӕр, уӕд дӕ буар иуылдӕр уыдзӕн талынг» (Матф. 6:22, 23). Сыгъдӕг, кӕнӕ хуымӕтӕг, цӕст уымӕн ис, йӕ царды нысан фӕллой, мулк ӕмбырд кӕнын нӕ, фӕлӕ Хуыцауы фӕндон ӕххӕст кӕнын кӕмӕн у (Матф. 6:19—21, 24—33). Цӕмӕй нӕ цӕст хуымӕтӕг уа, уымӕн нын цы баххуыс уыдзӕн?
2. Хуыцауы Ныхасмӕ гӕсгӕ мулкмӕ, фӕллоймӕ цы цӕстӕй хъуамӕ кӕсӕм?
2 Цы дын ис, уымӕй разы у. Фыстад куыд амоны, афтӕмӕй алчидӕр хъуамӕ йӕ бинонты дара, цух сӕ мацӕмӕй уадза (1 Тим. 5:8). Фӕлӕ уый ууыл дзурӕг нӕу, ӕмӕ ногӕй ӕмӕ хуыздӕрӕй цыдӕриддӕр ис, уыдӕттӕ амал кӕнӕм (Ӕмб. 27:20; 30:8, 9). Библи нын зӕгъы, цӕмӕй разы уӕм, ӕнӕмӕнгхъӕугӕ цы у, уымӕй — «хӕринаг ӕмӕ дарӕсӕй» (1 Тим. 6:8; Дзут. 13:5, 6). Ацы уынаффӕмӕ куы хъусӕм, уӕд нӕ цӕст, цы нӕ нӕ хъӕуы, уыдӕттыл нӕ дзӕгъӕлтӕ кӕндзӕн.
3. Цӕмӕй ӕнӕхъуаджы нӕ тыхтӕ ма хӕрӕм, уый тыххӕй нӕ цы хъӕуы аразын?
3 Хорз уаид, ӕнӕхъуаджы ӕхца ӕфстау куы нӕ исиккам, нӕ рӕстӕг ӕмӕ нын нӕ тыхтӕ цы хӕры, уыдӕттӕ куы нӕ ӕлхӕниккам ӕмӕ куы нӕ аразиккам (1 Тим. 6:9, 10). Фӕлӕ цы хъӕуы уый тыххӕй? Дӕ зӕрды исты бакӕнын куы уа, уӕд скув ӕмӕ дзӕбӕх ахъуыды кӕн, Хуыцауы куысты дӕ бахъыгдардзӕн ӕви нӕ. Царды дын хъуамӕ иууыл сӕйрагдӕр уа Хуыцауы хъуыддаг (Фил. 1:10; 4:6, 7).
4. Цӕмӕн хъуамӕ фӕхуымӕтӕгдӕр кӕнӕм нӕ цард?
4 Дӕ цард фӕхуымӕтӕгдӕр кӕн. Цӕмӕй мулчы хызы ма бахауӕм, уый тыххӕй ма нӕ хъӕуы нӕ цард фӕхуымӕтӕг кӕнын дӕр. Иу ӕфсымӕр бамбӕрста, сӕ цард куы фӕхуымӕтӕгдӕр кодтой ӕмӕ сӕм раздӕрау бирӕ цыдӕртӕ куы нал ис, уӕддӕр йӕ бинонтӕ цӕрын кӕй фӕразынц. Уый зӕгъы: «Ныр мӕ бон у ӕмбырдӕн бирӕ фылдӕр ӕххуыс кӕнын, ӕмӕ фидарӕй зӕгъын: Иегъовӕйӕн йӕ лӕггадгӕнджытӕ сӕхи хъуыддӕгты разӕй дӕр уый хъуыддаг куы фӕаразынц, уӕд сӕ йӕ хорздзинӕдтӕй цух нӕ уадзы». Дӕу дӕр нӕ фӕнды дӕ цард фӕхуымӕтӕгдӕр кӕнын ӕмӕ Иегъовӕйӕ стырдӕр хорзӕхтӕ райсын?
5. Цӕмӕй нӕ цӕст хуымӕтӕг уа, уый тыххӕй нӕ ӕппынӕдзух тох кӕнын цӕмӕн хъӕуы?
5 Мах ӕппынӕдзух хъӕуы тох кӕнын, уымӕн ӕмӕ нӕ ӕнцад нӕ уадзынц иуӕрдыгӕй Сайтан ӕмӕ ацы мулкылмард дуне, иннӕрдыгӕй та не ’нӕххӕстдзинад. Уӕдӕ нӕ цӕст йӕхи бар ма ауадзӕм, фӕлӕ йӕ саразӕм Хуыцауы фӕндонмӕ ӕмӕ диссаджы фидӕны ныфсмӕ — ӕнусон цардмӕ (Ӕмб. 4:25; 2 Кор. 4:18).