Нӕ литературӕйӕн аргъ кӕнӕм
1, 2. Бирӕтӕ нӕ литературӕйы тыххӕй цы хъуыды кӕнынц ӕмӕ уымӕ гӕсгӕ цы фарст ӕвзӕры?
1 «1965 азӕй фӕстӕмӕ уын кӕсын уӕ литературӕ. Кӕсгӕ-кӕсын Библи дӕр бакӕнын ӕмӕ амынд бынӕттӕ бакӕсын. Цыдӕриддӕр фыссут, уый Библимӕ гӕсгӕ раст у. Мӕхи цы зонын, уымӕй мӕ алкӕддӕр фӕндыд Хуыцау ӕмӕ Чырыстийы тыххӕй ӕцӕгдзинад базонын, ӕмӕ ӕнӕзӕрдӕхудтӕй мӕ бон у зӕгъын, уӕ литературӕйы ӕмӕ Библийы мӕ фарстытӕн зӕрдӕзӕгъгӕ дзуаппытӕ кӕй ссардтон». Афтӕ ныффыста иу нӕлгоймаг Иегъовӕйы Ӕвдисӕнты сӕйраг хайадмӕ. Йӕ фыстӕджы ма загъта, кӕй йӕ фӕнды Библи ахуыр кӕнын райдайын.
2 Уыцы нӕлгоймагау ӕгас дунейыл милуангай адӕм бузныг сты, «ӕууӕнкджын ӕмӕ зондджын цагъар» Библи ӕмбарынӕн цы литературӕ уадзы, уый тыххӕй (Матф. 24:45). Сыгъдӕгзӕрдӕ адӕмӕн «ӕцӕгад базонынӕн» баххуыс кӕныны тыххӕй ӕрвылаз дӕр мыхуыр цӕуы тынг бирӕ литературӕ (1 Тим. 2:4). Кӕй йын аргъ кӕнӕм, уый цӕмӕй уыдзӕн бӕрӕг?
3. Цы саразӕн ис, цӕмӕй нӕм литературӕ ӕнӕхъуаджы ма ӕмбырд кӕна?
3 Ӕнӕхъуаджы сӕ ма ӕмбырд кӕнӕм. Чи зоны нӕм цасдӕр рӕстӕгмӕ ӕрӕмбырд, цас нӕ хъӕуы, уымӕй фылдӕр чингуытӕ ӕмӕ журналтӕ. Цы саразӕн ис, цӕмӕй уыцы зынаргъ литературӕ дзӕгъӕлы ма лӕууа? Уацамындӕн литературӕ куы фӕисӕм, уӕд хъуамӕ уӕм ӕмбаргӕ. Цы чиныг кӕнӕ журнал парахат кӕндзыстӕм, уымӕй бирӕ исыны бӕсты нӕ бон у, ӕмӕ дзы иу-дыууӕ ахӕссӕм, ӕмӕ уыдон куы раттӕм, уӕд та дзы ноджы райсӕм. Афтӕмӕй нӕм хӕдзары литературӕ не ’мбырд кӕндзӕн. Стӕй ма нӕм кӕд бирӕ журналтӕ баззайы, уӕд хорз уаид, къаддӕр дзы куы рафыссиккам.
4. Ӕмбырды ӕгӕр бирӕ литературӕ куы ӕрӕмбырд уа, уӕд цы саразӕн ис?
4 Ӕгӕр бирӕ литературӕ куы ӕрӕмбырд уа. Кӕд ӕмбырды цавӕрдӕр публикацитӕй ӕгӕр бирӕ ӕрӕмбырд, уӕд литературӕйӕн дзуаппдӕттӕг ӕфсымӕрӕн йӕ бон у, ӕмӕ иннӕ ӕмбырдты бафӕрса, фылдӕр литературӕ сӕ хъӕуы ӕви нӕ. Хъусынгӕнджытӕн сӕ бон у, ӕмӕ раздӕры уагъд литературӕ раттой, сӕ бинонтӕй Ӕвдисӕн чи нӕу, Библи кӕимӕ ахуыр кӕнынц, уыдонӕн, ӕмӕ ӕндӕр искӕмӕн. Уыцы литературӕ ма, чи зоны, хъӕуа, ӕмбырдтӕм ӕрӕджы чи райдыдта цӕуын, уыдоны – кӕд сӕ фӕнды Иегъовӕйы Ӕвдисӕнты уагъд литературӕйӕ сӕхицӕн ӕрӕмбырд кӕнын, уӕд.
5. Нӕ литературӕйы тыххӕй бузныг кӕй стӕм, уый цӕмӕй бӕрӕг уыдзӕн?
5 Мах фӕнды, цӕмӕй нӕ литературӕ, цӕй тыххӕй уагъд цӕуы, уыцы нысаныл ӕмбӕла – сыгъдӕгзӕрдӕ адӕмӕн Иегъовӕйы диссаджы фӕндты тыххӕй фылдӕр базонынӕн ӕххуыс кӕна. Йесо тынг бирӕ адӕмы диссаджы хуызы куы бафсӕста, уӕд, хӕринагӕй цы баззад, уый сӕфын нӕ бауагъта. Мах дӕр хъуамӕ афтӕ архайӕм, ӕмӕ, цы литературӕ исӕм, уымӕй куыд хуыздӕр у, афтӕ пайда кӕнӕм (Иоан. 6:11–13). Нӕ литературӕйы цы цардирвӕзынгӕнӕг хабар ис, уый рӕстуд адӕмы зӕрдӕтӕ нӕ бацагайдзӕн, нӕ скъӕппыты кӕнӕ нӕ хызынты куы лӕууа, уӕд. Уымӕ гӕсгӕ, хъуамӕ уӕм ӕмбаргӕ, уацамындӕн литературӕ куы фӕисӕм, уӕд, ӕмӕ йын аргъ кӕнӕм, цӕмӕй иннӕтӕн дӕр фӕахъаз уа (Фил. 4:5).