Алы ран дӕр хъусын кӕнӕм Йегъовӕйы рӕсугъд миниуджыты тыххӕй!
1. Йегъовӕйы рӕсугъд миниуджыты тыххӕй хъусын кӕнынмӕ нӕ цы разӕнгард кӕны?
1 «Дӕумӕ сты, о Йегъовӕ, бӕрзонддзинад ӕмӕ тых, рӕсугъддзинад ӕмӕ кад; уымӕн ӕмӕ уӕлӕрвты ӕмӕ зӕххыл цыдӕриддӕр ис, уыдон дӕу сты» (1 Пар. 29:11). Йегъовӕйы кӕй уарзӕм ӕмӕ дзы бузныг кӕй стӕм, уый нӕ цардыл куыд зыны? Уый нӕ разӕнгард кӕны, «„цӕмӕй алы рӕтты хъусын кӕнӕм“, талынгӕй нӕ йӕ диссаджы рухсмӕ чи ӕрхуыдта, уымӕн йӕ „рӕсугъд миниуджыты тыххӕй“» (1 Пет. 2:9). Махӕн нӕ бон нӕу, ӕмӕ ма хъусын кӕнӕм нӕ кадджын Хуыцауы тыххӕй! Йегъовӕйы рӕсугъд миниуджыты тыххӕй дзурынӕн нын диссаджы фадат уыдзӕн мартъи, апрель ӕмӕ майы.
2. Ӕрымысӕн изӕры размӕ цавӕр зиу уыдзӕн ӕмӕ кӕй бон у уыцы хъуыддаджы архайын?
2 Зиу – хонӕм Ӕрымысӕн изӕрмӕ. 2 апрелы къуырисӕры Йегъовӕйы рӕсугъд миниуджытӕ нӕ зӕрдыл ӕрлӕууын кӕндзыстӕм Хицауы Ӕхсӕвӕр бӕрӕг кӕнгӕйӕ. Уыцы ахсджиаг цаумӕ хуынды гӕххӕттытӕ ӕгас дунейы дӕр уардзысты 17 мартъийӕ 2 апрелмӕ. Уе ’ппӕты дӕр разӕнгард кӕнӕм уыцы хъуыддаджы архайынмӕ. Уый хорз фадат у ногтӕн дӕр, цӕмӕй хорз хабар хъусынгӕнджытӕ суой, кӕд цӕттӕ сты, уӕд. Кӕд, Библи кӕимӕ ахуыр кӕнут кӕнӕ уӕ сывӕллӕттӕ цӕттӕ сты, уӕд хистӕр нӕлгоймӕгтӕн зӕгъут, цӕмӕй семӕ аныхас кӕной.
3. Цы зӕгъӕн ис адӕмы Ӕрымысӕн изӕрмӕ хонгӕйӕ?
3 Ацы зиу дӕр ацӕудзӕн, фарон облӕстон конгрессы размӕ куы уыд, афтӕ. Ӕмбырдтӕм арвитдзысты фаг хуынды гӕххӕттытӕ, алы хъусынгӕнӕг дӕр дзы райсдзӕн фӕйнӕ 50. Хуынды гӕххӕтт дӕтгӕйӕ цыбыртӕй зӕгъ: «Зӕрдиагӕй дӕ хонӕм, алы аз дӕр цы ахсджиаг бон фӕбӕрӕг кӕнӕм, уымӕ. Кӕд ӕмӕ йӕ кӕм бӕрӕг кӕндзыстӕм, уый йыл фыст ис». Кӕд адӕймагмӕ исты фарстытӕ ис, уӕд сыл аныхас кӕн. Хицауы ӕхсӕвӕр бӕрӕг кӕнын цӕмӕн хъӕуы, уый бамбарын кӕнынӕн нын баххуыс кӕндзӕн, чиныджы «Библи цы дзуры», зӕгъгӕ, 206 фарсыл «Уӕлӕмхасӕны» цы фыст ис, уый. Сабат ӕмӕ хуыцаубоны хуынды гӕххӕтт дӕттӕн уыдзӕн журналтимӕ дӕр. Иу гыццыл дӕр дӕм чи байхъуса, уыдоны-иу дӕхимӕ афысс ӕмӕ-иу сӕм стӕй бацу.
4. Ӕрымысӕн изӕрмӕ хуынды гӕххӕтт куыд дӕтдзыстӕм?
4 Гӕнӕн ӕмӕ амалӕй-иу хуынды гӕххӕтт адӕймагӕн йӕхимӕ раттӕм. Уымӕ гӕсгӕ-иу дӕхимӕ фысс, хӕдзары чи нӕ уыд, уыдоны, ӕмӕ-иу сӕм ӕндӕр рӕстӕг бацу. Уе ’мбырды бирӕ хуынды гӕххӕттытӕ куы уа, уӕд сӕ уӕ бон у уадзын, хӕдзары кӕй нӕ баййӕфтат, уыдонӕн Ӕрымысӕн изӕры размӕ къуыри, уымӕй раздӕр нӕ. Бацархай, дыккаг хатт кӕмӕ бацӕуыс, Библи кӕимӕ ахуыр кӕныс, уыдонӕн, стӕй дӕ хӕстӕджытӕн, де ’мкусджытӕн, дӕ сыхӕгтӕн ӕмӕ ӕндӕр зонгӕтӕн хуынды гӕххӕтт раттыныл.
5. Ӕххуысгӕнӕг пионерӕй лӕггад кӕнын абонӕй пълан кӕнын цӕмӕн хъӕуы?
5 Ӕххуысгӕнӕг пионерӕй балӕггад кӕн. Дӕ бон у ӕххуысгӕнӕг пионерӕй лӕггад кӕнын, цӕмӕй мартъи, апрель ӕмӕ майы Йегъовӕйы рӕсугъд миниуджыты тыххӕй фылдӕр хъусын кӕнай? Уый тыххӕй дӕ, чи зоны, бахъӕуа дӕ боны фӕтк гыццыл фӕивын (Еф. 5:15–17). Фидарӕй зон, Йегъовӕйӕн лӕггад кӕнгӕйӕ дӕ тыхтыл куы нӕ ауӕрдай, уӕд стыр цин ӕмӕ арфӕйӕ хайджын уыдзынӕ (Ӕмб. 10:22). Ӕрымысӕн изӕр кӕй ӕрбаввахс кӕны, уымӕ гӕсгӕ йӕм хъуамӕ абонӕй райдайӕм нӕхи цӕттӕ кӕнын (Ӕмб. 21:5).
6. Цӕуыл ахуыр кӕнӕм, фарон ӕххуысгӕнӕг пионерӕй чи лӕггад кодта, уыцы ацӕргӕ хойӕ?
6 90 азы кӕуыл цӕуы, иу ахӕм хо фарон лӕггад кодта ӕххуысгӕнӕг пионерӕй. Уый загъта: «Кӕд цӕхӕрадоны кусын тынг уарзын, ӕмӕ дзы хъуамӕ цыдӕртӕ садзын райдыдтаин, уӕддӕр бамбӕрстон, мӕ царды сӕйрагдӕр цы у, уый мӕ фӕивын кӕй хъӕуы. Мӕн фӕндыд Хуыцауы Паддзахад фыццаг бынаты сӕвӕрын. Ӕмӕ уымӕ гӕсгӕ сфӕнд кодтон мартъийы ӕххуысгӕнӕг пионерӕй балӕггад кӕнын». Цымӕ йӕ фыдӕбоны тыххӕй арфӕгонд ӕрцыд? «Ӕмбырдмӕ ӕмӕ Йегъовӕмӕ феввахсдӕр дӕн»,– загъта уыцы хо. Махӕн та царды фыццаг бынаты цы ис? Нӕ бон у исты фӕивын?
7. Тынг зын у ӕххуысгӕнӕг пионерӕй лӕггад кӕнын?
7 Ӕххуысгӕнӕг пионерыл цы хӕс ис, 50 сахаты, уый, дӕумӕ куыд кӕсы, афтӕ зын сӕххӕст кӕнӕн нӕу. Йегъовӕмӕ скув ӕмӕ ахъуыды кӕн, ӕрвылбон цы хъуыддӕгтӕ кӕныс, уыдоныл, сараз график ӕмӕ йӕ стӕй ныффысс дӕ къӕлиндары. Дӕуӕй хуыздӕр дӕ уавӕртӕ ничи зоны. Кӕд рынчын дӕ, уӕддӕр, чи зоны, дӕ бон суа бон дыууӕ сахаты хъусын кӕнын. Кӕд ӕнӕхъӕн бон кусыс кӕнӕ ахуыр кӕныс, уӕддӕр, ӕвӕццӕгӕн, дӕ бон суыдзӕн ӕххуысгӕнӕг пионерӕй лӕггад кӕнын, изӕрыгӕтты кӕнӕ улӕфгӕ бонты куы хъусын кӕнай, уӕд.
8. Иу лӕг ӕмӕ усӕн сӕ бон цӕй фӕрцы сси пионертӕй лӕггад кӕнын?
8 Бирӕ бинонтӕн сӕ бон баци ӕххуысгӕнӕг пионертӕй лӕггад кӕнын. Цӕвиттон, иу лӕг ӕмӕ ус раздӕр дызӕрдыг кодтой, сӕ бон суыдзӕн ӕххуысгӕнӕг пионертӕй лӕггад кӕнын ӕви нӕ, ууыл. Афтӕ сӕм каст, ӕмӕ сӕ уавӕртӕм гӕсгӕ уымӕн гӕнӕн нӕй. Ӕмӕ цы сарӕзтой? «Мах куывтам Йегъовӕмӕ, цӕмӕй, рагӕй нӕ цы фӕндыд, уый нӕ къухы бафтыдаид». Алцыдӕр хорз кӕй спълан кодтой, уый руаджы сӕ бӕллиц сӕххӕст. Стӕй ма загътой: «Цы диссаг уыди. Йегъовӕ нын тынг раарфӕ кодта. Уӕдӕ сымах дӕр бацархайут. Кӕд махӕн сси нӕ бон, уӕд сымахӕн дӕр суыдзӕн».
9. Цы у уӕ бон саразын бинонты ахуыры рӕстӕджы, цӕмӕй иннӕ мӕйты фылдӕр хъусын кӕнат?
9 Хорз нӕ уаид, бинонты ахуыры рӕстӕг куы ахъуыды кӕниккат, уе ’ппӕты бон дӕр суыдзӕн ӕртӕ мӕйы дӕргъы ӕххуысгӕнӕг пионертӕй балӕггад кӕнын? Кӕд нӕ, уӕддӕр, чи зоны, иуӕн йӕ бон суа, иннӕтӕ йын уыцы хъуыддаджы куы баххуыс кӕной, уӕд. Кӕд афтӕ дӕр нӕ уайы, уӕд та, ӕвӕццӕгӕн, уӕ бон суыдзӕн уыцы мӕйты фылдӕр рӕстӕг хъусын кӕнын.
10. Ӕрымысӕн изӕры рӕстӕг нӕ фылдӕр лӕггад кӕнын кӕй фӕнды, уый тыххӕй иннӕтӕн дзурын хорз цӕмӕй у?
10 Ӕххуыс кӕнӕм кӕрӕдзийӕн. Дӕ зӕрдӕйы уаг иннӕтыл дӕр фӕзындзӕн. Иннӕ хъусынгӕнджытӕн дзур, ӕххуысгӕнӕг пионерӕй лӕггад кӕнын дӕ кӕй фӕнды. Афтӕмӕй уыдоны дӕр сразӕнгард кӕндзынӕ. Уымӕй уӕлдай, раздӕр пионерӕй чи лӕггад кодта, уыдоны уынаффӕтӕ дӕр дын баххуыс кӕндзысты дӕ хъуыддӕгтӕ афтӕ спълан кӕнынӕн ӕмӕ ахӕм график саразынӕн, цӕмӕй дӕ нысан дӕ къухы бафта (Ӕмб. 15:22). Кӕд дӕ бон у ӕххуысгӕнӕг пионерӕй лӕггад кӕнын, уӕд хорз нӕ уаид, дӕу хуызӕн уавӕрты чи ис, ахӕм хъусынгӕнӕгӕн куы зӕгъис, цӕмӕй уый дӕр демӕ лӕггад кӕнын райдайа?
11. Хистӕр нӕлгоймӕгты бон куыд у иннӕты ныфс уадзын, цӕмӕй ӕххуысгӕнӕг пионертӕй лӕггад кӕнын райдайой?
11 Хистӕр нӕлгоймӕгтӕй бирӕтӕ сӕ хъуыддӕгтӕ афтӕ спълан кӕнынц, цӕмӕй Ӕрымысӕн изӕры рӕстӕг фылдӕр хъусын кӕной (Дзут. 13:7). Уый ӕцӕгдӕр стыр ныфс бауадзы иннӕ ӕфсымӕрты ӕмӕ хоты! Хистӕр нӕлгоймӕгтӕ ма иннӕты сразӕнгард кӕнынц сӕ ныхӕстӕй дӕр. Иу цалдӕр ныфсдӕттӕг ныхасы кӕнӕ хорз уынаффӕйы дӕр фаг вӕййы, цӕмӕй адӕймаджы сразӕнгард кӕна ӕххуысгӕнӕг пионерӕй лӕггад кӕнынмӕ. Уацамындӕн дзуапдӕттӕг цӕстдарӕг спълан кӕндзӕн фылдӕр уацамындон фембӕлдтӕ, цӕмӕй алкӕмӕн дӕр йӕ бон уа уацамынды цӕуын, суанг куысты кӕнӕ ахуыры фӕстӕ дӕр. Уыцы фембӕлдты тыххӕй-иу хъӕудзӕн рагацау фехъусын кӕнын. Стӕй ма сбӕрӕг кӕндзӕн, хъусын кӕнынӕн участоктӕ ӕмӕ литературӕ се ’ппӕтӕн дӕр фаг ис ӕви нӕ.
12. Кӕд дын ӕххуысгӕнӕг пионерӕй лӕггад кӕнынӕн фадат нӕй, уӕддӕр дӕ бон цы у аразын?
12 Кӕд дӕ уавӕртӕ нӕ амонынц, цӕмӕй ӕххуысгӕнӕг пионерӕй лӕггад кӕнай, уӕддӕр дӕ бон у, чи лӕггад кӕндзӕн, уыдоны ныфс уадзын ӕмӕ уыдоны тыххӕй кувын (Ӕмб. 25:11; Кол. 4:12). Чи зоны, дӕ бон суа семӕ къуырийы дӕргъы ноджы иу бон хъусын кӕнын кӕнӕ, ӕнӕуи цас рӕстӕг вӕййыс уацамынды, уымӕй фылдӕр лӕггад кӕнын.
13. Уӕрӕсе ӕмӕ Беларусы цал ӕххуысгӕнӕг пионеры хъӕуы ӕмӕ де ’мбырды бон цы у саразын, цӕмӕй уыцы нысан къухы бафта?
13 Нысан – апрелы ӕххуысгӕнӕг пионертӕй лӕггад кӕнын. Уӕрӕсейы ӕппӕты фылдӕр ӕххуысгӕнӕг пионертӕ уыд 2002 азы мартъийы – 17 612, Беларусы та 2005 азы февралы – 518. Уымӕ гӕсгӕ, нӕ бон у нысан сӕвӕрын, цӕмӕй Уӕрӕсейы апрелы уа 20 000 ӕххуысгӕнӕг пионеры, Белорусы та – 600. Уый нӕ къухы бафтдзӕн, алы ӕмбырды дӕр ӕхсӕз адӕймагӕй иу ӕххуысгӕнӕг пионерӕй куы лӕггад кӕна, уӕд. Кӕй зӕгъын ӕй хъӕуы, иуӕй-иу ӕмбырдты, сӕ бон кӕмӕн уыдзӕн, ахӕм хъусынгӕнджытӕ уымӕй фылдӕр разындзӕн. Ӕмбырдтӕн сӕ фылдӕрӕн уыцы нысан зын сӕххӕстгӕнӕн нӕу. Ахъуыды-ма кӕн, де ’мбырды хоты ӕмӕ ’фсымӕрты уый куыд сразӕнгард кӕндзӕн ӕмӕ уӕ территорийы уацамынды хъуыддагыл хорзырдӕм куыд фӕзындзӕн!
14. Апрель хорз фадат цӕмӕн у ӕххуысгӕнӕг пионерӕй лӕггад кӕнынӕн?
14 Апрель хорз фадат цӕмӕн у ӕххуысгӕнӕг пионерӕй лӕггад кӕнынӕн? Ӕрымысӕн изӕр апрелы райдианы кӕй уыдзӕн, уый фӕрцы нӕ бон уыдзӕн, чи ӕрбацыд, уыдоны бабӕрӕг кӕнын. Журналтӕ дӕтгӕйӕ нӕ зӕрдыл дардзыстӕм нӕ нысан – чиныг «Библи цы дзуры» раттын ӕмӕ семӕ ахуыр кӕнын райдайын. Уымӕ гӕсгӕ, апрелы ӕххуысгӕнӕг пионерӕй куы лӕггад кӕнӕм, уӕд нын фӕзындзӕн бирӕ фадӕттӕ адӕмимӕ Библи ахуыр кӕнын райдайынӕн. Стӕй бон вӕййы даргъдӕр ӕмӕ вӕййы хъармдӕр. Уымӕй уӕлдай апрелы ис фондз хуыцаубоны. Уымӕ гӕсгӕ, кусгӕ чи кӕны, уыдонӕн ӕмӕ скъоладзаутӕн ӕнцондӕр уыдзӕн ӕххуысгӕнӕг пионертӕй лӕггад кӕнын.
15. Ӕрымысӕн изӕр куыд ӕрбаввахс кӕны, афтӕ мах дӕр цӕуылнӕ хъуамӕ фӕстиат кӕнӕм?
15 Алы Ӕрымысӕн изӕр дӕр нӕ иу аз хӕстӕгдӕр кӕны ацы дунейы кӕронмӕ. Нӕ кадджын Хуыцауы тыххӕй хъусын кӕнынӕн нын бирӕ рӕстӕг нал баззад (1 Кор. 7:29). Ацы Ӕрымысӕн изӕр дӕр аивгъуыйдзӕн, ӕмӕ нын цы диссаджы фадат ис нӕ уӕларвон Фыды кадджын кӕнынӕн, уый дӕр нал раздӕхдзӕн. Цӕй уӕдӕ нӕхи абон цӕттӕ кӕнын райдайӕм, цӕмӕй не ’ппӕт дӕр мартъи, апрель ӕмӕ майы Йегъовӕйы рӕсугъд миниуджыты тыххӕй хъусын кӕнӕм!
[Рамкӕ 4 фарсыл]
Апрелы нӕ къухы бафтдзӕн, цӕмӕй Уӕрӕсейы 20 000 ӕххуысгӕнӕг пионеры уа, Беларусы та – 600?
◼ Сӕйрагдӕр цы у, ууыл ахъуыды кӕн
◼ Уӕ бинонтимӕ аныхас кӕнут, цы пълан кӕнут, ууыл
◼ Иннӕтимӕ дӕ фӕндты тыххӕй ныхас кӕн