«Хӕринаг афоныл»
1. Иубонон конгрессы программӕ нын куыд баххуыс кодта?
1 Иубонон конгрессы фӕстӕ арӕх фӕзӕгъӕм: «Цы хорз хъуыдытӕ дзы уыди, ӕмӕ сӕ тӕккӕ афоныл куыд сты!». Иу районон цӕстдарӕг загъта, программӕйы фӕстӕ йӕ районӕй кӕйдӕрты кӕй бафӕндыд фылдӕр лӕггад кӕнын. Адон та сты ӕндӕр районон цӕстдарӕджы ныхӕстӕ: «Конгресс нын баххуыс кодта, цӕмӕй лӕмбынӕг хъуыды кӕнӕм, цы рӕстӕджы цӕрӕм, ууыл, ӕмӕ-иу афтӕмӕй равзарӕм, царды фыццаг бынаты цы ӕвӕрӕм, уый». Иннӕ та загъта: «Хъусынгӕнджытӕй бирӕтӕ дзырдтой, конгресс сӕ ногӕй хъуыдытыл кӕй бафтыдта: ӕппӕты ахсджиагдӕр цы у, уый, ома уацамынд, мӕнӕн фыццаг бынаты ис ӕви нӕ». Дӕуӕн та иубонон конгресс куыд баххуыс кодта?
2. Иннӕ лӕггады азы конгрессы программӕйы дзырд цӕуыл цӕудзӕн?
2 Иннӕ лӕггады азы конгрессы программӕйы дӕр фехъусдзыстӕм, абон нӕ ӕппӕты тынгдӕр чи хъӕуы, уыцы хъуыдытӕ. Йӕ темӕ у «Дӕхи Йегъовӕйы уазӕг бакӕн», арӕзт у Псалом 118:8, 9 стихтыл. Ныхас дзы цӕудзӕн ахӕм фарстатыл: «Нӕ зын сахат нын Йегъовӕ фидар мӕсыг куыд у?», «Иннӕтӕн ӕххуыс кӕнӕм, цӕмӕй сӕхи Йегъовӕйы базыры бын бакӕной», «Йегъовӕйау иннӕтӕн „ӕмбӕхсӕн бынат“ у», «Фӕсивӕд, уӕ зӕрдӕ дарут Йегъовӕйыл!» ӕмӕ «Нӕ абоны дзӕнӕт – уым нӕ Йегъовӕ йе уазӕг бакодта».
3. Цӕмӕй конгрессӕй фылдӕр пайда райсӕм, уый тыххӕй нӕ цы кӕнын хъӕуы?
3 Конгрессӕй фылдӕр пайда райсӕн куыд ис? Конгресс кӕд уыдзӕн, уый уын куы фехъусын кӕной, уӕд уӕ хъуыддӕгтӕ афтӕ спълан кӕнут, цӕмӕй йӕ ма фӕцух кӕнат. Стӕй-иу фӕхонут, Библи кӕимӕ ахуыр кӕнут, уыдоны дӕр. Цӕмӕй фӕразон уӕм ӕмӕ уый фӕрцы «тыллӕг» дӕттӕм, уый тыххӕй-иу хъуамӕ, цы фехъусӕм, уый нӕ зӕрдӕты арф нывӕрӕм (Лук. 8:15). Уӕдӕ программӕмӕ лӕмбынӕг хъусӕм, стӕй-иу нӕхимӕ цыбыртӕй афыссӕм сӕйраг хъуыдытӕ ӕмӕ нӕ царды кӕнӕ уацамынды цы уынаффӕтӕй спайда кӕнын фӕнды, уыдон. Конгрессы фӕстӕ-иу программӕйыл уӕ бинонтимӕ аныхас кӕнут ӕмӕ-иу ахъуыды кӕнут, цы фехъуыстат, уымӕй уӕ бон спайда кӕнын куыд у, ууыл.
4. Нӕ иубонон конгресмӕ зӕрдиагӕй цӕмӕн ӕнхъӕлмӕ кӕсӕм?
4 Ӕфсин йӕ бинонтӕн хӕрзад хӕринаг куыд ӕрцӕттӕ кӕны, афтӕ ’фсымӕртӕ дӕр бацӕттӕ кодтой иннӕ лӕггады азы иубонон конгрессы программӕ. Бӕрӕг у, лӕмбынӕг ыл кӕй фӕхъуыды кодтой ӕмӕ нӕ бирӕ кӕй уарзынц. Уӕдӕ нын Йегъовӕ раарфӕ кӕнӕд, цӕмӕй конгресмӕ нӕ бон ацӕуын бауа ӕмӕ нын нӕ уырнындзинад фидар кӕнынӕн афоныл цы «хӕринаг» дӕттынц, уымӕй ӕнӕхай ма фӕуӕм (Матф. 24:25).