Ӕрымысӕн изӕры рӕстӕг фылдӕр лӕггад кӕнӕм
1. Ӕртӕ мӕйы дӕргъы нын фылдӕр балӕггад кӕнынӕн цавӕр хорз фадат уыдзӕн?
1 Ӕрымысӕн изӕры рӕстӕг дӕ бон фылдӕр балӕггад кӕнын у? Уыцы рӕстӕг боныхъӕд фӕхуыздӕр вӕййы ӕмӕ бон фӕдаргъдӕр вӕййы. Иуӕй-иу хъусынгӕнджытӕ отпуск райсынц, скъоладзаутӕн та каникултӕ вӕййы, уымӕ гӕсгӕ сын фадат уыдзӕн фылдӕр лӕггад кӕнынӕн. Фылдӕр базонын кӕй фӕнды, уыдоны 2 апрелӕй райдайдзыстӕм хонын Ӕрымысӕн изӕрмӕ, уыдзӕн 17 апрелы. Ӕрымысӕн изӕрмӕ чи ӕрбацӕуа, уыдоны хондзыстӕм сӕрмагонд раныхасмӕ. Уыцы раныхас уыдзӕн 25 апрелӕй райдайгӕ къуыри. Кӕй зӕгъын ӕй хъӕуы, хорз фадат нын уыдзӕн, цӕмӕй мартъийы, апрелы ӕмӕ майы фылдӕр балӕггад кӕнӕм.
2. Фылдӕр балӕггад кӕнынӕн цавӕр иу хорз фадат ис?
2 Ӕххуысгӕнӕг пионерӕй лӕггад кӕнын. Цӕмӕй Хуыцауы хъуыддаджы фылдӕр саразӕм, уымӕн нын иу хорз фадат у ӕххуысгӕнӕг пионерӕй лӕггад кӕнын. Иууылдӕр ӕнӕвдӕлон кӕй стӕм, уый тыххӕй хъуамӕ алцыдӕр рагацау спълан кӕнӕм (Ӕмб. 21:5). Афтӕ ахсджиаг чи нӕу, уыцы хъуыддӕгтӕ ис ӕндӕр рӕстӕгмӕ дӕр аргъӕвӕн (Фил. 1:9–11). Ис ма ӕмбырды иннӕтӕн дӕр зӕгъӕн, ӕххуысгӕнӕг пионерӕй дӕ балӕггад кӕнын кӕй фӕнды. Чи зоны дзы искӕй бафӕнда демӕ иумӕ ӕххуысгӕнӕг пионерӕй балӕггад кӕнын.
3. Бинонтӕн сӕ бон куыд у фылдӕр балӕггад кӕнын?
3 Иннӕ хатт уӕ бинонты ахуыры рӕстӕг хорз уаид, цы пълӕнттӕ уӕм ис, уыдоныл аныхас кӕнын (Ӕмб. 15:22). Кӕрӕдзийӕн ӕххуысгӕнгӕйӕ, гӕнӕн ис, уӕ бинонтӕй кӕмӕндӕрты йӕ бон бауа ӕххуысгӕнӕг пионерӕй балӕггад кӕнын иу кӕнӕ цалдӕр мӕйы. Уӕ бон куы нӕ суа, уӕд та? Уӕд та уӕ, чи зоны, бафӕнда иуӕй-иу хатт изӕрыгӕтты хъусын кӕнын кӕнӕ улӕфгӕ бонты фылдӕр лӕггад кӕнын.
4. Ӕрымысӕн изӕры рӕстӕг фылдӕр куы балӕггад кӕнӕм, уӕд цӕмӕй схайджын уыдзыстӕм?
4 Мах Йегъовӕйы тыххӕй цыдӕриддӕр аразӕм, уый уыны ӕмӕ нын нӕ фыдӕбонӕн аргъ кӕны (Дзут. 6:10). Адӕймаг Йегъовӕйӕн ӕмӕ иннӕтӕн йӕ хъарутӕ куы нӕ февгъау кӕны, уӕд йӕ цинӕн кӕрон дӕр нал вӕййы (1 Аз. 29:9; Хъуыд. 20:35). Уӕдӕ дӕ бон у ацы аз Ӕрымысӕн изӕры рӕстӕг фылдӕр балӕггад кӕнын, цӕмӕй стыр циндзинадӕй ӕмӕ фылдӕр арфӕдзинӕдтӕй схайджын уай?