Ӕрымысӕн изӕр. Зиу райдайдзӕн 17 мартъийы
1. 17 мартъийы цавӕр зиу райдайдзӕн?
1 Алы аз дӕр Ӕрымысӕн изӕры фӕбӕрӕг кӕнӕм Йесо Чырыстийы мӕлӕт (1 Кор. 11:26). Уымӕ гӕсгӕ нӕ фӕнды, цӕмӕй иннӕтӕ дӕр ӕрбацӕуой ӕмӕ фехъусой, Йегъовӕ йӕ хӕларзӕрдӕйӕ ахӕсты аргъ кӕй бафыста, уый тыххӕй (Иоан. 3:16). Ацы аз адӕмы Ӕрымысӕн изӕрмӕ хонын райдайдзыстӕм сабаты, 17 мартъийы. Зиуы рӕстӕг дӕ бон цы у, уый сараздзынӕ?
2. Хуынды гӕххӕтт дӕтгӕйӕ нӕ бон цы у зӕгъын?
2 Нӕ бон цы у зӕгъын. Хуыздӕр у, нӕ ныхас-иу цыбыртӕй куы райдаиккам. Нӕ бон у афтӕ зӕгъын: «Салам. Ацы аз ӕгас дунейы дӕр 5 апрелы бӕрӕг кӕндзысты иу ахсджиаг хабар, ӕмӕ нӕ фӕнды уӕ бинонты фӕхонын. Библийӕ дзы ӕмбарын кӕндзысты, Йесо Чырысти цӕмӕн амарди ӕмӕ абон цы аразы, уый. Ӕхца фидын дзы нӕ хъӕуы. Ацы хуынды гӕххӕтты фыст ис бынат ӕмӕ рӕстӕг». Хуынды гӕххӕттытӕ сабат-хуыцаубон куы уарӕм, уӕд ма дӕттӕн уыдзӕн ног брошюрӕтӕ дӕр, кӕд гӕнӕн уа, уӕд.
3. Гӕнӕн уӕвгӕйӕ фылдӕр адӕмы куыд фӕхонӕм?
3 Фӕхонӕм фылдӕр адӕмы. Нӕ нысан у, гӕнӕн уӕвгӕйӕ, фылдӕр адӕмы фӕхонын. Фӕхонӕм-иу нӕ ахуыргӕнинӕгты, дыккаг хатт кӕмӕ бацыдыстӕм, уыдоны, нӕ хӕстӕджыты, не ’мкусджыты, не ’мкъласонты, нӕ сыхӕгты ӕмӕ нӕ зонгӕты. Хистӕр нӕлгоймӕгтӕ нын бамбарын кӕндзысты, нӕ территорийыл куыд аххӕссӕм, уый. Алы аз дӕр адӕмы Ӕрымысӕн изӕрмӕ кӕй фӕхонӕм, уый бирӕ хорз хъуыддӕгтӕм ӕркӕны. Фарон иу сылгоймаг, фембӕлд кӕм хъуамӕ уыдаид, уырдӕм куы бацыд, уӕд ын уагдар загъта, зӕгъгӕ дын баххуыс кӕнон, чи дӕ фӕхуыдта, уый ссарынӕн. Фӕлӕ йын сылгоймаг загъта, залы кӕй никӕй зоны, уымӕн ӕмӕ йын хуынды гӕххӕтт чидӕр абон райсомӕй радта, хӕдзарӕй-хӕдзармӕ куы зылдысты, уӕд.
4. Зиуы зынгзӕрдӕйӕ цӕмӕн хъуамӕ архайӕм?
4 Чи зоны Ӕрымысӕн изӕрмӕ ӕрбацӕуа, хуынды гӕххӕтт кӕмӕн ныууагътай, ахӕм адӕймаг. Исчи ӕрбацӕуа ӕви нӕ, уӕддӕр дӕ фыдӕбон дзӕгъӕлы нӕ фӕуыдзӕн, адӕм зондзысты, Хуыцауы ӕвдисӕн сӕм кӕй ӕрбацыд. Цы хуынды гӕххӕттытӕ байуарай, уыдонӕй адӕм базондзысты, Йесо Чырысти абон хъомысджын паддзах кӕй у. Зынгзӕрдӕйӕ куы архайай, уӕд дӕ участокы цӕрджытӕ, де ’муырнджытӕ ӕмӕ, сӕйраджыдӕр та, Йегъовӕ, фендзысты ахӕсты аргъ стыр лӕварыл кӕй нымайыс (Кол. 3:15).