Пенсийы ацӕуын. Стыр ӕмӕ уӕрӕх дуар хъусын кӕнынӕн?
1 Фӕллойы ӕхсыст адӕмӕй бирӕтӕ ӕнӕрхъӕцӕй фенхъӕлмӕ кӕсынц, пенсийы кӕд ацӕудзысты ӕмӕ сӕ уӕззау ӕмӕ тыхст куыстӕй кӕд ссӕрибар уыдзысты, уымӕ. Фӕлӕ пенсийы ацӕугӕйӕ адӕймагмӕ арӕх афтӕ фӕкӕсы, цыма никӕйуал хъӕуы, ӕрхӕндӕг хъуыдытӕ йӕ тыхсын кӕнын райдайынц ӕмӕ йӕ афонӕй раздӕр базӕронд вӕййы. Адӕймаг исты куыстыл хӕст куы нӕ вӕййы, уӕд йӕ зӕрдӕмӕ ныхъхъусы. Иу бразилиаг газет куыд фыссы, афтӕмӕй, пенсийы чи ацыд, уыцы паддзахадон кусджытӕ «сӕ цардӕй разы не сты, алцыдӕр сӕм хъыг кӕсы, цавӕрдӕр тас сӕ бацыд, афтӕ сӕм кӕсы, цыма никӕйуал хъӕуынц, ӕмӕ сӕ ныфс асаст. Хатынц ӕй, сӕ цард кӕй ницыуал у».
2 Фӕлӕ чырыстӕттӕй бирӕтӕн, пенсийы кӕй ацӕуынц, уый свӕййы сӕ царды ног къӕпхӕн, ома уӕрӕх дуар хъусын кӕнынӕн. Иу ӕфсымӕрыл 65 азы куы сӕххӕст, уӕд дыууӕ къуырийы фӕстӕ пионерӕй лӕггад кӕнын райдыдта. Уый дзуры: «Фӕстаг 10 азы дӕргъы, пионерӕй лӕггадгӕнгӕйӕ, цас арфӕдзинӕдтӕ банкъардтон, уыйбӕрц арфӕдзинад мыл мӕ царды никуы ма сӕмбӕлд». Иу лӕг ӕмӕ ус ныффыстой: «Нӕ ӕцӕг сыгъзӕрин азтӕ райдыдтой, пионертӕй лӕггад кӕнын куы райдыдтам, уӕд». О, пенсийы ацӕугӕйӕ бирӕтӕн фӕзыны тынг хорз фадат, цӕмӕй фылдӕр лӕггад кӕной ӕмӕ Иегъовӕйӕ бирӕ хорздзинӕдтӕ исой.
3 Хъуыддагыл хӕст ӕмӕ ӕнтыстджын. Ныртӕккӕ пенсийы чи ис, уыдонӕй бирӕтӕ, абон адӕмӕн цы хорз уавӕртӕ ис, ахӕм уавӕрты не схъомыл сты ӕмӕ сӕ сӕ гыццылӕй фӕстӕмӕ хъуыд уӕззау куыст кӕнын. Кӕд сӕм сӕ фыццагон хъару нал ис, уӕддӕр нырма сӕ бон бирӕ цыдӕртӕ у. Иу филиалы бӕрны цы территори ис, уым пионертӕн сӕ 22 проценты — иу 20 мин ӕфсымӕр ӕмӕ хойы — сты, ӕппынкъаддӕр 60 азы кӕуыл цӕуы, ахӕмтӕ. Ацы ацӕргӕ адӕм хъусын кӕныны хъуыддаджы сӕ хъарутӕ не ’вгъау кӕнынц. Царды сӕм фӕлтӕрддзинад кӕй ис ӕмӕ Хуыцауӕн зӕрдӕмӕдзӕугӕ миниуджытӕ кӕй ӕвдисынц, уымӕ гӕсгӕ, цы ӕмбырдты лӕггад кӕнынц, уыдонӕн стыр арфӕдзинад сты (Иак. 3:17, 18).
4 Адӕймаг иудадзыг чырыстон хъуыддӕгты куы фӕархайы, уӕд йӕхи дӕр хуыздӕр фӕхаты ӕмӕ йӕ цардӕй дӕр бирӕ райгонддӕр вӕййы. Пенсийы ацӕугӕйӕ пионерӕй лӕггад кӕнын чи райдыдта, иу ахӕм 84-аздзыд хо дзуры: «Бирӕтимӕ Библи кӕй ахуыр кӕнын, уый мын ӕххуыс кӕны, цӕмӕй мӕ хъуыды ма сӕфа. Машинӕ мын нӕй, ӕмӕ къахӕй бирӕ фӕцӕуын. Уый та ахъаз у ме ’нӕниздзинадӕн». Ӕндӕр ацӕргӕ пионертӕ, лӕг ӕмӕ ус, загътой: «Пионертӕй кӕй лӕггад кӕнӕм, уый фӕрцы зондӕй ӕмӕ буарӕй дӕр стӕм цӕрдӕг. Мах алы хатт дӕр вӕййӕм иумӕ. Хъӕлдзӕг ӕмӕ амондджын цард кӕнӕм».
5 Фылдӕр хъусынгӕнджытӕ кӕм хъӕуы, уым лӕггад кӕнын. Пенсийы чи ацыд, уыцы чырыстӕттӕй иуӕй-иутӕ — йӕ бон йӕхи дарын кӕмӕн у, ахӕмтӕ — ацыдысты, Паддзахады хъусынгӕнджытӕ фылдӕр кӕм хъӕуы, ахӕм рӕттӕм цӕрынмӕ. Иннӕтӕ та, ӕндӕр ӕвзагыл кӕм дзурынц, ахӕм территорийы хъусын кӕнынц. Апостол Павелау ацы зынгзӕрдӕ хъусынгӕнджытӕ дӕр ӕппӕтдӕр кӕнынц «Евангелийы тыххӕй, цӕмӕй уой уыимӕ ӕмархайӕг» (1 Кор. 9:23).
6 Иу бинонтӕ пионертӕй лӕггад кӕнын райдыдтой, сӕ дыууӕ фырты куы схъомыл кодтой, уӕд. Цалдӕр азы фӕстӕ райдыдтой китайаг ӕвзаг ахуыр кӕнын. Ныр сӕ дыууӕйыл дӕр цӕуы 70 азӕй фылдӕр. Ӕрӕджы сыл тынг ӕхсызгон хабар сӕмбӕлд: цы китайаг къордимӕ лӕггад кодтой, уый сси ӕмбырд. Цӕй стыр арфӕдзинад вӕййынц ахӕм бинонтӕ!
7 Хуыцауы куыстӕй «пенсийы» ацӕуӕн нӕй. Кӕд адӕмӕн сӕ фылдӕр сӕ куыстӕй пенсийы ацӕуынц, уӕд Хуыцауы куыстӕй та иу чырыстонӕн дӕр нӕй «пенсийы» ацӕуӕн. Мах иууылдӕр хъуамӕ иузӕрдионӕй баззайӕм «кӕронмӕ» (Матф. 24:13, 14). Кӕй зӕгъын ӕй хъӕуы, рӕстӕг куыд цӕуы, афтӕ Иегъовӕйы хъуыддаджы иуӕй-иутӕн сӕ бон нал вӕййы, раздӕр цас арӕзтой, уыйбӕрц аразын. Фӕлӕ куыд ӕхсызгон у, уыдон уӕддӕр ӕппӕт зӕрдӕйӕ кӕй фӕархайынц! Хуыцауы Ныхас сын ныфс ӕвӕры, Иегъовӕ сын кӕй никуы ферох кӕндзӕн сӕ фыдӕбон ӕмӕ йын йӕ номмӕ цы уарзондзинад ӕвдисынц, уый! (Лук. 21:1—4; Дзут. 6:10).
8 Кӕд ды дӕр тагъд пенсийы ацӕудзынӕ, уӕд ӕвзӕр нӕ уаид, Хуыцаумӕ куы скувис ӕмӕ куы ахъуыды кӕнис, дӕ уавӕртӕ кӕй ивынц, уымӕй дӕ бон куыд у хуыздӕр спайда кӕнын. Хуыцауы ӕххуысӕй, ды фендзынӕ, пенсийы ацӕуын кӕй у уӕрӕх дуар фылдӕр хъусын кӕнынӕн, ӕмӕ уый фӕрцы та кадджын кӕндзынӕ Иегъовӕйы ӕмӕ дыл йӕ хорздзинӕдтӕ кӕлгӕуӕлдайӕ ӕруадздзӕн (Пс. 148:12, 13).