Стыр ӕмбырды Иегъовӕйы кадджын кӕн
1, 2. Облӕстон конгресс нын цавӕр хъуыддагӕн дӕтты хорз фадат ӕмӕ куыд у нӕ бон уый аразын?
1 Нӕ облӕстон конгресстӕ нын ӕрвылаз дӕр дӕттынц диссаджы фадат Иегъовӕйы кадджын кӕнынӕн. Нӕ зӕрдӕ нӕм фӕдзуры, Давидмӕ цы дзырдта, уый. Давид зарыд: «Ӕз скадджын кӕндзынӕн Дӕу стыр ӕмбырды, бирӕ нымӕц адӕмты ’хсӕн раппӕлдзынӕн Дӕу» (Пс. 34:18). Ацы азы облӕстон конгрессы, «Хуыцауӕн коммӕгӕс ут», зӕгъгӕ, Иегъовӕйы ӕмзӕрдӕйӕ скадджын кӕнын нӕ бон куыд у?
2 Уымӕн иу мадзал – нӕ хорз уагахаст. Конгресстӕ кӕм фӕцӕуынц, иу ахӕм агъуысты хицау загъта: «Уӕ конгресстӕм уын куы бакастыстӕм, уый фӕстӕ иннӕ динтӕн, нӕ агъуыст баххуырсынмӕ чи ӕрбацӕуы, уыдонӕн, фӕзӕгъӕм, зӕгъгӕ, ӕрбацӕут ӕмӕ фенут, Иегъовӕйы Ӕвдисӕнтӕ куыд фӕуадзынц конгресс – алцыдӕр сын вӕййы уаг ӕмӕ ӕгъдауыл». Не ’ддаг бакастӕй, нӕ уагахастӕй, ӕмгуыст кӕй кӕнӕм, уымӕй, махӕй алчидӕр хай хӕссы, ӕцӕгӕй нӕ Хуыцаумӕ чи ӕмбӕлы, уыцы диссаджы арфӕйы ныхӕстӕм (1 Пет. 2:12).
3, 4. Хӕдӕфсармдзинад нын куыд баххуыс кӕндзӕн, чырыстӕттӕн ӕмбӕлон чи у, ахӕм дарӕсы цӕуынӕн программӕйы рӕстӕджы дӕр ӕмӕ уый фӕстӕ дӕр?
3 Ӕддаг бакаст. Цӕмӕй Иегъовӕйӕн кад хӕссӕм, уый тыххӕй нӕ конд ӕмӕ нӕ уынд хъуамӕ уа аив, хӕдӕфсармдзинадыл дзурӕг (1 Тим. 2:9). «Хъусынгӕнджыты скъола»-йы чиныджы 132 фарсыл дзырдӕуы: «Хӕдӕфсарм адӕймаг йӕхи хизы искӕй зӕрдӕхудты бацӕуынӕй ӕмӕ адӕмы йӕхимӕ дӕр не ’ркӕсын кӕны». Бирӕ бӕстӕты адӕм цӕуынц ӕнӕфсарм кондӕй, ӕмӕ уый диссаг никӕмӕуал кӕсы. Фӕлӕ Иегъовӕ тынг аргъ кӕны, мах ууыл кӕй архайӕм, цӕмӕй йын аккаг ӕвдисӕнтӕ уӕм (Ап. к. 15:14). Кӕд хатт конгресс вӕййы спорткомлексы кӕнӕ хиирхӕфсӕн агъуысты, уӕддӕр уый вӕййы не «стыр ӕмбырд» ӕртӕ боны дӕргъы дӕр. Иегъовӕйы раз кӕй ӕрӕмбырд вӕййӕм, уымӕ гӕсгӕ нӕ дарӕс дӕр хъуамӕ уа, Дун-дунейы ӕппӕты бӕрзонддӕр чи у, уый аккаг (1 Пар. 29:11).
4 Не ’ддаг бакаст-иу нӕ хъуамӕ рох ма уа программӕйы фӕстӕ дӕр. Чи зоны-иу нӕ улӕфты афон кӕнӕ-иу хӕрӕндонмӕ куы цӕуӕм, уӕд фӕнда сӕрибардӕр дарӕс скӕнын, фӕлӕ ам дӕр нӕ конд ӕмӕ нӕ уынд хъуамӕ ууыл дзурӕг уа, мах, «йӕхи Хуыцауыл ӕууӕндӕг чи хоны», уыдон кӕй стӕм (1 Тим. 2:10, НТ). Афтӕ зӕгъӕн нӕй, ӕмӕ адӕмӕн сӕ фылдӕр кӕй дарынц, уыцы дарӕс ӕмбӕлон у (1 Иоан. 2:16, 17). Нӕ литературӕйы цы къамтӕ ис, уыдон нын ӕвдисынц, алыхуызон уавӕрты дӕр нӕлгоймӕгтӕн ӕмӕ сылгоймӕгтӕн цавӕр дарӕс у аив ӕмӕ хӕдӕфсармдзинадыл дзурӕг. Конгресс цы горӕты уа, уым нӕ плакеткӕтӕ ӕппынӕдзух нӕ риуыл куы уой, уӕд нын уый нӕ зӕрдыл лӕууын кӕндзӕн, чырыстӕттӕ ӕрмӕст иу кӕцыдӕр афон кӕй не стӕм, фӕлӕ алкӕддӕр (2 Кор. 6:3, 4).
5, 6. Иегъовӕйы фынгӕн куы аргъ кӕнӕм, уӕд цы араздзыстӕм?
5 Аргъ кӕн Иегъовӕйы фынгӕн. Дунедарӕг Стыр Хуыцау нын ӕрцӕттӕ кодта куывд (Ис. 25:6; 1 Кор. 10:21). Иегъовӕйы фынгмӕ хуынд кӕй стӕм, уымӕн кӕд аргъ кӕнӕм, уӕд бацархайдзыстӕм, цӕмӕй уыцы ӕртӕ бонӕй иу дӕр ма фӕцух кӕнӕм. Бӕлвырд базыдтай, конгресмӕ цӕуыл цӕудзынӕ, кӕм цӕрдзынӕ? Куыстӕй дӕхи ракуырдтай? Ахъуыды кодтай, цас рӕстӕг дӕ бахъӕудзӕн, цӕмӕй афоныл сцӕттӕ уай ӕмӕ конгрессы бынатмӕ раздӕр ныххӕццӕ уай, дӕхицӕн бынат ссарай, де ’фсымӕртыл бацин кӕнай ӕмӕ семӕ иумӕ Иегъовӕйӕн фыццаг зарӕг ӕмӕ куывды скад кӕнай? (Пс. 146:1).
6 Иегъовӕйы фынгӕн куы аргъ кӕнӕм, уӕд программӕмӕ лӕмбынӕг хъусдзыстӕм, ӕнӕхъуаджы нӕ ныхас кӕндзыстӕм, программӕйы рӕстӕджы хӕргӕ кӕнӕ рацу-бацу нӕ кӕндзыстӕм. Иегъовӕ нын «ӕууӕнкджын ӕмӕ зондджын цагъары» уылты дӕтты, раст нӕ абон цы монон хӕринаг хъӕуы, уый, ӕмӕ дзы хъуамӕ мацы ауадзӕм (Матф. 24:45). Ныййарджытӕ хъуамӕ бадой сӕ сывӕллӕтты цур ӕмӕ сын ӕххуыс кӕной, программӕ сын тынгдӕр куыд фӕахъаз уа (Дык. з. 31:12).
7. Сихоры тыххӕй нын цы фӕдзӕхстӕуы ӕмӕ цӕмӕн?
7 Сихор хъуамӕ немӕ ӕрбахӕссӕм, цӕмӕй нӕ улӕфты рӕстӕджы конгрессӕй хӕринаг ӕлхӕнынмӕ цӕуын ма хъӕуа. Раппӕлинаг у, фӕстаг аз конгрессдзаутӕн сӕ фылдӕр кӕй байхъуыстой ацы уынаффӕмӕ. Куыд хорз уаид, ацы аз иууылдӕр афтӕ куы бакӕниккам! (Дзут. 13:17). Ацы ӕгъдау нын хорз фадат дӕтты не ’фсымӕртимӕ зӕрдӕбынӕй фӕныхас кӕнынӕн,– уый та у ахъаз нӕ иудзинад ӕмӕ фарнӕн, ӕмӕ кад хӕссы Иегъовӕйӕн (Пс. 132:1).
8, 9. Цӕмӕй ма у нӕ бон скадджын кӕнын Иегъовӕйы конгрессы афон?
8 Хъусын кӕнӕм, фадат куы фӕзына уӕд. Конгресмӕ цӕугӕйӕ кӕнӕ фӕстӕмӕ ӕрбаздӕхгӕйӕ, махӕн вӕййы бирӕ хорз фадӕттӕ Иегъовӕйы нӕ дзыхы дзырдӕй скадджын кӕнынӕн (Дзут. 13:15). Хӕрӕндоны куы уӕм кӕнӕ уазӕгдзӕрӕны кусджытимӕ куы ныхас кӕнӕм, уӕд-иу сын, гӕнӕн уӕвгӕйӕ, ӕцӕгады тыххӕй дзурӕм. Конгрессы фӕстӕ нӕ хъуыдытӕ ӕмӕ нӕ зӕрдӕтӕ уыдзысты йедзаг монон хӕзнатӕй. Цӕй уӕдӕ-иу нын искӕимӕ аныхас кӕныны фадат куы фӕзына, уӕд-иу сын уыцы хӕзнатӕ ма бавгъау кӕнӕм! (1 Пет. 3:15).
9 Мах ӕнӕрхъӕцӕй ӕнхъӕлмӕ кӕсӕм уыцы рӕстӕгмӕ, Иегъовӕйӕн та не стыр «ӕмбырды» кӕд арфӕ кӕндзыстӕм (Пс. 25:12). Уӕдӕ нӕ уыцы амонд уӕд, ӕмӕ нӕ облӕстон конгрессы – «Хуыцауӕн коммӕгӕс ут» – Иегъовӕйӕн ӕмвӕнд-ӕмзондӕй куыд скад кӕнӕм.
[Рамкӕ 5 фарсыл]
Облӕстон конгрессы тыххӕй зӕрдылдаринӕгтӕ
◼ Программӕйы рӕстӕг. Программӕ-иу ӕртӕ боны дӕр райдайдзӕн 9.30. Дуӕрттӕ гом уыдзысты 8.00. сахатӕй. Программӕйы райдианмӕ ма цалдӕр минуты куы хъӕуа, уӕд сӕрдариуӕггӕнӕг ӕфсымӕр сценӕмӕ рацӕудзӕн ӕмӕ сбаддзӕн, райхъуысдзысты Паддзахады мелодитӕ. Уӕд хъуамӕ не ’ппӕт дӕр нӕ бынӕтты сбадӕм, цӕмӕй программӕ кад ӕмӕ радыл райдайа. Майрӕмбон ӕмӕ сабаты программӕ фӕуыдзӕн 17.00., хуыцаубоны та – 16.10.
◼ Машинӕты лӕууӕндӕттӕ. Конгресстӕ кӕм фӕцӕуынц, уым машинӕтӕн вӕййы хъахъхъӕнгӕ лӕууӕндӕттӕ. Чи куыд цӕуа, афтӕ ӕвӕрдзӕн йӕ машинӕ сӕрибар бынаты; бынатӕн ӕхца фидын нӕ хъӕуы. Лӕууӕндонмӕ машинӕ батӕрӕн уыдзӕн, конгрессы плакеткӕ кӕуыл уа, уыдонӕн. Лӕууӕндӕтты афтӕ бирӕ бынат кӕй нӕ вӕййы, уымӕ гӕсгӕ машинӕйы дыууӕйӕ кӕнӕ ӕртӕйӕ цӕуыны бӕсты бадзурут ӕмӕ иу машинӕйыл ацӕут. Машинӕ ӕвӕргӕйӕ хъусут уагдартӕм.
◼ Бадӕн бынӕттӕ. Бынӕттӕ бацахсӕн ис, демӕ иу машинӕйыл чи ӕрцыд кӕнӕ та кӕимӕ цӕрыс, ӕрмӕстдӕр уыдонӕн.
◼ Мысайнӕгтӕ. Облӕстон конгресс бацӕттӕ кӕнын ӕмӕ ауадзынӕн хъӕуы бирӕ фӕрӕзтӕ. Нӕ бузныгдзинад равдисдзыстӕм нӕ мысайнӕгтӕй – раттӕн сӕ ис нӕхи Паддзахады залы кӕнӕ та, конгресс кӕм цӕуа, уым.
◼ Сихор. Курӕг уӕ стӕм, уӕ сихор-иу уемӕ рахӕссут, цӕмӕй уӕ улӕфты рӕстӕджы конгрессӕй хӕринаг ӕлхӕнынмӕ цӕуын ма хъӕуа. Ис ӕрбахӕссӕн гыццыл уазалгӕнӕн асыкк, бандоны бын чи бацӕуа, ахӕм. Конгрессмӕ нӕй хӕссӕн, улӕфынмӕ цӕуынӕн цы стыр уазалгӕнӕн асыччытӕ ис, ахӕмтӕ, авгын мигӕнӕнтӕ, ӕмӕ хъӕбӕр нозт.
◼ Видеокамерӕтӕ ӕмӕ диктофонтӕ. Ахӕм фыссӕн аппаратурӕ нӕй иугӕнӕн конгрессы электронон кӕнӕ зӕлтыхджындӕргӕнӕн фӕрӕзтӕм, ӕмӕ сӕ хъӕуы афтӕ пайда кӕнын, цӕмӕй макӕй хъыгдарой.
◼ Къамисӕнтӕ. Программӕйы рӕстӕджы къам куы исай, уӕд къамисӕнӕн йӕ рухс ахуыссын кӕнын хъӕуы.
◼ Дзыппыхӕсгӕ телефонтӕ ӕмӕ пейджертӕ. Адон афтӕ сиу кӕнын хъӕуы, цӕмӕй макӕй хъыгдарой.
◼ Уазӕгдзӕрӕнтӕ. 1) Цал бынаты уӕ хъӕуа, ӕрмӕстдӕр уал ныззаказ кӕнут, ӕмӕ уат цал адӕймагӕн у, уымӕй фылдӕр дзы ма цӕрӕнт. 2) Уӕ заказ куы иват, уӕд уый тыххӕй ӕвӕстиатӕй фехъусын кӕнут уазӕгдзӕрӕны кусджытӕн. 3) Хӕринаг цӕттӕ кӕныны бар кӕм нӕй, уыцы уаты йӕ ма цӕттӕ кӕнут. 4) Уазӕгдзӕрӕны кусджытимӕ ныхасгӕнгӕйӕ ӕвдисут сыгъдӕг уды дыргъ, уӕлдайдӕр та бирӕ уазджыты куы фӕисынц ӕмӕ куы фӕфӕндараст кӕнынц, уӕд.
◼ Ӕмдзӕрӕны. Уӕ фӕстӕ-иу уат сыгъдӕгӕй ныууадзут. Уӕ хорзӕхӕй, дымсгӕ гобӕттимӕ арӕхстджынӕй архайут.