¿Te me̱ꞌä rä Armagedón?

Näꞌä udi rä Mäkä Tꞌofo

Rä Armagedón geꞌä näꞌä rä tuhni ma dä nja entre Äjuä ꞌne nuꞌu̱ yä gobiernu de nunä rä xiꞌmhai. Nuꞌu̱ yä gobiernu ꞌne nuꞌu̱ di mfaxkui di nkontraui Äjuä ngeꞌä hingi ne dä yꞌo̱te nuꞌu̱ yä mhända (Salmo 2:2). Ha näꞌä rä gerra de Armagedón ma dä uadi gatꞌho nuꞌu̱ yä gobiernu de rä xiꞌmhai (Daniel 2:44).

Rä noya Armagedón ꞌnehe di tꞌofo Har-Magedón. Nunä noya ehe ho̱nse̱ nꞌa rä mꞌiki ha rä Mäkä Tꞌofo ha rä mfistꞌofo Revelación o Apocalipsis. Ha nꞌa rä profecía de nunä mfistꞌofo enä ge «yä ndä de gatꞌho rä xiꞌmhai» ma dä muntsꞌi ha nꞌa rä tuhni kontra «Äjuä nuꞌä toꞌo pe̱ꞌtsä gatꞌho rä tsꞌe̱di». Nuꞌu̱ yä gobiernu ma dä muntsꞌi «ha nuꞌä rä luga rä thuhu Armagedón» (Apocalipsis 16:14, 16).

¿Toꞌo ma dä ntuhni ha näꞌä rä gerra de Armagedón? Ñhesukristo ꞌne nuꞌu̱ yä e̱nxe̱ ma dä ntunkui nuꞌu̱ yä nkontra Äjuä (Apocalipsis 19:11-16, 19-21). ¿Toꞌo ma dä ꞌme̱di ha näꞌä rä tuhni? Gatꞌho nuꞌu̱ di nju̱tsꞌi kontra Äjuä ꞌne u̱tsabi rä thuhu (Ezequiel 39:7).

Näꞌä rä tuhni de Armagedón, ¿ma dä nja ha nꞌa rä luga de rä Xiꞌmhai? Hinä. Nunä rä tuhni ma dä nja ha gatꞌho rä Xiꞌmhai (Jeremías 25:32-34; Ezequiel 39:17-20).

Rä noya Armagedón (de gä hebreo Har-Meghiddóhn) ri bo̱ni «Rä Tꞌo̱ho̱ de Meguidó». Meguidó geꞌä nꞌa de nuꞌu̱ yä hnini habu̱ mi ꞌmu̱i nuꞌu̱ yä israelita. Mäyaꞌmu̱ bi nja rꞌa yä tuhni ha näꞌä rä lugaꞌä, ꞌne rä Mäkä Tꞌofo pede rꞌa de geꞌu̱ (Jueces 5:19, 20; 2 Reyes 9:27; 23:29). Armagedón hingä geꞌä näꞌä rä luga de Meguidó de mäyaꞌmu̱, ngeꞌä nuni otho nꞌa rä tꞌo̱ho̱. ꞌNehe ha näꞌä rä ꞌmatha de Jezreel habu̱ bi kohi Meguidó, hingä ma dä ñꞌenini gatꞌho nuꞌu̱ ma dä ntunkui Äjuä. Hänge Armagedón, näꞌä nꞌa rä tuhni näꞌä ma dä nja entre rä Tsꞌu̱tꞌhui Äjuä ꞌne nuꞌu̱ yä gobiernu de nunä rä xiꞌmhai.

¿Te ma dä thogi ha näꞌä rä gerra de Armagedón? Hindi pädihu̱ hanja ma dä usa Äjuä rä tsꞌe̱di, pe zäi ge ma dä usa nuꞌu̱ yä tꞌo̱tꞌe bi usa mäyaꞌmu̱ ngu yä ndo, yä mbiꞌmhai, yä nzo̱the, yä yꞌee de gä tsibi ko yä asufre, yä hue̱i ꞌne yä tsꞌo ñheni (Job 38:22, 23; Ezequiel 38:19, 22; Habacuc 3:10, 11; Zacarías 14:12). Koꞌmu̱ nuꞌu̱ yä nkontra Äjuä hingä ma dä bädi toꞌo di ntunkui, rꞌaa ma dä ñhose̱ entre geꞌu̱. Pe rä ngätsꞌi ma dä daꞌu̱ ngue̱nda ge di ntunkui Äjuä (Ezequiel 38:21, 23; Zacarías 14:13).

Xti zo̱ho̱ Armagedón, ¿ma dä uadi rä Xiꞌmhai? Hinä. Armagedón hingä ma dä huati rä Xiꞌmhai. Äjuä bi hyoki rä Xiꞌmhai pa dä mꞌu̱i yä jäꞌi pa nzäntho (Salmo 37:29; 96:10; Eclesiastés 1:4). Po rängeꞌä, Armagedón hingä ma dä huati gatꞌho näꞌä jaua ha rä Xiꞌmhai. ¿Hanja di pädihu̱? Rä Biblia enä ge ma dä bongi «nꞌa däta mhuntsꞌi yä jäꞌi» nuꞌu̱ yꞌo mänjuäntho ha rä ꞌñuu Äjuä (Apocalipsis 7:9, 14; Salmo 37:34).

Pe, ¿hingi udi rä Mäkä Tꞌofo ge ha Armagedón ma dä «uadi rä xiꞌmhai»? Mäjuäni ge ha rꞌa yä xe̱ni de rä Biblia usa rä noya xiꞌmhai pa dä no̱ni nunä rä hai habu̱ di ꞌmu̱hu̱. Pe rä Biblia ꞌnehe usa nunä rä noya pa dä no̱ni gatꞌho nuꞌu̱ yä jäꞌi di nkontraui Äjuä (1 Juan 2:15-17). Hänge ora rä Biblia enä ge ma dä «uadi rä xiꞌmhai», ne dä mää ge ma dä uadi gatꞌho nuꞌu̱ yä nkontra Äjuä, hingä rä planeta (Mateo 24:3, Ra ꞌRaꞌyo Testamento).

¿Hämꞌu̱ ma dä zo̱ho̱ rä fin o rä gerra de Armagedón? Nuꞌmu̱ rä Hesu mi esplikabi yä de̱ni ge ma dä nja nꞌa «rä däta tribulación» —nunä ma dä uadi ko rä gerra de Armagedón—, näꞌä bi ꞌñenä: «Hinto pädi rä pa nixi rä ora [...] nixi yä e̱nxe̱ bi ꞌmu̱ mähetsꞌi hingi pädi, ho̱nse̱ mä Dada». Hää, nixi rä Hesu himi pädi (Mateo 24:21, 36). Pe po näꞌä udi rä Mäkä Tꞌofo, dä za gä ntiendehu̱ ge Armagedón ma dä zo̱ho̱ durante näꞌä rä tiempo fädi ngu rä presensia rä Hesu. Nunä tiempo bi mu̱di dende rä je̱ya 1914 (Mateo 24:37-39).