ਅਧਿਆਤਮਿਕ ਟੀਚੇ ਰੱਖੋ
1 ਸਦਾ ਲਈ ਯਹੋਵਾਹ ਦੀ ਮਹਿਮਾ ਕਰਨੀ ਕਿੰਨੇ ਮਾਣ ਦੀ ਗੱਲ ਹੋਵੇਗੀ! ਇਸ ਟੀਚੇ ਨੂੰ ਹਾਸਲ ਕਰਨ ਲਈ ਅਸੀਂ ਹੁਣ ਤੋਂ ਹੀ ਅਧਿਆਤਮਿਕ ਟੀਚੇ ਰੱਖ ਸਕਦੇ ਹਾਂ ਅਤੇ ਉਨ੍ਹਾਂ ਨੂੰ ਹਾਸਲ ਕਰਨ ਲਈ ਮਿਹਨਤ ਕਰ ਸਕਦੇ ਹਾਂ। ਇਸ ਤਰ੍ਹਾਂ ਅਸੀਂ ਆਪਣੀ ਤਾਕਤ ਨੂੰ ਸਹੀ ਕੰਮਾਂ ਵਿਚ ਲਗਾ ਸਕਾਂਗੇ। (1 ਕੁਰਿੰ. 9:26) ਤੁਸੀਂ ਕਿਹੜੇ ਟੀਚੇ ਰੱਖ ਸਕਦੇ ਹੋ?
2 ਬਾਈਬਲ ਦਾ ਅਧਿਐਨ: ਕੀ ਤੁਸੀਂ ਕਲੀਸਿਯਾ ਦੀ ਹਰ ਸਭਾ ਲਈ ਤਿਆਰੀ ਕਰਦੇ ਹੋ? ਜੇ ਕਰਦੇ ਹੋ, ਤਾਂ ਕੀ ਤੁਸੀਂ ਰੀਸਰਚ ਅਤੇ ਮਨਨ ਕਰਨ ਲਈ ਸਮਾਂ ਕੱਢਦੇ ਹੋ? ਮਿਸਾਲ ਲਈ, ਹਰ ਹਫ਼ਤੇ ਦੇ ਪਹਿਰਾਬੁਰਜ ਅਧਿਐਨ ਅਤੇ ਕਲੀਸਿਯਾ ਪੁਸਤਕ ਅਧਿਐਨ ਲਈ ਤਿਆਰੀ ਕਰਦੇ ਸਮੇਂ, ਕੀ ਤੁਸੀਂ ਸਿਰਫ਼ ਜਵਾਬ ਹੇਠ ਲਕੀਰਾਂ ਖਿੱਚਦੇ ਹੋ ਜਾਂ ਕੀ ਤੁਸੀਂ ਬਾਈਬਲ ਦੀਆਂ ਆਇਤਾਂ ਨੂੰ ਵੀ ਪੜ੍ਹਦੇ ਹੋ ਅਤੇ ਸਮਝਾਈਆਂ ਗਈਆਂ ਗੱਲਾਂ ਦੇ ਕਾਰਨਾਂ ਉੱਤੇ ਵਿਚਾਰ ਕਰਦੇ ਹੋ? ਕੀ ਤੁਸੀਂ ਹਰ ਹਫ਼ਤੇ ਦੇ ਬਾਈਬਲ ਪਠਨ ਲਈ ਦਿੱਤੇ ਗਏ ਅਧਿਆਵਾਂ ਵਿੱਚੋਂ ਇਕ-ਦੋ ਗੱਲਾਂ ਉੱਤੇ ਰੀਸਰਚ ਕਰਨ ਦਾ ਟੀਚਾ ਰੱਖ ਸਕਦੇ ਹੋ? ਇਸ ਤਰੀਕੇ ਨਾਲ ਅਧਿਆਤਮਿਕ ਖ਼ਜ਼ਾਨੇ ਦੀ ਖੋਜ ਕਰਨ ਲਈ ਸਮੇਂ ਅਤੇ ਮਿਹਨਤ ਦੀ ਲੋੜ ਪੈਂਦੀ ਹੈ, ਪਰ ਇਸ ਤਰ੍ਹਾਂ ਕਰ ਕੇ ਸਾਨੂੰ ਬਹੁਤ ਸਾਰੇ ਫ਼ਾਇਦੇ ਹੋਣਗੇ।—ਕਹਾ. 2:4, 5.
3 ਕਲੀਸਿਯਾ ਸਭਾਵਾਂ: ਤੁਸੀਂ ਕਲੀਸਿਯਾ ਦੀਆਂ ਪੰਜਾਂ ਸਭਾਵਾਂ ਵਿਚ ਬਾਕਾਇਦਾ ਹਾਜ਼ਰ ਹੋਣ ਦਾ ਟੀਚਾ ਵੀ ਰੱਖ ਸਕਦੇ ਹੋ। ਸਭਾ ਸ਼ੁਰੂ ਹੋਣ ਤੋਂ ਕੁਝ ਸਮਾਂ ਪਹਿਲਾਂ ਆ ਕੇ ਭੈਣਾਂ-ਭਰਾਵਾਂ ਨਾਲ ਮਿਲਣ-ਗਿਲਣ ਦੁਆਰਾ ਅਤੇ ਸ਼ੁਰੂ ਦੇ ਗੀਤ ਤੇ ਪ੍ਰਾਰਥਨਾ ਲਈ ਮੌਜੂਦ ਹੋ ਕੇ ਤੁਸੀਂ ਕਲੀਸਿਯਾ ਨੂੰ ਮਜ਼ਬੂਤ ਕਰ ਸਕੋਗੇ। ਅਸੀਂ ਹਰ ਸਭਾ ਵਿਚ ਟਿੱਪਣੀ ਕਰਨ ਅਤੇ ਆਪਣੀਆਂ ਟਿੱਪਣੀਆਂ ਨੂੰ ਸੁਧਾਰਨ ਦੀ ਵੀ ਕੋਸ਼ਿਸ਼ ਕਰ ਸਕਦੇ ਹਾਂ। ਸ਼ਾਇਦ ਤੁਸੀਂ ਦੱਸ ਸਕਦੇ ਹੋ ਕਿ ਪੈਰੇ ਵਿਚ ਦਿੱਤੀ ਆਇਤ ਦਾ ਲੇਖ ਦੇ ਵਿਸ਼ੇ ਨਾਲ ਕੀ ਸੰਬੰਧ ਹੈ ਜਾਂ ਇਨ੍ਹਾਂ ਗੱਲਾਂ ਨੂੰ ਅਸੀਂ ਆਪਣੀ ਰੋਜ਼ਾਨਾ ਦੀ ਜ਼ਿੰਦਗੀ ਵਿਚ ਕਿੱਦਾਂ ਲਾਗੂ ਕਰ ਸਕਦੇ ਹਾਂ।—ਇਬ. 10:24, 25.
4 ਪ੍ਰਚਾਰ ਦਾ ਕੰਮ: ਟੀਚੇ ਰੱਖਣ ਨਾਲ ਸਾਡੀ ਸੇਵਕਾਈ ਹੋਰ ਜ਼ਿਆਦਾ ਅਸਰਦਾਰ ਬਣਦੀ ਹੈ। ਕੀ ਤੁਸੀਂ ਟੀਚਾ ਰੱਖਿਆ ਹੈ ਕਿ ਹਰ ਮਹੀਨੇ ਤੁਸੀਂ ਪ੍ਰਚਾਰ ਦੇ ਕੰਮ ਵਿਚ ਕਿੰਨੇ ਘੰਟੇ ਬਿਤਾਓਗੇ? ਕਈਆਂ ਨੂੰ ਅਜਿਹੇ ਟੀਚੇ ਰੱਖਣ ਤੋਂ ਕਾਫ਼ੀ ਲਾਭ ਮਿਲਿਆ ਹੈ। ਕੀ ਤੁਸੀਂ ਸੇਵਕਾਈ ਦੇ ਕਿਸੇ ਪਹਿਲੂ ਵਿਚ ਸੁਧਾਰ ਕਰ ਸਕਦੇ ਹੋ, ਮਿਸਾਲ ਲਈ ਘਰ-ਘਰ ਪ੍ਰਚਾਰ ਕਰਦੇ ਸਮੇਂ ਬਾਈਬਲ ਇਸਤੇਮਾਲ ਕਰਨੀ, ਅਸਰਦਾਰ ਤਰੀਕੇ ਨਾਲ ਪੁਨਰ-ਮੁਲਾਕਾਤਾਂ ਕਰਨੀਆਂ, ਬਾਈਬਲ ਸਟੱਡੀ ਸ਼ੁਰੂ ਕਰਨੀ ਜਾਂ ਵਿਦਿਆਰਥੀ ਨੂੰ ਹੋਰ ਚੰਗੀ ਤਰ੍ਹਾਂ ਸਿਖਾਉਣਾ?
5 ਮਾਪਿਓ, ਕੀ ਤੁਸੀਂ ਆਪਣੇ ਬੱਚਿਆਂ ਨੂੰ ਯਹੋਵਾਹ ਦੀ ਸੇਵਾ ਵਿਚ ਟੀਚੇ ਰੱਖਣ ਦੀ ਪ੍ਰੇਰਣਾ ਦੇ ਰਹੇ ਹੋ? ਉਨ੍ਹਾਂ ਨੂੰ ਸਿਖਾਓ ਕਿ ਇਕ ਪਾਇਨੀਅਰ ਜਾਂ ਬੈਥਲ ਪਰਿਵਾਰ ਦੇ ਮੈਂਬਰ ਵਜੋਂ ਸੇਵਾ ਕਰਨੀ ਯਹੋਵਾਹ ਦਾ ਧੰਨਵਾਦ ਕਰਨ ਦਾ ਉੱਤਮ ਤਰੀਕਾ ਹੈ।—ਉਪ. 12:1.
6 ਆਪਣੀਆਂ ਗਤੀਵਿਧੀਆਂ ਦੀ ਜਾਂਚ ਕਰ ਕੇ, ਅਧਿਆਤਮਿਕ ਟੀਚੇ ਰੱਖ ਕੇ ਅਤੇ ਫਿਰ ਇਨ੍ਹਾਂ ਨੂੰ ਹਾਸਲ ਕਰਨ ਲਈ ਮਿਹਨਤ ਕਰ ਕੇ ਅਸੀਂ ਆਪਣੀ ਸੇਵਾ ਵਿਚ ਜ਼ਿਆਦਾ ਖ਼ੁਸ਼ੀ ਹਾਸਲ ਕਰਾਂਗੇ ਅਤੇ ਦੂਸਰਿਆਂ ਦੀ ਵੀ ਹੌਸਲਾ-ਅਫ਼ਜ਼ਾਈ ਕਰਾਂਗੇ।—ਰੋਮੀ. 1:12.