ਭਾਗ 9​—ਬਿਹਤਰ ਤਰੀਕੇ ਨਾਲ ਬਾਈਬਲ ਸਟੱਡੀਆਂ ਕਰਾਉਣੀਆਂ

ਗਵਾਹੀ ਦੇਣ ਲਈ ਵਿਦਿਆਰਥੀਆਂ ਨੂੰ ਤਿਆਰ ਕਰਨਾ

¹ ਜਦੋਂ ਅੰਦ੍ਰਿਯਾਸ ਤੇ ਫ਼ਿਲਿੱਪੁਸ ਨੂੰ ਪਤਾ ਲੱਗਾ ਕਿ ਯਿਸੂ ਹੀ ਵਾਅਦਾ ਕੀਤਾ ਹੋਇਆ ਮਸੀਹਾ ਸੀ, ਤਾਂ ਉਹ ਦੂਜਿਆਂ ਨੂੰ ਇਹ ਗੱਲ ਦੱਸਣ ਤੋਂ ਰਹਿ ਨਾ ਸਕੇ। (ਯੂਹੰ. 1:40-45) ਇਸੇ ਤਰ੍ਹਾਂ, ਅੱਜ ਵੀ ਜਦੋਂ ਬਾਈਬਲ ਵਿਦਿਆਰਥੀ ਸਿੱਖੀਆਂ ਗੱਲਾਂ ਵਿਚ ਨਿਹਚਾ ਕਰਨ ਲੱਗਦੇ ਹਨ, ਤਾਂ ਉਨ੍ਹਾਂ ਦਾ ਦਿਲ ਇਹ ਗੱਲਾਂ ਦੂਜਿਆਂ ਨੂੰ ਦੱਸਣ ਨੂੰ ਕਰਦਾ ਹੈ। (2 ਕੁਰਿੰ. 4:13) ਅਸੀਂ ਉਨ੍ਹਾਂ ਨੂੰ ਅਸਰਕਾਰੀ ਤਰੀਕੇ ਨਾਲ ਗਵਾਹੀ ਦੇਣ ਦਾ ਉਤਸ਼ਾਹ ਕਿਵੇਂ ਦੇ ਸਕਦੇ ਹਾਂ ਤੇ ਉਨ੍ਹਾਂ ਨੂੰ ਤਿਆਰ ਕਰ ਸਕਦੇ ਹਾਂ?

² ਆਪਣੇ ਵਿਦਿਆਰਥੀ ਨੂੰ ਪੁੱਛੋ ਕਿ ਉਸ ਨੇ ਬਾਈਬਲ ਤੋਂ ਸਿੱਖੀਆਂ ਗੱਲਾਂ ਬਾਰੇ ਹੋਰਨਾਂ ਨੂੰ ਦੱਸਿਆ ਹੈ ਕਿ ਨਹੀਂ। ਉਹ ਸ਼ਾਇਦ ਆਪਣੇ ਦੋਸਤਾਂ ਤੇ ਪਰਿਵਾਰ ਦੇ ਮੈਂਬਰਾਂ ਨੂੰ ਸਟੱਡੀ ਵਿਚ ਬੈਠਣ ਲਈ ਉਤਸ਼ਾਹਿਤ ਕਰ ਸਕਦਾ ਹੈ। ਉਸ ਨੂੰ ਪੁੱਛੋ ਕਿ ਕੀ ਉਸ ਦੇ ਕਿਸੇ ਸਹਿਕਰਮੀ, ਸਹਿਪਾਠੀ ਜਾਂ ਹੋਰ ਵਾਕਫ਼ਕਾਰਾਂ ਨੇ ਖ਼ੁਸ਼ ਖ਼ਬਰੀ ਵਿਚ ਦਿਲਚਸਪੀ ਲਈ ਹੈ। ਇਸ ਤਰੀਕੇ ਨਾਲ ਉਹ ਗਵਾਹੀ ਦੇਣੀ ਸ਼ੁਰੂ ਕਰ ਸਕਦਾ ਹੈ। ਉਸ ਦੀ ਇਹ ਸਮਝਣ ਵਿਚ ਮਦਦ ਕਰੋ ਕਿ ਦੂਜਿਆਂ ਨੂੰ ਯਹੋਵਾਹ ਪਰਮੇਸ਼ੁਰ ਅਤੇ ਉਸ ਦੇ ਮਕਸਦ ਬਾਰੇ ਦੱਸਣ ਲੱਗਿਆਂ ਸੂਝ-ਬੂਝ, ਆਦਰ ਤੇ ਸਲੀਕੇ ਨਾਲ ਗੱਲ ਕਰਨੀ ਚਾਹੀਦੀ ਹੈ।—ਕੁਲੁ. 4:6; 2 ਤਿਮੋ. 2:24, 25.

³ ਆਪਣੇ ਵਿਸ਼ਵਾਸਾਂ ਬਾਰੇ ਦੱਸਣਾ: ਬਾਈਬਲ ਵਿਦਿਆਰਥੀਆਂ ਨੂੰ ਇਹ ਸਿਖਾਉਣਾ ਬਹੁਤ ਜ਼ਰੂਰੀ ਹੈ ਕਿ ਉਹ ਆਪਣੇ ਵਿਸ਼ਵਾਸਾਂ ਬਾਰੇ ਦੱਸਣ ਸਮੇਂ ਬਾਈਬਲ ਦਾ ਇਸਤੇਮਾਲ ਕਰਨ। ਸਟੱਡੀ ਦੌਰਾਨ ਖ਼ਾਸ ਮੁੱਦਿਆਂ ਬਾਰੇ ਵਿਦਿਆਰਥੀ ਨੂੰ ਪੁੱਛੋ: “ਆਪਣੇ ਪਰਿਵਾਰ ਨੂੰ ਇਸ ਸਿੱਖਿਆ ਬਾਰੇ ਸਮਝਾਉਣ ਲਈ ਤੁਸੀਂ ਬਾਈਬਲ ਕਿਵੇਂ ਇਸਤੇਮਾਲ ਕਰੋਗੇ?” ਜਾਂ “ਇਸ ਬਾਰੇ ਆਪਣੇ ਦੋਸਤ ਨੂੰ ਸਮਝਾਉਣ ਲੱਗਿਆਂ ਤੁਸੀਂ ਬਾਈਬਲ ਦੀ ਕਿਹੜੀ ਆਇਤ ਵਰਤੋਗੇ?” ਧਿਆਨ ਨਾਲ ਉਸ ਦੀ ਗੱਲ ਸੁਣੋ ਤੇ ਫਿਰ ਦਿਖਾਓ ਕਿ ਉਹ ਕਿਵੇਂ ਬਾਈਬਲ ਦੀ ਮਦਦ ਨਾਲ ਕਿਸੇ ਸਿੱਖਿਆ ਨੂੰ ਸਮਝਾ ਸਕਦਾ ਹੈ। (2 ਤਿਮੋ. 2:15) ਇਸ ਤਰ੍ਹਾਂ ਤੁਸੀਂ ਵਿਦਿਆਰਥੀ ਨੂੰ ਗਵਾਹੀ ਦੇਣ ਲਈ ਤਿਆਰ ਕਰਨ ਦੇ ਨਾਲ-ਨਾਲ ਉਸ ਸਮੇਂ ਲਈ ਵੀ ਤਿਆਰ ਕਰ ਰਹੇ ਹੋਵੋਗੇ ਜਦੋਂ ਉਹ ਪ੍ਰਕਾਸ਼ਕ ਬਣ ਕੇ ਕਲੀਸਿਯਾ ਨਾਲ ਪ੍ਰਚਾਰ ਦਾ ਕੰਮ ਕਰ ਸਕੇਗਾ।

⁴ ਬਾਈਬਲ ਵਿਦਿਆਰਥੀਆਂ ਨੂੰ ਵਿਰੋਧ ਦਾ ਸਾਮ੍ਹਣਾ ਕਰਨ ਲਈ ਤਿਆਰ ਕਰਨਾ ਵੀ ਚੰਗੀ ਗੱਲ ਹੋਵੇਗੀ। (ਮੱਤੀ 10:36; ਲੂਕਾ 8:13; 2 ਤਿਮੋ. 3:12) ਜਦੋਂ ਦੂਸਰੇ ਲੋਕ ਯਹੋਵਾਹ ਦੇ ਗਵਾਹਾਂ ਬਾਰੇ ਸਵਾਲ ਖੜ੍ਹੇ ਕਰਦੇ ਹਨ ਜਾਂ ਨੁਕਤਾਚੀਨੀ ਕਰਦੇ ਹਨ, ਤਾਂ ਇਸ ਨਾਲ ਵਿਦਿਆਰਥੀਆਂ ਨੂੰ ਗਵਾਹੀ ਦੇਣ ਦਾ ਮੌਕਾ ਮਿਲ ਸਕਦਾ ਹੈ। ਬਰੋਸ਼ਰ ਯਹੋਵਾਹ ਦੇ ਗਵਾਹ—ਉਹ ਕੌਣ ਹਨ? ਉਹ ਕੀ ਵਿਸ਼ਵਾਸ ਕਰਦੇ ਹਨ? (ਹਿੰਦੀ) ਦੀ ਮਦਦ ਨਾਲ ਵਿਦਿਆਰਥੀ ‘ਉੱਤਰ ਦੇਣ ਨੂੰ ਤਿਆਰ ਰਹਿ’ ਸਕਦੇ ਹਨ। (1 ਪਤ. 3:15) ਨਵੇਂ ਵਿਦਿਆਰਥੀ ਇਸ ਬਰੋਸ਼ਰ ਵਿਚ ਦਿੱਤੀ ਸਹੀ ਜਾਣਕਾਰੀ ਵਰਤ ਕੇ ਆਪਣੇ ਦੋਸਤਾਂ ਤੇ ਪਰਿਵਾਰ ਦੇ ਮੈਂਬਰਾਂ ਨੂੰ ਸਾਡੇ ਬਾਈਬਲ-ਆਧਾਰਿਤ ਵਿਸ਼ਵਾਸਾਂ ਅਤੇ ਕੰਮਾਂ ਬਾਰੇ ਦੱਸ ਸਕਦੇ ਹਨ।