ਪ੍ਰਕਾਸ਼ਨਾਂ ਵਾਲੀ ਰੇੜ੍ਹੀ ਜਾਂ ਮੇਜ਼ ਵਰਤ ਕੇ ਗਵਾਹੀ ਕਿਵੇਂ ਦੇਈਏ?

ਪ੍ਰਕਾਸ਼ਨਾਂ ਵਾਲੀ ਰੇੜ੍ਹੀ ਜਾਂ ਮੇਜ਼ ਵਰਤ ਕੇ ਗਵਾਹੀ ਦੇਣ ਦਾ ਕੰਮ ਬਹੁਤ ਅਸਰਕਾਰੀ ਸਾਬਤ ਹੋਇਆ ਹੈ। ਇਸ ਨਾਲ ਨੇਕਦਿਲ ਲੋਕ ਸੱਚਾਈ ਵੱਲ ਖਿੱਚੇ ਆਉਂਦੇ ਹਨ। (ਯੂਹੰ. 6:44) ਇਸ ਲਈ ਬਜ਼ੁਰਗਾਂ ਨੂੰ ਹੱਲਾਸ਼ੇਰੀ ਦਿੱਤੀ ਜਾਂਦੀ ਹੈ ਕਿ ਉਹ ਆਪਣੀ ਮੰਡਲੀ ਦੇ ਉਨ੍ਹਾਂ ਇਲਾਕਿਆਂ ਵਿਚ ਪ੍ਰਕਾਸ਼ਨਾਂ ਵਾਲੀ ਰੇੜ੍ਹੀ ਜਾਂ ਮੇਜ਼ ਲਗਾਉਣ ਦਾ ਇੰਤਜ਼ਾਮ ਕਰਨ ਜਿੱਥੋਂ ਦੀ ਜ਼ਿਆਦਾ ਲੋਕ ਪੈਦਲ ਆਉਂਦੇ-ਜਾਂਦੇ ਹਨ। ਪ੍ਰਕਾਸ਼ਨਾਂ ਵਾਲੀ ਰੇੜ੍ਹੀ ਜਾਂ ਮੇਜ਼ ਅਸੀਂ ਹਮੇਸ਼ਾ ਇੱਕੋ ਜਗ੍ਹਾ ʼਤੇ ਨਹੀਂ ਰੱਖਦੇ, ਇਸ ਲਈ ਆਮ ਤੌਰ ʼਤੇ ਅਧਿਕਾਰੀਆਂ ਤੋਂ ਇਜਾਜ਼ਤ ਮੰਗਣ ਦੀ ਲੋੜ ਨਹੀਂ ਹੈ। ਕਿਹੜੇ ਪਬਲੀਸ਼ਰ ਇਸ ਕੰਮ ਵਿਚ ਹਿੱਸਾ ਲੈ ਸਕਦੇ ਹਨ? ਉਹ ਪਬਲੀਸ਼ਰ ਜੋ ਸਮਝਦਾਰੀ ਤੋਂ ਕੰਮ ਲੈਂਦੇ ਹਨ, ਤਮੀਜ਼ ਨਾਲ ਪੇਸ਼ ਆਉਂਦੇ ਹਨ ਅਤੇ ਜਿਨ੍ਹਾਂ ਨੂੰ ਚੰਗੀ ਤਰ੍ਹਾਂ ਗੱਲਬਾਤ ਕਰਨੀ ਆਉਂਦੀ ਹੈ। ਥੱਲੇ ਕੁਝ ਉਹ ਗੱਲਾਂ ਦੱਸੀਆਂ ਗਈਆਂ ਹਨ ਜਿਨ੍ਹਾਂ ਨੂੰ ਮੰਨ ਕੇ ਪਬਲੀਸ਼ਰ ਹੋਰ ਜ਼ਿਆਦਾ ਸਫ਼ਲਤਾ ਪਾ ਸਕਣਗੇ।

ਇਹ ਕਰੋ:

ਆਉਣ-ਜਾਣ ਵਾਲਿਆਂ ਨਾਲ ਮੁਸਕਰਾ ਕੇ ਗੱਲ ਕਰੋ ਅਤੇ ਸਲੀਕੇ ਨਾਲ ਪੇਸ਼ ਆਓ। ਕਈ ਪਬਲੀਸ਼ਰ ਮੁਸਕਰਾਉਂਦੇ ਹੋਏ ਆਉਣ-ਜਾਣ ਵਾਲਿਆਂ ਨੂੰ ਨਮਸਤੇ ਕਹਿੰਦੇ ਹਨ। ਜੇ ਕੋਈ ਲੰਘਣ ਵਾਲਾ ਰੇੜ੍ਹੀ ਜਾਂ ਮੇਜ਼ ਵੱਲ ਦੇਖਦਾ ਹੈ, ਤਾਂ ਤੁਸੀਂ ਕਹਿ ਸਕਦੇ ਹੋ: “ਜੇ ਤੁਸੀਂ ਪੜ੍ਹਨਾ ਚਾਹੁੰਦੇ ਹੋ, ਤਾਂ ਲੈ ਸਕਦੇ ਹੋ।”
ਪ੍ਰਕਾਸ਼ਨਾਂ ਵਾਲੀ ਰੇੜ੍ਹੀ ਜਾਂ ਮੇਜ਼ ਤੋਂ ਥੋੜ੍ਹੀ ਦੂਰੀ ʼਤੇ ਖੜ੍ਹੇ ਹੋਵੋ। ਕੁਝ ਥਾਵਾਂ ʼਤੇ ਪਬਲੀਸ਼ਰਾਂ ਨੇ ਦੇਖਿਆ ਹੈ ਕਿ ਇੱਦਾਂ ਕਰਨ ਨਾਲ ਉਨ੍ਹਾਂ ਨੂੰ ਜ਼ਿਆਦਾ ਸਫ਼ਲਤਾ ਮਿਲੀ ਹੈ। ਪਰ ਕੁਝ ਪਬਲੀਸ਼ਰਾਂ ਨੇ ਦੇਖਿਆ ਹੈ ਕਿ ਇਸ ਤਰੀਕੇ ਨਾਲ ਆਉਣ-ਜਾਣ ਵਾਲੇ ਰੇੜ੍ਹੀ ਜਾਂ ਮੇਜ਼ ਕੋਲ ਆਉਣ ਤੋਂ ਹਿਚਕਿਚਾਉਂਦੇ ਹਨ। ਇਸ ਕਰਕੇ ਉਹ ਹੋਰ ਥੋੜ੍ਹੀ ਦੂਰੀ ʼਤੇ ਖੜ੍ਹੇ ਹੁੰਦੇ ਹਨ ਅਤੇ ਉਦੋਂ ਤਕ ਇੰਤਜ਼ਾਰ ਕਰਦੇ ਹਨ ਜਦ ਤਕ ਕੋਈ ਪ੍ਰਕਾਸ਼ਨਾਂ ਵਾਲੀ ਰੇੜ੍ਹੀ ਜਾਂ ਮੇਜ਼ ਕੋਲ ਨਹੀਂ ਆਉਂਦਾ। ਜਦੋਂ ਵੀ ਕੋਈ ਵਿਅਕਤੀ ਰੇੜ੍ਹੀ ਕੋਲ ਆਉਂਦਾ ਹੈ, ਤਾਂ ਸ਼ਾਇਦ ਇਹ ਸਵਾਲ ਪੁੱਛ ਕੇ ਉਸ ਨਾਲ ਗੱਲਬਾਤ ਸ਼ੁਰੂ ਕਰਨ ਦੀ ਕੋਸ਼ਿਸ਼ ਕਰੋ: “ਕੀ ਤੁਸੀਂ ਇਸ ਸਵਾਲ ਬਾਰੇ ਪਹਿਲਾਂ ਕਦੇ ਸੋਚਿਆ?”
ਜਿੰਨਾ ਹੋ ਸਕੇ ਬਾਈਬਲ ਦੀ ਵਰਤੋ ਕਰੋ।
ਜਿਹੜਾ ਵਿਅਕਤੀ ਬਾਈਬਲ ਸਟੱਡੀ ਕਰਾਉਣ ਵਾਲੇ ਪ੍ਰਕਾਸ਼ਨਾਂ ਵਿੱਚੋਂ ਕੋਈ ਪ੍ਰਕਾਸ਼ਨ ਲੈਂਦਾ ਹੈ, ਜਿਵੇਂ ਬਾਈਬਲ ਕੀ ਸਿਖਾਉਂਦੀ ਹੈ? ਕਿਤਾਬ, ਉਸ ਨੂੰ ਬਾਈਬਲ ਸਟੱਡੀ ਦੇ ਇੰਤਜ਼ਾਮ ਬਾਰੇ ਦੱਸੋ। ਮੋਬਾਇਲ ਜਾਂ ਟੈਬਲੇਟ ʼਤੇ ਬਾਈਬਲ ਕਿਉਂ ਪੜ੍ਹੀਏ? ਨਾਂ ਦਾ ਵੀਡੀਓ ਵੀ ਦਿਖਾਓ।
ਜੇ ਹੋ ਸਕੇ, ਤਾਂ ਦਿਲਚਸਪੀ ਲੈਣ ਵਾਲਿਆਂ ਕੋਲੋਂ ਉਨ੍ਹਾਂ ਦਾ ਪਤਾ ਤੇ ਫ਼ੋਨ ਨੰਬਰ ਲਓ। ਜੇ ਉਹ ਵਿਅਕਤੀ ਤੁਹਾਡੇ ਇਲਾਕੇ ਵਿਚ ਨਹੀਂ ਰਹਿੰਦਾ, ਤਾਂ ਜਲਦੀ ਤੋਂ ਜਲਦੀ S-43 ਫ਼ਾਰਮ ਭਰ ਕੇ ਆਪਣੀ ਮੰਡਲੀ ਦੇ ਸੈਕਟਰੀ ਨੂੰ ਦਿਓ।

ਮੁਸ਼ਕਲ ਖੜ੍ਹੀ ਕਰਨ ਵਾਲੇ ਲੋਕਾਂ ʼਤੇ ਨਜ਼ਰ ਰੱਖੋ ਤੇ ਉਨ੍ਹਾਂ ਤੋਂ ਸਾਵਧਾਨ ਰਹੋ। ਜੇ ਕੋਈ ਬਹੁਤ ਗੁੱਸੇ ਨਾਲ ਸਾਡੇ ਕੰਮ ਦਾ ਵਿਰੋਧ ਕਰਦਾ ਹੈ, ਤਾਂ ਵਧੀਆ ਹੋਵੇਗਾ ਕਿ ਉਸ ਇਲਾਕੇ ਵਿੱਚੋਂ ਚਲੇ ਜਾਓ।

ਇਹ ਨਾ ਕਰੋ:
ਨਾ ਗੁੱਸੇ ਹੋਵੋ ਤੇ ਨਾ ਹੀ ਕਿਸੇ ਨੂੰ ਪ੍ਰਕਾਸ਼ਨ ਲੈਣ ਲਈ ਮਜਬੂਰ ਕਰੋ। ਰੇੜ੍ਹੀ ਜਾਂ ਮੇਜ਼ ਕੋਲ ਇਕ ਪਹਿਰੇਦਾਰ ਵਾਂਗ ਖੜ੍ਹੇ ਨਾ ਰਹੋ।
ਪ੍ਰਚਾਰ ਕਰਨ ਦੇ ਇਸ ਤਰੀਕੇ ਨੂੰ ਸਿਰਫ਼ ਪ੍ਰਕਾਸ਼ਨ ਵੰਡਣ ਦਾ ਜ਼ਰੀਆ ਨਾ ਸਮਝੋ। ਜਦੋਂ ਅਸੀਂ ਪ੍ਰਚਾਰ ਕਰਦੇ ਹਾਂ, ਤਾਂ ਸਾਡਾ ਟੀਚਾ ਬਾਈਬਲ ਸਟੱਡੀਆਂ ਸ਼ੁਰੂ ਕਰਨ ਦਾ ਹੋਣਾ ਚਾਹੀਦਾ ਹੈ। ਇਸ ਲਈ ਸਾਨੂੰ ਆਉਂਦੇ-ਜਾਂਦੇ ਲੋਕਾਂ ਨਾਲ ਗੱਲਬਾਤ ਸ਼ੁਰੂ ਕਰਨ ਦੀ ਕੋਸ਼ਿਸ਼ ਕਰਨੀ ਚਾਹੀਦੀ ਹੈ।
ਰੇੜ੍ਹੀ ਜਾਂ ਮੇਜ਼ ਦੇ ਮੋਹਰੇ ਨਾ ਖੜ੍ਹੇ ਹੋਵੋ ਜਾਂ ਆਪਣੇ ਸਾਥੀ ਨਾਲ ਗੱਲਾਂ ਕਰਨ ਵਿਚ ਖੁੱਭ ਨਾ ਜਾਓ। ਜੇ ਤੁਹਾਨੂੰ ਆਪਣਾ ਫ਼ੋਨ ਇਸਤੇਮਾਲ ਕਰਨਾ ਪਵੇ, ਤਾਂ ਚੰਗਾ ਹੋਵੇਗਾ ਕਿ ਤੁਸੀਂ ਰੇੜ੍ਹੀ ਜਾਂ ਮੇਜ਼ ਤੋਂ ਪਰਾਂ ਹੋ ਕੇ ਇਸ ਨੂੰ ਵਰਤੋ।
ਵਿਰੋਧੀਆਂ ਨਾਲ ਬਹਿਸਬਾਜ਼ੀ ਨਾ ਕਰੋ। ਜੇ ਉਹ ਗਾਲ਼ਾਂ ਕੱਢਣ ਲੱਗ ਪਵੇ, ਤਾਂ ਚੰਗਾ ਹੋਵੇਗਾ ਕਿ ਤੁਸੀਂ ਹੋਰ ਜਗ੍ਹਾ ਚਲੇ ਜਾਓ।