Naandi ni Kasi Terorismo?

No walay nabalitaan mon inyataki na saray terorista, nayarin naisip mo: ‘Talaga kasin walay malasakit na Dios? Akin et nagagawa iraya? Naandi ni kasi terorismoa? Panon kon nalabanan so pakatatakot ko? Naamtaan ed Biblia so ebat ed saratan ya tepet.

Antoy nalilikna na Dios ed saray nagagawan terorismo?

Kabusol na Dios so inkaruksa tan terorismo. (Salmo 11:5; Proverbio 6:16, 17) Tan sinimbawa na mangirerepresenta ed Dios ya si Jesus iray disipulo to nen kinmiwas iran maruksa. (Mateo 26:50-52) Anggaman ibabaga na arum ya gagawaen da ray maruksan panangataki parad ngaran na Dios, agbalot aabobonan na Dios itan ya gagawaen da. Diad tua et agto ingen dedengelen so pikakasi da.—Isaias 1:15.

Imamalasakit na Dios so amin ya maniirap, kaiba la ray biktima na terorismo. (Salmo 31:7; 1 Pedro 5:7) Ipapaamta met na Biblia ya onkiwas so Dios pian panampoten so inkaruksa.—Isaias 60:18.

Say lapuan na terorismo

Ipapaamta na Biblia so rason no akin ya nagagawa so terorismo: “Say too et uuleyan toy kapara ton too diad pankaugsan to.” (Eclesiastes 8:9) Nensaman la, uusaren na saray manuley so pakayari da pian pairapen iray totoo. Lapud satan, ombabawi iray napapairap diad panamegley na terorismo.—Eclesiastes 7:7.

Manampot lay terorismo

Imbaga na Dios ya ekalen toy takot tan inkaruksa tan pagmaliwen ton mareen so interon dalin. (Isaias 32:18; Miqueas 4:3, 4) Nia ray gawaen to:

Ekalen to so panlalapuan na terorismo. Salatan na Dios so gobierno na too tan say isalat to et say gobierno to. Atan lay manuley diad interon mundo. Si Jesu-Kristo so Manuley ed satan ya gobierno tan patas so pantrato to ed amin ya totoo, tan panampoten to so panamairap tan inkaruksa. (Salmo 72:2, 14) Diad satan ya panaon et anggapo lay manggaway terorismo. Saray totoo et “manliket iran maong ed agnaparaan a kareenan.”—Salmo 37:10, 11.
Ekalen toy amin ya epekto na terorismo. Ekalen na Dios so amin ya aliwliwan epekto na terorismo, balanglan diad pisikal odino emosyonal. (Isaias 65:17; Apocalipsis 21:3, 4) Imbaga to ni ingen ya bilayen to lamet iray inatey tan paolien to ra diad mareen ya dalin.—Juan 5:28, 29.

Ibabaga na Biblia iray maabig ya rason pian manisia tayon asingger lan onkiwas so Dios. Balet ompan nitepet mo, ‘Akin balet et agni panampoten na Dios so terorismo?’ Pian naamtaan so ebat, bantayan so video ya Akin et Aabuloyan na Dios so Paniirap?

a Ontutukoy so “terorismo” ed panggaway inkaruksa odino pangusar ed satan—lalo lad saray sibilyan—pian nataktakot iray totoo tan bilang resulta et walay nagawan pananguman ed politika, relihyon, odino ed panagbilay na saray totoo. Balet nanduruma so opinyon na totoo no kasin nibagan terorismo so sakey ya agawan inkaruksa.

Makatulong so Biblia ed saray apektado na terorismo

Walay duaran ibabaga na Biblia ya makatulong ed sika.

Manpikasi ed Dios.—Filipos 4:6, 7.
Manpokus ed ilalo ya manlalapud Biblia.—Hebreo 6:19.

Parad kaaruman nin tulong ya nibase ed Biblia, nengnengen so artikulon “No Panon ya Kontrolen so Panaburido.”

Atulongan met na saray kaagian da iray Tasi nen Jehova ya abiktima na terorismo. Niay duaran alimbawa:

Si Natalya tan say anak ton si Aslan ya manedad na siamera et walad eskuelaan diad Beslan, Russia nen biglan linmusob iray terorista tan masulok ya 1,000 so hinostage da. Makapaermen ta nilasus so inatey tan maslak ed sikara et ugugaw. Tua ya akaliktar si Natalya tan si Aslan, pero a-trauma iran maong. Amtaen no antoy akatulong ed sikara.
Si Pablo tan Sophie et inateyan na anak nen inataki na saray terorista so Twin Towers ed New York. Bantayan iyan video pian nanengneng no antoy akatulong ed sikara tan ed arum nin apektado na terorismo.