Panangipasal ed Gilead Diad Sankasantosan a Pananisia

“SARAY estudyante mi so nipasal a maong ed sankasantosan a pananisia.” Saraya so manangilukas a balikas ed programa na graduation na koma-95 a klase na Watchtower Bible School of Gilead, ya agawa ed Simba, Setyembre 12, 1993. Diad saman a kabuasan, saray 4,614 a naimbitaan a bisita tan membro na say pamilya na Bethel a nandaragup ed Jersey City Assembly Hall so nidaulo ed sakey a panangilukas a pikakasi nen George Gangas. Si Brother Gangas so membro na pamilya na Bethel ed loob la na 65 a taon tan diad edad a 97 et sikato so sankatatkenan a membro na Mananguley ya Ulop.

Si Albert Schroeder, membro met na Mananguley ya Ulop tan tserman ed programa, inkuanto: “Diad loob na limaran bulan say kurso na Gilead so nibase’d sankasantosan a pananisia.” Balet anto so “sankasantosan a pananisia”? Insalaysay to a sayan “sankasantosan a pananisia,” ya abitla ed Judas 20, so interon laknab na katuaan ed Biblia. Kanian say kurso na Gilead so nibabase’d Salita nen Jehova, say Biblia, a satan so manunan libron-panaralan.

Naawat na Saray Estudyante so Dakel nin Instruksion

Say inmunan espiker et si John Stuefloten na Watchtower Farms Commitee, a nansalita nipaakar ed teman “Mangungguna Manlapud Impluensya na Saray Makabat a Totoo.” Ibabaga na Biblia a saramay “miolop . . . ed saray makabat a totoo . . . [magmaliw a] makabat.” (Uliran 13:20) Legan na kurso ed Gilead, angusar iray estudyante na 900 ya oras ed panagaral na Biblia. Si Brother Stuefloten so tinmepet ed saray estudyante: “Panon a say impluensya nen Jehova so mangapekta ed arapen yo? Sikayo so onla ed 18 a bansa tekep na dagup na populasyon na 170 milyon a totoo. Kanian panon yon naimpluensyaan iratan a totoo?” Diad pangisindag na kakabatan nen Jehova, saray balon misionero so makayarin ontulong ed arum a magmaliw a managdayew nen Jehova, say Lapuan na daakan a kakabatan.

“Say Pagmaliw ya Amin a Bengatla ed Amin a Too” so tema na ontumbok a paliwawa, a tinibukel nen Lloyd Barry na Mananguley ya Ulop. (1 Corinto 9:22, King James Version) Ngalngali 45 a taon ed apalabas, si Brother Barry a mismo so sakey ya estudyante ed koma-11 a klase na Gilead. Natan say koma-95 a klase so mangaapresya ed pangaawat na praktikal a simbawa manlapud datin misionero a walaan na dakel a taon na eksperiensia ed sankailin dalin. Pinaseseg toray estudyante a mibagay a tampol ed saray totoo ed balon teritorya ra ed biek-taew diad pangamta ed lokal a kultora tan panaral ed dilin lenguahe ra diman. Imbaga to a nagawa iya diad panamegley na pilimog tan panumpal ed kimey na panarian ed lokal a totoo ontan met a diad panaral ed saray kustombre tan pangadapta ed saraya no kapiganman a matukoy.

Kayari to, si Dean Songer na Factory Committee so nanpaliwawa nipaakar ed makatenyeg-imanon tema a “Nibulos Manlapud Obligasyon.” Kayari na 35 a taon na sigpot-panaon a serbisyo, kabat nen Brother Songer no anto so labay ya ibaga na pambilay a walaan na pihon kalat, simplin bilay, a niyapasakey ed kanonotan so teokratikon kimey a kaukolan a gawaen, bulos manlapud kapagaan ed materyal a bengabengatla. Tan satan so segek na simbawa to ed saray estudyante. Saray kumakanta ed templo nen Jehova so nibulos manlapud saray obligasyon a gagawaen na arum a Levita pian sigpot a nitalaga ra so inkasikara ed nikadkaduman asainmin da. (1 Awaran 9:33) Mipadpara, saray misionero ed Gilead so nibulos manlapud ontan iran ordinaryon pamaakaran a singa say sekular a kimey ta pian sikaray niyapasakey ed espesyal a serbisyo ra. Sinampotan nen Brother Songer na onian simbawa: “Mansiansian akapuntirya so panmoria yo ed bilay tan say bilay yo so kaukolan a simpli. Say responsabilidad yo a singa ed saramay nibulos manlapud obligasyon et say panggawa ed inagew-agew tan nilabi-labin pangigalang ed si Jehova.”

Si Daniel Sydlik a sakey a membro na Mananguley ya Ulop so tinmumbok a nampaliwawa ed teman “Panbangat ed Arum No Panon a Nagamoran so Sankaabigan ed Bilay.” Pinaseseg toray estudyante no anto so nepeg dan gawaen pian say bilay da so mitunosan ed linawa na Dios.” Saray maong a managbangat so kaukolan a managyat tan mamakiwas. “Magmaliw a maisip a bangatan iray totoo a bayuboan daray Kristianon estandarte imbes ya ibangat lambengat iray totontonen tan regulasyon ed sikara.” Inkuanto tan intuloy to bilang konklusyon: “Manuna ed amin, pinablin agagi, bangatan yo so inkasikayo tan bangatan so arum no panon dan mangaro, ta satan so ayadyarin bedber na pankakasakey.”​—1 Corinto 13:1-3; Colosas 3:14.

Kayari limaran bulan na panangipasal, apabli na saray estudyante so duaran instruktor na Gilead. Si Jack Redford, sakey a datin misionero, so inmunan nansalita, ed teman “Duga so Pinili Yo.” Diad kadaanan a Judion mundo, sakbay a nagmaliw a Kristianon apostol, si Pablo so walaan na posisyon, galang, impluensya, tan kaligenan ed pinansyal. Balet diad Filipos 3:8, dineskribe nen Pablo iyan amin ya “andi kakanaan a dutak,” odino “basura,” unong ed patalos na Phillips. Say puso tayo so naynay a sinononot ed ministeryo, tan susto so pinili to. Diad kasuniyan, kaslakan ed katooan natan so mangipapanengneng ed saray pili ra ed bilay ya ipapasen daray materyal a kayarian da a mas mabalor nen say andi-anggaan a bilay. Susto so pinili na saray misionero ed Gilead. Sinampotan nen Jack Redford diad impangikuan: “Anggapo so niyopresi na mundo na Diablo ed sika no ipareng ed misioneron serbisyo. Asikasoen itan ya anggapoy-kaparan pribilihyo, tan abuloyan so mundo a mangasikaso ed dilin basura to!”

Diad apalabas a 32 a taon, si Ulysses Glass so nagmaliw a sakey ya instruktor ed Gilead. Angiter ed saray estudyante na pigaran kasampotan a simbawa ed teman “Say Dios Lambengat so Makapanggawa na Kiew,” ya ibabase to so paliwawa to ed Salmo 1:3. Say modernon teknolohiya so agbalot tinmalona a mangalig ed inkagawa na sakey a kiew, a dinisenyo na Dios. Diad sakey a pantalos, saray tuan Kristianos so singa ra kiew, intanem tan sinalog nen Jehova. Sinalambit nen Brother Glass a diad loob na limay bulan, saray estudyante so “maparanay a nasasalog manlapud subok na mangiter-bilay a danum na Salita’y Dios,” singa saray kiew diad espiritual a tanamanan odino paraiso. Ingen, bilang misionero, nepeg dan bantayan so “espiritual iran lamot da pian naalwaran manlapud antokaman a pakaderal.” Sikaray sinimbawa a ‘mantultuloy ya oninum ed danum na bilay manlapud si Jehova lapud say Dios lambengat so makapanggawa na kiew.”

Say unor a paliwawa so inter nen Carey Barber, sakey a membro na Mananguley ya Ulop. Kayari na 70 a taon na sigpot-panaon a serbisyo, si Brother Barber so sitatalek a makapansalita nipaakar ed teman “Iter ed si Jehova so Nikabkabiig a Debosyon.” Say baleg a kabiangan na katooan so ag-angiter na nikabkabiig a debosyon ed si Jehova. (Deuteronomio 5:9) Anggaman ontan, singa impanengneng nen Brother Barber, anggaman sikatayo so ag-ayadyari, “nayarian tayon sigpot a makapangitalaga ed Dios.” Inyarum to: “Anggapo so talagan makapangibaga: ‘Say Diablo so anagdag ed siak a manggawa na saya.’” Balet taloen itayo na Diablo no sikato so agtayo sumpaen. (Santiago 4:7) Say pansiansian okupado ed kimey nen Jehova so manunan paraan a sumpaen si Satanas tan say mundo to tan iter ed si Jehova so nikabkabiig a debosyon.

Aturo Bilang Misionero

Asumpal so programa ed kabuasan diad opisyal ya inkaturo na amin a 46 ya estudyante bilang misionero. Saray 23 sanasawa so angawat na saray diploma a mangibabaga ed kabiangan to a sikaray nangraduar a “walaan na nikadkaduman kualipikasyon a manumpal ed kimey a panagbangat, mangiyaalibansa na maong-a-linawa tan mankikimey ed biang na permanentin kareenan tan ganggan na ayadyarin uksoy na inkatunong ed limog na amin a totoo.” Say koma-95 a klase na Gilead so maseguron manbabanikel a manumpal ed sayan maabig a kimey diad 18 a bansa ya akaasainan da. Saray asainmin so onlaknab ed mundo tan ontan met ed saray bansa ed Asia, Aprika, Europa, Latin Amerika, tan ed Caribbean.

Diad ngarem, kayari na apatikey a Panagaral na Panag-Bantayan ya inkondukta nen Charles Woody na say Service Department Committee, saray balon nangraduar ed Gilead so angiparungtal ed programa, ed say teman “Imparaan Kami na say Gilead a Manbangat Bilang Misionero.” Say sesyon so anampot ed sakey a drama, “Saray Panpilian a Walad Arapan Mi.”

Kayari na sayan makapasagyat a programa, saray misionero so akaparaan la natan a nibaki ed apatiran suyok na dalin pian ipanabang ed arum so “sankasantosan a pananisia.”