For di Nos Lectornan

Petrolio Mi kier a djis expresa mi gratitud pa e serie di articulo di 8 di november 2003, “Petrolio—Lo Caba un Dia?” Nunca prome mi no a mira e estadisticanan spantoso cu boso a cita relaciona cu deramenan petrolero. Mirando e cosnan aki cu hende ta haci, no ta straño cu e tera ta den asina un mal estado! Esaki ta pone mi anhela e tempo den futuro ora cu Yehova lo limpia tur cos di unabes pa semper y transforma e tera den un paradijs!

T. T., Merca

E articulonan a keda presenta den un manera masha atractivo y sin prehuicio. Aunke mi tin mi doctorado di fisica den proceso di ingenieria, nunca mi a tende di e teoria abiogenico di origen di petrolio. Por lo general scolnan ta siña bo solamente e teoria biogenico, esta, cu petrolio ta e producto di putrimento di materialnan biologico.

E. B., Francia

Mi ta bai un universidad tecnico y mi tin masha problema pa haya bukinan di instruccion cu ta uza diagram pa splica mecanismonan di mashin. Ta pesei mi a keda impresiona cu e diagram cu ta mustra con nan ta produci petrolio. Esei a yuda haci e articulo facil pa compronde.

M. I., Japon

Eigenlijk boso mester a haci un investigacion mas cabal pa boso serie di articulo. Boso no a menciona cu ta James Miller Williams a coba e prome pos di petrolio comercial di Norte America na Ontario, Canada. El a haci esei un aña prome cu Edwin Drake a coba su pos na Titusville, Pennsylvania, Merca.

G. Y., Canada

“Spierta!” ta contesta: Tin bastante debate riba e asunto aki. Un geologo di petrolio cu a skirbi tocante e historia di petrolio a bisa “Spierta!” cu tin hopi controversia relaciona cu e sitio di e prome pos. “The Canadian Encyclopedia” pues ta resumie asin’aki: “Tanto Williams como E. L. Drake di Pennsylvania ta pretende di a bora e prome pos di petrolio na Norte America.”

Desaster di Mississippi Mi a keda geshock pa e articulo “Tempo Cu e Riu A Core Contrario.” (8 di december 2003) El a pone mi realisa con poderoso naturalesa ta y con impotente hende ta ora e hay’e confronta cu calamidad. Boso articulo a fortalece mi determinacion pa confia den Bijbel.

M. J., Mauritania

Aunke e susesonan describi a tuma luga casi 200 aña pasa, mi a sinti como si fuera ta un hende cu a mira e acontecementonan tawata describi nan. Segun cu mi tawata lesa e articulo, mi a sinti como si fuera mi tawata einan, ta tambalia door di e furia di e awa. Ansiosamente mi a lesa cada paragraf.

V. R., Rusia

Famianan Incredulo Danki pa e articulo “E Punto di Bista Biblico: Ora Bo Sernan Keri No Tin e Mesun Religion Cu Bo.” (8 di november 2003) Como e unico cristian den un famia di seis yiu, mi tin añanan ta lucha pa ta balansa den e manera cu mi ta trata cu e situacion aki. E textonan biblico den e articulo aki tawata manera rayo di lus briyante!

R. G., Merca

Mi no tin hopi tempo cu mi a cuminsa studia Bijbel. Pero e tiki cu mi sa, mi ta purba compartie cu mi sernan keri, cu no ta creyente. Como cu mi tin 16 aña so, mi famia no ta permiti mi batisa, pero mi ta spera di hacie un dia. E articulo aki lo yuda mi trata cu mi famia.

J. G., Merca