Haci Jehova Su Nomber i Su Tratonan Conocí
1 “Gradicí Jehova, inbocá su nomber, haci su tratonan conocí entre e pueblonan. . . . Laga e curason di esnan cu ta busca Jehova alegrá.” (Sal. 105:1, 3) E salmista cu a skirbi e palabranan ei a haña gran goso personal den conta otro hende tocante Jehova i su “tratonan.” Ki tratonan? Sin duda Dios su tratonan asociá cu su glorioso reinado i cu “e bon nobo di salbacion dor di dje.”—Sal. 96:2, 3; 145:11, 12.
2 Segun cu nos ta acercá e temporada di Memorial 2001, nos tin hopi motibu pa alegrá relacioná cu e manera cu Jehova ta trata nos. Con asina? E Cena di Señor ta indiscutiblemente e celebracion mas grandi di aña pa tur cristian berdadero. No tin ningun otro ocasion manera dje pa loke ta importancia, propósito of procedura. Esaki ta un temporada pa nos tur corda loke Jehova i Jesus a haci pa percurá e medio pa nos salbacion. No ta straño anto cu durante e temporada di Memorial, di mes nos ta verwagt di mira un aumento di actividad den sirbishi di veld, segun cu nos ta haci “e bon nobo di salbacion” conocí!
3 Abo Lo Traha Pionero Auxiliar? April aña pasá e islanan ABC tabatin un cantidad record di 389 pionero auxiliar. Nos por haci mart cu april dje aña aki lunanan special di mayor actividad den e ministerio? Mart tin cincu diasabra, i april tin cincu diadomingo. Dor di planea pa traha henter dia den sirbishi durante fin di siman, hopi publicadó cu ta traha full-time a nota cu e trabou di pionero auxiliar ta na nan alcanse. Pa yega na e rekisito di 50 ora pa luna, un pionero auxiliar tin cu traha un promedio di 12 ora pa siman den sirbishi. Considerá cuidadosamente e orarionan sugerí den e cuadro na página 4. Un di nan ta pas cu bo circunstancia? Si no ta asina, podisé bo por traha bo mes orario pa sirbi como pionero auxiliar e lunanan di mart cu april aki.
4 For di awor e ancianonan mester cuminsá crea entusiasmo i apoyo pa mayor actividad di sirbishi. Aña pasá den un congregacion caminda tur anciano i sirbidó ministerial a inscribí como pionero auxiliar, 64 dje 121 publicadónan a traha pionero na april! Tambe e congregacion tabata contentu di mira seis publicadó no-bautisá cuminsá raportá na mart cu april. En berdad no tin mihó tempu pa mucha i esnan nobo puntra e ancianonan si nan ta cualificá pa cuminsá participá den e actividad di testificacion público.
5 Esfuerso Extra Ta Trece Bendicion: Congregacionnan cu ta pone metanan special i cu ta haci extra esfuerso, ta disfrutá di hopi bendicion. Tin congregacion cu por duna énfasis special na cubri teritorio poco trahá, na concentrá riba otro formanan di duna testificacion of na resaltá testificacion via telefon, cua ta un medio eficas pa haña contacto cu esnan no-na-cas i cu habitantenan cu no ta accesibel.
6 E echo cu un hende su salú no ta bon of e ta hende di edad mester previnié necesariamente di ta enbolbí mas tantu posibel den sirbishi? No den tur caso. Por ehempel, un ruman muher di 86 aña cu tin cancer a traha pionero na april apesar cu su pia tabata hinchá. Testificacion via telefon a haci posibel pa e tin un pleno participacion den sirbishi, i asina aumentá su alabansa na Jehova. Esaki a stimulá tantu e mes como e congregacion.
7 Prepará Bon pa Memorial: E aña aki Memorial ta cai dia 8 di april. Como cu ta un diadomingo, lo mester ta posibel pa mas hende asistí. Nos por tin e asistencia mas grandi cu nunca si nos haci nos parti dor di (1) nos mes ta presente i (2) invitá otro hende pa ta huntu cu nos na Memorial. Ken nos mester invitá?
8 Pasa dor di bo registro personal di sirbishi di veld pa haña nomber di hende cu a mustra algu di interes den e berdad, maske bo no ta bishitá nan cu regularidad. Dos of tres siman promé cu Memorial, concentrá riba bishitá tur e hendenan aki cu e invitacion pa Memorial. Si bo circunstancia ta permití, ofrecé transport na esnan cu tin gana di bini.
9 Den algun congregacion, e publicadónan no ta parti tur e invitacionnan di Memorial. E secretarionan di congregacion mester haci sigur cu e invitacionnan ta disponibel suficiente tempu di antemano pa asina por parti tur. Kisas abo kier tik of skirbi nèchi cu blokletter e ora i lugá di Memorial na e parti abou dje invitacion. Of kisas bo ta pone un pamfleta acerca cu ta mustra e adres dje Salon di Reino, si ta einan boso lo tene e Memorial. Como un recordatorio, den mayoria caso mester entregá e invitacion di Memorial na e doño di cas personalmente.
10 Corda Riba Esnan Inactivo: Ta un goso ora un studiante di Bijbel dedicá su mes na Jehova i simbolisá esaki mediante bautismo bou di awa. Sin embargo, tur aña algun ruman den nos seno ta stop di asociá cu nos, i nan ta stop di conta otro hende tocante e nomber di Jehova i di su tratonan. Nos tin bon motibu pa preocupá. Aunke mayoria persona inactivo no a bandoná e berdad, nan a stop di predicá kisas debí na desanimacion, problemanan personal of otro ansiedadnan di bida. (Mat. 13:20-22) Esnan cu ta den un condicion spiritualmente swak tin mester di yudansa pa bolbe n’e congregacion promé cu e sistema di Satanas guli nan. (1 Ped. 5:8) E temporada di Memorial aki nos kier haci un esfuerso special pa yuda tur esnan inactivo cu ta cualificá, pa nan bolbe cuminsá predicá e bon nobo.
11 E secretario di congregacion mester alertá e conductornan di studio di buki di cualkier publicadó den nan grupo cu ta inactivo. E Comité di Sirbishi di Congregacion lo hiba delantera den haci areglo pa pastoreá tur esnan inactivo. Si nan determiná cu e persona lo beneficiá di un studio bíblico personal, e superintendente di sirbishi lo haci areglo pa esei, despues di consultá cu e otro miembronan dje comité di sirbishi en cuanto ken ta esun mas indicá pa conducí e studio. Aunke kisas no ta necesario pa tene e studio pa un periodo prolongá di tempu, esun asigná pa conducié por raportá e ora, rebishita i studio di Bijbel.
12 Aña pasá april, un ruman muher cu tabata trahando di cas pa cas a ofrecé revista na un homber hóben riba caya. E homber a bis’é cu su señora tabata un Testigo inactivo. El a puntra unda e Salon di Reino ta keda i a invitá e ruman muher pa bishitá e cu su casá. Como resultado, e parehá a asistí na e siguiente reunion i a aceptá un studio di Bijbel.
13 Prepará pa Mayor Actividad! E salmista cu a declará cu nos mester haci Jehova su nomber i su tratonan conocí, a agregá: “Canta na dje, haci melodia na dje, interesá boso mes intensamente den tur su obranan maraviyoso. Broma den su nomber santu.” (Sal. 105:2, 3) Laga nos demostrá nos interes intenso den Jehova su gran nomber i su “obranan maraviyoso” dor di aumentá nos esfuerso den e ministerio, haciendo e temporada aki di Memorial esun mas grandi cu nunca!
[Box on page 4]
Vários Manera pa Programá 12 Ora pa Siman pa Traha Pionero Auxiliar
Dia Ora
Dialuna 1 2 − −
Diamars 1 − 3 −
Diarason 1 2 − 5
Diahuebs 1 − 3 −
Diabierne 1 2 − −
Diasabra 5 4 3 5
Diadomingo 2 2 3 2
Total: 12 12 12 12
Un dje orarionan aki lo funcioná pa bo? Si no, pakico no traha bo mes orario?