E Dunador di “Tur Bon Regalo”
“Na un ocasion e dominee dje religion gereformeerde a bishitámi. El a puntra con mi a maneha mi religion. Mi a bisé: . . . ‘Nos no ta paga salario; no tin nada pa haci hende pleita. Nos nunca ta pasa colecta.’ El a puntra: “‘Con bo ta haya placa?’ “Mi a contestá, ‘Awor, Dr.——, si mi ta bisábo loke ta e berdad di mas senciyo, bo casi no por keré. Ora hende ta bira interesá den e camina aki, nan no ta haya colecta pasá bao di nan nanishi. Pero nan ta mira cu tin gasto. Nan ta bisa den nan mes, “E sala aki ta costa algo. . . . Con mi por contribui un poco placa ne movimento aki?”’ “El a wak mi como si el a pensa ‘Bo ta kere cu mi ta un bobo?’ “Mi a bisa, “Awor, Dr.——, mi ta bisábo e berdad senciyo. . . . Ora un hende ta recibi un bendicion i tin recurso material, e kier usé pa Señor. Si e no tin recurso, pakico nos mester pone presion riba dje?’”
—Charles T. Russell, e promé presidente dje Sociedad Watch Tower, “E Toren di Vigilancia” di 15 di Juli di 1915.
NOS ta duna pasobra Jehova Dios tabata e promé cu a duna. Su dunamento a cuminza siglonan incontable den pasado cu e creacion—cu net su promé creacion, su “Yiu unigénito.” (Juan 3:16) Den su amor, el a duna e don di bida na otronan.
E Yiu di Dios, Jesucristo, ta e don mayor cu Jehova a dúnanos. Pero di su mes, e Yiu di Dios no ta e fin dje dunamento di Dios. E “sublime bondad inmerecida di Dios” ta loke apóstol Pablo a yama e “don gratis inexplicable” di Jehova. (2 Corintio 9:14, 15) E don evidentemente ta inclui e total completo di tur e gentileza i bondad amoroso cu Dios ta extende na su pueblo mediante Jesús. Tal bondad amoroso ta asina maraviyoso cu e ta sobrepasá e potencia humano di detayá of expresá. Sin embargo, tin otro aspecto dje dunamento di Dios.
Leu den pasado, un rey a reconoce sabia i humildemente cu cualkier cos bon cu el a duna como regalo realmente a pertenece na Jehova Dios. El a bisa: “Pasobra tur cos den cielo i riba tera ta di bo. E reino ta di bo, O Jehova, Esun cu també ta halza bo mes como cabez riba tur. . . . I sin embargo, ken ta ami i ken ta mi pueblo, pa nos retene e poder pa haci ofrenda boluntario manera esaki? Pasobra tur cos ta bini di bo, i for di bo mes man nos a dunábo.”—1 Crónica 29:11-14.
Ehempel di Dios
Santiago, un disípel di Jesucristo, tabata sa cu Jehova Dios ta e fuente di tur loke ta bon den tur aspecto. Solamente regalo perfecto ta bini di dje. Santiago a skirbi: “Tur bon regalo i tur don perfecto ta djariba, pasobra e ta baha dje Tata di luz celestial, i cuné no tin variacion di biramento di sombra.”—Santiago 1:17.
Asta den e asunto di dunamento di regalo, Santiago a mira e diferencia grandi entre Dios i hende. Hende por duna bon regalo pero no ta haci esei cada bez. Tal regalo por nace di un motibo egoísta, of nan por ta usá pa tenta hende pa haci algo malu. No tin variacion den Jehova Dios; e no ta cambia. Pues, calidad di regalo di dje no ta cambia. Nan ta semper puro. Nan semper ta promove e bienestar i felicidad di humanidad. Nan ta semper bondadoso i útil, nunca destructivo.
E motibo pa duna regalo
Den e tempo di Santiago, lider religioso popular a practica e dunamento di regalo pa hende míranan. Nan a duna riba base di un mal motibo. Ansioso pa recibi aplauso di hende, nan a compromete nan norma husto. Pero, hende cristian tin cu ser diferente. Jesús a consehánan: “Ora bo bai pa duna regalo di misericordia, no toca trompet dilanti bo, mescos cu hipócrita ta haci den sinagoga i na caya, pa hende glorificánan. En berdad mi ta bisa boso, Nan ta disfruta di nan recompensa completo caba. Ma abo, ora bo duna regalo di misericordia, no laga bo man robez sa loke bo man drechi ta haci, pa bo regalo di misericordia sea den secreto; anto bo Tata cu ta mira den secreto lo pagábo.”—Mateo 6:2-4.
Un motibo pa hende cristian duna regalo ta di yuda otronan satisface un necesidad of pa hácinan feliz of pa promove e adoracion berdadero. Nan no ta hacié pa glorifica nan mes. En todo caso, e wowo di Jehova Dios por penetra den e rincón di mas profundo di nos curazón. E por mira e motibo di mas íntimo tras di nos regalo di misericordia.
Testigo di Jehova ta haci esfuerzo pa sigi ehempel di Jehova Dios i di su Yiu den e dunamento di regalo. Nan ta duna loke nan tin. Nan tin e bon nobo di Reino, i nan ta duna esei pe bendicion di otro hende. Nan sa cu Proverbio 3:9 ta bisa: “Onra Jehova cu bo cosnan balioso i cu e promé fruta di tur bo producto.” Pa motibo cu tur sucursal dje Sociedad Watch Tower, tur congregacion, i tur hende individual ta purba sinceramente pa contribui ne bienestar di tur hende, tur e hermandad ta ser hací fuerte i próspero spiritualmente. Prosperidad material no ta resulta den prosperidad spiritual, pero prosperidad spiritual sí ta resulta den suficiente prosperidad material pa satisface e necesidad dje trabao di Jehova Dios.
Manera pa comparti
Tin hopi manera pa tur hende contribui personalmente pa apoya e bon nobo. Un manera ta en cuanto Salón di Reino. Tur miembro dje congregacion ta usa e Salón di Reino. Hende a percura fondo pa su construccion of huur, luz, control di temperatura, i mantenecion. Siendo cu ta necesario pa tur hende apoya e congregacion, tin caha di contribucion den Salón di Reino, i donacion boluntario recibí ta ser usá pa paga gasto dje congregacion. For dje sobrá, nan por haci contribucion ne sucursal local dje Sociedad Watch tower, conforme cu decision dje congregacion.
Contribucion por ta duná ne sucursal mes dje Sociedad pa entrená i mantené misionero i pionero special den parti di mundo unda e bon nobo no a alcanza e pueblo en general. Otro gasto den plamamento dje bon nobo ta en relacion cu e trabao di superintendente biahero. Apóstol Pablo, cu a pone ehempel den e trabao di biahamento den e promé siglo, a encomenda e congregacion den Filipos: “Boso a manda algo pa mi un biaha i també dos biaha pa mi necesidad.” (Filipense 4:14-16) Además di gasto di tal rasgo dje sirbishi di tempo completo, locual tur sucursal tin, tin e mantenecion di cada cas di Betel i di esnan cu ta biba i ta traha ei. E skirbimento i drukmento di literatura cu ta contene e bonita mensahe dje bon nobo ta berdaderamente privilegio cu Dios ta duna, pero distribucion di literatura també ta necesario, i ta ocasioná gasto. També tin e gasto di asamblea chikito i grandi, sin menciona caso dilanti raad cu tin cu ser pleitá pa ‘defende i legalmente establece e bon nobo.’—Filipense 1:7.
E tempo cu cada sirbidor di Jehova Dios ta dedica na predicacion dje bon nobo ta boluntario, i també nan contribucion di fondo material. Apóstol Pablo a conseha e apartamento regular di placa pa ser usá pa apoya e expansion dje adoracion berdadero. “Awor, en cuanto e coleccion cu ta pe santonan, . . . e promé dia di tur siman laga cada un di boso den su mes cas pone algo un banda en reserva segun cu e ta prospera.”—1 Corintio 16:1, 2.
Ora hende ta haci donacion, nan no sa exactamente con esei lo ser usá, pero nan ta mira e resultado den expansion di predicacion dje Reino. Informe den e Anuario de los Testigos de Jehová de 1993 ta mustra cu e bon nobo di Reino ta ser predicá den mas cu 200 país i isla di lamá mediante mas cu 4.500.000 predicador cristian. Tal informe ta alegrá e curazón. Cualkier regalo, anto, apesar dje suma, ta yuda plama e bon nobo mundialmente.
E trabao ta ser financiá door di contribucion combiná di tur. Algun por contribui mas cu otro, locual ta yuda e trabao di predica mas tanto. Otronan ta duna menos. Pero, esnan cu ta haci donacion modesto no tin cu sinti bergüenza ni kere cu nan contribucion ta mucho insignificante. Jehova Dios siguramente no ta kere esei. Jesús a haci esei basta claro ora el a mustra cuanto Jehova Dios a aprecia e contribucion chikito dje biuda. “Anto el a mira un cierto biuda den necesidad tira ei dos cen di mashá poco balor, i el a bisa: ‘Mi ta bisa boso berdaderamente, E biuda, aunque pober, a tira mas cu nan tur. Pasobra tur eseinan a tira regalo di nan abundancia, pero e biuda den su necesidad a tira tur e medio di biba cu e tabatin.’”—Lucas 21:2-4.
Sea loke sea nos situacion financiero, nos por duna di manera cu ta agrada Jehova Dios. E salmista a wel resumi con nos por duna gloria na nos Rey i Huez. El a bisa: “Atribui na Jehova e gloria cu ta pertenece na su nomber; hiba regalo i drenta den su curá.” (Salmo 96:8) P’sei, nos por imita ehempel amoroso di nos Tata celestial cu nos dunamento alegre di regalo pasobra el a dúna na nos promé.
[Box on page 30]
CON ALGUN HENDE TA HACI DONACION PE TRABAO DI PREDICA E REINO
◻ CONTRIBUCION PE TRABAO MUNDIAL: Hopi hende ta apartá of ta presupuestá un suma cu nan ta pone den e caha di contribucion marcá: “Contribucion pe trabao mundial dje Sociedad—Mateo 24:14.” Tur luna e congregacion ta manda e suma sea pe centro mundial den Brooklyn, New York, of ne oficina di sucursal mas cerca.
◻ REGALO: Donacion boluntario di placa por ta mandá directamente na Watch Tower Bible and Tract Society of Pennsylvania, 25 Columbia Heights, Brooklyn, New York 11201, of ne oficina di sucursal local dje Sociedad. Hoyas of otro cos di balor també por ta contribuí. Un carta breve bisando cu esei ta un regalo incondicional mester ta incluí cu tal contribucion.
◻ DONACION CONDICIONAL: Placa por ta duná ne Sociedad Watch Tower pa nan usé den confianza te ne morto dje dunador, cu e provision di cu en caso di necesidad personal, e Sociedad lo debolbele ne dunador.
◻ SEGURO: E Sociedad Watch Tower por ta nombrá como beneficiario di póliza di seguro di bida of plan di pension of hubilacion. E Sociedad mester ta informá di arreglo asina.
◻ CUENTA DI BANCO: Bo por laga en fideicomiso of pagadero pe Sociedad Watch Tower en caso di morto cuenta bancaria, certificado di depósito of cuenta personal di hubilacion, segun requisito bancario dje país. En caso bo ta haci esei, bo mester informa e Sociedad dje arreglo.
◻ ACCION I BONO: Bo por regala accion i bono ne Scoiedad Watch Tower sea como regalo incondicional of cu e condicion cu bo ta sigi recibi entrada foi dje.
◻ PROPIEDAD: Propiedad bendibel por ta contribuí ne Sociedad Watch Tower sea como regalo incondicional of cu e condicion di cu e doño por sigi biba ei durante su bida. Bo mester haci contacto cu e Sociedad promé cu bo ta regalé cualkier propiedad.
◻ TESTAMENT I FIDEICOMISO: Bo por nombra e Watch Tower Bible and Tract Society of Pennsylvania bo heredero den un testament legal, of e Sociedad por ta nombrá como beneficiario di un acuerdo fideicomisario. Fideicomiso cu tin como beneficiario un organizacion religioso por percura cierto bentaha en relacion cu belasting. Un copia dje testament of dje fideicomiso mester ta mandá ne Sociedad.
Pa mas informacion tocante tal asunto, skirbi Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, of e sucursal local dje Sociedad.
[Picture on page 31]
E manera cu bo donacion ta usá:
1. Trahador boluntario den Betel
2. Construccion di oficina di sucursal
3. Auxilio durante desaster
4. Salón di Reino
5. Misionero