“Onra Jehova cu Bo Cosnan Balioso”—Con?

“ONRA Jehova cu bo cosnan balioso i cu e promé frutanan di tur bo productonan.” E palabranan inspirá aki di sabiduria, skirbí rond di 2.600 aña pasá, ta contené e clave pa experenciá Jehova su bendicionnan na abundancia, pasobra e escritor ta sigui bisando: “E ora ei bo mangasinanan di suministro lo ta yená cu abundancia; i bo propio bakinan di pers biña lo basha over cu biña nobo.”—Proverbionan 3:9, 10.

Pero kico kier men onra Dios? Kico ta e cosnan balioso cu cua nos ta onra Jehova? I con nos por haci esaki?

“Onra Jehova”

Den e Scritura, e palabra hebreo principal pa onor, ka·vohdhʹ, ta nificá literalmente “pisá.” P’esei onra un persona ta nificá consider’é como di peso, impresionante of di balor. Un otro palabra hebreo pa onor, yeqarʹ, ta ser traducí tambe como “precioso” i “cosnan precioso.” Di igual manera, e palabra griego ti·meʹ, traducí “onor” den Bijbel, ta transmití e sentido di aprecio, balor, preciosidad. Pues bo ta onra un otro persona dor di mustra e persona ei respet profundo i aprecio.

Duna onor tin un otro aspecto tambe. Considerá e relato tocante e fiel hudiu Mardokeo, kende na un ocasion a exponé un complot contra bida di Rey Asuero di Persia di antigwedad. Mas despues, ora e rey a haña sa cu nada no a ser hací pa onra Mardokeo pa e acto ei, el a puntra su promé minister, Haman, con ta e mihó manera pa onra esun den ken e rey a haña deleite. Haman a kere cu un onor asina lo tabata p’e, pero ki ekibocá e tabata! Di tur manera, Haman a bisa cu mester a bisti un persona asina cu “trahe real” i e mester a core “un cabai riba cua e rey ta core.” El a concluí: “Nan mester pon’é core riba e cabai den e plasa público dje stad, i nan mester proclamá dilanti dje: ‘Asina ta haci cu e homber den ken su onor e rey mes a haña deleite.’” (Ester 6:1-9) Den e caso aki, duna onor na un persona a incluí exalt’é públicamente di manera cu henter e pueblo por a apreci’é mashá.

Di igual manera, duna onor na Jehova tin dos aspecto: mustr’é respet haltu personalmente i exalt’é públicamente dor di participá den i apoyá e obra di proclamacion público di su nomber.

“Bo Cosnan Balioso”—Kico Nan Ta?

Entre nos cosnan balioso siguramente nos tin nos bida, nos tempu, nos talentonan i nos fortalesa. Kico di nos posesionnan material? Considerá e palabranan di Jesus ora el a mira un biuda den necesidad tira dos moneda chikitu di poco balor den e caha di placa dje tempel. El a bisa: “E biuda aki, aunke pober, a tira mas cu nan tur. Pasobra tur esakinan [otronan cu a contribuí] a tira regalo for di loke nan tabatin di mas, pero e muher aki for di su necesidad a tira tur e medio di biba cu e tabatin.” (Lucas 21:1-4) Jesus a elogiá e biuda aki pa a usa su posesionnan material pa promové e adoracion di Jehova.

Claramente anto, entre e cosnan balioso cu Sálomon a mencioná tin tambe cualkier posesion material cu nos por tin. I e expresion “e promé frutanan di tur bo productonan” ta transmití e idea di duna lo mihó di tur nos cosnan balioso na Jehova.

Sin embargo, con dunamentu di cosnan material ta onra Dios? Tur cos no ta pertenecé na dje caba? (Salmo 50:10; 95:3-5) “Tur cos ta bini di bo,” Rey David a reconocé den un oracion sincero na Jehova. I relacioná cu un donacion grandi cu e i su pueblo a haci p’e construccion dje tempel, David a bisa: “For di bo mes man nos a duná bo.” (1 Crónicanan 29:14) P’esei ora nos ta ofrecé regalo na Jehova, nos ta solamente dun’é bek loke e, for dje bondad di su curason, a duna nos. (1 Corintionan 4:7) Pero, manera a ser mencioná anteriormente, onra Jehova ta nificá tambe exalt’é den bista di otro hende. I regalonan material cu ta ser usá p’e adelanto di adoracion berdadero ta onra Dios. Bijbel ta contené ehempelnan excelente dje manera aki di onra Jehova.

Ehempelnan di Pasado

Rond di 3.500 aña pasá, ora e tempu a yega pa Jehova percurá e tabernáculo den e desierto como un lugá di adoracion p’e israelitanan, a lanta e necesidad pa un variedad di artículonan precioso cu e diseño divino a exigí. Jehova a manda Moises pa ‘laga tur persona di curason dispuesto trece un contribucion pa Jehova.’ (Exodo 35:5) E relato ta sigui bisa: “Nan a bini, tur hende kende su curason a impuls’é, i nan a trece, tur hende kende su spiritu a incit’é, e contribucion di Jehova pa e obra dje tent di reunion i pa tur su sirbishi i p’e pañanan santu.” (Exodo 35:21) Eigenlijk, nan ofrenda boluntario a resultá di ta muchu mas di loke tabata necesario p’e obra te cu mester a “restringí e pueblo di trec’é aden”!—Exodo 36:5, 6.

Considerá un otro ehempel. Ora e tabernáculo a sirbi su propósito i preparacionnan tabata na caminda p’e construccion dje tempel, David a haci un contribucion personal grandi pa cu e tempel cu su yu Sálomon lo a construí. Tambe el a emití un yamada pa otronan uni den esaki, i e pueblo a respondé cu regalonan di cosnan balioso pa Jehova. E plata i oro so tabata bal rond di 50 mil miyon dollar na balor actual. “I e pueblo a entregá na alegria dor di a haci ofrendanan boluntario.”—1 Crónicanan 29:3-9; 2 Crónicanan 5:1.

“Ofrendanan Boluntario” den Nos Tempu

Con nos tambe por tin e goso di haci ofrenda boluntario den nos tempu? E trabou mas importante cu ta tumando lugá na mundu actualmente ta esun di predicá e Reino i haci disipel. (Mateo 24:14; 28:19, 20; Echonan 1:8) I Jehova a haña ta bon pa encargá e interesnan terenal dje Reino na su Testigonan.—Isaías 43:10.

Ta obvio cu placa ta necesario pa financiá e trabou cu Testigonan di Jehova ta haciendo awe. Pa construí i mantené Salonnan di Reino, Salonnan di Asamblea, oficinanan di sucursal, fábricanan i casnan di Betel ta enbolbé placa. Tambe tin gastu enbolbí pa publicá i distribuí Bijbel i publicacionnan basá riba Bijbel na vários idioma. Con e gastunan di organisacion ei ta ser financiá? Mediante contribucionnan cu ta estrictamente boluntario!

Mayoria dje contribucionnan ta bini di individuonan cu—mescos cu e biuda cu Jesus a observá—tin solamente poco recurso. Nan no kier perde e oportunidad aki di onra Jehova, p’esei nan ta contribuí sumanan modesto “segun loke nan berdaderamente por,” i, tin biaha, asta “mas ayá di loke nan berdaderamente por.”—2 Corintionan 8:3, 4.

Apostel Pablo a bisa e cristiannan na Corinto: “Laga cada un haci net manera el a determiná den su curason, no di mala gana ni bou di obligacion, pasobra Dios ta stima un dunadó alegre.” (2 Corintionan 9:7) Dunamentu alegre ta exigí bon planeamentu. Pablo a bisa e corintionan: “Tur promé dia di siman laga cada un di boso den su mes cas pone algu un banda den reserva segun cu e ta prosperando, pa ora mi yega, boso no haci colecta e ora ei.” (1 Corintionan 16:2) Mescos, na un manera privá i boluntario, esnan cu ta deseá di haci donacion pa adelantá e obra di Reino awe por pone algu di nan entrada un banda p’e propósito ei.

Jehova Ta Bendicioná Esnan Cu Ta Onr’é

Aunke prosperidad material riba su mes no ta hiba na prosperidad spiritual, ora nos ta usa nos cosnan balioso generosamente—nos tempu, nos forsa i nos recursonan material—pa onra Jehova, nos ta haña bendicionnan ricu. Esaki ta asina pasobra Dios, na ken tur cos ta pertenecé, ta duna nos e siguransa: “E alma generoso mes lo ser hací gordo, i esun cu ta muha otronan libremente, e mes tambe lo ser muhá libremente.”—Proverbionan 11:25.

Despues dje morto di Rey David, su yu Sálomon a usa e contribucionnan boluntario cu su tata a colectá pa construí un tempel glorioso, manera Jehova a instruí. I tanten cu Sálomon a keda fiel den su adoracion na Dios, “Huda i Israel a sigui biba den siguridad . . . for di Dan te Beer-seba, tur e dianan di Sálomon.” (1 Reynan 4:25) Mangasinanan tabata yen, tinashinan di biña tabata pasa over—tanten cu Israel ‘a onra Jehova cu nan cosnan balioso.’

Mas despues, mediante profeta Malakías, Jehova a bisa: “‘Probá mi, por fabor, en cuanto esaki,’ Jehova di ehércitonan a bisa, ‘si mi no ta habri pa boso e portanan di shelu i realmente basha riba boso un bendicion te ora no tin mas necesidad.’” (Malakías 3:10) E prosperidad spiritual cu Jehova su sirbidónan ta disfrutá di dje awe ta evidencia cu Dios a cumpli cu su promesa.

Jehova siguramente ta keda contentu ora nos ta haci nos parti den adelantá e interesnan di Reino. (Hebreonan 13:15, 16) I e ta primintí di sostené nos si nos ta ‘sigui busca promé e reino i su husticia.’ (Mateo 6:33) Cu gran alegria di curason, laga nos ‘onra Jehova cu nos cosnan balioso.’

[Kuadro na página 28, 29]

Maneranan den Cua Algun Hende Ta Ofrece Boluntariamente pa Duna Contribucion p’e Trabou Mundial

Hopi hende ta apartá, of ta presupuestá, un montante cu nan ta pone den e cahanan di contribucion marcá: “Contribucion p’e Trabou Mundial dje Sociedad—Mateo 24:14.” Tur luna congregacionnan ta manda e montantenan aki sea p’e sede mundial na Brooklyn, New York, of n’e oficina di sucursal local.

Donacionnan boluntario di placa por ser mandá tambe directamente na e Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, of n’e oficina di Sociedad cu ta sirbi bo pais. Tambe por haci donacion di hoya of otro cos di balor. Un carta breve cu ta declará cu esei ta un regalo incondicional mester compañá e contribucionnan aki.

Areglo di Donacion Condicional

Por duna Sociedad Watch Tower placa via un areglo special den cua, si e dunadó hañ’é den un necesidad personal, lo debolbé e donacion na dje. Pa mas informacion, por fabor, tuma contacto cu e Treasurer’s Office na e adres mencioná ariba.

Dunamentu Planeá

Ademas di regalonan directo di placa i donacionnan condicional di placa, tin otro métodonan di duna na beneficio dje sirbishi di Reino mundialmente. Esakinan ta incluí:

Seguro: Por nombra Sociedad Watch Tower como beneficiario di un pólisa di seguro di bida of plan di penshon of hubilacion. Mester informá Sociedad di cualkier areglo asina.

Cuentanan di Banco: Por duna Sociedad Watch Tower derecho di usa durante cu e dunadó ta na bida of cobra despues di morto cuentanan di banco, certificadonan di depósito of cuentanan personal di hubilacion, segun rekisitonan bancario local. Mester informá Sociedad di cualkier areglo asina.

Accion i Bono: Por haci donacion di accion i bono na Sociedad Watch Tower sea como un regalo incondicional of segun un areglo den cua e dunadó ta sigui ricibí dividendo of interes.

Propiedad: Por haci donacion na Sociedad Watch Tower di propiedad cu por ser bendí, sea como regalo incondicional of bou dje condicion cu e dunadó por sigui biba den dje te na su morto. Mester tuma contacto cu Sociedad promé cu traha e acta pa traspasá cualkier propiedad na Sociedad.

Testament i ‘Trust’: Por nombra Sociedad Watch Tower den un testament legal como heredero di propiedad of placa, of por nombra Sociedad como beneficiario di un areglo di ‘trust.’ Un ‘trust’ cu ta beneficiá un organisacion religioso por duna cierto bentahanan fiscal. Un copia dje testament of areglo di ‘trust’ mester ser mandá pa Sociedad.

Manera e término “dunamentu planeá” ta implicá, e tipo di donacionnan aki típicamente ta rekerí pa e dunadó planea. Pa yuda personanan cu ta deseá di haci donacion na Sociedad via un forma di dunamentu planeá, Sociedad a prepará un foyeto na ingles titulá Planned Giving to Benefit Kingdom Service Worldwide (Dunamentu Planeá p’e Adelanto di Sirbishi di Reino Mundialmente). E foyeto a ser skirbí como reaccion riba e hopi preguntanan cu Sociedad a ricibí relacioná cu regalo, testament i ‘trust.’ Tambe e ta contené informacion adicional útil riba asuntunan relacioná cu propiedad, finansa i belasting, i ta diseñá pa yuda personanan na Merca cu ta deseá di adelantá interesnan di Reino rond mundu pa scoge e métodonan mas bentahoso i eficas pa haci esei tumando nan circunstancianan familiar i personal na consideracion. Dor di lesa e foyeto i consultá cu esnan cu ta traha cu e Planned Giving Desk, hopi persona por a yuda Sociedad i a la bes probechá mas tantu posibel dje bentahanan fiscal relacioná cu esei. E foyeto ta disponibel riba peticion, sea por escrito of via telefon.

Esnan cu ta interesá den un dje areglonan aki di dunamentu planeá mester tuma contacto cu Planned Giving Desk, Watch Tower Bible and Tract Society of Pennsylvania, 100 Watchtower Drive, Patterson, New York, 12563-9204, telefon (914) 878-7000, of nan mester tuma contacto cu e oficina di Sociedad cu ta sirbi nan pais.