Pakico Duna na Jehova?
SEGUN cu solo tabata kima riba e pueblito sidonio di Sarepta, un biuda tabata bùk pa piki pidanan di palu. E tabatin cu traha un candela di manera cu e por a cushiná un tiki cuminda—probablemente e último cuminda cu e i su yu chikitu lo a come. El a lucha pa mantené su mes i su yu homber na bida atrabes di un periodo largu di secura i scarcedad di cuminda, i a terminá den e situacion lamentabel aki. Nan tabata muriendo di hamber.
Un homber a yega cerca. Su nomber tabata Elías, i e biuda pronto a mira cu e tabata un profeta di Jehova. Ta parce cu e biuda a tende dje Dios aki. Jehova tabata distinto di Baal, kende su adoracion cruel i perverso tabata prevalecé den su tera di Sidon. Pues ora Elías a pidié un poco awa pa bebe, e tabata ansioso pa yuda. Kisas el a pensa cu haciendo esei lo e gana fabor cerca Jehova. (Mateo 10:41, 42) Pero despues Elías a pidi mas cos—un poco cuminda. E biuda a splica cu e tabatin solamente suficiente ingrediente pa un último cuminda. Sin embargo, Elías a persistí, sigurand’e cu Jehova lo a percurá alimento milagrosamente p’e te ora cu e secura a pasa. Kico e biuda a haci? Bijbel ta bisa: “Di manera cu el a bai i a haci segun e palabra di Elías.” (1 Reynan 17:10-15) E palabranan simpel aki ta describí un acto di gran fe—de facto, un fe asina grandi, cu Jesucristo a eliogá e biuda ei casi mil aña despues!—Lucas 4:25, 26.
Asina mes, por parce straño cu Jehova lo a pidi asina tantu for di un muher cu tabatin asina tiki. Esaki ta particularmente e caso ora nos considerá un oracion cu un homber masha prominente a yega di haci un biaha. E colecta di contribucion cu Rey David a haci pa su yu Sálomon usa den construccion dje tempel a impulsá otronan pa duna hopi. Segun balornan moderno, e regalonan cu a ser contribuí tabata bal miles di miyones di florin! Sin embargo, David a bisa den oracion na Jehova: “Ken ami ta i ken mi pueblo ta, pa nos retené e poder di haci ofrendanan boluntario manera esaki? Pasobra tur cos ta bini di bo, i for di bo mes man nos a duná bo.” (1 Crónicanan 29:14) Manera David a bisa, tur cos ta pertenecé na Jehova. Pues ki ora cu nos duna pa promové adoracion puru, nos simplemente ta dunando na Jehova loke ta di dje caba. (Salmo 50:10) P’esei, e pregunta ta lanta, Pakico Jehova kier pa nos duna mes anto?
Un Parti Vital di Adoracion Berdadero
E contesta mas senciyo ta cu for di un comienso Jehova a haci dunamentu un parti vital di adoracion puru. E fiel homber Abel a sacrificá algun di su precioso bestia di crio na Jehova. E patriarcanan Noe, Abraham, Isaac, Jacob i Job a haci ofrendanan similar.—Génesis 4:4; 8:20; 12:7; 26:25; 31:54; Job 1:5.
E Ley di Moises a manda i asta a regulá e dunamentu di contribucionnan na Jehova. Por ehempel, a manda tur israelita pa duna diesmo, esta un décimo parti di loke e tera producí i dje aumento den nan bestianan di crio. (Númeronan 18:25-28) Otro contribucionnan no tabata asina estrictamente regulá. Por ehempel, a ser rekerí di cada israelita pa duna Jehova e promé frutanan di su bestianan di crio i cosecha. (Exodo 22:29, 30; 23:19) Sin embargo, e Ley a laga na cada individuo pa determiná cuantu di su promé frutanan lo e duna, tanten cu el a duna lo mihó. E Ley a percurá tambe pa ofrendanan di gradicimentu i di voto, cuanan tabata completamente boluntario. (Levítico 7:15, 16) Jehova a animá su pueblo pa duna den e mésun proporcion cu el a bendicioná nan. (Deuteronomio 16:17) Mescos cu tabata e caso cu e construccion dje tabernáculo i despues dje tempel, cada persona a duna loke su curason a impuls’é pa duna. (Exodo 35:21; 1 Crónicanan 29:9) Siguramente tal contribucionnan boluntario tabata sumamente agradabel pa Jehova!
Bou di “e ley di Cristo,” tur dunamentu lo mester tabata boluntario. (Galationan 6:2; 2 Corintionan 9:7) Esei no a nificá cu siguidornan di Cristo a stop di duna of cu nan a duna ménos. Al contrario! Segun cu Jesus i su apostelnan tabata predicá den Israel, un grupo di hende muher a sigui nan i tabata sirbi nan for di nan propio pertenencianan. (Lucas 8:1-3) Apostel Pablo di igual manera a ricibí donacionnan cu a sostené su trabou di misionero, i na su turno el a animá algun congregacion pa duna placa na otro hende den casonan di necesidad. (2 Corintionan 8:14; Filipensenan 1:3-5) E cuerpo gobernante na Jerusalem a asigná hombernan responsabel pa haci sigur cu e recursonan cu a ser contribuí a ser distribuí na esnan den necesidad. (Echonan 6:2-4) Claramente, e cristiannan di promé a mir’é como un privilegio pa sostené adoracion puru den maneranan asina.
No obstante, nos por puntra nos mes pakico Jehova ta haci dunamentu parti di su adoracion. Considerá cuater motibu.
Pakico Nos Ta Duna
Na promé lugá, Jehova ta haci dunamentu parti di adoracion berdadero pasobra dunamentu ta bon pa nos. E ta enfatisá nos aprecio pa Dios su bondad. Por ehempel, si un mucha cumpra of traha un regalo pa un mayor, pakico e mayor ta briya di alegria? E regalo ta satisfacé un necesidad urgente cu e mayor lo no por a satisfacé di otro manera? Probablemente cu no. Mas bien, e mayor ta contentu di mira e mucha desaroyá un spiritu apreciativo i generoso. Pa motibunan similar Jehova ta animá nos pa duna i ta keda contentu ora nos hacié. Esaki ta e manera cu nos ta mustr’é cu nos realmente ta apreciá tur su bondad sin límite i su generosidad pa cu nos. E ta e dunador di “tur bon regalo i tur don perfecto,” di manera cu nunca nos lo falta motibunan pa gradicié. (Santiago 1:17) Riba tur cos, Jehova a duna su propio Yu stimá, permitiend’e muri di manera cu nos lo por biba pa semper. (Juan 3:16) Hamas nos lo por caba di gradicié?
Na di dos lugá, si nos haci dunamentu un custumber, e ora ei nos ta siña imitá Jehova i su Yu, Jesucristo, den un aspecto sumamente importante. Jehova ta duna consistentemente i ta constantemente generoso. Manera Bijbel ta bisa, e ta otorgá nos “bida i rosea i tur cos.” (Echonan 17:25) Apropiadamente nos por gradicié pa cada rosea cu nos hala, pa cada hap di cuminda cu nos disfrutá di dje, pa cada momento felis i satisfaciente den bida. (Echonan 14:17) Jesus, mescos cu su Tata, a demostrá un spiritu di duna. El a duna di su mes liberalmente. Bo tabata sa cu ora Jesus a efectuá milagernan, el a haci esei a costo di su mes? Mas cu un biaha e Scritura ta bisa nos cu ora el a cura hende enfermo, poder ‘a sali for di dje.’ (Lucas 6:19; 8:45, 46) Jesus tabata asina generoso cu asta el a drama su propio alma, su bida, te na morto mes.—Isaías 53:12.
Pues ora nos ta duna, sea di nos tempu, nos energia of nos posesionnan, nos ta imitá Jehova i ta haci su curason alegrá. (Proverbionan 27:11; Efesionan 5:1) Nos ta sigui tambe e patronchi perfecto pa conducta humano cu a ser lagá pa nos mediante Jesucristo.—1 Pedro 2:21.
Na di tres lugá, dunamentu ta cumpli cu necesidadnan real i importante. Ta cierto cu Jehova fácilmente por yena e necesidadnan di interes di Reino sin nos yudansa, mescos cu lo e por haci areglo pa e piedranan sclama en bes di usa nos pa predicá e palabra. (Lucas 19:40) Pero el a scoge pa onra nos cu e privilegionan aki. Pues ora nos ta duna di nos recursonan pa promové interesnan di Reino, nos tin e gran satisfaccion di sa cu nos ta hungando un parti real den e trabou di mas importante cu ta tumando lugá den e mundu aki.—Mateo 24:14.
No ta di papia mes cu placa ta necesario pa financiá e trabou mundial di Testigonan di Jehova. Durante e aña di sirbishi di 1995, e Sociedad a gasta casi 60 miyon dollar mericano solamente na percurá pa pioneronan special, misioneronan i superintendentenan biahero den nan asignacion di sirbishi di veld. Sin embargo, esei ta un gastu relativamente chikitu compará cu e construccion i operacion di oficinanan di sucursal i facilidadnan di imprenta rond mundu. Sin embargo, tur esei ta ser hací posibel mediante contribucionnan boluntario!
Jehova su pueblo generalmente no ta asumí cu si nan mes no ta bon pará, nan simplemente ta laga otronan hiba e carga. Un actitud asina lo por pone nos perde chens di participá den e aspecto aki di nos adoracion. Segun apostel Pablo, e cristiannan na Macedonia tabata sufriendo di “profundo pobresa.” Tog nan a roga pa haña e privilegio di duna. I loke nan a duna, Pablo a testificá, tabata “mas ayá di loke nan berdaderamente por a haci”!—2 Corintionan 8:1-4.
Na di cuater lugá, Jehova a haci dunamentu un parti di adoracion berdadero pasobra dunamentu lo yuda nos pa ta felis. Jesus mes a bisa: “Tin mas felicidad den duna cu tin den ricibí.” (Echonan 20:35) Asina Jehova a diseñá nos. Esei ta un motibu mas pakico nos por sinti cu sin importá cuantu nos ta duna na dje, nunca nos lo no por igualá e aprecio cu nos ta sinti p’e den nos curason. Sin embargo, felismente Jehova no ta spera di nos mas di loke nos por duna. Nos por tin confiansa cu e ta keda contentu ora nos gososamente ta duna loke nos por!—2 Corintionan 8:12; 9:7.
Demostrando un Spiritu di Duna Ta Resultá den Bendicionnan
Bolbiendo na nos ehempel anterior, imaginá bo si e biuda di Sarepta a razoná cu un otro hende por a percurá pa Elías su necesidad di un cuminda. Ki un bendicion e biuda lo a perde e ora ei!
No tin ningun duda cu Jehova ta bendicioná esnan cu ta demostrá un spiritu di duna. (Proverbionan 11:25) E biuda di Sarepta no tabatin nodi sufri dor di entregá loke el a pensa tabata su último cuminda. Jehova a recompens’é cu un milager. Manera Elías a primintí, su pochinan di hariña i di zeta no a caba te ora cu e secura a terminá. Pero el a ricibí un recompensa asta mas grandi. Ora su yu homber a bira malu i a muri, Elías, e homber dje Dios berdadero, a restor’é na bida bek p’e biuda. Con esei lo mester a edifik’é spiritualmente!—1 Reynan 17:16-24.
Awe nos no ta spera di ser bendicioná cu milagernan. (1 Corintionan 13:8) Pero sí Jehova ta sigurá nos cu lo e sostené esnan cu ta sirbié di henter alma. (Mateo 6:33) Pues nos por ta manera e biuda di Sarepta den e aspecto ei, dunando generosamente, cu confiansa cu Jehova lo percurá pa nos. Di igual manera, nos por disfrutá di gran recompensanan spiritual. Si nos dunamentu ta parti di un rutina regular, en bes di un asuntu sporádico i impulsivo, esei lo yuda nos mantené nos wowo simpel i enfocá riba interesnan di Reino, manera Jesus a recomendá. (Lucas 11:34; compará cu 1 Corintionan 16:1, 2.) Tambe esei lo yuda nos sinti nos mas cerca di Jehova i Jesus como nan colaboradornan. (1 Corintionan 3:9) I esei lo profundisá e spiritu generoso i dunador cu ya caba ta marca e adoradornan di Jehova mundialmente.
[Kuadro na página 31]
MANERANAN DEN CUA ALGUN HENDE TA SCOGE PA DUNA
CONTRIBUCION P’E Trabou Mundial
Hopi hende ta apartá of ta presupuestá un montante cu nan ta pone den e cahanan di contribucion marcá: “Contribucion p’e Trabou Mundial dje Sociedad—Mateo 24:14.” Tur luna congregacionnan ta manda e montantenan aki sea p’e sede mundial na Brooklyn, New York, of n’e oficina di sucursal local.
Donacionnan boluntario di placa por ser mandá tambe directamente na e Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, of n’e oficina di Sociedad cu ta sirbi bo pais. Tambe por haci donacion di hoya of otro cos di balor. Un carta breve cu ta declará cu esei ta un regalo incondicional mester compañá e contribucionnan aki.
AREGLO DI DONACION CONDICIONAL
Por duna placa pa Sociedad Watch Tower warda cu e derecho di us’é i keda cuné despues di morto dje dunador, cu e stipulacion di cu den caso di necesidad personal, lo e ser debolbé n’e dunador. Pa mas informacion, por fabor, tuma contacto cu e Treasurer’s Office na e adres mencioná ariba.
DUNAMENTU PLANEÁ
Ademas di regalonan directo di placa i donacionnan condicional di placa, tin otro métodonan di duna na beneficio dje sirbishi di Reino mundialmente. Esakinan ta incluí:
Seguro: Por nombra Sociedad Watch Tower como beneficiario di un pólisa di seguro di bida of plan di penshon of hubilacion. Mester informá Sociedad di cualkier areglo asina.
Cuentanan di Banco: Por duna Sociedad Watch Tower derecho di usa durante cu e dunador ta na bida of cobra despues di morto cuentanan di banco, certificadonan di depósito of cuentanan personal di hubilacion, segun rekisitonan bancario local. Mester informá Sociedad di cualkier areglo asina.
Accion i Bono: Por haci donacion di accion i bono na Sociedad Watch Tower sea como un regalo incondicional of segun un areglo den cua e dunador ta sigui ricibí e dividendo of interes.
Propiedad: Por haci donacion na Sociedad Watch Tower di propiedad cu por ser bendí, sea como regalo incondicional of bou dje condicion cu e dunador por sigui biba den dje te na su morto. Mester tuma contacto cu Sociedad promé cu regalá cualkier propiedad na Sociedad.
Testament i ‘Trust’: Por nombra Sociedad Watch Tower den un testament legal como heredero di propiedad of placa, of por nombra Sociedad como beneficiario di un areglo di ‘trust.’ Un ‘trust’ cu ta beneficiá un organisacion religioso por duna cierto bentahanan fiscal. Un copia dje testament of areglo di ‘trust’ mester ser mandá pa Sociedad.
Esnan interesá den cualkier un dje areglonan aki di dunamentu planeá mester tuma contacto cu Planned Giving Desk n’e adres mencioná aki bou of n’e oficina di Sociedad cu ta sirbi bo pais. Planned Giving Desk lo mester ricibí un copia di documentonan relevante cu ta pertenecé na cualkier un dje areglonan aki.
Sociedad a prepará un foyeto na ingles titulá Planned Giving [Dunamentu Planeá]. Esnan na Merca cu ta planeando pa duna un regalo special na Sociedad awor of pa laga un herencia ora nan muri mediante un testament por haña e informacion aki útil. Esei ta specialmente e caso si nan ta deseá na logra algun meta como famia of kier planea kico pa haci cu nan propiedad miéntras nan ta usa beneficionan fiscal pa minimisá e gastu dje regalo of testament. E foyeto ta disponibel riba peticion, sea por escrito of via telefon.
PLANNED GIVING DESK
Watch Tower Bible and Tract Society of Pennsylvania
100 Watchtower Drive, Patterson, New York 12563-9204, Merca
Telefon: (914) 878-7000