“Di Unda e Placa Ta Bini?”

ESNAN cu ta mira e video dje Sociedad Watch Tower “Los testigos de Jehová... la organización tras el nombre” ta keda impresioná. Nan ta mira homber i muhernan saludabel di vários rasa i antecedente, cu un sonrisa i trahando huntu den armonia. No solamente e miles di trahadornan contentu ta capta nan atencion, sino tambe e compleho grandi di edificio n’e sede dje Sociedad na Brooklyn i na nan haciendanan na Wallkill, New York. E video ta mustra cu den e edificionan aki bo por haña tecnologia modernísimo—ekipo di imprenta i di ‘bind in’ buki di alta velocidad cu ta producí hopi miyones di publicacionnan tur luna, un gran variedad di ekipo di computer, i un gran cantidad di departamento di cua nan funcion ta pa sostené e publicacion di literatura.

Esaki ta reflehá un gastu tremendo di recursonan. P’esei algun ta puntra, “Di unda e placa ta bini?”

Bishitantenan n’e sede mundial dje Sociedad ta keda impresioná di igual manera. Nan ta rek nan garganta pa mira e edificio nobo di residencia di 30 piso, un dje hopi edificionan cu ta ser usá pa acomodá e mas cu 3.000 ministernan boluntario cu ta traha ei. Un bishita n’e Centro Educacional nobo di Watchtower mas of ménos 110 kilometer nort di Brooklyn tambe ta laga hopi hende keda babucá. Siendo den construccion ainda, e ta acomodá den careda di 1.200 trahador. Dos klas di misionero lo ser entrená ei tur aña i mandá den exterior na nan asignacionnan. Ta for dje sitio aki tambe e mas cu 10.000 congregacion di Testigonan di Jehova na Merca ta ser dirigí. Hopi sucursal rond mundu tambe recientemente a amplia nan facilidadnan of ta den e proceso di haci esei. Pa efectuá tur e actividadnan aki ta rekerí un gran cantidad di placa. Hende ta puntra, “Di unda e placa ta bini?”

E contesta ta cu e ta bini di individuonan comun mescos cu cualkier un di nos. Nan ta personanan di tur parti di mundu cu ta deseá na haci tur loke nan por pa promové e obra cristian vital di predicá i siña. Un spiritu boluntario asina no ta sin precedente.

E Ehempel cu Israel Antiguo A Pone

Mas cu 3.500 aña pasá, un necesidad pa contribucionnan generoso a lanta. Jehova a instruí Moises pa laga construí un tabernáculo, of “tent di reunion,” pa ser usá den Su adoracion. E diseño duná divinamente a exigí un variedad di artículo precioso. Jehova a manda: “For di entre boso mes tuma un contribucion pa Jehova. Laga tur persona di curason dispuesto trec’é como Jehova su contribucion.” (Exodo 35:4-9) Con e pueblo a reaccioná? E relato ta bisa nos cu “nan a bini, tur kende su curason a impuls’é, i nan a trece, tur kende su spiritu a incit’é, Jehova su contribucion p’e trabou dje tent di reunion i pa tur su sirbishi i pa e prendanan santu di bisti.” E “ofrenda boluntario” aki gradualmente a bira asina grandi cu e tabata ‘muchu mas di loke tabata necesario p’e trabou cu Jehova a manda pa ser hací.’ (Exodo 35:21-29; 36:3-5) Ki un spiritu inegoista i generoso e pueblo a manifestá!

Ménos cu 500 aña despues, un yamada a bolbe sali pa un contribucion generoso for dje israelitanan. Rey David su deseo pa construí un cas permanente pa Jehova den Jerusalem tabata cerca di ser realisá mediante su yu Sálomon. David mes a colectá i a contribuí un parti grandi di loke lo tabata necesario. Otronan a tuma parti ora David a emití e yamada pa trece “un regalo pa Jehova.” E resultado? “E pueblo a entregá na alegria over di nan hacimentu di ofrendanan boluntario, pasobra tabata cu un curason completo cu nan a haci ofrenda boluntario na Jehova; i asta David e rey mes a alegrá cu gran goso.” (1 Crónicanan 22:14; 29:3-9) E plata i oro so tabata bal rond di US$ 50 mil miyon na balor actual!—2 Crónicanan 5:1.

Nos ta ripará for dje ehempelnan aki cu ningun hende a ser forsá pa duna. E tabata estrictamente “boluntario” i duná “cu un curason completo.” Jehova lo tabata contentu cu solamente un contribucion di henter curason. Di igual manera, ora e oportunidad a presentá pa contribuí cu placa pa yuda cristiannan den necesidad, apostel Pablo a skirbi cu e no mester tabata “manera algu rancá cu forsa.” El a agregá: “Laga cada un haci net manera el a determiná den su curason, no di mala gana ni bou di obligacion, pasobra Dios ta stima un dunador alegre.”—2 Corintionan 9:5, 7.

E Necesidad Awe

Tin un necesidad pa contribucion awe? Sí, tin, i lo tin asta mas ainda segun cu tempu ta pasa. Pakico?

Cristiannan a ricibí instruccionnan specífico p’e tempu di fin aki. Jesus a manda su disipelnan: “Bai, pues, i haci disipel di hende di tur nacion, bautisando nan den e nomber dje Tata i dje Yu i dje spiritu santu, siñando nan pa warda tur loke mi a manda boso.”—Mateo 28:19, 20.

Pa cumpli cu e gran trabou aki di siña i predicá segun cu nos ta yega cada bes mas cerca dje final di “e conclusion dje sistema di cosnan,” bastante tempu i recurso ta necesario. Pakico? Pa motibu di tur loke ta enbolbí den hiba e mensahe dje Reino di Dios “n’e parti mas lehano dje tera.” (Echonan 1:8) Mayoria hende no ta bon versá den e Scritura, mescos cu e hudiunan dje promé siglo. Realmente, un gran cantidad di habitante dje tera ni sikiera conocé e Bijbel ni no ta consider’é como e Palabra di Dios. Predicadornan mester ser entrená i mandá na teranan lehano. (Romanonan 10:13-15) I pensa dje cantidad di idiomanan enbolbí! Hende cu ta ser alcansá cu e predicacion mester haña Bijbel i publicacionnan basá riba Bijbel pa lesa i studia den nan propio idioma. Pa alcansá tur persona sistemáticamente i trece nan progresivamente na madures spiritual di manera cu nan por yuda otronan tambe ta rekerí organisacion riba un escala grandi.—2 Timoteo 2:2.

Jesus a bisa cu e “bon nobo dje reino” mester ‘ser predicá promé den tur e tera habitá como testimonio pa tur nacion; i e ora ei e fin lo yega.’ (Mateo 24:14) Pues awor ta e tempu pa dedicá tur loke nos por pa cumpli cu e trabou vital ei. No tin un mihó manera pa usa nos recursonan promé cu rikesa material perde tur balor práctico.—Ezekiel 7:19; Lucas 16:9.

Unda e Placa Ta Bai?

E Sociedad Watch Tower ta publicá literatura bíblico den mas cu 230 idioma, i tambe den ‘braille’ pa hende ciegu i video den idioma di seña pa hende surdu. Esei ta rekerí timnan di traductor i coregidor di fout den cada idioma. Ta asombroso pa bo djis pensa so caba riba hacimentu di tur e trabou aki, specialmente p’e revista Toren di Vigilancia, cua ta ser publicá tur luna den 121 idioma i simultáneamente den 101 di nan. Sin embargo, e ta necesario pa asina hende rond mundu por tin i lesa e mésun informacion. Tur aña tin aumento den e gastu di papel i otro materialnan cu ta ser usá pa producí e mensahe di Reino den forma imprimí of grabacion di audio of di video. E gastunan ei mester ser cubrí usando donacion dje rumannan.

E trabou di predicacion i siñamentu ta ser efectuá den teritorionan cubrí pa mas cu 75.000 congregacion di Testigonan di Jehova rond mundu. Pa unificá i animá nan, superintendentenan biahero entrená ta bishitá cada congregacion rond di dos biaha pa aña. Asambleanan tambe ta hunga un papel vital den impartí instruccion. Mester huur localidadnan grandi p’e congresonan, cuanan ta asina fortalecedor di fe. Boso contribucionnan ta ser usá tambe p’e propósitonan aki.

Miéntras asambleanan generalmente ta ser tené solamente tres bes pa aña, congregacionnan local ta bini huntu pa cincu reunion semanal. (Compará cu Exodo 34:23, 24.) E drentamentu di esnan nobo cu ta respondé n’e bon nobo a nificá cu tur aña miles di congregacion nobo ta ser formá. Cu e yudansa di miyones di dollar na fiansa canalisá via e Sociedad, cientos di Salon di Reino nobo ta ser construí tur aña, i hopi otronan ta ser renobá i ampliá. Aunke esaki ta un fondo rotativo cu ta ser usá bes tras bes, e demanda ta sigui aumentá.

Un área caminda tabatin crecementu sin precedente ta den e nacionnan den Oost Europa cu tabata cai bou di ex-Union Soviético. Ki gososo tabata e noticianan progresivo cu e trabou a habri den e lugánan aki! Awor misioneronan ta ser mandá na hopi dje paisnan aki. Sucursalnan nobo a ser establecí den algun pais, aumentando e cantidad di ministernan boluntario cu ta forma e personal dje famia mundial di Betel na mas cu 15.000. Naturalmente, edificionan di sucursal pa acomodá nan mester ser cumprá of construí. Boso contribucionnan ta yuda yena e necesidad.

Tur e trabou aki no a pasa e atencion di Satanas i su demoñonan forbij. Nan ta haci tur loke nan por pa frustra e esfuersonan di Jehova su fiel sirbidornan of forma problema pa nan. (Revelacion 12:17) Esaki ta nificá un cantidad aumentante di batayanan legal pa protehá e derechonan dje pueblo di Dios pa predicá i biba na armonia cu su leynan hustu. Ademas, e destruccionnan di guera den e sistema di cosnan di Satanas, i tambe desasternan natural, ta nificá cu suministronan di auxilio hopi biaha ta necesario pa nos rumannan afligí i otronan huntu cu nan. Boso contribucionnan ta yuda suministrá e yudansa vital aki.

Jehova Lo Recompensá Boso

Usando nos tempu i recursonan generosamente pa promové e trabou di Señor ta trece bendicionnan grandi. Con asina? Pasobra Dios, na ken finalmente tur cos ta pertenecé, lo recompensá nos. Proverbionan 11:25 ta declará: “E alma generoso mes lo ser hací gordo, i esun cu ta muha otronan libremente, e mes tambe lo ser muhá libremente.” Jehova en berdad ta contentu ora nos ta haci nos parti pa promové su adoracion. (Hebreonan 13:15, 16) El a primintí e israelitanan di antigwedad cu lo a trece e contribucionnan rekerí bou dje pacto di Ley: “ ‘Probá mi, por fabor, en cuanto esaki,’ Jehova di ehércitonan a bisa, ‘pa mira si lo mi no habri pa boso e portanan di cielu i realmente basha un bendicion riba boso te ora no tin mesté mas.’ ” (Malakías 3:10) E prosperidad spiritual cu Jehova su sirbidornan ta disfrutá di dje awe ta evidencia di cu Dios ta cumpli cu su promesa.

E gran trabou aki di declará na tur pueblo e dia di salbacion i di yuda esnan di curason onesto riba e caminda pa bida lo no sigui pa semper. (Mateo 7:14; 2 Corintionan 6:2) Pero tur esnan dje “otro carnénan” di Señor mester ser reuní. (Juan 10:16) Ki imperativo ta pa cumpli cu e desafio ei awe! I ki felis cada un di nos lo ta, pa den e mundu nobo ei di husticia mira atras, i bisa, ‘Mi tabatin un participacion completo den e trabou di recogimentu final ei’!—2 Pedro 3:13.

[Kuadro na página 30]

Con Algun Hende Ta Haci Donacion p’e Trabou di Predicacion di Reino

CONTRIBUCION P’E TRABOU MUNDIAL: Hopi hende ta apartá of ta presupuestá un montante cu nan ta pone den e cahanan di contribucion marcá: “Contribucion p’e Trabou Mundial dje Sociedad—Mateo 24:14.” Tur luna e congregacion ta manda e montantenan aki sea p’e sede mundial na Brooklyn, New York, of n’e oficina di sucursal mas cerca.

REGALO: Donacionnan boluntario di placa por ser mandá directamente na Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, of n’e oficina dje Sociedad cu ta sirbi bo pais. Tambe por haci donacion di hoya of otro cos di balor. Un carta breve cu ta declará cu esei ta un regalo incondicional mester compañá e contribucionnan aki.

AREGLO DI DONACION CONDICIONAL: Por duna placa pa Watch Tower Society warda cu e derecho di us’é i keda cuné despues di morto dje dunador, cu e stipulacion di cu den caso di necesidad personal, lo e ser debolbé n’e dunador.

SEGURO: E Sociedad Watch Tower por ser nombrá como beneficiario di un pólisa di seguro di bida of plan di penshon of hubilacion. Mester informá e Sociedad di cualkier areglo asina.

CUENTA DI BANCO: Por duna e Sociedad Watch Tower derecho di usa durante cu e dunador ta na bida of cobra despues di morto cuentanan di banco, certificadonan di depósito of cuentanan personal di hubilacion, segun rekisitonan bancario local. Mester informá e Sociedad di cualkier areglo asina.

ACCION I BONO: Por haci donacion di accion i bono n’e Sociedad Watch Tower sea como un regalo incondicional of segun un areglo den cua e dunador ta sigui ricibí e dividendo of interes.

PROPIEDAD: Por haci donacion n’e Sociedad Watch Tower di propiedad cu por ser bendí, sea como regalo incondicional of bou dje condicion cu e dunador por sigui biba den dje te na su morto. Mester tuma contacto cu e Sociedad promé cu regalá cualkier propiedad n’e Sociedad.

TESTAMENT I ‘TRUST’: Por nombra Watch Tower Bible and Tract Society of Pennsylvania den un testament legal como heredero di propiedad of placa, of bo por nombra e Sociedad como beneficiario di un areglo di ‘trust.’ Un ‘trust’ cu ta beneficiá un organisacion religioso por duna cierto bentahanan fiscal. Un copia dje testament of areglo di ‘trust’ mester ser mandá p’e Sociedad.

DUNAMENTU PLANEA: E Sociedad a prepará un foyeto na ingles titulá “Planned Giving” [Dunamentu Planeá]. Esnan na Merca cu ta planeando pa duna un regalo special n’e Sociedad awor of pa laga bienes ora nan muri mediante un testament por haña e informacion aki probechoso. Esei ta specialmente e caso si nan ta deseá na logra algun meta di famia of kier planea kico pa haci cu nan propiedad miéntras nan ta usa beneficionan fiscal pa minimisá e gastu dje regalo of testament.

Pa mas informacion relacioná cu cualkier dje asuntunan aki riba, skirbi Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, of na e oficina di sucursal dje Sociedad cu ta sirbi bo pais.