Congreso di Districto di Testigonan di Jehova “Alabadornan Gososo”
Tres dia recompensador di instruccion bíblico ta warda bo. Cu 180 congreso programá na Merca so, probablemente un congreso lo ser tené cerca banda di bo cas. Soru pa bo t’ei ora e programa cuminsá cu música pa 9:40 a.m. riba diabierne.
E programa di diabierne mainta lo presentá comentarionan di bon biní i tambe e discurso clave, “Apartá Como Alabadornan Gososo Mundialmente.” Parti merdia e programa lo enfocá riba hóbennan, mayornan i educacion. “Mi Ta Prepará pa Casa?” ta un discurso cu esnan cu ta hóben lo no kier perde. Mayornan mester scucha cuidadosamente n’e tema “Mayornan cu Ta Haña Placer den Nan Yunan.” E programa despues di merdia lo concluí cu e discurso “Educacion—Us’é pa Alabá Jehova.” Loke ser considerá lo mester yuda hóbennan progresá bon na scol.
E programa di diasabra mainta lo duna atencion special na bautismo, i oportunidad lo ser duná pa esnan cu ta cualificá ser bautisá. Parti merdia lo tin un consideracion franco di con Satanas for di un cuminsamentu a usa deseo sexual pa coge hende den trampa. Tambe lo tin un discurso poderoso “Evitá e Trampanan dje Diabel.” E programa dje dia lo concluí cu e discurso importante “Pakico Humanidad Mester dje Conocimentu di Dios.”
Diadomingo mainta, e simposio titulá “Alabadornan Gososo Durante e Conclusion dje Sistema di Cosnan Aki” lo enfocá atencion riba e sucesonan cu lo sagudí mundu i cu pronto lo confrontá nos. Lo e enfatisá e urgencia di hui na siguridad promé cu e cuminsamentu dje “tribulacion grandi” cu Jesucristo a papia di dje, manera tin skirbí na Mateo 24:21.
E programa di diadomingo mainta lo concluí cu e importante drama “Onrando Esnan Digno den Nan Añanan di Behes.” Despues, parti merdia, lo duna e discurso público, “Alabá e Rey di Eternidad!” Lo e ta un rasgo principal dje congreso.
Traha plan awor pa asistí. Pa haña e sitio mas cerca bo cas, tuma contacto cu e Salon di Reino local di Testigonan di Jehova, of skirbi e publicadornan dje revista aki. E edicion di Spierta! [na ingles] di 8 di juni lo mencioná e adresnan di tur e sitionan di congreso na Cánada, Inglatera, Irlanda i Merca.