Programa Nobo di Asamblea di Circuito

“Tene Masha Presente e Dia di Jehova” ta e tema dje programa di dos dia di asamblea di circuito di september padilanti. (2 Ped. 3:12) E ta diseñá pa stimulá nos sentido di urgencia. Pronto e habitantenan dje tera lo experenciá e huicionan di Jehova. Ken lo sobrebibí e “gran dia di Dios e Todopoderoso”? Solamente esnan cu permanecé spiritualmente lantá i cu establecé un patronchi di bida di “actonan santu di conducta i echonan di debocion piadoso.”—Rev. 16:14; 2 Ped. 3:11.

Bautismo ta esencial pa un persona sobrebibí e dia di Jehova. (1 Ped. 3:21) Publicadónan cu ta deseá di ser bautisá n’e asamblea mester bisa e superintendente presidente, kende lo haci e areglonan necesario.

Un simposio di cuater parti, “E Clase di Personanan cu Nos Mester Ta,” lo mustra claramente ki accionnan ta enbolbí den tene masha presente e presencia dje dia di Jehova. E discurso público, “Actua Sabiamente Segun cu e Dia di Jehova Ta Acercá,” lo splica kico ta nificá ‘busca Jehova, husticia i suavedad,’ pa por ta un sobrebibiente.—Sof. 2:3.

E asamblea di circuito lo concluí cu dos discurso motivador na encargo dje superintendentenan biahero, titulá: “Bo Bida Ta Drei Rond dje Berdad?” i “Planeando pa Futuro cu e Dia di Jehova na Mente.” E discursonan aki lo impulsá nos pa examiná nos bida i haci cualkier ahuste necesario. Profecia di Bijbel i sucesonan di mundu ta indicá claramente cu e dia di Jehova ta cerca. E programa di asamblea aki lo animá nos pa ‘mantené nos sano huicio i sea vigilante.’ (1 Ped. 5:8) Traha plannan definitivo pa asistí tur dos dia.