Programa Nobo di Asamblea di Circuito

Ki beneficionan práctico bo ta ricibí awor dor di cana cu Jehova? Con bo por resistí e tentacion pa no laga actividadnan no-teocrático tuma e promé lugá cu interesnan di Reino tin den bo bida? (Mat. 6:33) Bo ta haña cu ta difícil pa distinguí loke ta bon for di loke ta malu den un mundu cu ta laga loke ta malu parce bon? (Heb. 5:14) E asamblea di circuito “Beneficiá Awor dor di Cana den Dios Su Camindanan” lo trata cu e asuntunan aki. E programa nobo lo cuminsá for di september 1999.—Sal. 128:1.

Un rasgo nobo riba diasabra dje asamblea di circuito aki lo ta presentacion di un Reunion di Sirbishi modelo. Bo superintendente di circuito lo informá e congregacionnan di loke tin planeá, di manera cu tur ruman por bini prepará pa disfrutá dje programa plenamente.

E parti titulá “Pioneronan—Vigilá Cuidadosamente Con Boso Ta Cana” lo mustra nos con pa ehercé sabiduria i razonabilidad pa por cumpra e tempu oportuno pa e ministerio di pionero. (Efe. 5:15-17) E tema “Tene Cuidou cu Camindanan cu Ta Djis Parce Bon” lo siña nos con pa haci sigur di loke ta aceptabel pa Dios den tur aspecto di bida. E discurso “Con Profecia cu A Cumpli Ta Toca Nos” lo yuda yena nos mente i curason cu un amor p’e Palabra di Dios. E discurso público “Dios Su Camindanan—Esta Beneficioso!” lo enfatisá e beneficionan práctico cu nos ta ricibí awor dor di cumpli cu e rekisitonan hustu di Jehova.

Ta bo deseo pa demostrá públicamente mediante bautismo bou di awa cu bo kier cana den Dios su camindanan como un di su sirbidónan dedicá? Anto papia cu e superintendente presidente p’e por haci e areglonan necesario.

Dicidí for di awor pa no perde e asamblea di circuito oportuno aki. Sea presente pa henter e programa di dos dia, pasobra “felis ta tur cu ta teme Jehova, cu ta cana den su camindanan.”—Sal. 128:1.