Con Bo Ta Reaccioná na Apatia?
1 Apatia ta un falta di sintimentu of emocion, un ausencia di interes of preocupacion. E ta un dje actitudnan mas comun i mas difícil cu nos ta topa den e ministerio. Con bo ta reaccioná na dje? El a poné bo baha bo actividad den e ministerio? Con bo por super’é pa asina alcansá hende cu e mensahe di Reino?
2 Promé, saca afó pakico hende den bo teritorio ta apático. Ta pasobra nan ta desapuntá den nan lidernan político i religioso? Nan ta sinti cu no tin solucion pa e problemanan cu nan ta enfrentá? Nan tin duda den e promesanan di algu mihó? Nan no ta dispuesto pa pensa tocante asuntunan spiritual a ménos cu nan por mira beneficionan palpabel mesora?
3 Resaltá e Speransa di Reino: No tin ningun problema cu e Reino lo no solucioná. P’esei, ora ta posibel, nos mester papia tocante e promesanan di Reino, refiriendo na declaracionnan bíblico clave, asta si no ta posibel of práctico pa mustra un texto di Bijbel. (Heb. 4:12) Sin embargo, con nos por hiba e combersacion n’e promesanan di Reino?
4 Hende tin cu comprendé e propósito di nos bishita. Nan tin cu realisá cu ta debí na amor pa próhimo i interes intenso pa e comunidad cu nos t’ei cerca nan. Nos lo por haci un pregunta bon prepará manera: “Kico bo ta pensa ta e solucion pa [un problema cu ta afectando e comunidad]?” Si un introduccion no ta duna resultado, purba un otro.
5 Den un teritorio di hende bon pará caminda e doñonan di cas tabata indiferente pa cu e mensahe di Reino, publicadónan a haci esfuerso pa haña un introduccion cu lo a lanta interes. Durante un campaña dje buki Conocimentu, un pareha a purba e introduccion aki: “Bo ta kere cu un bon educacion ta importante pa logra éxito den e mundu djawe? Bo ta di acuerdo cu un educacion completo lo mester incluí conocimentu di Bijbel?” Den un atardi nan a laga tres buki, di cua un tabata cu un señora cu despues a bisa cu el a lesa henter e buki Conocimentu i a bai di acuerdo pa un studio di Bijbel.
6 Ora bo topa cu apatia, purba diferente introduccion, haci preguntanan cu ta stimulá pensamentu i haci uso dje poder dje Palabra di Dios. Asina lo bo por yuda otronan aceptá nos maraviyoso speransa di Reino.